Әз Мәрьвәки Щабдар ьм?

Хԝә бьщерʹьбинә!

• Әз ... тʹьме, гәләк щар, щара, тʹӧ щар

  • һʹәлал ьм

  • бь итʹбар ьм

  • ԝәʹдәда тьшта дькьм

  • хәбатһʹьз ьм

  • тʹәрбәт ьм

  • аликʹарийе дьдьм

  • һәԛ ьм

  • бь ԛәдьр ьм

  • бона мәрьва хәм дькьм

• Жь ван һʹӧнӧра кʹижан бал тә зәʹф ә?

  Сәр хԝә бьхәбьтә ԝәки бәрдәԝам ки ван һʹӧнӧра бьди кʹьфше (Филипи 3:16).

• Ле сәр кʹижан һʹӧнӧра тӧ гәрәке һе зедә бьхәбьти?

Жере һәнә чәнд фькьр, йед кӧ ԝе али тә бькьн һе зедә пешда һәрʹи.

Чь те һʹәсабе бьбьнә мәрьвнә щабдар?

Мәрьве щабдар щабдарийед хԝә малда, мәкʹтәбеда у щийед дьнда тʹьме тинә сери. Әԝ фәʹм дькә ԝәки әԝ бона кьред хԝә щабдар ә. Ләма жи гава әԝ шашийе дькә, шашийа хԝә тинә сәр хԝә, бахшандьне дьхԝазә у ӧса дькә ԝәки шашийа хԝә рʹаст кә.

Кʹьтеба Пироз дьбежә: «Һәр кәсе хӧрща хԝә һьлгьрә» (Галати 6:5).

Әз чьрʹа гәрәке щабдар у бь итʹбар бьм?

Бь сайа ве йәке, мәрьв ԝе ԝи ԛимәт кьн, һьндава ԝида ӧса бьн ча һьндава мәрьвед гьһишти у һе зедә азайе у щабдарийа бьдьне.

Кʹьтеба Пироз дьбежә: «Тә әԝ мәрьве шьхӧлкʹаре хԝә дитийә? Әԝ ль бәр пʹадша дьсәкьнә» (Мәтʹәлок 22:29).

Кʹьтеба Пироз дьбежә: «Бьдьн, ԝәрʹа ԝе бе дайине» (Луԛа 6:38).

Кʹьтеба Пироз дьбежә: «Бьра һәр кәс кьрьнед хԝә бьдә сәр мезине у паши һьнге жь хԝә рʹази бә» (Галати 6:4).

Әз ча дькарьм бьбьмә йәки дьһа щабдар?

Сәва щаба ве пьрсе пебьһʹәси, жере фькьред щаһьлед дьн бьхунә. Дәрәща кʹижана мина йа тә йә?

«Чьԛас хьраб ә гава һьндава тәда ча һьндава зарʹәкә бьчʹук ьн, йе кӧ бе изьна де-баве хԝә нькарә һәма сәр сьһʹәтәке щикида һәрʹә!»​—Керри.

«Де-баве мьн изьне дьдьнә мьн, ԝәки әз тʹәви һәвалед хԝә щийада һәрʹьм»​—Ричард.

«Чахе әз дьвиньм, ԝәки де-бавед һәвалед мьн чьԛас азайе дьдьнә ԝан, әз әʹщебмайи дьминьм у хԝәрʹа дьбежьм: ‘Ле де-баве мьн чьрʹа һаԛас азайе надьнә мьн?’»​—Анна.

«Әз дькарьм бежьм, ԝәки де-баве мьн изьне дьдьнә мьн ве йәке бькьм чь кӧ дьхԝазьм. У әз гәләк жь ԝан рʹази мә, кӧ әԝана азайикә ӧса дьдьнә мьн»​—Марина.

Фькьра сәрәкә: Һьнә щаһьл жь йед дьн зедәтьр азайе дьстиньн. Гәло чьрʹа?

Мәʹни: Тӧ чьԛас бь итʹбар би, те һаԛас азайе бьстини.

Дина хԝә бьдә гьлийед дӧ щаһьла, дәрһәԛа кʹижана жоре һатьбу готьне.

Ричард: «Сәре-серида де-баве мьн дьтьрсийан азайе бьдьнә мьн. Ле ньһа әԝана итʹбарийа хԝә мьн тиньн, чьмки әз азайа хԝә рʹаст дьдьмә хәбате. Мьн тʹӧ щар де-баве хԝә нәхапандийә, кӧ дьчьмә кʹӧ у тʹәви кʹе дьчьм. Һәрге әԝана жь мьн напьрсьн жи, йәкә әз тʹьме ԝанарʹа дьбежьм кӧ чь дьхԝазьм бькьм».

Марина: «Жийина хԝәда мьн тʹәне дӧ щара де-баве хԝә хапандийә, у һәр дӧ щара жи һатьмә гьртьне. Паши ԝе йәке әз һьндава де-баве хԝә һʹәлал ьм. Мәсәлә, әз тʹьме ӧса дькьм, ԝәки әԝана һаш жь мьн һәбьн, у чахе әз жь мал дәртем әз ԝанрʹа тʹеле дьхьм. Ньһа әԝана ида һе зедә итʹбарийа хԝә мьн тиньн».

Тӧ дьхԝази ԝәки де-баве тә жи һьндава тәда ӧса бьн, ча де-баве Ричард у Маринайе? Һәрге әре, һәла хԝә ван дәрәщада бьщерʹьбинә:

МАЛДА

• Тӧ бь дьл у щан шьхӧлед мале тини сери?

• Тӧ һәр гав ԝәʹдәда тейи мал?

• Тӧ ԛәдьре де-баве хԝә у хушк-бьред хԝә дьгьри?

Анәгори ван пьрса, кʹижан алийада тӧ гәрәке сәр хԝә бьхәбьти?

Кʹьтеба Пироз дьбежә: «Гӧрʹа де у баве хԝәда бьн» (Әфәси 6:1).

МӘКʹТӘБЕДА

• Тӧ дәрсед хԝәйә мәкʹтәбе ԝәʹдәда дьки?

• Тӧ сәр хԝә дьхәбьти, ԝәки нишанед баш бьстини?

• Тӧ һинбунеда хирәт и?

Анәгори ван пьрса, кʹижан алийада тӧ гәрәке сәр хԝә бьхәбьти?

Кʹьтеба Пироз дьбежә: ‘Билани . . . дьпарезә’ (Ԝаиз 7:12). Һәрге тʹӧ мәкʹтәбеда рʹьнд һин би, тӧйе биланийе ԛазанщ ки.

НАВЕ ТӘ

• Тӧ тʹәви де-баве хԝә у мәрьвед дьн һʹәлал и?

• Тӧ пʹәре хԝә бь билани хәрщ дьки?

• Тә нас дькьн ча мәрьвәки бь итʹбар?

Анәгори ван пьрса, кʹижан алийада тӧ гәрәке сәр хԝә бьхәбьти?

Кʹьтеба Пироз дьбежә: «Мәрьве ну ль сәр хԝә ԝәргьрьн» (Әфәси 4:24). Тӧ дькари ӧса бьки ԝәки хәйсәт у наве хԝә дьһа баш ки.