Һәвнаскьрьн—Пʹара 3: Әм Гәрәке Һәләԛәтийа Хԝә Бьдьнә Сәкьнандьне?

Һьнә ԝәʹдә йә тӧ рʹасти кәсәки тейи, ԝәки һәв нас бькьн, ле ида шьк кʹәтийә дьле тә, кӧ һун һәв тен йан на. Гәло һьнге тӧ гәрәке һәләԛәтийа хԝә тʹәви ԝи йан ԝе бәрдәԝам ки, йан бьди сәкьнандьне? Әв готар ԝе али тә бькә, ԝәки сафикьрьна рʹаст бьки.

Ве готареда

• Чахе шьк дькʹәвә дьле тә

• Чахе сафикьрьне дьки

• Һәрге тә сафи кьрийә кӧ һәләԛәтийа хԝә бьди сәкьнандьне

Чахе шьк дькʹәвә дьле тә

Һьнә ԝәʹдә паши ԝе йәке, чахе гәдә у кәчʹьк рʹасти һәв тен кӧ һәв нас кьн, дьԛәԝьмә кӧ әԝана ида тʹәхмин дькьн ԝәки һәв найен. Мәсәлә:

• Йәк һʹәз дькә бәр бәʹре һеса бә, йе дьн жи нав мешә у тʹәбийәтеда бьгәрʹә.

• Йәк һʹәз дькә нав мәрьвада бә у хәбәрхԝәш ә, йе дьн жи һәст у фькьред хԝә әʹйан накә, у тʹәнебуне һʹәз дькә.

• Йәк һьнәки бьнва йә у дькарә дәрәԝа бькә, ле йе дьн жи тʹьме һʹәлал ә.

Дина хԝә бьде кӧ әԝ һәр се дәрәщә жь һәв щӧдә дьбьн. Дәрәща пешьнда һәрдӧ жь һәв щӧдә дьбьн ве йәкеда кӧ чь ԝана хԝәш те; йа дӧда хәйсәтда жь һәв щӧдә дьбьн; йа сьсийа ве йәкеда жь һәв щӧдә дьбьн, кӧ бона ԝан чь дьһа фәрз ә.

Бьфькьрә: Һәрге һун һәв бьстиньн, жь ԝан һәр се щӧдәбуна, кʹижан ԝе тәрʹа дьһа чәтьн бә ԛәбул ки? Йан ван се щӧдәбунада, кʹижанида һуне һәрдӧ жи бькарьбьн гӧһастьна нав хԝәда бькьн, ԝәки һәв фәʹм кьн?

Жьн-мер дькарьн хәйсәтда у ԝан тьштада чь кӧ ԝана хԝәш те жь һәв щӧдә бьн, ле диса жи бәхтәԝар бьн, чьмки һәв бен найе һʹәсабе мина һәв бьн. Жьн йан мер дькарьн һʹәԝаса хԝә пешда биньн һьндава ԝан тьшта, чь кӧ һәвалзәԝаще ԝан хԝәш те, у һәла һе жь хәйсәте һәв һин бьн у кʹаре бьстиньнa.

Ле гәрәке чь кӧ бона тә фәрз ьн, бона ԝи жи кʹижани тӧ дьхԝази бьстини, фәрз бьн, демәк баԝәри, принсипед нав-намусийе у ньһерʹандьна тә сәр ве йәке кӧ чь ԛәнщ ә у чь хьраб ә. Һәрге ве йәкеда һун жь һәв щӧдә дьбьн, әԝ нишанәкә нәбаш ә.

Мәсәлә, бьдә бәр чʹәʹве хԝә кӧ баԝәрийа ԝә жь һәв щӧдә дьбә. Кʹьтебәкеда те готьне: «Лекʹолинед кӧ тʹьме тенә кьрьне, дьдьнә кʹьфше ԝәки дьһа зәʹф әԝ жьн-мер жь һәв дьԛәтьн, йед кӧ жь щурʹә-щурʹә религийа нә» (Fighting for Your Marriage).

