Мина Мәрьвед ве Дьне Хԝәһʹәз Нибә

ГӘЛӘК мәрьв дьфькьрьн, кӧ әԝана мәхсус ьн. Әԝана дьһа зедә хԝә һʹәз дькьн, у кәсед дьн жь хԝә ньмьзтьр һʹәсаб дькьн. Кʹьтеба Пирозда пешда һатьбу готьне, кӧ илаһи рʹожед хьлазийа ве дьнйайе, мәрьв ԝе хԝәһʹәз бьн (2 Тимотʹейо 3:2).

Мәрьвед хԝәһʹәз тʹьме жи һәбун. Адәм у Һәԝайе хԝәха сафи кьрьн, кӧ чь йә хьраби у чь йә ԛәнщи, у иро әм рʹуйе сафикьрьна ԝанә нәрʹастда дьчәрчьрьн. Исраела бәреда, пʹадшаки бь наве Узийа, дьфькьри ԝәки изьна ԝи һәйә, кӧ пʹарьстгәһеда бьхуре бьшәԝьтинә, ле бь рʹасти изьна ԝи тʹӧнә бу (2 Дирок 26:18, 19). Ԛьрʹна йәкеда Ферьси у Садуԛийа жи баԝәр дькьр ьн, кӧ бәр чʹәʹве Хԝәде, әԝана мәрьвнә мәхсус ьн, чьмки әԝана зӧрʹәта Бьраһим ьн (Мәтта 3:9).

Дәр-дора мә гәләк мәрьвед хԝәһʹәз һәнә, у ньһерʹандьна ԝан дькарә сәр мә жи һʹӧкӧм кә (Галати 5:26). Мәсәлә, дьбәкә әм бьфькьрьн, ԝәки әм һежайи ԛәдьре мәзьн ьн. Сәва кӧ әм жь ньһерʹандьнәкә ӧса хԝә дур бьгьрьн, әм гәрәке ньһерʹандьна Йаһоԝа пебьһʹәсьн. Ԝәрә әм дина хԝә бьдьнә дӧ принсипед Кʹьтеба Пироз.

Йаһоԝа сафи дькә, кӧ әм һежайи чь нә. Ԝәрә әм һьнә мәсәла шеԝьр кьн.

• Йаһоԝа дьхԝазә ԝәки жьн ԛәдьре мере хԝә бьгьрә, ле мер жи жьна хԝә һʹәз бькә (Әфәси 5:33). Кәсед зәԝьщи гәрәке һәстед романтик һьндава тʹӧ кәсида нәдьнә кʹьфше, хенщи һәвалзәԝаще хԝә (1 Корьнтʹи 7:3). Де-бав һежайи нә, ԝәки зарʹед ԝан гӧрʹа ԝан бькьн, у зарʹ жи һежайи нә, ԝәки де-бав ԝана һʹәз бькьн у ԝана бьбьнә хԝәйи (2 Корьнтʹи 12:14; Әфәси 6:2).

• Щьватеда рʹуспи һежайи нә, ԝәки әм ԛәдьре ԝан бьгьрьн (1 Тʹесалоники 5:12). Ле алийе дьнва жи, рʹуспийарʹа изьн нәһатийә дайине, ԝәки хушк-бьра контрол кьн (1 Пәтрус 5:2, 3).

• Хԝәде изьн дайә сәрԝеред дәԝләте, ԝәки жь бьнәлийед хԝә хәрще дәԝләте у ԛәдьргьртьне дәʹԝа кьн (Рʹомайи 13:1, 6, 7).

Йаһоԝа жь һʹәзкьрьне дьһа зедә тьшта дьдә мә, нә кӧ әм һежайи нә. Әм мәрьвнә гӧнәкʹар ьн, ләма жи әм тʹәне һежайи мьрьне нә (Рʹомайи 6:23). Диса жи, жь бо һʹәзкьрьна мәзьн һьндава мәда, Йаһоԝа гәләки мә кʹәрәм дькә (Зәбур 103:10, 11). Мәʹни нә кӧ әв ә, ԝәки әм һежайи кʹәрәмед ԝи нә, ле чьмки әԝ ԛәнщийа мәзьн һьндава мәда дьдә кʹьфше (Рʹомайи 12:6-8; Әфәси 2:8).

ӘМ ЧА ДЬКАРЬН ХԜӘ ЖЬ ХԜӘҺʹӘЗИЙЕ ДУР БЬГЬРЬН?

Нәкʹәвә бәр байе ньһерʹандьна мәрьвед ве дьнйайе. Һеди-һеди дьбәкә әм дәстпекьн бьфькьрьн, ԝәки әм жь кәсед дьн зедәтьр һежайи тьшта нә. Бь мәсәла хәбатчийед, кӧ тʹәне динарәк стандьн, Иса да кʹьфше, ԝәки чаԝа ньһерʹандьнәкә ӧса дькарә бал мә пешда бе. Һьнәк жь ԝан хәбатчийа жь сьбәһе зу дәстпекьрьн шьхӧл бькьн у һʹәта еваре бәр ԛьжә-ԛьжа тәʹве дьхәбьтин. Ле һьнәк жи, тʹәне сьһʹәтәк хәбьтин. Йед пешьн дьфькьрин, ԝәки әԝана һежайи нә, кӧ дьһа зедә пʹәрә бьстиньн (Мәтта 20:1-16). Бь ве мәсәле Иса да кʹьфше, ԝәки әм гәрәке рʹази бьн жь ве йәке, чь кӧ Хԝәде дьдә мә.

Шекьрдар бә у һивийе нибә, ԝәки мәрьв бона тә тьштәки бькьн (1 Тʹесалоники 5:18). Чʹәʹв бьдә Паԝлосе шанди, йе кӧ жь хушк-бьред Корьнтʹе дәʹԝа нәдькьр, ԝәки әԝана алийе материалида кʹомәке бьдьнә ԝи (1 Корьнтʹи 9:11-14). Әм гәрәке бона һәр тьшти, чь кӧ мәрьв дьдьнә мә, рʹази бьн у нәфькьрьн, ԝәки кәсәк борщдар ә тьштәки бьдә мә.

Мьлук бә. Гава кәсәк бь зедәйи дәрһәԛа хԝә дьфькьрә, дьбәкә әԝ һʹәсаб кә, ԝәки изьна ԝи һәйә, кӧ жь кәсед дьн зедәтьр тьшта бьстинә. Мьлукти ԝе али мә бькә, кӧ әм хԝә жь фькьред ӧса дур бьгьрьн.

Данийел пʹехәмбәр мәрьвәки мьлук бу. Әԝ жь малбәтәкә әʹсьли бу у йәки гәләк аԛьл, пʹешәкʹар у хԝәйе бәжн-баләкә бәдәԝ бу. Ләма жи әԝ дькарьбу бьфькьрә, кӧ әԝ һежайи һӧрмәт-рʹумәте йә (Данийел 1:3, 4, 19, 20). Ле Данийел ӧса нәдьфькьри. Әԝ тʹьме мьлук бу, у ләма жи Йаһоԝа гәләки ԝи ԛимәт дькьр (Данийел 2:30; 10:11, 12).

Ԝәрә әм хԝә жь хԝәһʹәзийа ве дьнйайе дур бьгьрьн, у жь кʹәрәмед кӧ Йаһоԝа бь ԛәнщийа хԝәйә мәзьн сәр мәда дьбаринә, шабуне бьстиньн.