Йаһоԝа Хԝәдайе Афукʹар ә

1. Ль гора Ԝаиз 7:20, әм чь һʹалида ньн?

СЬЛЕМАН Пʹадша ӧса готьбу: «Ль сәр рʹуйе әʹрде кәсәки рʹаст тʹӧнәйә кӧ ԛәнщи кьрьбә у тʹӧ щара гӧнә нәкьрьбә» (Ԝаиз 7:20, ИМ). Бь рʹасти жи, әм гьшк гӧнәкʹар ьн (1 Йуһʹәнна 1:8). Ләма жи әм гьшк һʹәԝщә нә, ԝәки һьм жь Хԝәде һьм жи жь мәрьвед дьн бахшандьне бьстиньн.

2. Гава һәваләки мә дьбахшинә мә, әм хԝә ча тʹәхмин дькьн?

² Дьбәкә тә дьле һәваләки хԝә ешандьбу у тә дьхԝәст проблема нав ԝәда сафи буйа. Ләма тә жь ԝи бахшандьн хԝәст. Гава әԝи бахшандә тә, дьле тә рʹьһʹәт бу, ӧса нинә? Бәле, һьнге те бежи барәки гьран жь стуйе тә кʹәт!

3. Ве готареда әме чь шеԝьр кьн?

³ Әм дьхԝазьн ԝәки Йаһоԝа бьбә досте мә, ле йазьх щарна әм бь готьн йан кьред хԝә дьле ԝи дешиньн. Гәло әм жь кʹӧ заньн ԝәки Йаһоԝа һазьр ә бьбахшинә мә? Фьрԛийа ортʹа бахшандьна Йаһоԝа у бахшандьна мәрьва чь йә? Гәло Хԝәде һазьр ә бьбахшинә кʹижан мәрьва?

ЙАҺОԜА ҺАЗЬР Ә БЬБАХШИНӘ

4. Әм жь кʹӧ заньн ԝәки Йаһоԝа һазьр ә бьбахшинә?

⁴ Кʹьтеба Пироз дьбежә кӧ Йаһоԝа һазьр ә бьбахшинә. Гава Йаһоԝа сәр чʹийайе Синайе хԝә Мусарʹа әʹйан кьр, әԝи бь сайа мәләкәки ӧса гот: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо, кӧ бона һʹәзара хԝәйе һʹӧба амьн ә, нәһәԛийе, нәрʹастийе у гӧна дьбахшинә» (Дәркʹәтьн 34:6, 7). Бәле, Йаһоԝа Хԝәдеки дьлгәрм у рʹәʹм ә, йе кӧ тʹьме һазьр ә бьбахшинә ԝан гӧнәкʹара, йед кӧ тʹобә дькьн (Нәһәмийа 9:17; Зәбур 86:15).

5. Ль гора Зәбур 103:13, 14, Йаһоԝа һьндава мә ча нә?

⁵ Йаһоԝа әм әʹфьрандьнә, ләма жи әԝ дәрһәԛа мә һәр тьшти занә. Бьдә һʹәсабе хԝә, ԝәки Әԝ дәрһәԛа һәр мәрьве сәр әʹрде һәр тьшти һур бь һур занә! (Зәбур 139:15-17) Ләма жи Йаһоԝа һʹәму кемасийед кӧ мә жь де у баве хԝә стандийә, дьвинә. Йаһоԝа һәла һе һәр тьште кӧ сәр хәйсәте мә һʹӧкӧм кьрийә жи, занә. Гәло әԝ йәк кӧ Йаһоԝа дәрһәԛа мә һаш һәр тьшти һәйә, ԝи бәрбь чь һелан дькә? Әв йәк ԝи һелан дькә, ԝәки һьндава мәда рʹәʹм бә (Зәбур 78:39; Зәбур 103:13, 14 бьхунә).

6. Йаһоԝа чаԝа избат кьрийә ԝәки әԝ һазьр ә бьбахшинә мә?

