Шәʹдед Йаһоԝа Пʹәре Ԛӧрбанкьри сәр Чь Хәрщ Дькьн?
Бь сайа пʹәре ԛӧрбанкьри шьхӧлед тʹәшкиләта мә йед религи у һуманитари тенә кьрьне. Әм ԝан тьшта дькьн жь бо нетәке, демәк кӧ али мәрьва бькьн бьбьнә шагьртед Иса Мәсиһ (Мәтта 28:19, 20).
Әм тʹӧ щар пʹәре ԛӧрбанкьри надьн хәбате ԝәки кәсәки дәԝләти кьн. Әм рʹуспийарʹа йан жи хьзмәткʹаред майинрʹа пʹәра надьн. Ӧса жи Шәʹдед Йаһоԝа пʹәра настиньн кӧ мал бь мал хьзмәт дькьн. Әԝед кӧ филиалед мәда у офиса сәрәкәда хьзмәт дькьн, демәк ӧса жи әндәмед Кʹома Рʹебәрийе, бона хьзмәта хԝә пʹәра настиньн.
Мәсәлә, Пʹәред Ԛӧрбанкьри Тенә Хәрщкьрьне сәр:
Нәшьркьрьна Әʹдәбйәта: Әм бь милйона Кʹьтебед Пироз у әʹдәбйәта ԝәлдьгәрʹиньн, чап дькьн, дьшиньн щурʹә-щурʹә ԝәлата у бе пʹәрә бәла дькьн. Хенщи ве йәке, ль сәр малпәра мә jw.org у «JW Library» app, әʹдәбйәтед мәйә әләктроник һәнә кӧ дькарьн бепʹәрә у бейи реклам хԝәрʹа бькʹьшиньн.
Авакьрьн у Хԝәйкьрьна Авайа: Әм ава дькьн авайед кӧ бона һʹәбандьне дьдьнә хәбате, у гава лазьм ә ԝана тʹәзә дькьн. Хенщи ве йәке, әм филиала у офиса ава дькьн. Ԝедәре һʹәчʹи зәʹф шьхӧл хьзмәткʹар бь рʹәзәдьли дькьн, у бь сайа ве йәке пʹәред ԛӧрбанкьри кем тенә хәрщкьрьне.
Шьхӧле Рʹебәрикьрьне: Һʹәму хәрщед шьхӧле офиса сәрәкә, филиал у офисед ԝәлгәрʹандьне, у ӧса жи хәрщед шьхӧле бәрпьрсийаред рʹеви, пе пʹәре ԛӧрбанкьри тенә дадане, йед кӧ бона шьхӧле һʹәмдьнйайе тенә ԛӧрбанкьрьне.
Шьхӧле Бәлакьрьна Мьзгине: Шәʹдед Йаһоԝа бона бәлакьрьна мьзгине у һинкьрьна «хәбәра Хԝәде» пʹәра настиньн (2 Корьнтʹи 2:17). Иро жи мина Мәсиһийед ԛьрʹна йәке һьнә хьзмәткʹаред һинкьри йед кӧ һʹәчʹи зәʹф ԝәʹде хԝә хьзмәтийеда хәрщ дькьн, һьнә пʹәра дьстиньн сәва кʹьрийа хԝә у һʹәԝщед майин (Филипи 4:16, 17; 1 Тимотʹейо 5:17, 18).
Шьхӧле Һинкьрьне: Щьватед мәйи мәзьн пе пʹәре ԛӧрбанкьри тенә сазкьрьне. Хенщи ве йәке, әм програмед аудио у видео дәрдьхьн кӧ сәр һʹиме Кʹьтеба Пироз ьн. Әм ӧса жи мәкʹтәбед бона рʹуспийа у хьзмәткʹаред һәртʹьм дәрбаз дькьн, ԝәки әԝана кʹьфшкьрьна хԝәда һе щерʹьбанди у пешдачуйи бьн.
Аликʹари Ԝәʹде Хәзәба: Гава тʹәшԛәлед тʹәбийәте йан хәзәбед майин дьԛәԝьмьн, әм хәм дькьн бона ве йәке кӧ хԝарьн, ав, у щи-сьтʹара ԝан һәбә, йед кӧ зийан стандьнә. Аликʹарийа ви щурʹәйи әм нә тʹәне дьдьнә баԝәрмәндед хԝә, ле ӧса жи мәрьвед майин (Галати 6:10).