ПЬРСЕД ЩАҺЬЛА
Чь Бькьм Һәрге Әз жь Мәкʹтәбе Ԝәстийамә?
Һәрге тӧ дьфькьри ԝәки тӧ жь мәкʹтәбе ԝәстийайи, әԝ йәк фәʹмдари йә, чьмки мәкʹтәбеда дәрсдаред тә дьԛәԝьмә сәрт ьн, һәвалдәрсханед те сәр тә һʹӧкӧм дькьн, ӧса жи екзамед кӧ бәрхԝәкʹәтьна тә зедә дькьн у беһʹәсаб дәрс.a Кәчʹькәк бь наве Рейчелb ӧса дьбежә:
«Әз һазьр ьм һәрʹьм һʹәму щийа, хенщи мәкʹтәбе. Мьнрʹа дьһа баш ә бәр дәве бәʹре бьм, тʹәви һәвалед хԝә бьм у һәла һе али дә-баве хԝә бькьм мале тʹәмьз кьм у хԝарьне чекьм, нә кӧ һәрʹьм мәкʹтәбе!»
Мина Рейчел дьԛәԝьмә тӧ жи дьфькьри, ԝәки мәкʹтәб бона те буйә ча кәла кʹидәре тӧ мәщбур и тәйах ки, һʹәта кӧ мәкʹтәб хьлаз бә у тӧ аза би. Ле гәло чь дькарә али тә бькә, ԝәки һьндава мәкʹтәбе ньһерʹандьна рʹаст хԝәй ки?
Ԝә заньбу? Чахе тӧ ньһерʹандьна рʹаст һьндава мәкʹтәбеда пешда тини, һьнге тӧ дькари дәрәща хԝә контрол ки у мәкʹтәбе ида һʹәсаб нәки ча щерʹьбандьна хԝә. Бь рʹасти мәкʹтәб ча һащәт ә, кʹижан тӧ дьди хәбате сәва кӧ фәрәсәтед хԝә дьһа баш ки, йед кӧ ахьрийе ԝе кери тә бен.
Сәва кӧ тӧ ньһерʹандьна рʹаст һьндава мәкʹтәбеда пешда бини, дәрһәԛа ԝан тьшта бьфькьрә:
Һинбуна тәйә мәкʹтәбеда. Һәрге тӧ мәкʹтәбеда рʹьнд һин би, ахьрийеда тӧйе бькарьби щурʹә-щурʹә дәрәщед әʹмьре хԝәда хԝәха проблемед хԝә сафи ки, нә кӧ тʹьме аликʹарийе жь йед дьн бьхԝази. Жь хԝә бьпьрсә: «Һәрге жи һьнә тьшт мәкʹтәбеда мьн хԝәш найен, диса жи әԝ һинбун чьда керһати йә?»
Принсипа Кʹьтеба Пироз: «Биланийе у фәʹмкʹарийе хԝәй кә» (Мәтʹәлок 3:21).
Сәва кӧ һе зедә информасийа пебьһʹәсьн бьньһерʹьн готара «Чь Бькьм ԝәки Мәкʹтәбеда Рʹьнд Һин бьм?»
Хәйсәтед тә. Мәкʹтәб дькарә али тә бькә ԝәки тӧ бькарьби рʹаст ԝәʹде хԝә хәрщ ки, һин би ԝәʹдәда тьшта бьки у хәбатһʹәз би, демәк хәйсәт-һʹӧнӧред ӧса нав хԝәда пешда бини, йед кӧ ԝе кери тә бен гава тӧ мәзьн би. Пьрсед ӧса бьдә хԝә: «Чаԝа һинбуна мәкʹтәбеда дькарә али мьн бькә, ԝәки әз бькарьбьм ԝәʹдәда тьшта бькьм у бьбьмә хәбаткʹарәки баш? Чь әз дькарьм бькьм, ԝәки ԝан дәрәщада һе баш бьм?»
Принсипа Кʹьтеба Пироз: «Һәр шьхӧлида кʹар һәйә» (Мәтʹәлок 14:23).
Сәва кӧ һе зедә информасийа пебьһʹәсьн бьньһерʹьн готара «Ча Һин бьм кӧ Ԝәʹде Хԝә Рʹаст Хәрщ кьм?»
Һәләԛәтийа тә тʹәви мәрьва. Хәбәрдана тә тʹәви һәвалдәрсханед тә дькарә али те бькә, кӧ тӧ бькарьби ԛәдьре мәрьва бьгьри у дьлшәԝат би. Хортәк щаһьл бь наве Щошуа дьбежә:«Һин би ча тʹәви мәрьва хәбәр ди, ӧса фәрз ә ча тʹәрихийе у зандарийе бьзаньби. Әв йәк ԝе тʹәмамийа әʹмьре тә кери тә бе». Жь хԝә бьпьрсә: «Ча мәкʹтәб али мьн кьр, кӧ чаԝа тʹәви мәрьва зьман бьвиньм, илаһи тʹәви ԝан мәрьва, йед кӧ жь мьләтед дьн ьн у ньһерʹандьна кʹижана жь йа мьн щӧдә дьбә?»
Принсипа Кʹьтеба Пироз: «Тʹәви һʹәмуйа әʹдьл бьн» (Ибрани 12:14).
Сәва кӧ һе зедә информасийа пебьһʹәсьн бьньһерʹьн готара «Ча Әз Дькарьм Хәбәрдана Хԝә һе Баш кьм?»
Ахьрийа тә. Мәкʹтәб дькарә али тә бькә ԝәки бьзаньби чь щәм тә рʹьнд те стандьне у хԝәрʹа нета дайни. Кәчʹькәк щаһьл бь наве Брук ӧса дьбежә: «Тӧ дькари тʹәне тьштәки ӧса һин би, кʹижан кӧ ԝе паше хәбатеда кери тә бе. Мьн һәма ӧса кьр.» Жь хԝә бьпьрсә: «Гәло паше мәкʹтәбе әзе ча әʹбура хԝә бькьм? Чаԝа әзе бькарьбьм чь кӧ әз һин бумә хәбатеда бьдьмә хәбате?»
Принсипа Кʹьтеба Пироз: «Шьвәрʹийа гавед хԝә әʹнәнә кә» (Мәтʹәлок 4:26).
a Гәләк принсипед кӧ ве готареда һатьнә шеԝьркьрьне, дькарьн али ԝан зарʹа жи бькьн йед кӧ малда һин дьбьн.
b Һьнә нав һатьнә гӧһастьне.