⁶ Йаһоԝа избат кьрийә ԝәки әԝ һазьр ә бьбахшинә мә. Әԝ рʹьнд занә кӧ сәва гӧне Адәм, әм гьшк кʹәтьнә бьн ньфьрʹа гӧнә у мьрьне (Рʹомайи 5:12). Ԛәԝата мә нагьһиже, ԝәки әм хԝә йан жи кәсәки дьн жь ве ньфьрʹе хьлаз кьн (Зәбур 49:7-9). Ле Хԝәдайе мәйи дьлшәԝат тьштәк кьрийә, ԝәки әм аза бьн. Чаԝа кӧ Йуһʹәнна 3:16 нишан дькә, Йаһоԝа Кӧрʹе хԝәйи тайе тʹәне шанд, ԝәки әԝ бона мә әʹмьре хԝә бьдә (Мәтта 20:28; Рʹомайи 5:19). Иса Мәсиһ щәзайа мьрьне дәԝса мә станд, ԝәки кәсед кӧ баԝәрийа хԝә ԝи тиньн аза бьн (Ибрани 2:9). Гава Йаһоԝа дит кӧ Кӧрʹе ԝийи дәлал чаԝа беһӧрмәт кьрьн у берʹәʹмти кӧштьн, дьле ԝи гәләк ешийа. Һәгәр Йаһоԝа нәхԝәста бьбахшанда мә, ԛә ԝе изьн бьда ԝәки Кӧрʹе ԝи бьмьрә?

7. Кʹьтеба Пирозда мәсәлед кʹижан мәрьва һәнә, йед кӧ жь Йаһоԝа бахшандьн стандьнә?

⁷ Кʹьтеба Пироз бәʹса гәләк мәрьва дькә, кʹижана кӧ жь Йаһоԝа бахшандьн стандьнә (Әфәси 4:32). Мәсәла Мьнашә Пʹадша бинә бира хԝә. Әԝи гәләк хьраби кьрьбу. Мәсәлә, әԝи пʹут дьһʹәбандьн у һьм жи щьмәʹт бәрбь ве йәке һелан дькьр. Әԝи һәла һе зарʹед хԝә жи пʹутарʹа ԛӧрбан кьрьбу. Сәрда жи, әԝи пʹарьстгәһа Йаһоԝада пʹутәк данибу. Кʹьтеба Пироз дьбежә кӧ Мьнашә пе хьрабийа хԝә һерса Йаһоԝа рʹакьрьбу (2 Дирок 33:2-7). Диса жи, гава Мьнашә жь дьл тʹобә кьр, Йаһоԝа бахшандә ԝи. Йаһоԝа һәла һе изьн жи да ԝи, ԝәки диса бьбә пʹадша (2 Дирок 33:12, 13). Даԝьд Пʹадша жи бинә бира хԝә. Әԝи жи гӧнед гьран кьрьбун. Мәсәлә, Даԝьд бенамуси кьрьбу у мерәк дабу кӧштьне. Диса жи, гава Даԝьд жь дьл гӧнед хԝә ани рʹуйе хԝә, Йаһоԝа бахшандә ԝи (2 Самуйел 12:9, 10, 13, 14). Бәле, әм дькарьн баԝәр бьн, ԝәки Йаһоԝа һазьр ә бьбахшинә мә. У ве готареда әме шеԝьр кьн фьрԛийа ортʹа бахшандьна Йаһоԝа у бахшандьна мәрьва.

БАХШАНДЬНА ЙАҺОԜА МӘХСУС Ә

8. Чьрʹа Йаһоԝа Һʹакьме һәри баш ә?

⁸ Йаһоԝа Һʹакьме «тʹәмамийа дьнйайе» йә (Дәстпебун 18:25). Һʹакьмәки баш гәрәке ԛануна рʹьнд бьзаньбә. Йаһоԝа Ԛанундаре мә йә, ләма әԝ ԛануна һур бь һур занә (Ишайа 33:22). Тʹӧ кәс мина Йаһоԝа ньзанә кӧ чь ԛәнщ ә у чь хьраб ә. Хенщи ве йәке, пешийа кӧ һʹакьм сафикьрьне бькә, әԝ гәрәке бьзаньбә кӧ бь рʹасти чь ԛәԝьмийә. Ԝи алида жи Йаһоԝа Һʹакьме һәри баш ә, чьмки әԝ һаш жь һәр тьшти һәйә.

9. Йаһоԝа сәр чь һʹими дьбахшинә мәрьва?

