Жь бо Шәрʹ у Гӧһастьна Климате Нав Тʹәмамийа Дьнйайе Хӧрәк Кем Дьбә—Кʹьтеба Пироз Чь Дьбежә?

Жь бо шәрʹа Украинайеда у гӧһастьна климате, хӧрәк нав тʹәмамийа дьнйайеда һе кем у кем дьбә. Әв йәк илаһи һʹӧкӧм дьбә сәр ԝан ԝәлата, аборийа кʹижана пешдачуйи нинә, у кʹидәре гәләкарʹа чәтьн ә епʹещә хӧрәке хԝәрʹа дәст хьн.

«Жь бо шәрʹ, гӧһастьна климате, жь бо байе бьльнд сәр енержийайе у жь бо тьштед дьн, дәстхьстьна хӧрәке чәтьн дьбә».—Антонйо Гӧтеррес, секретаре сәрәкә йе Тʹәшкиләта Мьләтед Йәкбуйи, 17 Тирмәһе, сала 2023.
«Русйа ида пʹара ве пәймане нинә, кӧ хӧрәке бехоф жь Украинайе дәрбази ԝәлатед дьн бькьн. Експерт дьбежьн ԝәки жь бо ве йәке хӧрәк нав тʹәмамийа дьнйайеда ԝе һе кем бьбә у ван ԝәлатада, аборийа кʹижана кӧ сьст ә, хӧрәк һе бьһа бьбә, илаһи Африкайа Бакӧреда у Рʹоһьлата Навинда».—Atalayar.com, 23 Тирмәһе, сала 2023.

Дина хԝә бьдьн кӧ Кʹьтеба Пироз дәрһәԛа кемасийа хӧрәке у ахьрийе чь дьбежә.

Кʹьтеба Пироз дәрһәԛа кемасийа хӧрәке пʹехәмбәрти кьрийә

Иса пʹехәмбәрти кьрьбу: «Мьләте һьмбәри мьләт у пʹадшати һьмбәри пʹадшатийе рʹабә. У гәләк щийа ԝе хәлайи у әʹрдһʹәж һәбьн» (Мәтта 24:7).
Кʹьтеба Пирозда, Әʹйантида бь симболик дәрһәԛа чар сийаред һәспа те готьне. Йәк жь ԝан сийара те һʹәсабе шәрʹ-дәʹԝ. Пәй ԝи сийаре дьн те, йе кӧ те һʹәсабе хәлайи, демәк ԝәхтәкә ӧса чахе хӧрәк ԝе кем бьбә у баһе ԝе гәләк бьльнд бә. «Мьн дина хԝә дайе, ва һәспәки рʹәш у дәсте сийаре ԝида мезинәк һәбу. Һьнге те бежи мьн дәнгәк бьһист, . . . кӧ дьгот: ‹Чапәкә гәньмә бьчʹук пе зивәки у се чапед бьчʹук щәһ пе зивәки›» (Әʹйанти 6:5, 6).

Әв пʹехәмбәртийед Кʹьтеба Пироз дәрһәԛа кемасийа хӧрәке рʹожед мәда те сери, кӧ ль гора Кʹьтеба Пироз те навкьрьне ‹рʹожед ахьрийе› (2 Тимотʹейо 3:1). Сәва кӧ һе зедә дәрһәԛа рʹожед ахьрийе у чар сийаред һәспа жь кʹьтеба Әʹйанти пебьһʹәсьн, бьньһерʹьн видео Жь Сала 1914 Һʹале Дьнйайе Һатийә Гӧһастьне у бьхуньн готар «Чар Сийар бь Рʹасти Кʹи нә?»

Кʹьтеба Пироз ча дькарә али мә бькә

Кʹьтеба Пирозда ширәтед керһати һәнә, йед кӧ дькарьн дәрәщед чәтьнда жи али мә бькьн. Дькʹәвә нава ве йәке кемасийа хӧрәке у әв йәк кӧ баһе хӧрәке бьльнд дьбә. Һьнә мәсәла бьвинә готареда «Ча Пе Пʹәре Һьндьк Әʹбура Хԝә Бькьн?»
Кʹьтеба Пироз ӧса жи гӧмане дьдә мә, ԝәки ахьрийеда һәр тьшт ԝе баш бә. Әв соз дьдә, ԝәки гәньм сәр әʹрде ԝе тʹер-тʹьжә һәбә у тʹӧ кәс ԝе жь бьрʹчибуне нәчәрчьрә (Зәбур 72:16). Сәва кӧ һе зедә пебьһʹәсьн дәрһәԛа ве гӧмане у чьма һун дькарьн баԝәрийа хԝә ве йәке биньн, бьхуньн готар «Һевийа Баш бона Рʹожа Сьбе».