«Әз Тʹӧ Щар Тʹәне Нәмамә»

МӘСӘЛА ДЕ У БАВЕ МЬН

Де у баве мьн Католикед хирәт бун. Ле гава ԝана Кʹьтеба Пирозда дит, ԝәки наве Хԝәде Йаһоԝа йә, әԝана бунә Шәʹдед Йаһоԝа, у хьзмәтийеда гәләк хирәт бун. Баве мьн нәщар бу у әԝи тʹәрка ве йәке да, ԝәки шькьлед Иса Мәсиһ чекә, дәԝсе әԝи пʹеше хԝә да хәбате, ԝәки ԛате йәке йа мала мә бькә Ода Щьвате. Сан Жуан дел Монтеда, ль һәрема Манилайе, кӧ пʹайтʹәхте Филипинайе йә, әв Ода Щьватейә пешьн бу.

Әз сала 1952-да һатьмә буйине. Де-баве мьн чаԝа мьн, ӧса жи чар бьра у се хушкед мьнә мәзьн, рʹийа рʹастийеда һин кьрьбун. Гава әз мәзьн дьбум, баве мьн дьготә мьн, кӧ әз һәр рʹож жь Кʹьтеба Пироз сәрики бьхуньм, у әԝи бь сайа гәләк әʹдәбйәтед тʹәшкиләте әз һин дькьрьм. Щарна де-баве мьн бәрпьрсийаред рʹеԝи у ԝәкʹилед филиале тʹәглифи мала мә дькьрьн. Әз у малбәта мьн, мә жь сәрһатийед ван бьра шабун у һелан дьстанд, у мә сафи кьр, ԝәки жийина хԝәда әме жь һәр тьшти зедәтьр дина хԝә бьдьнә хьзмәтийе.

Амьнийа де-баве мьн гәләк сәр мьн һʹӧкӧм дькьр. Сала 1971-да, паши кӧ дийа мьн жь нәхԝәшикә гьран мьр, әз у баве мьн, мә тʹәвайи дәстпекьр ча пешәнг хьзмәт кьн. Ле сала 1973-да, чахе әз 20 сали бум, баве мьн жи мьр. Мьн һьм дийа хԝә һьм жи баве хԝә ӧнда кьрьбу, ләма жи мьн хԝә тʹәне тʹәхмин дькьр. Ле гӧмана «һʹимгьрти у амьн», йа кӧ Кʹьтеба Пироз дьдә мә, али мьн кьр ԝәки әз ԛәԝи бьминьм у хԝә бьсперьм Йаһоԝа (Ибрани 6:19). Дәмәкә кьнда паши мьрьна баве мьн, әз ча пешәнге мәхсус һатьмә шандьне сәр гьрава Короне, ль һәрема Палаԝане.

ԜӘʹДЕ КʹЬФШКЬРЬНӘКӘ ЧӘТЬН, ТʹӘНЕ МАМ

Гава әз гьһиштьмә Короне, әз 21 сали бум. Һʹәта ԝе дәме, әз шәһәрда дьмам, ле сәр гьрава Короне, гәләк малада ав у ток тʹӧнә бу, әʹрәбә у мотосиклет жи һьндьк бун. Рʹаст ә ԝедәре чәнд хушк-бьра һәбун, ле гәләк щар әз мәщбур бум тʹәне дәркʹәвьм хьзмәтийе. Серида мьн гәләки бира малбәт у һәвалед хԝә дькьр. Шәв мьн дина хԝә дьда стәйрка у дьгьрийам. Һьндьк мабу мьн кʹьфшкьрьна хԝә бьһишта у вәгәрʹийама мале.

Чахе мьн хԝә тʹәне тʹәхмин дькьр, мьн дӧада дьле хԝә Йаһоԝарʹа вәдькьр. Әз ль сәр гьлийед Кʹьтеба Пирозә хԝәш у әʹдәбйәтед мә дьфькьрим. Зәбур 19:14 гәләк щар дьһатә бира мьн. Мьн фәʹм кьр һәрге әз дина хԝә бьдьмә тьштед, кӧ Йаһоԝа хԝәш тен, мәсәлә кьред ԝи у һʹӧнӧред ԝи, әԝе бьбә Ԛәйайе мьн у Хьлазкʹаре мьн. Готарәкә жь Бьрща Ԛәрәԝьлийе (1 Илоне, сала 1972, рʹупʹ. 521-527), бь наве «Тӧ Ԛәт Тʹәне Нини», гәләк али мьн дькьр. Мьн әв готар диса у диса дьхԝәнд. Ԝи ԝәʹдәйи, тебежи әз тʹәви Йаһоԝа тʹәне дьмам, у мьнрʹа мәщал чедьбу ԝәки әз дӧа бькьм, лекʹолин бькьм у кʹур бьфькьрьм.