⁹ Дьнйайеда, гава һʹакьм диԝана кәсәки дькьн, әԝана бь тʹәмами һаш жь дәрәща ԝи тʹӧнә нә. Әԝана тʹәне ль гора тьштед кӧ дьбьһен йан дьвиньн, сафикьрьне дькьн. Ле Йаһоԝа ӧса нинә. Әԝ бь тʹәмами һаш жь һәр тьшти һәйә (Дәстпебун 18:20, 21; Зәбур 90:8). Йаһоԝа рʹьнд занә кӧ сәр рʹабун-рʹуньштьна кәсәки һʹӧкӧм дькьн факторед генетик, тьштед кӧ бьчʹуктайеда һатьнә сәре ԝи, тьштед кӧ дәр-дора ԝи дьԛәԝьмьн у һʹале ԝийи психоложи. Сәрда жи, Йаһоԝа дьле мәрьва жи дьвинә. Әԝ нет, фькьр у хԝәстьнед һәр кәси занә. Тʹӧ тьшт нькарә жь Йаһоԝа бе вәшартьне (Ибрани 4:13). Ләма жи гава Йаһоԝа дьбахшинә кәсәки, мәʹни әԝ ә кӧ әԝ һур бь һур һәр тьшти занә.

10. Әм жь кʹӧ заньн кӧ диԝанед Йаһоԝа һәртʹьм рʹаст у һәԛ ьн? (Ԛануна Дӧщари 32:4)

¹⁰ Диԝанед Йаһоԝа һәртʹьм рʹаст у һәԛ ьн. Әԝ тʹӧ щар фьрԛийе накә ортʹа мәрьва. Йаһоԝа ль гора бәжн-бал, дәԝләмәндти йан фәрәсәтед мәрьва, сафикьрьне накә, һәла бьбахшинә ԝи йан на (1 Самуйел 16:7; Аԛуб 2:1-4). Тʹӧ кәс нькарә зоре Йаһоԝа бькә йан жи рʹӧшәте бьдә ԝи, сәва кӧ әԝ тьштәки бькә (2 Дирок 19:7). Әԝ тʹӧ щара сәр һʹиме емосийед хԝә сафикьрьна накә (Дәркʹәтьн 34:7). Бәле, Йаһоԝа Һʹакьме һәри баш ә, чьмки әԝ дәрһәԛа мә у һʹале мә һәр тьшти занә (Ԛануна Дӧщари 32:4 бьхунә).

11. Бахшандьна Йаһоԝа чьрʹа мәхсус ә?

¹¹ Ньвискʹаред Ньвисаред Ибрани, рʹьнд заньбун ԝәки бахшандьна Йаһоԝа мәхсус ә. Чаԝа кӧ фәрһәнгәкеда те готьне, ԝана хәбәрәкә Ибрани «хут тʹәне ԝи чахи дьданә хәбате, гава хәбәрдан дәрһәԛа бахшандьна жь Хԝәде дьчу», ԝана «әв хәбәр тʹӧ щар нәдьданә хәбате гава хәбәрдан дәрһәԛа бахшандьна жь мәрьва дьчу». Тʹәне Йаһоԝа дькарә бь тʹәмами бьбахшинә ԝан гӧнәкʹара, йед кӧ тʹобә дькьн. Гава Йаһоԝа дьбахшинә мә, әм чь кʹаре дьстиньн?

12-13. (а) Чахе әм жь Йаһоԝа бахшандьне дьстиньн, әм чь сәр хԝә тʹәхмин дькьн? (б) Бахшандьна Йаһоԝа чь щурʹәйи йә?

¹² Гава әм ԛәбул дькьн кӧ Йаһоԝа бахшандийә мә, әʹдьлайи дькʹәвә дьле мә у исафа мә ида мә сущдар накә. Әм тʹәне ԝи чахи хԝә ӧса тʹәхмин дькьн, гава бахшандьна жь Йаһоԝа дьстиньн (Кʹаред Шандийа 3:19). Чахе Йаһоԝа дьбахшинә мә, әԝ һьндава мәда ӧса йә, ча бежи мә ԛә бәр ԝи гӧнә нәкьрьбу у әԝ изьне дьдә ԝәки әм диса бьбьнә достед ԝи.

