Әм Чь Дькарьн Бькьн Һәгәр жь Пандәмийе Ԝәстийанә?

Дьԛәԝьмә һун жь пандәмийа COVID-19 гәләк ԝәстийанә. Ле һун тʹәне ниньн. Әва ида чәнд мәһ ә кӧ мәрьв сәр тʹәмамийа дьнйайе һини жийина тʹәзә дьбьн. Директорәки бь наве Һанс Клуг, йе Организасйона Һʹәмдьнйайе йа Сьһʹәт-Ԛәԝатийе, дьбежә кӧ һʹәчʹи зәʹф бьнәли гәләк тьшт жь хԝә кем кьрьн, ԝәки COVID-19 бәла нәбә. Директор Клуг дьбежә: «Әʹщебмайи нинә кӧ дәрәщед ӧсада мәрьв дьлтәнг дьбьн, нахԝазьн тьштәки бькьн, хирәта хԝә ӧнда дькьн у һʹал дькʹәвьн».

Һәгәр һун рʹуйе һʹале пандәмийайеда гәләк ԝәстийанә, дьлтәнг нә бьн. Ви һʹале чәтьнда Кʹьтеба Пироз али гәләка кьрийә у дькарә али ԝә жи бькә.

• Ԝәстандьна жь бо пандәмийе әԝ чь те һʹәсабе?

• Чьрʹа хоф ә гава мәрьв жь пандәмийе дьԝәстә?

• Гава әм жь бо пандәмийе ԛьдум дькʹәвьн, кʹижан принсипед жь Кʹьтеба Пироз дькарьн али мә бькьн?

• Рʹезед жь Кʹьтеба Пироз дькарьн ча дәрман һʹале мә сьвьк кьн

Ԝәстандьна жь бо пандәмийе әԝ чь те һʹәсабе?

Ԝәстандьна жь бо пандәмийе әԝ нәхԝәши нинә. Әԝ һәйә термин кʹижан әʹйан дькә реаксийа мәрьва, гава әԝ ньзанә һивийа чь ахьрийе бә у һʹале ԝи ԝе кʹәнге бе гӧһастьне, у графика жийина ԝи тʹәвиһәв дьбә. Һәр мәрьвәк дәрәщед ӧсада хԝә бь щурʹәки дьдә кʹьфше. Ле ԝьра һәнә һьнә нишан кӧ дьдьнә кʹьфше, ԝәки мәрьв жь бо пандәмийайе ԛьдум кʹәтийә.

• Мәрьв хирәта хԝә ӧнда дькә

• Режима ԝийә хәԝе у нанхԝарьне һәв дькʹәвә

• Мәрьв зу һерс дькʹәвә

• Жь бо шьхӧлед һеса жи дькʹәвә стресе

• Ԝирʹа чәтьн дьбә һʹьш-аԛьле хԝә бьдә сәр тьштәки

• У фькьред ӧса щәм ԝи пешда тен кӧ чʹарә тʹӧнә у тʹӧ тьшт ԝе алийе башда нәйе гӧһастьне

Чьрʹа хоф ә гава мәрьв жь пандәмийе дьԝәстә?

Ԝәстандьна жь бо пандәмийе дькарә зийане бьдә ча ԝәрʹа ӧса жи мәрьвед дьнрʹа. Һәрге әм фәсал нибьн, әме ида нәхԝазьн кӧ тьштәки бькьн, ԝәки хԝә жь пандәмийе хԝәй кьн. Әԝ дькарә бьбә мәʹни кӧ әме дәстпекьн пьшт гӧһе хԝәва бавежьн ԝан рʹебәрийа, йед кӧ мә жь ве вирусе хԝәй дькьн, кӧ дьбә бәрбь мьрьне. Мәрьв гәләк дьԝәстьн жь синоред кӧ һатьнә данине жь бо пандәмийе. Ләма әԝана дьһа зедә азайе дьхԝазьн, жь бо чь жи дькарьн әʹмьре хԝә у әʹмьре мәрьвед дьн бькьнә ԛәзийе.

