ПЬРСЕД ЩАҺЬЛА
Һәвнаскьрьн—Пʹара 2: Ԝәʹде Һәвнаскьрьне Әз Чь Гәрәке Һьлдьм Һʹәсаб?
Дьԛәԝьмә ԝә кәсәк бәгәм кьрийә у хԝәстьна ԝә пешда һат, ԝәки һәв рʹьнд нас кьн, сәва кӧ бьвиньн һәла бона зәԝаще лайиԛи һәв ьн йан на. Ле гәло ԝәʹде һәвнаскьрьне чь һун гәрәке һьлдьн һʹәсаб?
Ве готареда
Һун гәрәке тʹәви һәв һʹәлал бьн
Чьԛас һун ԝәʹдә тʹәви һәв дәрбаз кьн, һаԛас һуне һе зедә дәрһәԛа һәв пебьһʹәсьн. Һьнә тьшт дәрһәԛа ԝи йан ԝе те ԝи чахи пебьһʹәси, чахе бьвини кӧ әԝ щурʹә-щурʹә дәрәщада ча хԝә дьдә кʹьфше.
Диса жи һәнә һьнә тьшт, йед кӧ һун гәрәке тʹәвайи һʹәлал шеԝьр кьн. Чахе һун ван тьшта шеԝьр кьн, сафикьрьна кӧ һуне дәрһәԛа ԝи йан ԝе бькьн, гәрәке нә сәр һʹиме һәстед ԝә бә, ле сәр һʹиме избатийа бә.
Тʹемед кӧ һун тʹәвайи гәрәке шеԝьр кьн:
Пʹәрә. Гәло дәйне ԝә һәйә? Гәло һун пʹәра бь билани хәрщ дькьн? Паши зәԝаще, гәло һуне чаԝа сафикьрьна бькьн дәрһәԛа ԛазанщкьрьн у хәрщкьрьна пʹәра?
Сьһʹәт-ԛәԝат. Сьһʹәт-ԛәԝата ԝә баш ә? Гәло пешда проблемед ԝәйә сьһʹәт-ԛәԝатева гьредайи һәбунә?
Нет. Чь нет һун дьхԝазьн дайньнә пешийа хԝә? Гәло нетед ԝә мина һәв ьн? Һәрге паши зәԝаще жь бо һьнә дәрәща һун нәгьһижьнә нетед хԝә, гәло һуне бькарьбьн шабуна хԝә ӧнда нәкьн?
Малбәт. Гәло малбәтеда щабдарийед ԝә һәнә? Һун ча дьфькьрьн, әԝ щабдарийед кӧ ньһа щәм ԝә һәнә, ахьрийе жи ԝе һәбьн? Һун дьхԝазьн зарʹед ԝә һәбьн? Һәрге әре, чьԛас?
Чахе һун дәрһәԛа ван тʹема хәбәр дьн, тʹәви һәв һʹәлал бьн. Тʹӧ тьшт вәнәшерьн у информасийа дәрһәԛа хԝә нәгӧһезьн, сәва кӧ бәр чʹәʹве ԝи йан ԝе баш бенә кʹьфше (Ибрани 13:18).
Бьфькьрә: Чь һун гәрәке дәрһәԛа һәв бьзаньбьн? Чаԝа хәбәрдана бь һʹәлали ԝе ԝә һазьр кә бона ахьрийе, һәрге һун бьхԝазьн бьзәԝьщьн?
Принсипа Кʹьтеба Пироз: «Жь ԝә һәр йәк һәвале хԝәрʹа рʹаст хәбәр дә» (Әфәси 4:25).
«Ԛиз дькарә бьфькьрә, ‹Әз дьфькьрьм шәш мәһада әме бенә нишанкьрьне›, ле хорт дькарә бьфькьрә кӧ әԝана ԝе саләкеда бенә нишанкьрьне. Ве дәрәщеда ԛиз дькарә дьлтәнг бә, чьмки дьфькьрә кӧ әԝана ԝе дьһа зу бенә нишанкьрьне. Гәләк фәрз ә, кӧ һәрдӧ жи сәр нетәке бьн»—Ариана, саләк зәԝащеда нә.