¹³ Чахе Йаһоԝа дьбахшинә мә, әԝ ви гӧнәйи ида тʹӧ щар надә рʹуйе мә у мә щәза накә (Ишайа 43:25; Йерәмийа 31:34). «Чьԛас рʹоһьлат жь рʹоавайе дуртьр ә», Йаһоԝа гӧнед мә жь мә һаԛас дур дьхәb (Зәбур 103:12). Гава әм тиньн бәр чʹәʹве хԝә кӧ Йаһоԝа чьԛас афукʹар ә, дьле мә бь рʹазибуне тʹьжә дьбә, ӧса нинә! (Зәбур 130:4) Ле Йаһоԝа һазьр ә кӧ бьбахшинә кʹе?

ЙАҺОԜА ДЬБАХШИНӘ КʹЕ?

14. Әм дәрһәԛа бахшандьна Йаһоԝа чь пеһʹәсийан?

¹⁴ Чаԝа кӧ мә дит, Йаһоԝа һазьр ә нә тʹәне гӧнед бьчʹук, ле гӧнед мәзьн жи бьбахшинә. Ӧса жи, әм пеһʹәсийан ԝәки жь бо ве йәке кӧ Йаһоԝа Әʹфьрандар, Ԛанундар у Һʹакьме мә йә, әԝ рʹьнд занә һәла кʹе һежайи бахшандьне йә. Ле пешийа кӧ сафи кә бьбахшинә кәсәки, гәло Йаһоԝа дина хԝә дьдә кʹижан тьшта?

15. Ль гора Луԛа 12:47, 48, Йаһоԝа дина хԝә дьдә чь?

¹⁵ Бона Йаһоԝа фәрз әв ә, һәла кәсе гӧнәкʹар заньбу ԝәки кьред ԝи шаш ьн йан на. Иса әв йәк рʹьнд зәлал кьрьбу (Луԛа 12:47, 48 бьхунә). Мәрьве кӧ һʹәмде хԝә хьрабийе дькә, демәк әԝе кӧ рʹьнд занә ԝәки кьред ԝи бәр чʹәʹве Хԝәде хьраб ьн, гӧнәки гьран дькә. Ве дәрәщеда Йаһоԝа дькарә сафи кә ԝәки нәбахшинә ԝи (Марԛос 3:29; Йуһʹәнна 9:41). Ле щарна әм гәрәке биньн сәр хԝә, ԝәки чь кӧ мә кьрьбу нәрʹаст бу. Гәло әм дькарьн диса жи бенә бахшандьне? Бәле! Ԝәрә әм тьштәки дьн жи шеԝьр кьн, чь жи Йаһоԝа һьлдьдә һʹәсаб.

16. Тʹобәкьрьн чь те һʹәсабе, у сәва кӧ Йаһоԝа бьбахшинә мә, чьрʹа фәрз ә ԝәки әм тʹобә бькьн?

¹⁶ Йаһоԝа ӧса жи дина хԝә дьде, һәла кәсе гӧнәкʹар бь рʹасти жь дьл тʹобә дькә йан на. Тʹобәкьрьн әв ә, гава мәрьв «фькьр, ньһерʹандьн у нета хԝә дьгӧһезә». Мәрьве кӧ тʹобә дькә, бона кьред хԝәйә хьраб йан жи бона кӧ әԝи тьштед рʹаст нәкьрийә, пʹошман дьбә у дьлтәнг ә. Әԝ һьм сәва гӧне хԝә, һьм жи сәва ве йәке кӧ әԝи һәләԛәтийа хԝә тʹәви Йаһоԝа хьраб кьр, хәмгин ә. Бинә бира хԝә кӧ Мьнашә Пʹадша у Даԝьд Пʹадша гӧнед гьран кьрьбун, ле Йаһоԝа бахшандә ԝан, чьмки ԝана жь дьл тʹобә кьр (1 Пʹадшати 14:8). Бәле, сәва кӧ Йаһоԝа бьбахшинә мә, гәрәке әм жь дьл тʹобә бькьн. Бәс нинә тʹәне сәва гӧнед хԝә пʹошман бьн. Лазьм ә кӧ әм тьштәки бькьн.c Гәло Йаһоԝа диса дина хԝә дьдә сәр кʹижан тьштед дьн?

