Кʹьтеба Пироз Чь Дьбежә Дәрһәԛа Пандәмийе?
Щаба Кʹьтеба Пироз
Кʹьтеба Пироз пʹехәмбәртийе дькьр дәрһәԛа пандәмийа йане нәхԝәшийед һʹал, кʹижан кӧ ԝан рʹожед ахьрийеда гәләк бәла бьн (Луԛа 21:11). Нәхԝәшийед ви щурʹәйи щәзакьрьна жь Хԝәде ниньн. Ле Хԝәде соз дьдә, ԝәки ԝе бь сайа Пʹадшатийа хԝә һʹәму нәхԝәшийа ӧса жи пандәмийа, бьдә һьлдане.
Гәло Кʹьтеба Пироз дәрһәԛа пандәмийа пʹехәмбәртийе дькьр?
Кʹьтеба Пирозда конкрет найе готьне дәрһәԛа нәхԝәшийед һʹал, мәсәлә йед ӧса ча COVID-19, EYDZÊ (нәхԝәшийа спид), та, малариа у нәхԝәшийа Испани. Ле ԝедәре дәрһәԛа «нәхԝәшийа һʹал» те готьне (Луԛа 21:11; Әʹйанти 6:8). Әв һʹәму тьшт һәйә нишана рʹожед ахьрийе, кӧ ахьрийа ве дьнйайе әʹйан дькә (2 Тимотʹейо 3:1; Мәтта 24:3).
Гәло Хԝәде мәрьва бь нәхԝәшийа щәза дькьр?
Кʹьтеба Пироз һьнә ԛәԝьмандьна гьли дькә, гава Хԝәде бь нәхԝәшийа мәрьва щәза дькьр. Мәсәлә, әԝи һьнә мәрийа бь кʹотибуне щәза кьр (Жьмар 12:1-16; 2 Пʹадшати 5:20-27; 2 Дирок 26:16-21). Ле әв нәхԝәши сәр һʹәму мәрьва бәла нәдьбу, чьмки әв щәзакьрьн тʹәне бона ԝан бу, кʹижан кӧ мьԛабьли Хԝәде рʹадьбун.
Гәло пандәмийа иройин щәзакьрьна жь Хԝәде йә?
На. Һьнә мәрьв дьбежьн, ԝәки Хԝәде бь пандәмийа у нәхԝәшийед дьн мәрийа щәза дькә. Ле Кʹьтеба Пироз әве йәке һин накә. Гәло чьрʹа?
Һьнә хьзмәткʹаред Хԝәде йед ԝәʹде бәре у ньһа нәхԝәш дькʹәтьн. Мәсәлә, мәрьвәки амьн Тимотʹейо жи «зу-зу нәхԝәш» дькʹәт (1 Тимотʹейо 5:23). Ле Кʹьтеба Пироз набежә, ԝәки мәʹнийа ве йәке әԝ бу, кӧ Хԝәде ԝи ԛәбул нәдькьр. Иро жи хьзмәткʹаред Хԝәдейә амьн нәхԝәш дькʹәвьн. Гәләк щар әв дьԛәԝьмә жь бо ве йәке, кӧ әԝана щийе у ԝәʹде лайиԛда нибун (Ԝаиз 9:11).
Хенщи ԝе йәке Кʹьтеба Пирозда те готьне, кӧ әԝ ԝәʹдә һе нәһатийә, чахе Хԝәде мәрьвед зӧлм ԝе щәза бькә. Ле әм дьжин «рʹожа хьлазбунеда», гава Хԝәде һʹәму мәрийа тʹәглиф дькә, ԝәки незики ԝи бьн у хьлазбуне бьстиньн (2 Корьнтʹи 6:2). Тʹәглифкьрьна ԝи бь сайа бәлакьрьна «Мьзгинийа Пʹадшатийе» йә (Мәтта 24:14).
Гәло пандәмийа ԝе бе сәкьнандьне?
Бәле. Кʹьтеба Пироз соз дьдә, ԝәки ԝәʹдәки ӧса ԝе бе, кӧ тʹӧ кәс ԝе нәхԝәш нәкʹәвә. Бьн сәрԝертийа Пʹадшатийа хԝә, Хԝәде ԝе һʹәму проблемед сьһʹәт-ԛәԝатева гьредайи бьдә һьлдане (Ишайа 33:24; 35:5, 6). Әԝ ԝе тәʹли-тәнгийа, еш-ешук у мьрьне бьдә һьлдане (Әʹйанти 21:4). Һьм жи әԝе пашда вәгәрʹинә жийине ԝан мәрийа, йед кӧ жийина хԝә ӧнда кьрьнә, ԝәки әԝана шабуне бьстиньн жь сьһʹәт-ԛәԝата хԝәйә баш (Зәбур 37:29; Кʹаред Шандийа 24:15).
Рʹезед Кʹьтеба Пироз дәрһәԛа нәхԝәшийа
Мәтта 4:23: «Иса ль тʹәмамийа Щәлиле дьгәрʹийа, кʹьништед ԝанда һин дькьр у Мьзгинийа Пʹадшатийе дьда у һәр щурʹә еш у нәхԝәши жи кӧ нав щьмәʹтеда һәбун ԛәнщ дькьрьн».
Әв чь те һʹәсабе: Кʹәрәмәтед Иса мәрʹа әʹйан кьрьн, ԝәки Пʹадшатийа Хԝәде ԝе зутьрәке чь бькә бона инсанәте.
Луԛа 21:11: «Нәхԝәшийа һʹал ԝе бьбьн».
Әв чь те һʹәсабе: Нәхԝәшийед иройин нишана рʹожед ахьрийе әʹйан дькьн.
Әʹйанти 6:8: «Мьн дина хԝә дайе, ва һәспәки шиноԛи, кӧ наве сийаре ԝи Мьрьн бу, Дийаре Мьрийа пәй ԝи дьһат. Һʹӧкӧм ԝирʹа һатә дайине ... ԝәки пе ... нәхԝәшийа һʹал ... ԝан бькӧжә».
Әв чь те һʹәсабе: Пʹехәмбәртийа дәрһәԛа чар сийара дьдә кʹьфше, ԝәки пандәмийа гәрәке ԝәʹде мәда пешда бьһата.