Чахе әз гьһиштьмә Короне, гәләк ԝәхт дәрбаз нәбу кӧ әз ча рʹуспи һатьмә кʹьфшкьрьне. Хенщи мьн ԝедәре рʹуспи тʹӧнә бун, ләма жи мьн Мәкʹтәба Хьзмәтийа Тәократик, Щьвина Хьзмәтийе, Лекʹолина Кʹьтебе Щьватеда у Һинбуна Бьрща Ԛәрәԝьлийе дәрбаз дькьр. Ӧса жи һәр һʹәфтийе әз пе готаре дәрдькʹәтьм. Бь рʹасти ида ԝәʹдә ԛә нәдьма, ԝәки әз хԝә тʹәне тʹәхмин кьм!

Коронеда хьзмәтийа мьн пʹьрʹ хԝәш дәрбаз дьбу. Һьнә хԝәндәкʹаред мьн һатьнә ньхӧмандьне. Ле һьнә чәтьнайи жи һәбун. Щарна лазьм бу, кӧ әз нив рʹож рʹе һәрʹьм, һʹәта кӧ бьгьһижьмә щийе хьзмәтийе, у мьн ньзаньбу, кӧ шәв әзе кʹидәре рʹазем. Мә сәр гәләк гьравед бьчʹук жи хьзмәт дькьр, у лазьм бу кӧ әм бь ԛәйика һәрʹьн ԝедәре. Әв йәк бона мьн ԛә һеса нибу, чьмки мьн нькарьбу хԝә аве хьм, у щарна фьртонә жи рʹадьбу. Йаһоԝа һʹәму чәтьнайада али мьн дькьр у әз хԝәй дькьрьм. Паше мьн фәʹм кьр, ԝәки Йаһоԝа әз бона чәтьнайед дьһа мәзьн һазьр дькьрьм, рʹасти кʹижана әз ԝәʹде кʹьфшкьрьна хԝәйә тʹәзә һатьм.

ПАПУА ГИНӘЙА НУ

Сала 1978-да, мьн шандьнә Папуа Гинәйа Ну, сәр гьравәкә ль бакӧра Австралйайе. Ԝедәре гәләк чʹийа һәнә у мәзьнайа ԝи ԝәлати ԛаси мәзьнайа Испанйайе йә. Ԝәкә 3 милйон мәрьвед кӧ ԝедәре дьжин, сәр 800 зьмани зедәтьр хәбәр дьдьн. Диса жи, һʹәчʹи зәʹф бьнәлийед ԝедәре сәр зьмане Ток Писин хәбәр дьдьн.

Мьн сәр ԝәхтәки кьн ль Порт Моресбийайе, щьватәкә сәр зьмане Инглизида кʹьфш кьрьн. Ле паше әз дәрбази щьватәкә сәр зьмане Ток Писин бум, у әз дьчумә сәр дәрса, ԝәки ви зьмани һин бьм. Тьштед кӧ әз сәр ԝан дәрса һин дьбум, мьн хьзмәтийеда дьда хәбате. Бь ви щурʹәйи әз зьмане Ток Писин зу һин бум, у гәләк ԝәхт дәрбаз нәбу, кӧ мьн ида дькарьбу сәр ви зьмани пе готара дәрем. Дә бьдьнә һʹәсабе хԝә, әз чьԛас әʹщебмайи мам, чахе паши һатьна мьн ль Папуа Гинәйа Ну, саләк жи дәрбаз нәбу, кӧ әз бона щьватед сәр зьмане Ток Писин, бона чәнд һәремед мәзьн, ча бәрпьрсийаре мьһале һатьмә кʹьфшкьрьне.

Жь бо ве йәке кӧ щьват дури һәв бун, лазьм бу ԝәки әз гәләк щьватед мәзьнә йәкрʹожи организә бькьм у гәләк рʹеԝитийе бькьм. Серида мьн хԝә тʹәне тʹәхмин дькьр, жь бо ве йәке кӧ һәр тьшт бона мьн тʹәзә бу, демәк ԝәлат, зьман у култура тʹәзә. Мьн нькарьбу ԝедәре пе әʹрәбе тʹәсәлийа щьвата бькьм, чьмки ԝедәре чʹийа бун у рʹе тʹӧнә бун. Ләма жи, һәр һʹәфтийе мьн пе тәйаре рʹеԝитийе дькьр. Щарна тәйара кәвьн у бьчʹукда тʹәне рʹеԝик бу у әԝ жи әз бум. Бона мьн рʹеԝитийа пе тәйаре жи ӧса чәтьн бу, чаԝа кӧ рʹеԝитийа пе ԛәйике!