17. Сәва кӧ Йаһоԝа жь мә рʹази бә, гәрәке әм чь бькьн? Чьрʹа фәрз ә ԝәки әм шашийед хԝәйә бәре дӧбарә нәкьн? (Ишайа 55:7)

¹⁷ Йаһоԝа ӧса жи дина хԝә дьде, һәла кәсе гӧнәкʹар тʹәрка рʹийа хьраб дайә у хԝә ль рʹийа рʹаст гьртийә йан на. Демәк, Йаһоԝа дина хԝә дьде, һәла әԝ кәс те гӧһастьне у сәр хԝә дьхәбьтә, ԝәки ӧса бьжи чаԝа Ԝи хԝәш те (Ишайа 55:7 бьхунә). Әԝ гәрәке фькьред хԝә бьгӧһезә у изьне бьдә, ԝәки фькьред Йаһоԝа рʹебәрийе ԝи бькьн (Рʹомайи 12:2; Әфәси 4:23). Гәрәке әԝ хԝәрʹа сафи кә кӧ тʹәрка ньһерʹандьн у кьред нәрʹаст бьдә (Колоси 3:7-10). Сәва кӧ Йаһоԝа бьбахшинә мә, гәләк фәрз ә әм баԝәрийа хԝә ԛӧрбана Иса Мәсиһ биньн. Һәгәр әм хирәт бькьн кӧ жийина хԝә бьгӧһезьн, Йаһоԝа ԝе сәр һʹиме ԛӧрбана Иса бьбахшинә мә (1 Йуһʹәнна 1:7).

БАХШАНДЬНА ЙАҺОԜАДА ДӦДЬЛИ НӘБӘ

18. Әм дәрһәԛа бахшандьна Йаһоԝа чь һин бун?

¹⁸ Ве готареда, әм чь һин бун? Тʹәмамийа дьнйалькеда Йаһоԝа кәсе һәри Афукʹар ә. Гәло әм чьма ӧса дьбежьн? Йа пешьн, әԝ тʹьме һазьр ә бьбахшинә мә. Йа дӧда, әԝ дәрһәԛа мә һәр тьшти занә у мә рʹьнд нас дькә. Әԝ һʹәму хәйсәт-һʹӧнӧред мә занә у дьле мә дьвинә, ләма әԝ дькарә тедәрхә һәла әм бь рʹасти тʹобә дькьн йан на. Йа сьсийа жи, гава Йаһоԝа дьбахшинә мә, әԝ гӧнед мәйи бәре ида надә рʹуйе мә. Бь сайа бахшандьна ԝи, әм дьбьн хԝәйе исафәкә тʹәмьз у әм заньн ԝәки әԝ мә ԛәбул дькә.

19. Рʹаст ә әм гӧнәкʹар ьн, ле диса жи чьрʹа әм дькарьн ша бьн?

¹⁹ Һʹәта кӧ әм нәбьнә беԛьсур, әме һьлбәт щар щара шаши у гӧна бькьн. Ле Йаһоԝа дьлрʹәʹм у дьлован ә, у әԝ бир накә ԝәки әм гӧнәкʹар ьн. Ләма жи нәлазьм ә ԝәки әм бона шашийед кӧ әм жь бо ԛьсурдарийа хԝә дькьн, гәләк дьлтәнг бьн (Зәбур 103:8-14; 130:3). Бәле, һәгәр әм чь жь дәсте мә те бькьн, кӧ ль рʹийа Хԝәдеда һәрʹьн, әм дькарьн ша бьн (Филипи 4:4-6; 1 Йуһʹәнна 3:19-22). Гәло әв йәк дьле мә рʹьһʹәт накә?

20. Готара дьнда әме дәрһәԛа чь хәбәр дьн?

²⁰ Әм гәләк рʹази нә кӧ һәгәр әм жь дьл тʹобә бькьн, Йаһоԝа һазьр ә ԝәки шашийед мә афу бькә. Гәло әм чаԝа дькарьн мина Йаһоԝа афукʹар бьн? Бахшандьна мә чаԝа жь бахшандьна Йаһоԝа щӧдә дьбә, у чьма фәрз ә кӧ әм ве йәке фәʹм бькьн? Готара дьн ԝе щаба ван пьрса бьдә.