Нәхԝәшийа Кʹроники; Гәло Кʹьтеба Пироз Дькарә Аликʹарийе Бьдә?

Щаба Кʹьтеба Пироз

Бәле. Хԝәде хәм дькә бона хьзмәткʹаред хԝә, кʹижан кӧ нәхԝәш ьн. Дәрһәԛа хьзмәткʹаред амьн Кʹьтеба Пироз дьбежә: «Дь дәма бетʹаԛәтийеда, Хӧдан жь бо ԝи дьбә дәстәк» (Зәбур 41:3). Һәрге нәхԝәшийа ԝәйә кʹроники һәйә, се ширәтед жере дайи дькарьн али ԝә бькьн:

1. Дӧада ԛәԝате бьхԝазә. Тӧ дькари бьстини «ә′дьлайийа Хԝәде кӧ жь һәр һʹьш-аԛьли дәрбазтьр ә». Әв йәк ԝе дьле тә рʹьһʹәт кә у тә ԛәԝи кә (Филипи 4:6, 7).

2. Ньһерʹандьна позитив хԝәй кә. Кʹьтеба Пироз дьбежә: «Дьле ша мина дәрмане керһати йә, ле дьле хәм у хәйал һʹьшкбуна һәстуйа йә» (Мәт’әлок 17:22). Бьра дьле тә тʹьме ша бә, чьмки әв нә тʹәне дькарә рʹожед гьранда али тә бькә, ле сәр сьһʹәт-ԛәԝата тә жи ԝе баш һʹӧкӧм кә.

3. Һевийа хԝә ԛәԝи кә. Чахе нәхԝәшийа мәйә кʹроники һәйә, һеви дькарә али мә бькә шабуна дьле хԝә ӧнда нәкьн (Рʹомайи 12:12). Кʹьтеба Пироз дәрһәԛа ԝи ԝәʹдәйи пʹехәмбәртийе дькә, гава тʹӧ кәс жь мәрийа ԝе нәбежә: «Әз нәхԝәш ьм» (Ишайа 33:24). Һьнге Хԝәде ԝе нәхԝәшийед кʹроники бьдә һьлдане, кʹижан кӧ иро зандар жи нькарьн бьдьнә сәкьнандьне. Мәсәлә, Кʹьтеба Пирозда те готьне, ԝәки мәрьвед әʹмьрда мәзьн ԝе диса жи щаһьл у сьһʹәт-ԛәԝат бьн: «Гоште ԝи жь йе зарʹок ве зедәтьр дьбә; вәдьгәрә рʹожед хԝә йи щьԝанийе» (Ибо 33:25).

Фькьре сәрәкә: Һәмьки Шәʹдед Йаһоԝа һʹәму алийава итʹбарийа хԝә Хԝәде тиньн, ле чахе нәхԝәшийед ԝанә кʹроники һәнә, ве дәрәщеда әԝана ԛәнщкьрьнәкә баш дьгәрʹьн (Марԛос 2:17). Әм набежьн, кӧ кʹижан метода ԛәнщкьрьне баш ә у кʹижан на, чьмки әве пьрсе һәр кәс гәрәке хԝәха сафи кә.