Һәрге жь Щьвата Ԝә Кәсәк Те Дәрхьстьне, Һәләԛәтийа Ԝә Тʹәви Ԝан Һәйә?

Әм хԝә дур нагьрьн жь ԝан мәрийа, йед кӧ һатьнә ньхӧмандьне у бунә Шәʹдед Йаһоԝа, ле паше гәләк ԝәʹдә даннасин нәдькьрьн у дьбәкә жи һәләԛәтийа хԝә тʹәви хушк-бьра ԛәтандьн. Ле әм жь алийе хԝәда һʹәму тьшти дькьн, кӧ диса жи һәләԛәтийа хԝә тʹәви ԝан чекьн у һʹәԝаса ԝан һьндава һʹәԝщед рʹӧһʹани мәзьн кьн.

Һәрге кәсәки гӧнәки гьран кьрийә, әм перʹа-перʹа ԝи жь щьвате дәрнахьн. Ле һәрге Шәʹде Йаһоԝайи ньхӧманди принсипед Кʹьтеба Пироз дәрһәԛа намусийе надә хәбате, у тʹобә накә, һьнге ԝи (ԝе) жь щьвате дәрдьхьн. Дь Кʹьтеба Пирозда зәлал те готьне: «Йе хьраб жь нава хԝә дәрхьн» (1 Корьнтʹи 5:13).

Ле чь һәрге малхе мале жь щьвате һатийә дәрхьстьне, ле жьн-зарʹед ԝи диса жи Шәʹдед Йаһоԝа нә? Рʹаст ә әԝана нәфәре маләкинә у ча малбәт тʹәвайи дьжин, ле чьмки әԝи хԝәха алийе религийеда жь ԝана дуркʹәт, ләма жи һәләԛәтийа ԝанә религийайе ида тʹӧнә.

Әԝ кʹи кӧ жь щьвате һатийә дәрхьстьне дькарә диса бе ль сәр щьватед мә. Һәрге әԝ дьхԝазә, дькарә ӧса жи аликʹарийе жь рʹуспийед щьвате бьхԝазә. Нета рʹуспийа әԝ ә, ԝәки аликʹарийе бьдьнә ԝан һʹәму мәрийа йед кӧ жь щьвате һатьнә дәрхьстьне, сәва кӧ диса бьбьнә Шәʹдед Йаһоԝа. Һәрге әԝ кьред хԝәйә нәтʹәмьз инкʹар дькә у дьдә кʹьфше кӧ бь дьл-щан дьхԝазә бь нормед Кʹьтеба Пироз бьжи, дькарә диса вәгәрʹә щьвате.