Гәло Нормед жь Кʹьтеба Пироз Дәрһәԛа Ԛәнщийе у Хьрабийе Иро Керһати нә?

Гәләк мәрьв, һәла һе әԝед кӧ дьбежьн ԝәки әԝана Мәсиһи нә, дьфькьрьн кӧ нормед жь Кʹьтеба Пироз дәрһәԛа сексе у зәԝаще, кәвьн бунә. Гәләк дер ль гора ньһерʹандьна һʹәчʹи зәʹф мәрьва һинкьрьнед хԝә гӧһастьнә. Гәло нормед жь Кʹьтеба Пироз дәрһәԛа ԛәнщийе у хьрабийе иро керһати нә? Бәле. Жь ве готаре әме пебьһʹәсьн, ԝәки жь кʹӧ әм әве йәке заньн.

Мәрьв һʹәԝще нормед Хԝәде нә

Мәрьв ӧса һатьнә әʹфьрандьне, кӧ ԝанарʹа рʹебәри жь Әʹфьрандаре ԝан лазьм ә. Кʹьтеба Пироз дьбежә: «Гавед хԝә рʹасткьрьн, нә дь дәсте мьрове кӧ дьмәшәда йә» (Йерәмийа 10:23). Йаһоԝаa Хԝәде әм ӧса әʹфьрандьнә, кӧ әм дькарьн сафикьрьна бькьн, ле әԝи изьн нәдайә мә кӧ нормед ԛәнщийе у хьрабийе дайньн. Әԝ дьхԝазә кӧ ве пьрседа мәрьв итʹбарийа хԝә Ԝи биньн (Мәтʹәлок 3:5).

Нормед Хԝәдейә дәрһәԛа нав-намусийе Кʹьтеба Пирозда ньвисар ьн. Ԝәрен дина хԝә бьдьн дӧ мәʹнийа, кӧ избат дькьн ԝәки нормед Хԝәде керһати нә.

• Хԝәде әм әʹфьрандьнә (Зәбур 100:3). Әʹфьрандаре мә Йаһоԝа Хԝәде рʹьнд занә чь мәрʹа лазьм ә, сәва кӧ бәхтәԝар бьн у алийе физики у емосийалида сьһʹәт-ԛәԝат бьн. Әԝ ӧса жи занә, кӧ чь ахьри ԝе пәй хԝә бинә, һәрге әм нормед ԝи пьшт гӧһе хԝәва бавежьн (Галати 6:7). Һьм жи Йаһоԝа ԛәнщийа мә дьхԝазә. Жь Кʹьтеба Пироз Әԝ мәрʹа дьбежә: «Әз Йаһоԝа, Хԝәдайе тә мә, кʹижан кӧ тьштед ԛәнщ тә һин дькә у ве рʹерʹа тә дьбә, ль сәр кʹижани тӧ гәрәке һәрʹи» (Ишайа 48:17, ДТʹ).

• Хԝәстьнед мә дькарьн мә бьхальфиньн. Гәләк мәрьв дьфькьрьн кӧ әԝана дькарьн пәй хԝәстьнед дьле хԝә һәрʹьн у хԝәха сафи кьн, кӧ чь йә ԛәнщи у хьраби. Ле Кʹьтеба Пироз дьбежә, ԝәки «дьл жь һәр тьшти зедәтьр хапиноки йә у ԛәлс ә» (Йерәмйа 17:9). Һәрге дьле мә бь биланийа Хԝәде найе рʹебәрикьрьне, әԝ дькарә мә бәрбь кьред ӧса һелан кә, жь бо чи жи әме паше пʹошман бьн (Мәтʹәлок 28:26; Ԝаиз 10:2).

Гәло изьна сәрԝеред религи һәйә, кӧ нормед Кʹьтеба Пироз пьшт гӧһе хԝәва бавежьн?

На! Кʹьтеба Пирозда һатийә ньвисаре рʹасти дәрһәԛа Хԝәде у кӧ әԝ дьхԝазә ԝәки рʹабун-рʹуньштьна мә чь щурʹәйи бә (1 Корьнтʹи 6:9-11; Галати 5:19-23). У әԝ дьхԝазә кӧ мәрьв ԝан тьшта бьзаньбьн (1 Тимотʹейо 2:3, 4). Ләма жи хьзмәткʹаред Хԝәде гәрәке әԝе йәке һин кьн, чь кӧ Хәбәра Хԝәдеда ньвисар ә (Тито 1:7-9).

Әԝед кӧ нахԝазьн ль гора нормед Хԝәде дәрһәԛа нав-намусийе бьжин, сәрԝеред религийә ӧса дьгәрʹьн, кʹижан кӧ «тьштед ль гӧһе ԝан хԝәш те», ԝе бежьнә ԝан (2 Тимотʹейо 4:3). Дәрһәԛа мәрьвед ӧса Кʹьтеба Пироз дьбежә: «Ԝәй ль ԝан кәса кӧ жь йа хьрабрʹа ԛәнщ, жь йа ԛәнщрʹа хьраб дьбежьн» (Ишайа 5:20, ИМ). Демәк, ча те кʹьфше Хԝәде ԝе щәза кә сәрԝеред религи, йед кӧ нормед Хԝәдейә дәрһәԛа ԛәнщийе у хьрабийе, мәрьва һин накьн.

Гәло нормед Кʹьтеба Пироз бәрбь нәфрʹәтийе һелан дькьн?

На. Әԝед кӧ дьхԝазьн дьле Хԝәде хԝәш бен, чʹәʹв дьдьнә мәсәла Иса Мәсиһ у ль гора һинкьрьнед ԝи дьжин. Әԝи пәйчуйед хԝә һин дькьр, кӧ мәрьва сущдар нәкьн, һʹәмуйа һʹьз бькьн у ԛәдьре ԝан бьгьрьн (Мәтта 5:43, 44; 7:1).

Әԝед кӧ чʹәʹв дьдьнә Иса, гәрәке жийина хԝәда хԝә ль нормед Хԝәде бьгьрьн. Ӧса жи әԝана гәрәке фәʹм бькьн у ԛәбул кьн, кӧ изьна мәрийа һәйә хԝәха сафи кьн, кӧ хԝә ль кʹижан ньһерʹандьне бьгьрьн (Мәтта 10:14). Иса изьн нәдьда пәйчуйед хԝә, ԝәки бь сайа политикайе йан щурʹәки майин, мәрьва зоре бькьн, кӧ ль гора нормед Хԝәде бьжин (Йуһʹәнна 17:14, 16; 18:36).

Нормед Хԝәдейә нав-намусийе чь кʹаре тиньн?

Әԝед кӧ һәр тьшти дькьн, ԝәки ль гора нормед Хԝәде бьжин, әԝана һьм ньһа, һьм жи ахьрийеда кʹаре бьстиньн (Зәбур 19:8, 11). Дькʹәвә нава ве йәке:

• Бәхтәԝари (Мәтʹәлок 29:6).

• Һәләԛәтийа незик тʹәви Хԝәде (Мәтʹәлок 3:32).

• Аликʹарийа Хԝәде ԝәʹде чәтьнайа (Мәтʹәлок 11:8).

• Жийина һʹәта-һʹәтайе сәр әʹрде (Зәбур 37:29).