Әм Ча Дькарьн Бахшандьнеда Чʹәʹв Бьдьнә Йаһоԝа?

1-2. (а) Илаһи чьчах зор ә, кӧ мәрьв бьбахшинә кәсәки? (б) Хушкәкә мә чь кьр?

ГӘЛО тәрʹа чәтьн ә бьбахшини мәрьва? Бь рʹасти жи әв йәк бона гәләк мәрьва һеса нинә, илаһи гава дьле ԝан гәләк һатийә ешандьне. Ле әм дькарьн һьнә тьшта бькьн, ԝәки һерса мә дайнә, кӧ бькарьбьн бьбахшиньн мәрьва. Мәсәлә, ԝәрә әм дина хԝә бьдьне, кӧ чь һатьбу сәре хушкәкә мә, наве кʹижане Дениза йә.a Сала 2017-да, хушка мә тʹәви малбәта хԝә чубу офиса сәрәкә йа Шәʹдед Йаһоԝа, кʹижан кӧ тʹәзә һатьбу авакьрьне. Гава әԝана вәдьгәрʹийанә мале, ажованәки дьн нькарьбу әʹрәба хԝә контрол кә у әʹрәба ԝан хьст. Ве ԛәзийеда, хушка мә хәрьԛи. Чахе әԝ сәр һʹьше хԝәда һат, бьһист кӧ зарʹед ԝе гьран бьриндар бунә, ле мере ԝе Брайен, мьрийә. Хушка мә дьбежә: «Әз бечʹарә у дьлшкәсти бум». Паше әԝе бьһист кӧ чахе ԛәзи ԛәԝьми, ажован сәрхԝәш нибуйә, нәжи дина хԝә дайә телефона хԝә йан жи тьштәки дьн. У хушка мә дӧа кьр, ԝәки Йаһоԝа ԛәԝате бьдә ԝе.

² Ажоване кӧ ԝан хьстьбу, һатә гьртьне у диԝанкьрьне. Һәрге диԝане сафи кьра, ԝәки әԝ нәһәԛ ә, әԝе бькʹәта кәле. Ле мәрьвәки диԝане хушка мәрʹа гот, кӧ сафикьрьна диԝане шәʹдәтийа ԝева гьредайи йә. Хушка мә дьбежә: «Мьн хԝә ӧса тʹәхмин дькьр, тебежи кәсәки бьрина мьн вәкьр у хԝе сәрда кьр, чьмки лазьм бу ԝәки әз диса бәʹса ԝе рʹожа хьраб бькьм». Чәнд һʹәфте шунда, хушка мә бәр диԝане сәкьни у һазьр бу шәʹдәтийе бона ви ажовани бьдә. Ле гәло хушка мә чь гот? Әԝе жь һʹакьм рʹәща кьр, кӧ ль ԝи бе рʹәʹме.b Гава әԝе хәбәрдана хԝә хьлаз кьр, һʹакьм дәстпекьр бьгьри. Әԝи гот: «Әва 25 сал ә әз һʹакьм ьм, ле мьн тʹӧ щар диԝанеда тьштәки ӧса нәбьһистийә. Малбәта кӧ зьрар стандийә, тʹӧ щар бона кәсе сущдаркьри рʹәʹме нахԝазә. Диԝанеда мьн тʹӧ щар гьлийед дьловани нәбьһистийә у нәдитийә ԝәки кәсәк бьбахшинә йе нәһәԛ».

3. Чь али хушка мә кьр, кӧ әԝе карьбу бьбахшинә?

³ Гәло чь али Денизайе кьр, кӧ әԝе карьбу бьбахшинә? Әԝ дәрһәԛа бахшандьна Йаһоԝа кʹур фькьри (Миха 7:18). Бәле, һәрге әм бона бахшандьна Йаһоԝа шекьрдар бьн, әме бьхԝазьн мина ԝи бьбахшиньнә кәсед дьн.

