Кʹьтеба Пироз Дәрһәԛа Хәлайе Чь Дьбежә?

«Ида тʹӧ щар ԝе бьрʹчибун тʹӧнә бә». Әԝ нета сәрԝеред дьнйайе йә, кʹижан кӧ дьхԝазьн проблема һәрә мәзьн йа инсанәте сафи кьн, демәк ԝәки сәр тʹәмамийа дьнйайе хԝарьн тʹера һʹәму мәрьва бькәa. Ле гәло ԝе бе әԝ ԝәʹдә, гава бьрʹчибун ида тʹӧнә бә? Кʹьтеба Пироз дәрһәԛа ве йәке чь дьбежә?

Кʹьтеба Пироз дәрһәԛа хәлайе пʹехәмбәрти кьрийә

Кʹьтеба Пирозда пешда һатийә готьне, ԝәки рʹожед мәда, кӧ тенә навкьрьне «рʹожед ахьрийе», ԝе хәлайи һәбә (2 Тимотʹейо 3:1). Хԝәде сәбәбе хәлайе нинә, ле әԝи пешда мәрʹа әʹйан кьрийә, ԝәки әԝ йәк ԝе бьбә (Аԛуб 1:13). Дина хԝә бьдьнә ван дӧ пʹехәмбәртийед Кʹьтеба Пироз.

«Гәләк щийа ԝе хәлайи . . . һәбьн» (Мәтта 24:7). Әв пʹехәмбәрти әʹйан дькә, ԝәки бьрʹчибун ԝе гәләк бә. Дина хԝә бьдьне, һʹәсабәкә ван пашԝәхтийа чь дьбежә дәрһәԛа хԝарьне: «Һʹале дьнйайе һе хьраб буйә, чьмки иро бьрʹчибун һе зедә буйә, хԝарьна керһати кем ә у тʹера һʹәму мәрьва накә»b. Бь сәда милйон мәрьв гәләк ԝәлатада нькарьн тʹера хԝә хԝарьне дәстхьн. Йазьх, жь бо ве йәке гәләк мәрьв дьмьрьн.

«Ва һәспәки рʹәш у дәсте сийаре ԝида мезинәк һәбу» (Әʹйанти 6:5). Ве пʹехәмбәртийеда, әв һәспе симболик у сийаре ԝи тенә һʹәсабе хәлайа ван рʹожед пашьнc. Мезина дәсте сийарда бона чапкьрьна хԝарьне йә. Дәма әԝ сийар һәспе дажо, дәнгәк әʹлам дькә, ԝәки баһе хԝарьне ԝе гәләк бьльнд бә, у мәрьварʹа дьбежә, ԝәки хԝарьне зәʹй нәкьн, йане бадиһәԝа пʹучʹ нәкьн (Әʹйанти 6:6). Әԝ йәк рʹасти жи әʹйан дькә кризиса һʹәмдьнйайе йа рʹожа иро, демәк бь милйарда мәрьв нькарьн хԝарьна керһати дәстхьн йан жи нагьһижә ԝан.

Чаԝа хәлайе кʹӧта бә?

Експерт дьбежьн ԝәки планета мә һаԛас хԝарьне дьдә, кӧ дькарә тʹера һәр кәси бькә у һәла һе зедә жи. Ԝәки ӧса нә, ле чьрʹа иро кемасийа хԝарьне һәйә? У Кʹьтеба Пироз чь дьбежә дәрһәԛа ве йәке, кӧ Әʹфьрандаре мә Йаһоԝаd ԝе чаԝа ван проблема сафи кә?

Проблем: Сәрԝер нькарьн кʹәсибийе у нәһәԛийе кʹокева бьдьнә һьлдане, сәва кӧ мәрьв бьрʹчи нәминьн.

Сафикьрьн: Дәԝса сәрԝертийа мәрьвайә бь ԛьсур, ԝе Пʹадшатийа Хԝәде бә, демәк сәрԝертийа беԛьсур (Данийел 2:44; Мәтта 6:10). Иро гәләк мәрьв нькарьн хԝәрʹа хԝарьне дәстхьн, ле бьн сәрԝертийа Пʹадшатийа Хԝәдеда, әԝ проблем ԝе ида тʹӧнә бә. Ва Кʹьтеба Пироз чь дьбежә дәрһәԛа Иса Мәсиһ, демәк Пʹадше Пʹадшатийа Хԝәде: «Әԝ йе кʹәсиб хьлаз дькә, кӧ гази дькеу йе бәләнгаз кӧ кʹомәкдаре ԝи тʹӧнә йә . . . Гәньме ԝәлет бьбә бьрʹ-бәʹр, дәрәмәтед ԝи сәре чʹийа бьһʹәжьн» (Зәбур 72:12, 16).