Ви ԝәʹде чәтьнда, гәләк мәрьв баԝәр кьрьн, ԝәки әв гьли-готьна жь Кʹьтеба Пироз рʹаст ә: «Һәгәр тӧ тәнгасийеда дьлсьст би, кӧ ӧса йә тӧ нә хӧрт и» (Мәтʹәлок 24:10). Кʹьтеба Пирозда ширәтед керһати һәнә бона дәрәщед чәтьн, йед ӧса ча пандәмийа.

Гава әм жь бо пандәмийе ԛьдум дькʹәвьн, кʹижан принсипед жь Кʹьтеба Пироз дькарьн али мә бькьн?

• Дистансийайе хԝәй кьн, ле хԝә жь мәрьва башԛә нәкьн

  Кʹьтеба Пироз дьбежә: «Һәвал ... бьра буйә бона рʹожа охьрме гьран» (Мәтʹәлок 17:17).

  Чьрʹа әв йәк фәрз ә: Чахе әм тʹәв һәвала хәбәр дьдьн, әм дьшьдьн у гәш дьбьн (1 Тʹесалоники 5:11). Ле һәрге мәрьв жь мәрьвед дьн хԝә сәр гәләк ԝәхт башԛә дькә, ԝи чахи әԝ зийане дьдә сьһʹәт-ԛәԝата хԝә (Мәтʹәлок 18:1).

  Ширәт: Тʹьме тʹәви һәвалед хԝә хәбәр дьн, мәсәлә бь сайа видео-конференсйайе, тʹеле, емаиле йан жи смса. Һәгәр рʹожәкә ԝә хьраб дәрбаз бу, һәвалед хԝәрʹа гьли кьн. Хԝәха жи тʹьме бьпьрсьн һәла һәвалед ԝә ча ньн. Ԝанрʹа гьли кьн кӧ чь али ԝә дькә шабуна хԝә ԝәʹде ве пандәмийе ӧнда нәкьн. Мәщале бьвиньн кӧ ча дьле һәвалед хԝә ша бькьн. Ӧса һуне һәрдӧ жи шабуне бьстиньн.

• Бь щурʹе лапи баш дәрәщед хԝә бьдьнә хәбате.

  Кʹьтеба Пироз дьбежә: «Дәст бьдьнә бәр ԝәхт» (Әфәси 5:16).

  Чьрʹа әв йәк фәрз ә: Ԝәʹде хԝә керһати дәрбаз кьн. Бь ви щурʹәйи һуне шабуне ӧнда нәкьн у зедә хәма нәкьн (Луԛа 12:25).

  Ширәт: Бәрхԝә нәкʹәвьн бона ԝан тьшта чь кӧ һун нькарьн бькьн. Мәщалед тʹәзә бьгәрʹьн. Бәʹса хәбәре бьфькьрьн, чь шьхӧлед ԝә һәнә йед кӧ ԝә бәре перʹа нәдьгиһанд бькьра. Дьбәкә тьштәки ӧса һәйә кӧ һун һʹьз дькьн бькьн, ле бәре ԝәʹде ԝә тʹӧнә бу ве йәкева мьжул бьн. Йан жи дьбәкә һун дькарьн һе зедә ԝәʹдә тʹәви малбәта хԝә дәрбаз кьн.

• Хԝәрʹа графике чекьн

  Кʹьтеба Пироз дьбежә: «Тʹәне һәр тьшт бьра бь тʹәрбәт ... у маԛули бә» (1 Корьнтʹи 14:40).

  Чьрʹа әв йәк фәрз ә: Гәләк мәрьв дина хԝә данә, ԝәки дьһа баш хԝә тʹәхмин дькьн у шабуна хԝә ӧнда накьн, гава пе графике дьжин.

  Ширәт: Ль гора дәрәщед хԝә графике чекьн. Хԝәрʹа ԝәʹдә башԛә кьн бона һинбуне, хәбате, шьхӧлед мале, ӧса жи бона ԝан шьхӧла, йед кӧ ԝе ԝә незики Хԝәде кьн. Хенщи ве йәке, дәрһәԛа сьһʹәт-ԛәԝата хԝә бир нәкьн. Тʹәви нәфәред хԝә ԝәʹдә дәрбаз кьн, тʹәвайи дәрва бьгәрʹьн у спортева мьжул бьн. Щар-щара дина хԝә бьдьнә графика хԝә, у ль гора дәрәща гӧһастьна бькьн.