4. Йаһоԝа дьхԝазә кӧ әм чь бькьн? (Әфәси 4:32)

⁴ Йаһоԝа һивийе йә, ԝәки әм жи бьбахшиньн мәрьва, чаԝа кӧ әԝи бахшандийә мә (Бьхунә Әфәси 4:32). Әԝ дьхԝазә ԝәки әм бьбахшиньн ви мәрьви, йе кӧ дьле мә ешандийә (Зәбур 86:5; Луԛа 17:4). Ве готареда әме дина хԝә бьдьнә се тьшта, кʹижан кӧ дькарьн али мә бькьн, ԝәки әм һе зедә бьбахшиньн мәрьва.

ҺӘСТЕД ХԜӘ ҺЬЛДӘ ҺʹӘСАБ

5. Ль гора Мәтʹәлок 12:18, гава кәсәк дьле мә дешинә, дьбәкә әв йәк ча сәр мә һʹӧкӧм кә?

⁵ Дьбәкә әм жь бо гьли йан кьред кәсәки дьн гәләк дьлтәнг бьн, илаһи һәрге әв мәрьв дост йан мәрьве мә йә (Зәбур 55:12-14). Щарна алийе емосийалида еша дьле мә дькарә ӧса гьран бә, кӧ ча бежи шур дьле мә хьстьнә (Бьхунә Мәтʹәлок 12:18). Дьԛәԝьмә әм һәр тьшти дькьн, ԝәки һәстед хԝә вәшерьн, йан жи дина хԝә нәдьнә һәстед хԝә. Ле һәрге әм ӧса бькьн, әв йәк те һʹәсабе кӧ ча бежи әм шур бьринеда дьһельн. Анәгори ве йәке, һәрге әм дина хԝә нәдьнә һәстед хԝә, дьле мә ԝе рʹьһʹәт нәбә.

6. Гава кәсәк дьле мә дешинә, әм дькарьн хԝә ча бьдьнә кʹьфше?

⁶ Чахе кәсәк дьле мә дешинә, дьбәкә әм сәрида һерс кʹәвьн. Ль гора Кʹьтеба Пироз, әв йәк дькарә бьԛәԝьмә. Ле әм гәрәке һерсе дьле хԝәда хԝәй нәкьн (Зәбур 4:4; Әфәси 4:26). Гәло чьрʹа? Чьмки һәстед мә гәләк щара сәр шьхӧлед мә һʹӧкӧм дьбьн, у әшкәрә йә кӧ әв йәк бәрбь тьштәки баш набә (Аԛуб 1:20). Бир нәкә, кӧ щарна дәсте мәда нинә, кӧ әм һерс кʹәвьн йан на, ле дәсте мәда йә, кӧ әме һерсе дьле хԝәда хԝәй кьн йан на!

7. Гава кәсәк дьле мә дешинә, дьбәкә әм хԝә ча тʹәхмин кьн?

⁷ Һәрге кәсәк мәрʹа хьрабийе бькә, дьбәкә әм дьлшкәсти бьн. Мәсәлә, хушкәкә бь наве Анна ӧса дьбежә: «Гава әз зарʹ бум, баве мьн жь дийа мьн ԛәтийа у ве жьньке станд, кʹижане кӧ пʹәрәти әз хԝәй дькьрьм. Мьн хԝә тʹәне тʹәхмин дькьр. Гава зарʹ ԝанрʹа бун, мьн тʹьре ԝана щийе мьн гьрт. Чахе әз мәзьн дьбум, мьн тʹәхмин дькьр, кӧ нәфәред мале мьн һʹәз накьн». Хушкәкә бь наве Жоржета, дәрһәԛа зьнекʹарийа мере хԝә ӧса дьбежә: «Әм жь зарʹотийеда һәвалед һәв бун у мә тʹәвайи ча пешәнг хьзмәт дькьр. Дьле мьн бьриндар бу». Хушкәкә бь наве Наоми жи ӧса дьбежә: «Ԛә һʹьше мьнрʹа дәрбаз нәдьбу, кӧ рʹожәке мере мьн ԝе дьле мьн бешинә. Ләма жи гава әԝи ани сәр хԝә кӧ порнографийа дьньһерʹи у әв йәк жь мьн вәдьшарт, мьн хԝә хапанди тʹәхмин кьр».

8. (а) Чьрʹа фәрз ә кӧ әм бьбахшиньн мәрьва? (б) Чахе әм дьбахшиньн, әм чь кʹаре дьстиньн? (Бьньһерʹә чаргошә «Һәрге Бьрина Мә Кʹур ә, Әм Гәрәке Чь Бькьн?»)