Ньһерʹандьна ԝә дькарә жь һәв щӧдә бә
Дӧ мәрьв нькарьн хут мина һәв бьн. Ләма жи нәфькьрә, ԝәки һуне мина һәв бьфькьрьн у һәр тьшти мина һәв бькьн. Мәсәлә, култура тә йан жи тӧ чь щурʹәйи һати мәзьнкьрьне, дькарә сәр ньһерʹандьна ԝә һʹӧкӧм бә.
Бьфькьрә: Һәрге ньһерʹандьна ԝә дәрһәԛа тʹемед нә фәрз жь һәв щӧдә дьбьн, гәло һун һазьр ьн әʹдьлайе хԝәй кьн, ԝи чахи жи һәрге дәрһәԛа ве йәке Кʹьтеба Пироз тʹӧ ширәт надә?
Принсипа Кʹьтеба Пироз: «Бьра бәрбьһерийа ԝә һʹәму мәрьвава әʹйан бә» (Филипи 4:5).
«Һун чьԛас жи бьфькьрьн кӧ һун һәв тен, диса жи ԝе һәбьн тьшт чьда һуне щӧдә бьн. Һәмьки фәрз ә кӧ һун һәв бен, ле дьһа фәрз ә дина хԝә бьдьнә ԝан һʹӧнӧра, йед кӧ ԝе али ԝә бькьн гава һуне тьштәкида һәврʹа ԛайил нибьн»—Метиу, пенщ сал зәԝащеда нә.
Һәвнаскьрьн дькарә стресе пешда бинә
Һәвнаскьрьн гәләк ԝәʹдә ԝе жь ԝә бьстинә у дьԛәԝьмә һун бькʹәвьнә стресе жи. Чь дькарә али ԝә бькә?
Бь сәрԝахти синора дайньн. Гәләк нәкʹәвьнә һʹәйра һәләԛәтийа тʹәви ԝи мәрьви, чьмки әв йәк дькарә сәр щабдарийед тә йан жи һәләԛәтийа тә тʹәви һәвала һʹӧкӧм бә. Алана йа кӧ ида пенщ сал ә зәԝащеда нә, дьбежә: «Паши зәԝаще жи те бьхԝази ԝәʹдә тʹәви һәвалед хԝә дәрбаз ки у һәмьки әԝана жи ԝе һʹәԝще тә бьн. Әв йәк кӧ тӧ рʹасти кәсәк тейи, найе һʹәсабе кӧ тӧ гәрәке хԝә дури һәвалед хԝә бьгьри».
Бир нәкә, гава тӧ бьзәԝьщи тӧ гәрәке һʹәму дәрәщед жийина хԝәда ортʹа зерʹин бьвини. Гәло ԝе баш нибә ида ԝәʹде һәвнаскьрьне дина хԝә бьди сәр ве йәке?
Бьфькьрә: Гәло тӧ жь ԝи йан ԝе гәләк дәʹԝа дьки, кӧ әв һе зедә ԝәʹдә тʹәви тә дәрбаз кә? Гәло тӧ тʹәхмин дьки кӧ әв гәләк тьшт жь тә дәʹԝа дькә? Гәло һун ча дькарьн сәрԝахти бьдьнә кʹьфше, ԝәки ԝәʹде һәвнаскьрьне тʹӧ кәс жь ԝә дьлтәнг нәбә?
Принсипа Кʹьтеба Пироз: «Ԝәхте һәр тьшти һәйә . . . дәма һәр кьрьне һәйә» (Ԝаиз 3:1).
«Һәрге мәрьварʹа буйә хәйсәт кӧ ԝәʹде һәвнаскьрьне тʹәне ԝәʹдә дәрбаз кьн, ԝи чахи зәԝащеда проблем дькарьн пешда бен. Ԝе баш бә шьхӧлед һәррʹожи тʹәвайи бькьн, мәсәлә тʹәвайи һәрʹьнә дькʹане, шьхӧле мале бькьн у тʹәвайи хьзмәт кьн. Әв йәк дькарә али ԝан бькә, ԝәки зәԝащеда тʹәвайи һәвкʹарийе бькьн»—Даниел, дӧ сал зәԝащеда нә.
Һәвнаскьрьн али мәрьва дькә, ԝәки әԝана сафи кьн бьзәԝьщьн йан на. Пʹара 3-да ԝе бе шьровәкьрьне, кӧ чь ԝе ԝәрʹа лазьм бә һьлдьн һʹәсаб, чахе әԝе сафикьрьне бькьн.