• Ль гора дәмсала гӧһастьна бькьн

  Кʹьтеба Пироз дьбежә: «Йе аԛьл хьрабийе кӧ дьбинә һʹәвза хԝә дькә» (Мәтʹәлок 22:3).

  Чьрʹа әв йәк фәрз ә: Ԝәʹде һьнә дәмсала, мәщала мә кем дьбә кӧ дәркʹәвьн бәр һәԝайе тʹәмьз у бәр тәʹве. Әԝ йәк дькарә сәр сьһʹәт-ԛәԝата мәйә физики у емосийали хьраб һʹӧкӧм бькә.

  Ширәт: Һәрге зьвьстан незик дьбә, һун дькарьн һур-муред мала хԝәда йан жи щийе хәбата хԝә щигӧһасти кьн, ԝәки епʹещә рʹонайа тәʹве бькʹәвә һьндӧрʹ. Һәрге һәԝа сар ә жи, диса жи һәр тьшти бькьн кӧ дәркʹәвьн бәр һәԝайа тʹәмьз. Һәгәр дәсте ԝәда һәйә, бона зьвьстане кʹьнще гәрм бькʹьрʹьн, ԝәки бькарьбьн гәләк щар дәркʹәвьн дәрва.

  Ле һәрге һавин незик дьбә, бир нәкьн кӧ гәләк мәрьв ԝи чахи дәрдькʹәвьнә дәрва. Ләма жи бьфькьрьн кӧ кʹидәре у ча һун дькарьн һеса бьн, ԝәки нава гәләк мәрьвада нибьн, чьмки әԝ йәк хоф ә.

• Тʹьме һаш жь хԝә һәбьн кӧ хԝә жь COVID-е хԝәй кьн

  Кʹьтеба пироз дьбежә: «Йе ахмах дьԛьлԛьлә у щӧләʹт дьбә» (Мәтʹәлок 14:16).

  Чьрʹа әԝ йәк фәрз ә: COVID-19 гәләк хоф ә у мәрьва дькӧжә. У һәгәр әм фәсал нибьн, әм жи дькарьн пе ве вирусе нәхԝәш кʹәвьн.

  Ширәт: Һәрге дәԝләт дәрһәԛа ве йәке рʹебәрийа дьдә, тʹьме ԝан рʹебәрийа хԝәй кьн. Бир нәкьн кӧ бь сайа ве йәке һуне хԝә, нәфәред хԝә у мәрьвед дьн жь ве вирусе хԝәй кьн.

• Дьһа незики Хԝәде бьн

  Кʹьтеба пироз дьбежә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8).

  Чьрʹа әԝ йәк фәрз ә: Хԝәде дькарә һәр алийава али ԝә бькә у илаһи ԝәʹде чәтьнда (Ишайа 41:13).

  Ширәт: Һәр рʹож пʹарәкә Кʹьтеба Пироз бьхуньн. Әԝ бәрнама хԝәндьне ԝе али ԝә бькә кӧ хԝәндьна Кʹьтеба Пироз ԝәрʹа бьбә хәйсәт.

Ԝәʹде пандәмийе Шәʹдед Йаһоԝа диса жи бәрдәԝам дькьн щьватед хԝә дәрбаз кьн. Ле әԝана ида ве йәке бь видео-конференсйайе дькьн. Һәма бь ви щурʹәйи әԝана щьватед хԝәйи һәр һʹәфтийе дәрбаз дькьн, ӧса жи щьватед мәзьн, у Евара Биранина мьрьна Иса Мәсиһ. Тʹәв Шәʹдед Йаһоԝа текли бьн кӧ бьзаньбьн ча бькʹәвьнә ԝан щьвата.

Рʹезед жь Кʹьтеба Пироз дькарьн ча дәрман һʹале мә сьвьк кьн

Ишайа 33:24: «Ԝе тʹӧ рʹуньштийе ль ԝьр нәбежә: ‘Әз нәхԝәш ьм’».

Шьровәкьрьн: Хԝәде соз дьдә кӧ ԝе инсанәте жь һʹәму нәхԝәшийа хьлаз кә.