Ԝедәре тʹәне бал һьнә мәрьва тʹел һәбун, ләма жи мьн щьватарʹа нәʹмә дьшанд. Гәләк щар әз пешийа нәʹме дьгьһиштьмә щьвате у мьн гәрәке жь хәлԛе бьпьрсийа, кӧ малед Шәʹдед Йаһоԝа кʹидәре нә. Ле гава мьн хушк-бьра дьдитьн, әԝана гәләки ша дьбун, у мьн фәʹм дькьр кӧ щәфе мьн бадиһәԝа нибу. Мьн әʹмьре хԝәда гәләк щар дәсте Йаһоԝа дьдит у достийа мьн тʹәви ԝи дьһа ԛәԝи дьбу.

Гава әз щара пешьн чумә щьвинәкә ль гьрава Бугенвиле, жьн-мерәки бәшәрхԝәш һатьн бал мьн у пьрсин: «Тә әм нас кьрьн?» Һатә бира мьн, кӧ гава әз тʹәзә һатьбумә бажаре Порт Моресбийе, мьн шәʹдәти дабу ԝан. Мьн тʹәви ԝан һинбуна Кʹьтеба Пироз дәрбаз кьрьбу, у паше бьраки жь ԝедәре һинбун тʹәви ԝан бәрдәԝам кьрьбу, у һәр дӧ жи бунә Шәʹдед Йаһоԝа. Әз се сала ль Папуа Гинәйа Ну мам, у ԝедәре Йаһоԝа гәләк әз кʹәрәм кьрьм.

МАЛБӘТӘКӘ БЬЧʹУК У ХИРӘТ

Пешийа кӧ әз сала 1978-да жь Короне бьчума, әз тʹәви хушкәкә дәлал у хирәт бь наве Адел, бумә нас. Дӧ зарʹед ԝе һәбун, Самуйел у Ширли, у әԝе һьм ча пешәнга һәртʹьм хьзмәт дькьр һьм жи дийа хԝә дьбу хԝәйи. Мәһа Гӧлане сала 1981, әз вәгәрʹийамә Филипинайе, ԝәки Аделе бьстиньм. Паши ве йәке, мә ча пешәнгед һәртʹьм хьзмәт дькьр у тʹәвайи малбәте дьбунә хԝәйи.

Рʹаст ә әз ида хԝәйе нәфәра бум, йәкә сала 1983-да мьн диса ча пешәнге мәхсус кʹьфш кьрьн у шандьнә сәр гьрава Линапакан, ль һәрема Палаԝане. Әм гьшк дәрбази ԝи щийе дур бун, кʹидәре кӧ Шәʹдед Йаһоԝа ԛә тʹӧнә бун. Ԝәкә саләк шунда дийа Аделе мьр. Әм гәләк хәмгин бун, ле бь сайа хьзмәтийе, мә бәрдьли дьстанд. Линапаканеда мә тʹәви гәләк мәрьва һинбуна Кʹьтеба Пироз дәстпекьр, ләма жи гәләк ԝәхт дәрбаз нәбу кӧ мәрʹа ида Ода Щьвате лазьм бу. Мә хԝәрʹа одәкә бьчʹук ава кьр. Чахе әм дәрбази Линапакане бун, се сал шунда 110 мәрьв һатьнә сәр Биранина Мьрьна Иса Мәсиһ. Чахе әм жь ԝедәре чун, гәләк жь ԝан мәрьва рʹӧһʹанида пешда чун у бунә Шәʹдед Йаһоԝа.

