Кʹьтеба Пироз Чь Дьбежә Дәрһәԛа Кризиса Аве Нав Тʹәмамийа Дьнйайеда?
Һәр кәс жь мә һʹәԝще ава тʹәмьз ә. Антонйо Гӧтеррес, Секретаре Сәрәкә йе Мьләтед Йәкбуйи, ӧса дьбежә: «Нав тʹәмамийа дьнйайеда мәрьв һе зедә у зедә һʹәԝще ава тʹәмьз дьбьн у әв йәк дьдә кʹьфше кӧ әме рʹасти кризиса аве бен». Бь милйарда мәрьва щурʹә-щурʹә ԝәлатада ида нькарьн ава бона вәхԝарьне дәстхьн.
Strdel/AFP via Getty Images
Гәло ԝәʹдәки ӧса ԝе бе, кӧ ава тʹәмьз тʹерʹа һәр кәси бькә? Йан жи әме тʹьме һʹәԝще аве бьн? Кʹьтеба Пироз чь дьбежә?
Кʹьтеба Пироз соз дьдә ԝәки ава тʹәмьз ԝе тʹер-тʹьжә һәбә
Кʹьтеба Пирозда те готьне, ԝәки рʹожәке проблема кемасийа аве ԝе бе сафикьрьне. Дәԝсе, ава тʹәмьз ԝе тʹер-тʹьжә бә.
«Ԝе ль бәрʹийе ав бьзе у ль чол у дәште чʹәм рʹабьн. Ԝе ԛӧма сьнщьри бьбә гол, аха тʹи жи бьбә канийед аве» (Ишайа 35:6, 7, ИМ).
Чьма әм дькарьн баԝәрийа хԝә ве соза Кʹьтеба Пироз биньн? Бьфькьрьн кӧ Кʹьтеба Пироз чь дьбежә дәрһәԛа ԝе йәке, кӧ планета мә ча һатийә чекьрьне.
Кʹьтеба Пирозда чь те готьне дәрһәԛа әʹрде у зьвьрʹока аве
«Әԝ Хԝәде йә!–Йе кӧ әʹрде чекьрийә . . . у вькивала нәафьрандийә шькьл дайе кӧ ль сәр ԝәрә рʹуньштьн [жийин һәбә]» (Ишайа 45:18, ИМ).
Хԝәде әʹрд ӧса чекьрийә кӧ ль сәр ԝе әʹмьр һәбә, ләма жи әԝи системед тʹәбийәте ӧса чекьр, кӧ әԝ дькарьн тʹер-тʹьжә ава тʹәмьз пешда биньн.
«[Хԝәде] дьлопед аве бь жорва дькʹьшинә у дьлопед баране бь һʹьлма хԝә дьсәфинә. Әʹԝр баране дьһʹәрʹькиньн у бь тʹерʹа хԝә бь сәр мәрьва дьлоп дькьн» (Ибо 36:27, 28, ИМ).
Ве рʹезеда бь зьмане һеса те готьне дәрһәԛа зьвьрʹока аве тʹәбийәтеда йа кӧ Хԝәде чекьрийә. Һʹьлма аве жь әʹрд, бәʹр у окйануса һьлдькʹьшә жор, у ча баран сәр әʹрде дьбарә. Бь сайа ве просесе ава тʹәмьз бона жийина мәрьв у һʹәйԝана, тʹьме һәйә (Ԝаиз 1:7; Амос 5:8).
«Әзе жи ԝәрʹа баране ԝәʹдәда бьбариньм, әʹрде дәрәмәта хԝә бьдә у даред дәште жи бәред хԝә бьдьн» (Ԛануна Кʹаһинтийе 26:4).
Бь ԝан гьлийа Хԝәде соз да кӧ ԝе щьмәʹта Исраел, йед кӧ щоткʹар бун, бь бәред әʹрде кʹәрәм бькә. Хԝәде занә сәва кӧ әʹрд бәред хԝә бьдә, лазьм ә кӧ епʹещә ав ԝәʹдәда бьбарә.
Әв созе Хԝәде нә кӧ тʹәне бона Исраела бәре бу. Зутьрәке Хԝәде ԝе әве соза хԝә бона тʹәмамийа әʹрде бинә сери (Ишайа 30:23). Иро щурʹә-щурʹә щийада кризиса аве пешда те у мәʹни нә тʹәне ԝе йәкеда нә кӧ баран кем дьбарьн. Кʹьтеба Пирозда чь те готьне дәрһәԛа сафикьрьна проблемед авева гьредайи?
Кризиса аве ча ԝе бе сафикьрьне
Жь Кʹьтеба Пироз әм педьһʹәсьн, ԝәки Хԝәде ԝе бь сайа Пʹадшатийа хԝә һʹәму проблемед планета мә у ӧса жи кризиса аве, бьдә һьлдане (Мәтта 6:9, 10). Пʹадшатийа Хԝәде әв сәрԝертийа әʹзмани йә, йа кӧ ԝе ль сәр әʹрде һʹӧкӧм бькә (Данийел 2:44; Әʹйанти 11:15). Хенщи ԝе йәке, Пʹадшатийа Хԝәде ԝе һʹәму мәʹнийед кемасийа аве бьдә һьлдане, чь кӧ тʹӧ пʹадшатийед мәрьва нькарьн бькьн.
