ПЬРСЕД ЩАҺЬЛА
Кʹьтеба Пироз Ча Дькарә Али Мьн Бькә?—Пʹара 2: Хԝәндьна Кʹьтеба Пироз Һʹәԝас Бькә
Щаһьләк бь наве Ԝил ӧса дьбежә: «Һәгәр тӧ ньзани чь щурʹәйи Кʹьтеба Пироз бьхуни, тәрʹа дькарә бе кʹьфше кӧ һʹәԝас нинә ве бьхуни».
Һәрге тӧ дьхԝази пебьһʹәси кӧ чь щурʹә жь хԝәндьна Кʹьтеба Пироз һʹәԝасе бьстини, әв готар ве йәкеда ԝе али тә бькә.
Бинә бәр чʹәʹве хԝә
Бь тʹәмами бькʹәвә нава хԝәндьне. Мәсәлә, тӧ дькари ван метода бьди хәбате:
Пʹарәке бьжберә кӧ тӧ дьхԝази леколин бьки. Мәсәлә, тӧ дькари сафи ки кӧ сәрһатике йан жи пʹарәке жь Мьзгини бьхуни. Йан жи дькари сәрһатикә ӧса бьжбери кӧ сәр jw.org бь «Хԝәндьна Кьтеба Пироз бь Драматик » һәйә.
Ве пʹаре бьхунә. Тӧ дькари хԝәха бьхуни, йан тʹәви һәвалед хԝә йан жи тʹәви нәфәред хԝә бь дәнге бьльнд бьхуни. Мәсәлә, кәсәк дькарә ча хәбәрван бьхунә, ле йед майин ида ролед дьн бьлизьн.
Ширәтед кӧ жере ньвисар ьн бьдә хәбате:
Шькла бьнәԛьшинә. Мәсәлә, чәнд шькла бьнәԛьшинә, кʹижан кӧ ԝе бьдьн кʹьфше ча һәр тьшт пәй һәв дьԛәԝьмин. Бьн һәр шьклида бьньвисә кӧ әԝ чь дәрәщә йә.
Диаграма нәԛьш бькә. Мәсәлә, гава тӧ дәрһәԛа мәрьвәки амьн бьхуни, бьньвисә кӧ һʹӧнӧр у кьред ԝи кәси чь кʹәрәм жерʹа анин.
Бьдә бәр чʹәʹве хԝә кӧ тӧ журналист и. Паши хԝәндьна сәрһатийәке йанчь «ԛьсәкьрьне» һьлдә жь ԝан мәрьва, йед кӧ ве сәрһатийеда ролед сәрәкә дьлизьн у ӧса жи жь ԝан, йед кӧ шәʹдед ван ԛәԝьмандьна бун.
Һәгәр кәсәк жь сәрһатийәке, сафикьрьна нәаԛьлайи кьрийә, бьдә бәр чʹәʹве хԝә ԝе чь бьԛәԝьмийа һәрге әԝ кәс сафикьрьна бь билани бькьра. Мәсәлә, бинә бәр чʹәʹве хԝә ве дәрәще чахе Пәтрус Иса инкʹар кьр (Марԛос 14:66-72). Бьфькьрә, чаԝа Пәтрус дькарьбу тьрса бәр мәрьва алт кьра?
Сенарийа хԝә бьньвисә. Һәрге дькари сәр һʹиме сәрһатийәкә Кʹьтеба Пироз, драма хԝә бьньвисә. Дәрсед кӧ тә дитийә, бир нәкә хԝәрʹа бьньвисә (Рʹомайи 15:4).
Кʹьтеба Пироз ӧса бьхунә, кӧ те бежи һәр тьшт бәр чʹәʹве тә дьԛәԝьмә!
Кʹур леколина бькә
Һәгәр тӧ дина хԝә бьди деталед һур, тӧйе хьзнед вәшарти бьвини. Щара нав хәбәрәке йан чәнд хәбәрада фькьрәкә гәләк кʹур вәшартийә.
Мәсәлә, Мәтта 28:7 тʹәви Марԛос 16:7 бәрамбәр кә.
Чьрʹа Марԛос әԝ информасийа ньвиси, кӧ Иса зутьрәке ԝе шагьртарʹа «у Пәтрусрʹа» әʹйан бә?
Информасийа: Марԛос шәʹде ԝан ԛәԝьмандьна нибу; дьԛәԝьмә дәрһәԛа ван тьшта әԝ жь Пәтрус пеһʹәсийа бу.
Фькьра кʹур: Чьрʹа Пәтрус дьбәкә гәләк ша бу, чахе пебьһʹәсийа кӧ Иса дьхԝазә диса ԝи бьвинә? (Марԛос 14:66-72) Иса ча Пәтрусрʹа да кʹьфше кӧ бь рʹасти һәвале ԝи йә? Тӧ ча дькари чʹәʹв бьди Иса у бьби һәваләки баш?
Һәгәр тӧ чь кӧ Кʹьтеба Пирозда дьхуни зәлал дьди бәр чʹәʹве хԝә у кʹур сәр ве йәке дьфькьри, һьнге хԝәндьн ԝе тәрʹа дьһа һʹәԝас бә!