Принсипа Кʹьтеба Пироз: «Тʹәви нәбаԝәра нәкʹәвьнә бьне нирәки» (2 Корьнтʹи 6:14).

Чахе сафикьрьне дьки

Кʹьтеба Пирозда те готьне, ԝәки зәԝащеда жьн-мер «ԝе рʹасти охьрмед гьран бен» (1 Корьнтʹи 7:28). Ләма жи әʹщебмайи нәминә бона ԝан чәтьнайа, кӧ ида ԝәʹде һәвнаскьрьне пешда тен.

Проблемед бьчʹук тʹьме найенә һʹәсабе, кӧ һун һәв найен у чʹарә тʹӧнә. Ле пьрс ве йәкеда нә, кӧ гәло һун дькарьн ԝан чәтьнайа ортʹа һәвда сафи кьн у әʹдьлайе хԝәй кьн? Һәрге һун сафи кьн бьзәԝьщьн, һәмьки ԝә һәрдӧрʹа жи гәләк фәрз ә әви фәрәсәти нав хԝәда пешда биньн.

Принсипа Кʹьтеба Пироз: «Һәврʹа ширьн у дьлшәԝат бьн, ль һәв бьбахшиньн» (Әфәси 4:32).

Алийе дьнва жи, һәрге һун гәләк щар у һьм жи пьрсед фәрзда һәв фәʹм накьн, әв дькарә бьбә нишана ве йәке кӧ һун һәв найен. Һәрге бь рʹасти ӧса йә, чьԛас зу һун ве йәке тедәрхьн һаԛас баш ә, демәк һе пешийа зәԝаще!

Фькьра сәрәкә: Һәрге тӧ һьндава ԝи мәрьвида тʹәви кʹе дьби нас дькʹәви шьке, йан жи дӧдьли йи кӧ һәла тӧ бона зәԝаще һазьр и йан на, ԝе баш бә ԝан шька пьшт гӧһе хԝәва нәвежи.

Принсипа Кʹьтеба Пироз: «Йе аԛьл хьрабийе кӧ дьбинә һʹәвза хԝә дькә, ле йе дьлсах пешда дьчьн у зьраре дьбинә» (Мәтʹәлок 22:3).

Һәрге тә сафи кьрийә кӧ һәләԛәтийа хԝә бьди сәкьнандьне

Һәвԛәтандьн дькарә һеса нибә у дьле ԝә бешинә. Ле йәкә әв дькарә бьбә сафикьрьна лапә баш, илаһи һәрге дьле йәкида йан жи дьле ԝә һәрдада шьк һәйә кӧ һун һәв найен.

Чаԝа һун дькарьн һәләԛәтийа хԝә бьдьнә сәкьнандьне? Һәрге мәщал һәйә, ԝе дьһа баш бә ве йәке бь смса у емайла нәкьн. Дәԝсе, ԝәʹдә у щики лайиԛ бьжберьн, ԝәки рʹу бь рʹу дәрһәԛа ве йәке һәврʹа хәбәр дьн.

Принсипа Кʹьтеба Пироз: «Һәвдӧрʹа рʹастийе бежьн» (Зәкәрйа 8:16, ДТʹ).

Гәло сәкьнандьна һәләԛәтийе те һʹәсабе, ԝәки тӧ йәки бекер и? На. Бир нәкә, ԝәки һәвнаскьрьн сәва ве йәке йә, ԝәки сафи ки ԝи мәрьви бьстини, йан на. Һәрге һәләԛәти бе сәкьнандьне, йәкә тӧ дькари дәрсед ԛимәт жь ве йәке бьстини.

Пьрсе бьдә хԝә: «Әз дәрһәԛа хԝә чь пеһʹәсийам жь ве һәләԛәтийе? Анәгори ве һәләԛәтийе чь лазьм ә әз нав хԝәда бьгӧһезьм, ԝәки бона зәԝаще һазьр бьм? Һәрге әз бьхԝазьм кәсәки дьн нас бькьм ԝәки бьзәԝьщьм, әз гәрәке чь щурʹәки майин бькьм?»