Проблем: Гӧһастьна климате буйә сәбәба ԝе йәке, кӧ зьвьрʹока аве тʹәвльһәв буйә. Ахьрийа ԝе йәке әв ә, кӧ щи-щийада әʹрд зьһа у һʹьшк дьбә, ле щийед дьнда жи лейи рʹадьбьн у ав жь бәʹре дәрте.
Сафикьрьн: Пʹадшатийа Хԝәде ԝе һʹәму просесед тʹәбийәте рʹаст кә у еколожийа планета мә ԝе баш бә. Хԝәде соз дьдә: «Ва әз һәр тьшти ну чедькьм» (Әʹйанти 21:5). Ԝе ль сәр әʹрде зьһа ава тʹәмьз тʹер-тʹьжә бькʹьшә, у һәла һе ль сәр әʹрде һʹьшк жи ԝе гӧл шин бьн (Ишайа 41:17-20). Пʹадшатийа Хԝәде бьн дәсте Иса Мәсиһда, ԝе һʹәму ԛәԝатед тʹәбийәте контрол бькә.
Чахе Иса ль сәр әʹрде бу, әԝи фьртонә да сәкьнандьне у бь ве йәке да кʹьфше, кӧ ԛәԝатәкә чьԛас мәзьн Хԝәде дайә дәсте ԝи (Маркос 4:39, 41). Иса, чаԝа Пʹадше Пʹадшатийа Хԝәде ԝе хәм бькә бона ве йәке, кӧ тʹәшԛәлед тʹәбийәте ида тʹӧнә бьн. Мәрьв ԝе әʹдьлайе у бехофийеда бьн у тʹӧ ԛәзийе нәтьрсьн.
Проблем: Мәрьвед кӧ нафькьрьн дәрһәԛа ахьрийа кьред хԝә у ӧса жи тʹәшкиләтед тьма, чʹәм, гол у авед бьне әʹрде ԛьреж дькьн, ләма жи ава тʹәмьз һе кем дьбә.
Сафикьрьн: Хԝәде ԝе әʹрде, чʹәм, гол у бәʹр тʹәмьз кә. Дьнйа ԝе бьбә щьнәт. Кʹьтеба Пирозда гьлийед ӧса һатьнә ньвисаре: «Ԝе чол у дәшта зьһа ша бьбә, ԝе бәрʹи дьлгәш бьбә, ԝәк гӧла кӧлилк бьдә» (Ишайа 35:1, ИМ).
Чь ԝе бе сәре ԝан мәрьва йед кӧ нә бона тʹәбийәте, нә жи бона мәрьва хәм дькьн? Хԝәде соз дьдә ԝәки ԝе ԛьрʹа ԝан мәрьва бинә, йед кӧ тʹәбийәте хьраб дькьн (Әʹйанти 11:18; Мәтʹәлок 2:21, 22).
Проблем: Жь бо ве йәке кӧ гәләк ава тʹәмьз нәрʹаст те хәрщкьрьне, ав перʹа нагьһижә диса бе тʹьжәкьрьне.
Сафикьрьн: Ԛьрара Хԝәде ԝе «ль сәр рʹуйе әʹрде бе сери» бь сайа Пʹадшатийа Хԝәде, ле нә кӧ бь сайа мәрьвед хԝәһʹәз (Мәтта 6:9, 10). Пʹадшатийа Хԝәде ԝе мәрьварʹа хԝәндьна лапи баш бьдә. Ишайа 11:9-да ӧса те готьне: «Дьнйа жи ԝе бь занина Хӧдан [Йаһоԝа, ДТʹ]a тʹьжә бьбә, ИМ». Бь сайа ве занәбуна мәхсус у һʹәзкьрьна жь дьл һьндава Хԝәде у һʹәму әʹфринед ԝи, инсанәт ԝе бь щурʹе кʹамьл бона планета мәйә бәдәԝ у тʹәбийәте хәм бькә.
Сәва кӧ һе зедә дәрһәԛа Пʹадшатийа Хԝәде пебьһʹәсьн, бьхуньн готара бь наве «Пʹадшатийа Хԝәде ԝе Чь Бькә?»
Сәва кӧ пебьһʹәсьн ԝәки әʹрд ԝе чаԝа бьбә щьнәт, бьхуньн кʹьтеба Ишайа сәре 35.
Сәва кӧ һе зедә пебьһʹәсьн дәрһәԛа ԛьрара Хԝәде бона әʹрде у инсанәте, бьньһерʹьн видео Чьрʹа Хԝәде Әʹрд Әʹфьрандийә?
a Йаһоԝа наве Хԝәдейи шәхси йә (Зәбур 83:18). Бьньһерʹә готара бь наве «Йаһоԝа Кʹи йә?»