⁸ Әм нькарьн гьли у кьред кәсед дьн контрол кьн, ле әм дькарьн щаба хԝә контрол кьн. Гәләк щар, щаба лапә баш әв ә, кӧ әм шашийед мәрьва бьбахшиньн. Гәло чьрʹа? Чьмки әм Йаһоԝа һʹәз дькьн, у әԝ дьхԝазә кӧ әм бьбахшиньн мәрьва. Һәрге әм һьндава ԝи мәрьви, йе кӧ дьле мә ешандийә, һерсе хԝәй дькьн у набахшиньн ԝи, дьбәкә әм тьштәки беаԛьлайи бькьн, йан жи зьраре бьдьнә сьһʹәт-ԛәԝата хԝә (Мәтʹәлок 14:17, 29, 30). Хушка мә Кристина ӧса дьбежә: «Гава әз сәр еша дьле хԝә дьфькьрьм, әз мәʹдәкьри мә. Ԝәʹде ӧса, әз хԝарьнед бекер дьхԝьм у тʹер рʹаназем. Һьнге мьнрʹа чәтьн ә һәстед хԝә контрол кьм, у әв йәк хьраб һʹӧкӧм дькә һьм сәр зәԝаща мә у һьм жи сәр һәвалтийа мьн тʹәви кәсед дьн».

9. Чьрʹа әм гәрәке хәйде жь дьле хԝә дәрхьн?

⁹ Һәрге кәсе кӧ дьле мә ешандийә, жь бо кьред хԝә пʹошман нәбә жи, әм гәрәке хәмгин нәбьн. Хушка мә Жоржета дьбежә: «Ԝәʹдә шунда, мьн хәйд у һерса хԝә һьндава мере хԝәйи бәре, жь дьле хԝә дәрхьст. Паше рʹьһʹәтикә мәзьн кʹәтә дьле мьн». Бь рʹасти жи фәрз ә, кӧ әм хәйде дьле хԝәда хԝәй нәкьн, ԝәки дьле мә сәр мәрийа сар нәбә. Ӧса жи, гава әм хәйде дьле хԝәда хԝәй нәкьн, мәщала мә чедьбә кӧ жь әʹмьре хԝә дьһа зедә ләзәте бьстиньн, чьмки әм ида дәрһәԛа ве дәрәще нафькьрьн (Мәтʹәлок 11:17). Ле һәрге мәрʹа дьһа чәтьн дьбә бьбахшиньн ԝи кәси, йе кӧ дьле мә ешандийә, әм дькарьн чь бькьн?

ҺӘСТЕД ХԜӘ КОНТРОЛ КӘ

10. Сәва кӧ әм һәстед хԝә контрол кьн, чьма дьбәкә мәрʹа ԝәʹдә лазьм бә? (Бьньһерʹә ӧса жи шькьл.)

¹⁰ Гәло әм ча дькарьн һәстед хԝә контрол кьн у һерс нәкʹәвьн? Ве мәсәле бьдә бәр чʹәʹве хԝә. Һәрге кәсәк гьран бьриндар буйә, ԝәʹдә лазьм ә кӧ әԝ ԛәнщ бә. Мина ве йәке, һʹәта кӧ әм һазьр бьн жь дьл бьбахшиньн кәсәки, дьбәкә мәрʹа жи ԝәʹдә лазьм бә (Ԝаиз 3:3; 1 Пәтрус 1:22).

11. Дӧакьрьн ча дькарә али тә бькә, ԝәки тӧ бьбахшини мәрьва?

¹¹ Йаһоԝарʹа дӧа кә у аликʹарийе бьхԝазә, ԝәки тӧ бькарьби бьбахшини мәрьва.c Хушка мә Анна дьбежә, кӧ дӧакьрьне чаԝа али ԝе кьрийә: «Мьн жь Йаһоԝа рʹәща кьр, кӧ әԝ сәва һʹәму гьли у кьред мәйи нәбаш малбәтеда, бьбахшинә мә. Паше мьн баве хԝәрʹа у жьна ԝийә тʹәзәрʹа нәʹмәк ньвиси у мьн гот, кӧ әз дьбахшиньм ԝан». Әв йәк бона Аннайе ԛә һеса нибу. Диса жи әԝ дьбежә: «Әз баԝәр ьм кӧ һәрге бахшандьнеда чʹәʹв бьдьмә Йаһоԝа, баве мьн у жьна ԝи жи ԝе бьхԝазьн Йаһоԝа нас бькьн».