Сала 1986-да, мьн шандьнә сәр гьрава Кулионе. Ԝедәре кʹомәкә мәрьвед кʹоти һәбу. Адел жи ԝедәре ча пешәнга мәхсус һатә кʹьфшкьрьне. Серида әм һьнәк дьтьрсийан, чьмки мә гәрәке шәʹдәти бьда кәсед кʹоти. Ле хушк-бьра готьнә мә, кӧ ԝан мәрьва ида дәрман стандьбун у нәхԝәшийа ԝан ԝе дәрбази сәр мә нәбуйа. Һьнәк жь ԝан кәсед нәхԝәш дьһатьнә сәр щьвата, кӧ мала хушкәкеда дәрбаз дьбу. Әм зу һини ви һʹали бун у әм гәләк ша бун кӧ мә дькарьбу мьзгинийа Кʹьтеба Пироз бьдьнә ԝан мәрьва, йед кӧ дьфькьрин ԝәки тʹӧ кәс ԝан һʹәз накә, нә Хԝәде нә жи мәрьвед дьн. Әԝана гәләк ша бун, кӧ рʹожәкә ӧса ԝе бе, ԝәки әԝана ԝе бь тʹәмами жь нәхԝәшийа хԝә ԛәнщ бьн (Луԛа 5:12, 13).

Гәло әʹмьре Кулионеда бона зарʹед мә чаԝа бу? Әз у Адел, мә гази дӧ хушкед щаһьл жь Короне кьр, ԝәки тʹәви зарʹед мә һәвалтийе бькьн. Самуйел, Ширли у ван дӧ хушка тʹәвайи хьзмәт дькьр у тʹәви гәләк зарʹа һинбуна Кʹьтеба Пироз дәрбаз дькьрьн. Әз у Адел жи мә тʹәви де-бавед ван зарʹа һинбуна Кʹьтеба Пироз дәрбаз дькьр. Ԝәхтәки мә тʹәви 11 малбәта һинбуна Кʹьтеба Пироз дәрбаз дькьр. Гәләк мәрьв рʹӧһʹанида пешда дьчун у гәләк ԝәʹдә дәрбаз нәбу, кӧ мә щьватәкә тʹәзә саз кьр.

Серида ве һәремеда тʹәне рʹуспик һәбу, әԝ жи әз бум. Ләма жи филиале мьнрʹа гот, кӧ әз щьвата бона һʹәйшт мьзгинванед ль Кулионе у паше жи бона нәһ мьзгинванед ль гӧндәки бь наве Марили дәрбаз кьм, йа кӧ бь гәмийе ԝәкә се сьһʹәт дури мә бу. Паши щьвата әм тʹәвайи бь сьһʹәта рʹейед чәтьнрʹа дьчун, ԝәки ль гӧндәки бь наве Һалсей, тʹәви мәрьва һинбуна Кʹьтеба Пироз дәрбаз кьн.

Ԝәхт шунда ль Марили у Һалсейда гәләк мәрьв бунә Шәʹдед Йаһоԝа. Ләма жи мә ԝедәре Одед Щьвата ава кьр. Чаԝа сәр гьрава Линапакане, ль вьр жи хушк-бьра у кәсед кӧ Кʹьтеба Пироз һин дьбун, бона авакьрьне тьшт ԛӧрбан дькьрьн у авакьрьнеда кʹар дькьрьн. Ода Марилийеда 200 мәрьв щи дьбун. Ле чахе бона дәрбазкьрьна щьватед мәзьн һʹәԝщәти һәбу, мә ве одеда дькарьбу дьһа зедә мәрьв щи кьра.

ШИН, ТʹӘНЕБУН У ШАБУНА ТʹӘЗӘ

Сала 1993-да, гава зарʹ ида мәзьн бун, әз у Адел, мә ль Филипинайе хьзмәтийа бәрпьрсийартийе дәстпекьр. Сала 2000-да, әз чумә Мәкʹтәба Башкьрьна Хьзмәтийе, ԝәки һин бьм кӧ бьбьмә дәрсдаре ве мәкʹтәбе. Әз дьфькьрим кӧ әзе нькарьбьм ве щабдарийе биньм сери, ле Аделе һәртʹьм дьле мьн ԛәԝи дькьр у дьгот, ԝәки Йаһоԝа ԝе ԛәԝате бьдә мьн, кӧ әз ве щабдарийа тʹәзә бьԛәдиньм (Филипи 4:13). Адел ве йәкеда дӧдьли нәдьбу, чьмки рʹаст ә әԝ гәләк нәхԝәш бу, ле диса жи щабдарийа хԝә дьани сери.

