ПЬРСЕД ЩАҺЬЛА
Чьма Әз Һәр Тʹьм Тьштед Нәлазьм Дьбежьм?
«Щара әз мьԛати хәбәрдана хԝә мә, ле щара жи зьмане хԝә контрол накьм у бе һʹәмде хԝә хәбәр дьдьм!» (Щеймс).
Чахе әз стреседа мә әз ԛал-бал хәбәр дьдьм, у щара чахе әз хԝә рʹьһʹәт жи тʹәхмин дькьм һьнге жи әз дькарьм тьштед зедә хәбәр дьм. Һәйнәсәр һʹале мьн хьраб ә! (Мери).
Кʹьтеба Пироз дьбежә: «Зьман жи агьрәк ә», у «пьрискә агьр, чь дарьстанәкә мәзьн дькарә бьшәԝьтинә!» (Аԛуб 3:5, 6). Дьбә кӧ тӧ жи гәләк щар бона хәбәрдана хԝә пʹошман дьби? Һәрге әре, әв готар һәма бона тә йә.
Чьрʹа әз тьштед нәлазьм хәбәр дьдьм?
Ԛьсуртийа мә. Кʹьтеба Пироз дьбежә: «Әм һʹәму жи гәләки шашийа дькьн. Һәгәр йәк хәбәрданеда тʹӧ шашийе накә, әԝ йәки кʹамьл ә» (Аԛуб 3:2). Әм мәрьвнә гӧнәкʹар ьн, ләма жи әм нә тʹәне ԝәʹде рʹевачуйине дькарьн бьшьмьтьн, ле ӧса жи ԝәʹде хәбәрдане.
«Мәжу у зьмане мьн нәԛәданди нә, ләма жи ԝе нәаԛьлайи бә һәрге бежьм кӧ әз дькарьм бь тʹәмами хәбәрдана хԝә контрол кьм» (Анна).
Зәʹфхәбәрдан. Кʹьтеба Пироз дьбежә: «Зәʹфхәбәрданеда гӧнә һәнә» (Мәтʹәлок 10:19). Мәрьве кӧ гәләк хәбәр дьдә у гӧһ надә йед дьн, дькарә пе хәбәрдана хԝә дьле кәсәки бешинә.
«Мәрьве лапә аԛьл әԝ нинә йе кӧ гәләки хәбәр дьдә. Мәсәлә, Иса жи, мәрьве лапә аԛьл сәр әʹрде, щара хԝә кәрʹ дькьр у хәбәр нәдьда» (Щулйа).
Хәбәред туж. Кʹьтеба Пироз дьбежә: «Һьнәк бь хәбәра мина шур мерьв бьриндар дькьн» (Мәтʹәлок 12:18). Хәбәра мина шур, демәк йа бе һʹәмде хԝә, әв һәйә хәбәрдана туж у тәʹн-ньчʹ, кӧ бь ве нете тенә готьне, ԝәки кәсәки ньмьз кьн. Кʹи кӧ хәбәред ӧса дьдә хәбате щара дьбежьн: «Әз һʹәнәка дькьм!» Ле бь рʹасти ве йәкеда тьштәки кʹән тʹӧнә чахе кәсәки ньмьз дькьн. Хәбәра Хԝәдеда те готьне, «бьра ... кʹьфьри-зьфьри жь ԝә дур бьн» (Әфәси 4:31).
«Әз һʹьз дькьм хәбәр дьм у кʹәне мәрьва биньм, ле гәләк щар әв ча тәʹн-ньчʹ дәртен, у рʹуйе зьмане хԝәда әз шәрми дьминьм» (Оксана).
Чаԝа кӧ дәрмане дьрана гава дьгӧһеши ида нькари пашда бьки һʹӧндӧр, ӧса жи хәбәред готи ида нькари пашда вәгәрʹини.
Ча зьмане хԝә зәфт кьм?
Һеса нинә тʹьме зьмане хԝә контрол кьн, ле принсипед Кʹьтеба Пироз дькарьн ве йәкеда аликʹарийе бьдьн. Вьра чәнд принсип һатьнә дайине:
«Щи-ньвинада бьфькьрьн у дәнг нәкьн» (Зәбур 4:4).
Щарна һе баш ә хԝә кәрʹ кьн. Лаура ӧса дьбежә: «Чахе әз һерс ьм, әз дькарьм бе һʹәмде хԝә хәбәр дьм, ле чахе һерса мьн датинә, әз ша дьбьн ԝәки мьн хԝә контрол кьр у һәр тьшт чь кӧ дьфькьрим, нәгот». Щара әв чәнд сәни жи кӧ тӧ дьсәкьни ԝәки бина хԝә бькʹшини, али тә дькьн кӧ тьштед зедә хәбәр нәди.
«Гәр чаԝа полкә тьшт кӧ дьхԝә тәʹм бькә, ма гӧһ жи тьште бьһьстийә, ӧса нащәрʹьбинә?» (Ибо 12:11).
Бона кӧ паше сәва хәбәрдана хԝә пʹошман нәби, пешийа кӧ тьштәки бежи, хԝә бьпьрсә:
Әв тьштәки рʹаст ә? Әв тьштәки ԛәнщ ә? Әʹсәйи йә әве йәке бежьм? (Рʹомайи 14:19).
Мьне хԝә ча тʹәхмин кьра һәрге әв йәк мьнрʹа бьготана? (Мәтта 7:12).
Гәло бь ве йәке әзе ԛәдьр һьндава хәбәрдана кәсед дьн бьдьмә кʹьфше? (Рʹомайи 12:10).
Гәло лазьм ә ньһа дәрһәԛа ве йәке хәбәр дьм? (Ԝаиз 3:7).
«Бь мьлуктийе һәвале хԝә сәр хԝәр′а бьгьрә» (Филипи 2:3).
Һәрге тӧ ван ширәта бьди хәбате, тӧйе һин би ԛәдьре мәрьва бьгьри у әв йәк ԝе али тә бькә зьмане хