ПЬРСЕД ЩАҺЬЛА
Кʹьтеба Пироз Ча Дькарә Али Мьн Бькә?—Пʹара 1: Һин бә Кʹьтеба Пироз Леколин бьки
«Мьн чәнд щара дьхԝәст дәстпекьм Кʹьтеба Пироз бьхуньм, ле әв кʹьтебәкә ӧса мәзьн ә кӧ мьн тʹьре әзе нькарьбьм бь тʹәмами бьхуньм» (Брайана).
Тӧ жи ӧса дьфькьри? Һәгәр әре, әв готар ԝе али тә бькә!
Чьрʹа лазьм ә Кʹьтеба Пироз бьхуньм?
Дьбәкә тәрʹа һʹәԝас нинә Кʹьтеба Пироз бьхуни, әԝ йәк фәʹмдари йә. Тӧ дькари бьфькьри кӧ дәԝса ԝе, дьһа баш ә телевизийоне йан жи щурʹә-щурʹә видео хԝәрʹа бьньһерʹи, чьмки әԝ кʹьтебәкә бь һʹәзара рʹупʹела йә, бь һʹәрфед һур ә у шькьл жи теда тʹӧнә нә.
Ле ԝәрә алики дьнва бьфькьрә: Бәʹса хәбәре, тә сьндоԛа хьзна йа бәре дитийә, тәйе нәхԝәста бьдита кӧ теда чь һәйә?
Кʹьтеба Пироз һәма мина ве сьндоԛа бь хьзна йә. Теда гәләк ширәтед билан һәнә, кӧ ԝе али тә бькьн
Сафикьрьнед баш бьки
Де-баве хԝәрʹа зьман бьвини
Һәвалед баш хԝәрʹа ԛазанщ ки
Бәр стресе тәйах ки
Ле гәло әв кʹьтеба ӧса кәвьн, бь рʹасти дькарә иро кери мә бе? Бәле, чьмки «тʹәмамийа ньвисаре жь бина бәр Хԝәде йә» (2 Тимотʹейо 3:16). Әԝ те һʹәсабе кӧ ширәтед теда жь Кәсе һәри билан ә.
Кʹьтеба Пироз мина сьндоԛа хьзна йә, йа кӧ бь ширәтед билан тʹьжә йә
Чаԝа Кʹьтеба Пироз бьхуньм?
Метода пешьн: Жь сәри һʹәта хьлазийе бьхунә. Ӧса тӧйе фәʹм ки кӧ әʹламәтийа Кʹьтеба Пироз йа сәрәкә чь йә. Ле диса гәләк метод һәнә, кӧ тӧ ча дькари бьхуни. Дина хԝә бьдә дӧ методед жере:
Тӧ дькари 66 кʹьтебед теда пәй һәв бьхуни, демәк жь кʹьтеба Дәстпебун һʹәта Әʹйанти.
Тӧ дькари Кʹьтеба Пироз ль гора хроноложийе бьхуни, демәк һәр дәрәщә чаԝа пәй һәв дьԛәԝьми.
Ширәт: Брошура «Рʹебәри Бона Һинбуна Кʹьтеба Пироз»-да, Пʹара 4-да, нәхша ԛәԝьмандьнед фәрз йа жийина Иса сәр әʹрде, бь хроноложи һәйә.
Метода дӧда: Тʹемәки бьжберә йа кӧ тʹәви проблема тә гьредайи йә. Мәсәлә:
Тӧ дьхԝази кӧ һәвалед бь итʹбар хԝәрʹа ԛазанщ ки? Сәрһатийа Йонатʹан у Даԝьд бьхунә (1 Самуйел сәред 18-20). Тедәрхә кʹижан һʹӧнӧред Даԝьд Йонатʹан хԝәш һатьн кӧ әԝи хԝәст бьбә һәвале ԝи.
Тӧ дьхԝази ԝәʹде щерʹьбандьна амьн бьмини? Сәрһатийа Усьв бьхунә кӧ чаԝа әԝ ԝәʹде щерʹьбандьне амьн ма (Дәстпебун, сәре 39). Дина хԝә бьдә кӧ әԝи жь кʹӧ ԛәԝат станд кӧ амьн бьминә.
Тӧ дьхԝази пебьһʹәси кӧ дӧа ча дькарә али тә бькә? Сәрһатийа Нәһәмийа бьхунә (Нәһәмийа, сәре 2). Бьфькьрә кӧ ԛәԝата дӧайе Нәһәмийа чьԛас мәзьн бу.
Ширәт: Гава Кʹьтеба Пироз дьхуни, ԝе баш бә щики рʹьһʹәт бьжбери кӧ дина тә нәчә сәр тьштәки дьн, ԝәки бькарьби һʹьш-аԛьле хԝә бь тʹәмами бьди сәр хԝәндьне.
Метода сьсийа: Пʹарәк йан забурәк бьхунә, у паше бьфькьрә ча тӧ дькари кʹаре бьвини. Паши хԝәндьне тӧ дькари пьрсед ӧса бьди хԝә:
Чьрʹа Йаһоԝа Кʹьтеба Пирозда әԝ йәк дайә ньвисаре?
Әԝ йәк дәрһәԛа кʹижан хәйсәт-һʹӧнӧред Йаһоԝа мьнрʹа әʹйан дькә?
Ча әз дькарьм ве йәке әʹмре хԝәда бьдьмә хәбате?
Ширәт: Хԝәрʹа нете дайнә кӧ Кʹьтеба Пироз һәр рʹож бьхуни. Салнамеда хԝәрʹа кʹьфш кә кӧ жь кʹижан рʹоже тӧ дьхԝази хԝәндьна Кʹьтеба Пироз дәстпеки.