12. Чьрʹа фәрз ә әм итʹбарийа хԝә Йаһоԝа биньн, нә кӧ һәстед хԝә? (Мәтʹәлок 3:5, 6)

¹² Итʹбарийа хԝә Йаһоԝа бинә, нә кӧ һәстед хԝә (Бьхунә Мәтʹәлок 3:5, 6). Йаһоԝа тʹьме занә, кӧ чь бона мә керһати йә (Ишайа 55:8, 9). Әԝ тʹӧ щар нахԝазә ԝәки әм тьштәки ӧса бькьн, чь кӧ дькарә зьраре бьдә мә. Ләма жи гава әԝ мәрʹа дьбежә кӧ әм бьбахшиньн мәрьва, әм дькарьн баԝәр бьн, кӧ әв йәк бона кʹара мә йә (Зәбур 40:4; Ишайа 48:17, 18). Алийе дьнва жи, һәрге әм итʹбарийа хԝә һәстед хԝә биньн, дькарә ӧса бьԛәԝьмә кӧ әм тʹӧ щар нәбахшиньн һьнә мәрьва (Мәтʹәлок 14:12; Йерәмйа 17:9). Хушка мә Наоми дьбежә: «Серида әз дьфькьрим кӧ мере мьн һежайи бахшандьне нинә, чьмки әԝи порнографийа дьньһерʹи. Әз дьтьрсийам кӧ әԝе диса дьле мьн бешинә, йан жи бир кә кӧ әԝи чьԛас дьле мьн ешандийә. Ӧса жи әз дьфькьрим кӧ Йаһоԝа һәстед мьн фәʹм дькә. Ле паше мьн фәʹм кьр, ԝәки ньһерʹандьна мьн нәрʹаст ә. Бәле, Йаһоԝа һәстед мьн фәʹм дькә, ле әв йәк найе һʹәсабе кӧ әԝ һәстед мьнрʹа ԛайил ә. Әԝ занә әз чь тʹәхмин дькьм у мьнрʹа ԝәʹдә лазьм ә, сәва кӧ бьрина дьле мьн ԛәнщ бә. Ле диса жи Йаһоԝа дьхԝазә ԝәки әз бьбахшиньм мәрьва».d

НЬҺЕРʹАНДЬНА ХԜӘ БЬГӦҺЕЗӘ

13. Ль гора Рʹомайи 12:18-21, әм гәрәке чь бькьн?

¹³ Гава әм дьбахшиньн ԝи мәрьви, йе кӧ дьле мә ешандийә, әм гәрәке нә тʹәне ида дәрһәԛа ве дәрәще хәбәр нәдьн, ле жь алийе хԝәда һе зедә тьшт бькьн. Һәрге кәсе кӧ дьле мә ешандийә хушк йан бьре мә йә жи, әм дьхԝазьн ль һәв бен (Мәтта 5:23, 24). Дәԝса кӧ әм һерсе хԝәй кьн у кʹине бажон, әм дьхԝазьн дьлрʹәʹм бьн у бьбахшиньн (Бьхунә Рʹомайи 12:18-21; 1 Пәтрус 3:9). Гәло әм ча дькарьн ве йәке бькьн?

14. Әм гәрәке чь бькьн у чьрʹа?

¹⁴ Әм гәрәке һәр тьшти бькьн, ԝәки ль сәр ԝи кәси, йе кӧ дьле мә ешандийә, бь чʹәʹве Йаһоԝа бьньһерʹьн. Йаһоԝа дина хԝә дьдә хәйсәтед мәрьвайә баш (2 Дирок 16:9; Зәбур 130:3). Һәрге әм хәйсәтед нәбаш нава мәрьвада бьгәрʹьн, әме бьвиньн. Ле сәва кӧ мәрʹа һеса бә бьбахшиньн мәрьва, әм гәрәке дина хԝә бьдьнә хәйсәтед ԝани баш. Бьраки бь наве Щерод дьбежә: «Гава әз шашийед бьраки бәрамбәри хәйсәтед ԝийи баш дькьм, мьнрʹа дьһа һеса йә бьбахшиньмә ԝи».