Проблем: Шәрʹ економикайе, демәк аборийе, ԝеран дькә, жь бо чь жи мәрьварʹа чәтьн ә хԝәрʹа хԝарьне дәстхьн.

Сафикьрьн: «[Йаһоԝа, ДТʹ] шәрʹа дьдә сәкьнандьне, һәр чар ԛӧлбед дьнйайе, тир-кәвана дьшкенә, рʹьма һур-һури дькә у мәртʹала бь егьр дьшәԝьтинә» (Зәбур 46:9). Хԝәде ԝе һʹәму чʹәк у мәрьвед кӧ дьбьнә сәбәбе шәрʹа, кʹӧта кә. Ахьрийа ве йәке ԝе әԝ бә, кӧ һәр кәсе бькарьбә һеса у тʹера хԝә хԝарьне дәст хә. Кʹьтеба Пироз соз дьдә, ԝәки ԝе «рʹасти гӧл дә у әʹдьлайи гәләк бә» (Зәбур 72:7).

Проблем: Гӧһастьна һәԝайе у тʹәшԛәлед тʹәбийәте зәви у чандьнийе хьраб дькьн у ԛьрʹа кәри-сурийа тиньн.

Сафикьрьн: Хԝәде ԝе ԛәԝатед тʹәбийәте контрол кә, у ӧса бькә ԝәки әʹрд хԝарьна баш бьдә. Кʹьтеба Пироз дьбежә: «[Йаһоԝа, ДТʹ] фьртонә сәԛьрʹандьн у пел данә сәкьнандьн. . . . Әԝ чол у бәста дькә гола аве, әʹрде зьһа канийа аве. Бьрʹчийа ль ԝьр щиԝар дькә . . . Әʹрде давежьн, тьрийа датиньн у дәрәмәте тʹоп дькьн» (Зәбур 107:29, 35-37).

Проблем: Мәрьвед тьма у мьхәнәт хԝарьна зийандар дәрдьхьн йан жи ӧса дькьн, ԝәки хԝарьн нәгьһижә мәрьвед кӧ һʹәԝщә нә.

Сафикьрьн: Пʹадшатийа Хԝәде ԝе һʹәму мәрьвед ԛәлп у мьхәнәт кʹӧта кә (Зәбур 37:10, 11; Ишайа 61:8). Кʹьтеба Пироз дьбежә ԝәки Йаһоԝа Хԝәде «һесир-бәләнгазарʹа һәԛийе дькә,йед бьрʹчи жи нан-ав дькә» (Зәбур 146:7).

Проблем: Һәр сал ԝәкә 30 сәләф хԝарьна сәр дьнйайе зәʹй дьбә у пʹучʹ дьбә.

Сафикьрьн: Бьн Пʹадшатийа Хԝәдеда хԝарьн ԝе рʹаст бе пʹарәвәкьрьне. Иса чахе сәр әʹрде бу, бадиһәԝа хԝарьн пʹучʹ нәдькьр. Мәсәлә, щарәке әԝи бь кʹәрәмәти 5 000 мәрьва зедәтьр тʹер кьрьн. Паше әԝи тʹәми да шагьртед хԝә: «Ԝан һурькед бәрмайи бьдьнә һәв, ԝәки тьштәк пʹучʹ нәбә» (Йуһʹәнна 6:5-13).

Бәле, Пʹадшатийа Хԝәде ԝе бьрʹчибуне кʹокева бьдә һьлдане, у инсанәт ԝе жь хԝарьна тʹер-тʹьжә, баш у керһати ләзәте бьвинә (Ишайа 25:6). Сәва һе зедә пебьһʹәсьн кӧ ԝе кʹәнге Пʹадшатийа Хԝәде ве йәке бькә, бьньһерʹьн готар бь наве «Пʹадшатийа Хԝәде ԝе Чь Чах ль сәр Әʹрдерʹа Сәрԝертийе Бькә?»