Кʹи ԝе Әʹрде Хьлаз кә?

Гәләк мәрьв бәр хԝә дькʹәвьн бона ԝе йәке кӧ инсанәт зийане дьдә әʹрде у тʹәбийәте. Ль гора ньһерʹандьна һьнә експерта, кьред мәрьва бона тʹәбийәте тʹӧ щар ӧса хоф нибунә ча рʹожед мәда, чьмки гәләк һʹәйԝан у шинкайи бьн ԛәзийеда ньн кӧ ԝе лаптә кʹӧта бьн.

Гәло мәрьв ԝе әʹрде кʹӧта кьн? Йан мәрьв ԝе һин бьн зийане нәдьнә тʹәбийәте?

Гәло мәрьв ԝе бькарьбьн дәрәще рʹаст кьн?

Гәләк зандар баԝәр ьн кӧ мәрьв дькарьн планета мә у жийина сәр ве хԝәй кьн у зийане нәдьне. Ле һьнә леколинкʹар дьбежьн кӧ бона ԝе йәке лазьм ә дәрбәкерʹа чәнд алийада гӧһастьна бькьн. Мәсәлә:

• Бьгӧһезьн методед хәбьтандьна әʹрде, мешә, щьмщьма у окйануса.

• Һини методед әʹрдбещәркьрьнейә тʹәзә бьн у канийед тʹәзәйә енержийайе бьдьнә хәбате.

• Инсанәте һини хԝарьна тʹәзә бькьн, ԝәки һе зедә пʹьнщарʹ у шинкайа бьхԝьн, нә кӧ гошт у мәʹси. Ӧса жи лазьм ә һин бьн хӧрәк зедә хәрщ нәкьн у бадиһәԝа нәрʹежьн.

• Инсанәт ԛәбул кә ԝәки әʹмьре бәхтәԝар ԛазанщкьрьна гәләк тьштава гьредайи нинә.

Ча һун дьфькьрьн? Гәло реали йә ԝәки сәрԝер, бизнесмед у башԛә-башԛә мәрьв бьбьнә йәк ԝәки бьгьһижьнә ԝе нете? Йан һʹӧнӧред кӧ кʹур нав мәрьвада рʹуньштьнә демәк тьмайи, хԝәһʹьзи, у бетʹалаши ԝе нәһельн бьгьһижьнә ԝе нете? (2 Тимотʹейо 3:1-5)

Һеви һәйә

Кʹьтеба Пироз мә дьдә баԝәркьрьне, ԝәки ахьрийа баш һивийа планета мә йә. Теда те шьровәкьрьне кӧ чьма ԛәԝата мәрьва бәс нинә, ԝәки әʹрде хьлаз кьн. Ӧса жи әв дьбежә кӧ конкрет чь гәрәке бе гӧһастьне у әв гӧһастьн ԝе ча бенә кьрьне.

Чьма ԛәԝата мәрьва бәс нинә, ԝәки планета мә хьлаз кьн. Йаһоԝаa Хԝәде әʹрд әʹфьранд у тʹәми да мәрьва кӧ бона ԝе хәм бькьн (Дәстпебун 1:28; 2:15). Мәрьв ԝе бькарьбуна әв тʹәми банийана сери, һәрге пәй рʹебәрийа Әʹфьрандаре хԝә бьчуна (Мәтʹәлок 20:24). Ле дәԝсе ԝана пьшта хԝә данә Хԝәде у сафи кьрьн хԝәсәрихԝә бьн (Ԝаиз 7:29). Мәрьв бь хԝә нькарьн мьԛати әʹрде бьн. Һәрге әԝана тьштәки баш кьн жи, ле йәкә нькарьн һʹале планета мә бь тʹәмами рʹаст кьн (Мәтʹәлок 21:30; Йерәмйа 10:23).

Гӧһастьнед лазьм. Хԝәде ԝе нәһелә мәрьв әʹрде кʹӧта кьн (Әʹйанти 11:18). Әԝ ԝе бьнәлийед әʹрде у сәрԝера нә кӧ бьгӧһезә, ле дәԝса ԝан йед тʹәзә дайнә (Әʹйанти 21:1). Йаһоԝа дьбежә: «Ва әз һәр тьшти ну чедькьм» (Әʹйанти 21:5).

Әв гӧһастьн ԝе ча бенә сери. Йаһоԝа ԝе дәԝса сәрԝертийа мәрьвайи, сәрԝертийа әʹзмана кʹьфш кә, йа кӧ те навкьрьне Пʹадшатийа Хԝәде. Сәрԝере ве пʹадшатийе ԝе Иса Мәсиһ бә. Әԝ ԝе проблемед планета мә сафи кә (Данийел 2:44; Мәтта 6:10).

Пʹадшатийа Хԝәде ԝе али мәрьва бькә ль гора принсипед ԝи бьжин. Чахе мәрьв һин бьн ньһерʹандьна Хԝәде һьлдьн һʹәсаб у ширәтед ԝи биньн сери, һьнге әԝана ԝе бькарьбьн мьԛати тʹәбийәте бьн (Ишайа 11:9). Кʹьтеба Пирозда те шьровәкьрьне кӧ Пʹадшатийа Хԝәде, кʹижан кӧ ԝе зийане нәдә әʹрде, ԝе чь щурʹәйи бона һʹәԝщед бьнәлийед хԝә хәм бькә. Бь сайа Пʹадшатийа Хԝәде ԝе:

• Хԝарьн тʹер-тʹьжә бә (Зәбур 72:16).

• Тʹәбийәт тʹәзәда гәш бә (Ишайа 35:1, 2, 6, 7).

• Әʹдьлайи ортʹа мәрьва у һʹәйԝанада һәбә (Ишайа 11:6-8; Һосәйа 2:18).

• Тʹәбийәт у планета мә, жь кʹӧтакьрьне хьлаз бә (Марԛос 4:37-41).

Әм дькарьн баԝәр бьн ԝәки зутьрәке Пʹадшатийа Хԝәде ԝе һʹәму ԝан гӧһастьна бинә сери. Бона һе зедә әʹламәти бьхунә готар «Пʹадшатийа Хԝәде ԝе Чь Чах ль сәр Әʹрдерʹа Сәрԝертийе Бькә?»