ҺʹЬШЙАР БЬМИНЬН!
Әʹрд Ԝеран Дьбә; Кʹьтеба Пироз Чь Дьбежә?
Антонйо Гӧтеррес, Секретаре сәрәкә йе Тʹәшкиләта Мьләтед Йәкбуйи, паши һʹәсабе Кʹома Експертед Гӧһастьна Климатейә Навһʹӧкӧмәтийе, йа 4 Нисане, сала 2022, ӧса гот: «Әм гәләк ләз бәрбь хьрабкьрьна климате дьчьн. Шәһәред мәзьн дькʹәвьнә бьне аве. Гәрмайа һәԝе чьԛас дьчә, зедә дьбә. Фьртонед ԛайим рʹадьбьн. Ле гәләк щийада жи ав кем дьбә. Бь милйона щьснед һʹәйԝана у щурʹед шинкайа бәтавәдьбьн. Әва чʹирок нинә у әм жь бәр хԝә дәрнахьн. Зандар мәрʹа әве йәке әʹлам дькьн. Мәʹнийа ван ԛәзийа әв ә, кӧ мәрьв енержийайе, пәтроле у һʹәму щурʹә шәԝат, нәрʹаст дьдьнә хәбате».
Рʹожнәʹмәкеда «The New York Times» йа 15 Һʹәзиране, сала 2022, ӧса һатийә готьне: «Зандар хәмгин дьбьн у гәләк щар дьбежьн ԝәки салед дьн климат ԝе ӧса ԛайим бе гӧһастьне, кӧ ԝәкә 423 паркед мьләтийе [йед Дәԝләтед Йәкбуйида], жь бо бьльндбуна гәрме ԝе зийане кʹәвьн. Әв тьштед хьраб кӧ пешда тен, анәгори пʹехәмбәртийед Кʹьтеба Пироз ьн: агьр, селав, һʹәландьна бузе, зедәбуна аве бәʹрада у ԛьжә-ԛьжа гәрме» («Flooding Chaos in Yellowstone, a Sign of Crises to Come»).
Гәло проблемед тʹәбийәтева гьредайи, дькарьн бенә сафикьрьне? Һәрге әре, кʹи ԝе ԝан проблема сафи кә? Дина хԝә бьдьне кӧ Кʹьтеба Пирозда чь ньвисар ә.
Ԝеранкьрьна тʹәбийәте һатийә пʹехәмбәртикьрьне
Кʹьтеба Пирозда те готьне ԝәки Хԝәде ԝе ԛьрʹа ԝан бинә, «йед кӧ дьне хьраб дькьн» (Әʹйанти 11:18). Әв рʹеза жь Кʹьтеба Пироз се тьшта мә һин дькә:
Мәрьв ԝе бь кьред хԝә зийанәкә мәзьн бьдьнә әʹрде.
Ԝеранкьрьна әʹрде ԝе бе сәкьнандьне.
Нә кӧ мәрьв, ле Хԝәде ԝе проблемед тʹәбийәтева гьредайи сафи кә.
Ахьрийа баш һивийа планета мә йә
Кʹьтеба Пироз дьбежә, ԝәки әʹрд ԝе һʹәта-һʹәтайе һәбә (Ԝаиз 1:4). Демәк сәр әʹрде мәрьв ԝе һәртʹьм бьжин.
«Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).
Һʹале планета мә ԝе бь тʹәмами бе рʹасткьрьне.
«Ԝе чол у дәшта зьһа ша бьбә, ԝе бәрʹи дьлгәш бьбә, ԝәк гӧла кӧлилк бьдә» (Ишайа 35:1, ИМ).