Гәло Мьләт Дькарьн Бьбьнә Йәк, сәва кӧ Гӧһастьна Климате Бьдьнә Сәкьнандьне?—Кʹьтеба Пироз Чь Дьбежә?

Рʹожа Ләʹде, 20 Мьждаре сала 2022, Конференсийа Тʹәшкиләта Мьләтед Йәкбуйи йа Гӧһастьна Климате хьлаз бу (COP27). Сәрԝер у експертед кӧ һатьбун сәр ԝе щьвине, ԛайил бун ԝәки пʹәра бьдьнә ԝәлатед кʹәсиб, сәва кӧ әԝана бькарьбьн ԝан проблема сафи кьн, кʹижан кӧ жь бо гӧһастьна климатева гьредайи пешда тен. Ле гәләк мәрьв дьбежьн, ԝәки әԝ йәк ԝе бь тʹәмами әве проблеме сафи нәкә.

•  Антонйо Гӧтеррес, секретаре сәрәкә йе Мьләтед Йәкбуйи, 19 Мьждаре, сала 2022 ӧса гот: «Әз пьштгьрийа ве йәке дькьм, кӧ һатә сафикьрьне ԝәки алийе пʹәрада кʹомәке бьдьнә ԝәлатед кʹәсиб, йед кӧ жь бо гӧһастьна климате зьраре дьстиньн. Һәмьки әԝ йәк бәс нинә, . . . чьмки һʹале планета мә гәләк хьраб ә».

•  Мери Робинсон, йа кӧ бәре президента Ирләнде бу у ӧса жи Комисәра Һәрә Бьльнд бу йа Мьләтед Йәкбуйи бона Парьстьна Мафед Мәрьва, ӧса дьбежә: «Планета мә ԝе зутьрәке рʹасти гӧһастьна климате бе, йа кӧ ԝе гәләк хьраб сәр һәр кәса һʹӧкӧм кә» (20 Мьждаре, сала 2022).

Илаһи щаһьл бона ахьрийа планета мә, гәләк бәрхԝәдькʹәвьн. Ле гәло, мьләт дькарьн бьбьнә йәк, сәва кӧ созед хԝә дәрһәԛа сафикьрьна проблема гӧһастьна климате, биньн сери? Кʹьтеба Пироз чь дьбежә?

Гәло мьләт ԝе бьбьнә йәк кӧ бьгьһижьнә нета хԝә?

Рʹаст ә сәрԝер гәләк ԛәԝат дьдьнә хәбате, ԝәки гӧһастьна климате бьдьнә сәкьнандьне, ле Кʹьтеба Пироз дьбежә кӧ әԝана ԝе бь тʹәмами нькарьбьн әԝе проблеме бьдьнә һьлдане. Гәло чьрʹа? Ԝәрә әм дина хԝә бьдьнә дӧ мәʹнийа:

•  «Йа хԝар найе рʹасткьрьн» (Ԝаиз 1:15, ИМ).

  Әв чь те һʹәсабе: Сәрԝеред дәԝләте нькарьн һәр тьшти бькьн, чь кӧ әԝана дьхԝазьн бькьн (Йерәмйа 10:23). Һәрге мьләт бьбьнә йәк, диса жи әԝана нькарьн һʹәму проблемед дьнйайе сафи кьн.

•  «Мәрьве бьбьнә хԝәһʹьз, пʹәрәһʹьз . . . берʹәʹм» (2 Тимотʹейо 3:2, 3).

  Әв чь те һʹәсабе: Кʹьтеба Пирозда пешда һатьбу готьне, кӧ гәләк мәрьв рʹожед мәда ԝе бьбьнә хԝәһʹьз у ԝе нәхԝазьн тьштәки бона кʹара мәрьва бькьн.

Мәʹнийа бона һевийа баш

Ахьрийа планета мә, созед сәрԝеред дәԝләтева гьредайи нинә. Хԝәде сәрԝерәки гәләк баш кʹьфш кьрийә, әԝ һәйә Иса Мәсиһ. Кʹьтеба Пирозда дәрһәԛа ԝи те готьне:

•  «Сәрԝерти ԝе сәр мьле ԝи бә, әԝе бе навкьрьне Ширәткʹаре Пʹьрʹ Баш, Хԝәдейе Зор, Баве Һʹәта-Һʹәтайе, Мире Әʹдьлайе» (Ишайа 9:6, ДТʹ).

Иса Пʹадше Пʹадшатийа Хԝәде йә, кӧ сәр әʹзмана йә (Мәтта 6:10). Ԛәԝат, билани у хԝәстьна ԝи һәйә, кӧ мә у планета мә бьбә хԝәйи (Зәбур 72:12, 16). Бьн сәрԝертийа ԝида, Пʹадшатийа Хԝәде ԝе ԛьрʹа ԝан бинә, йед кӧ «дьне хьраб дькьн», у ԝе диса планета мә бькә щьнәт, чаԝа кӧ сәре серида Хԝәде ԛьрар кьрьбу (Әʹйанти 11:18; Ишайа 35:1, 7).

Сәва кӧ һе зедә пебьһʹәсьн, ԝәки чаԝа проблемед гӧһастьна климатева гьредайи ԝе бь тʹәмами бенә сафикьрьне, бьхуньн готара бь наве «Гӧһастьна Климате у Ахьрийа Мә; Кʹьтеба Пироз Чь Дьбежә?»