Сала 2006-да, гава мьн мәкʹтәб дәрбаз дькьр, әм пеһʹәсийан ԝәки бал Аделе нәхԝәшийа Паркинсоне һәйә. Әм гәләк хәмгин бун. Мьн гот ԝәки әм щабдарийа хԝә бьһельн, кӧ сьһʹәт-ԛәԝата ԝе бьбьнә хԝәйи, ле Аделе гот: «Жь кʹәрәма хԝә дохдьрәки бьвинә, йе кӧ дькарә али мьн бькә. Әз заньм кӧ Йаһоԝа ԝе али мә бькә, ԝәки әм бәрдәԝам кьн щабдарийа хԝә биньн сери». Паши ве йәке, Аделе шәш сал бе газьн хьзмәтийа хԝә бәрдәԝам кьр. Гава әԝе ида нькарьбу рʹе һәрʹә, әԝ пе кʹӧрсийа сәԛәта дьчу хьзмәтийе. Чахе жерʹа ида чәтьн бу хәбәр дә, әԝе сәр щьвата бь гьлик йан дӧ гьлийа щаба хԝә дьда. Гәләк хушк-бьра жерʹа смс дьшандьн у бона сәбьра ԝе пʹайе ԝе дьдан, һʹәта кӧ Адел сала 2013-да мьр. Мьн 30 сал зедәтьр тʹәви кʹӧлфәта хԝәйә амьн у дәлал, Аделе, дәрбаз кьр, у чахе әԝ кʹәтә хәԝа мьрьне, әз гәләк хәмгин бум у мьн хԝә диса тʹәне тʹәхмин дькьр.

Аделе дьхԝәст кӧ әз щабдарийа хԝә бәрдәԝам кьм, у мьн һәма ӧса жи кьр. Әз тʹьме щабдарийед хԝәва мьжул дьбум, у әв йәк али мьн дькьр, ԝәки әз хԝә бь зедәйи тʹәне тʹәхмин нәкьм. Жь сала 2014 һʹәта сала 2017, мьн ԝан ԝәлатада, кʹидәре кӧ хушк-бьра нькарьн бь азайи хьзмәт кьн, тʹәсәлийа щьватед сәр зьмане Тагалоги дькьр. Паши ве йәке мьн ль Тәйԝане, Америкайе у ль Канадайе тʹәсәлийа щьватед сәр зьмане Тагалоги дькьр. Сала 2019-да, мьн ль Һьндьстане у ль Тайландайе чәнд Мәкʹтәбед бона Мьзгинванед Пʹадшатийе, сәр зьмане Инглизи дәрбаз кьрьн. Мьн жь ԝан щабдарийа шабунәкә мәзьн дьстанд. Чахе әз бь тʹәмами шьхӧле Йаһоԝава мьжул дьбьм, әз хԝә гәләк бәхтәԝар тʹәхмин дькьм!

АЛИКʹАРИ ТʹЬМЕ НЕЗИК Ә

Ԝәʹде һʹәму кʹьфшкьрьнед тʹәзә, әз гәләк незики ԝан хушк-бьра дьбьм, тʹәви кʹе дьбьмә нас, у ԝан һʹәз дькьм, ләма жи чахе әз гәрәке жь ԝедәре һәрʹьм, мьнрʹа һеса нинә. Дәрәщед ӧсада әз һин дьбьм бь тʹәмами хԝә бьсперьм Йаһоԝа. Мьн тʹьме дәсте ԝи әʹмьре хԝәда дитийә, у әв йәк али мьн дькә, ԝәки әз һини гӧһастьна бьм. Иро әз Филипинайеда ча пешәнге мәхсус хьзмәт дькьм. Әз һини щьвата хԝәйә тʹәзә бумә, у хушк-бьра бунә малбәта мьнә гәләк ԛимәт. Ӧса жи әз ша мә, ԝәки Самуйел у Ширли жи, мина дайика хԝә бь амьни Йаһоԝарʹа хьзмәт дькьн (3 Йуһʹәнна 4).

Әʹмьре хԝәда әз рʹасти гәләк чәтьнайа һатьмә. Кʹӧлфәта мьнә дәлал жь нәхԝәшикә гьран дәрд кʹьшанд у мьр. Ӧса жи гәләк щар лазьм бу, кӧ әз һини дәрәщед тʹәзә бьм. Диса жи мьн дитийә, ԝәки Йаһоԝа «незики мә һәр йәки йә» (Кʹаред Шандийа 17:27). Дәсте Йаһоԝа кьн нинә, ләма жи әԝ һазьр ә ԛәԝате у аликʹарийе бьдә хьзмәткʹаред хԝә, һәла һе ԝан жи, кʹе кӧ щийед дур хьзмәт дькьн (Ишайа 59:1). Зьнаре мьн Йаһоԝа тʹьме кʹеләка мьн бу у әз гәләк жь ԝи рʹази мә. Әз тʹӧ щара тʹәне нәмамә!