15. Чьрʹа баш бә кӧ әм бежьнә мәрьва, ԝәки әм дьбахшиньнә ԝан?

¹⁵ Ӧса жи ԝе баш бә, ԝәки әм ԝи кәсирʹа, йе кӧ дьле мә ешандийә, бежьн, кӧ мә бахшандийә ԝи. Гәло чьрʹа? Хушка мә Наоми дьбежә: «Мере мьн жь мьн дьпьрси: ‹Тӧ дьбахшини мьн?› Ле мьн нькарьбу жерʹа бьгота: ‹Бәле, әз дьбахшиньм тә›. Мьн фәʹм дькьр, кӧ дьле хԝәда мьн бь рʹасти нәбахшандийә ԝи. Ле ԝәʹдә шунда, мьн ида дькарьбу әв гьлийед фәрз бежьмә ԝи: ‹Мьн бахшандийә тә›. Гава мьн бахшандә мере хԝә, чʹәʹвед ԝи тʹьжә һесьр бун, у әʹдьлайи кʹәтә дьле мьн. Жь ԝе дәме, мьн тʹәзәда итʹбарийа хԝә ԝи ани у әм диса бунә достед һәв».

16. Тӧ дәрһәԛа бахшандьне чь һин буйи?

¹⁶ Йаһоԝа дьхԝазә кӧ әм бьбахшиньн мәрьва (Колоси 3:13). Һәмьки әв йәк һеса нинә, ле диса жи әм дькарьн бьбахшиньн мәрьва. Бона ве йәке әм гәрәке чʹәʹве хԝә сәр һәстед хԝә нәгьрьн, ле һәр тьшти бькьн ԝәки һерсе дьле хԝәда хԝәй нәкьн. Әв йәк ԝе али мә бькә ньһерʹандьна хԝә бьгӧһезьн (Бьньһерʹьн чаргошә «Се Гавед Фәрз бона Бахшандьне»).

ДИНА ХԜӘ БЬДӘ КʹАРА БАХШАНДЬНЕ

17. Кʹара бахшандьне чь йә?

¹⁷ Гәләк мәʹнийед мә һәнә, ԝәки әм бьбахшиньн мәрьва. Йа йәке, әм дьхԝазьн чʹәʹв бьдьнә дьлованийа баве хԝә Йаһоԝа (Луԛа 6:36). Йа дӧда, әм шекьрдар ьн, чьмки Йаһоԝа бахшандийә мә (Мәтта 6:12). Йа сьсийа, бахшандьн бона сьһʹәтԛәԝата мә керһати йә у али мә дькә һәвалед хԝә ӧнда нәкьн.

18-19. Чь дькарә бьԛәԝьмә һәрге әм бьбахшиньн мәрьва?

¹⁸ Һәрге әм бьбахшиньнә мәрьва, әме бькарьбьн кʹәрәмед мәзьн бьстиньн. Ԝәре әм диса дина хԝә бьдьнә хушка мә Дениза, дәрһәԛа кʹижане мә дәстпека готареда гьли кьр. Ԝе дәме хушка мә ньзаньбу, ԝәки ажоване кӧ бьбу сәбәбе мьрьна малхе ԝе, сафи кьрьбу паши диԝанкьрьне хԝә бькӧжә. Ле бахшандьна Денизайе сәр ԝи һаԛас һʹӧкӧм кьр, кӧ әԝи дәстпекьр тʹәви Шәʹдед Йаһоԝа Кʹьтеба Пироз һин бә.

¹⁹ Дьԛәԝьмә мәрʹа жи гәләк чәтьн ә, бьбахшиньн ԝи кәси, йе кӧ дьле мә ешандийә. Ле гава әм дьбахшиньн, кʹара ве йәке гәләк мәзьн ә (Мәтта 5:7). Ләма жи чьԛас жь дәсте мә те, әм гәрәке бахшандьнеда чʹәʹв бьдьнә Йаһоԝа!