Чь Те Һʹәсабе Тʹәми кӧ «Ԛәдьре Де у Баве Хԝә» Бьгьрьн?
Щаба Кʹьтеба Пироз
Кʹьтеба Пирозда гәләк щар ньвисар ә «ԛәдьре де у баве хԝә бьгьрә» (Дәркʹәтьн 20:12; Ԛануна Дӧщари 5:16; Мәтта 15:4; Әфәси 6:2, 3). Чар кьред сәрәкә дькʹәвьнә нава ԝе йәке.
Ԝана ԛимәт кьн. Чахе тӧ рʹазибуне дьди кʹьфше бона һәр тьшти чь кӧ де-бав бона тә кьрьнә, ӧса тӧ ԛәдьре ԝан дьгьри. Тӧйе нишан ки кӧ ԝана ԛимәт дьки һәрге ширәт у рʹебәрийед ԝан ԛәбул ки (Мәтʹәлок 7:1, 2; 23:26). Кʹьтеба Пироз һелан дькә де-баве хԝәрʹа фьрнаԛ бьн (Мәтʹәлок 17:6).
Һʹӧкӧмәтийа ԝан ԛәбул кә. Һәрге тӧ щаһьл и ԝе һьнге бе кʹьфше кӧ ԛәдьре де-баве хԝә дьгьри, чахе һʹӧкӧмәтийа ԝан йа кӧ Хԝәде дайә, ԛәбул дьки. Колоси 3:20-да щаһьларʹа те готьне: «Һәр тьштида гӧрʹа де у баве хԝәда бьн, чьмки әԝ йәк ль Хӧдан хԝәш те». Һәла һе Иса, гава бьчʹук бу гӧрʹа де-баве хԝә дькьр (Луԛа 2:51).
Һьндава ԝанда бь ԛәдьр бә. (Ԛануна Кʹаһинтийе 19:3; Ибрани 12:9). Дькʹәвә нава ԛәдьргьртьне әԝ йәк кӧ тӧ ԝанрʹа чь дьбежи у ча дьбежи. Щарна дьбә кӧ де-бав хԝә ӧса дьдьнә кʹьфше, ԝәки чәтьн дьбә ԛәдьре ԝан бьгьрьн. Ле һәла һе ԝи чахи жи зарʹ гәрәке ԛәдьре де-баве хԝә бь ԝе йәке бьгьрьн, кӧ хәбәрдан у кьред хԝәда хԝә бәрзәԛ у бемәʹрифәт нәдьнә кʹьфше (Мәтʹәлок 30:17). Кʹьтеба Пирозда те готьне, ԝәки хәбәрдана кӧ де-бава беһӧрмәт дькә, гӧнәки гьран ә (Мәтта 15:4).
Бона ԝан хәм бькьн. Чахе де-бав әʹмьрда мәзьн дьбьн, ԝанарʹа дькарә аликʹарийа тә лазьм бә. Тӧ дькари бь ԝе йәке ԛәдьре ԝан бьгьри, кӧ чьда әԝана һʹәԝщә нә аликʹарийе бьди ԝан у әʹбура ԝан бьки (1 Тимотʹейо 5:4, 8). Мәсәлә, Иса һьнә ԝәʹдә пешийа мьрьна хԝә, хәм кьр бона ԝе йәке кӧ кʹе ԝе мьԛати дийа ԝи бә (Йуһʹәнна 19:25-27).
Ньһерʹандьна нәрʹаст кӧ чь те һʹәсабе ԛәдьре де у баве хԝә бьгьрьн
Ньһерʹандьна нәрʹаст: Тӧ гәрәке изьне бьди де-баве хԝә, ԝәки малбәта тә контрол бькьн, чьмки ӧса тӧ дьди кʹьфше кӧ ԛәдьре ԝан дьгьри.
Избати: Кʹьтеба Пироз һин дькә, ԝәки һәләԛәтийа жьн у мер жь һʹәму һәләԛәтийед малбәтеда фәрзтьр ьн. Дәстпебун 2:24-да те готьне: «Мере де у баве хԝә бьһелә, хԝә ль жьна хԝә бьгьрә у бьбьнә бәдәнәк» (Мәтта 19:4, 5). Һәмьки жьн у мер дькарьн кʹарәкә мәзьн бьстиньн жь ширәтед де-бава йан хаси у хәзура (Мәтʹәлок 23:22). Ле диса жи жьн-мер дькарьн синора дайньн кӧ нәфәред мале нәкʹәвьнә нав шьхӧле ԝан (Мәтта 19:6).
Ньһерʹандьна нәрʹаст: Һʹӧкӧмәтийа де-бава бесинор ә.
Избати: Рʹаст ә Хԝәде хԝәха де-баварʹа малбәтеда һʹӧкӧмәти дайә, ле диса жи һʹәму щурʹә һʹӧкӧмәтийед мәрьва синоркьри нә; әԝ тʹӧ щар жь һʹӧкӧмәтийа Хԝәде бьльндтьр нинә. Мәсәлә, ԝәʹде бәре гава мәрьвед хԝәйиһʹӧкӧм жь шагьртед Иса дәʹԝа дькьрьн кӧ гӧрʹа Хԝәде нәкьн, шагьрта щаба ԝан да: «Әм гәрәке гӧрʹа Хԝәде бькьн, нә кӧ йа мәрьва» (Кʹаред Шандийа 5:27-29). Мина ԝе йәке зарʹ жи гәрәке «чаԝа баԝәрмәндед Хӧдан», демәк һәр тьштида чь кӧ мьԛабьли ԛанунед Хԝәде нинә, гӧрʹа де-баве хԝә бькьн (Әфәси 6:1).
Ньһерʹандьна нәрʹаст: Ԛәдьре де-баве хԝә бьгьри ӧса жи те һʹәсабе, ԝәки хԝә ль религийа ԝан бьгьри.
Избати: Кʹьтеба Пироз мә һелан дькә, ԝәки бьщерʹьбиньн һәла әԝ чь кӧ әм һин дькьрьн, рʹаст ә йан на (Кʹаред Шандийа 17:11; 1 Йуһʹәнна 4:1). Әв йәк дькарә бәндә һелан кә, кӧ религийәкә ӧса хԝәрʹа бьжберә, йа кӧ ԝе жь религийа де-бава щӧдә бә. Кʹьтеба Пирозда ӧса жи гәләк мәсәлед хьзмәткʹаред Хԝәдейи амьн һәнә, кʹижан кӧ баԝәрийа де-баве хԝә ԛәбул нәкьрьнә. Мәсәлә Бьраһим, Рʹутʹ у Паԝлосе шанди (Йешу 24:2, 14, 15; Рʹутʹ 1:15, 16; Галати 1:14-16, 22-24).
Ньһерʹандьна нәрʹаст: Ԛәдьре де-бава бьгьри те һʹәсабе, ԝәки кал-бава бьһʹәбини.
Избати: Кʹьтеба Пироз дьбежә: «Сәре хԝә ль бәр Хӧдан Хԝәдейе хԝә дайнә у тʹәне ԝи бьһʹәбинә!» (Луԛа 4:8). Мәрьве кӧ кал-бава дьһʹәбинә, дьле Хԝәде дешинә. Хенщи ԝе йәке Кʹьтеба Пироз дьбежә, ԝәки «мьри бь тьштәки ньзаньн». Әв те һʹәсабе ԝәки әԝана нә жи заньн кӧ йед сах ԝана дьһʹәбиньн; ләма жи әԝана нькарьн нә аликʹарийе бьдьнә мә нә жи зийане (Ԝаиз 9:5, 10; Ишайа 8:19).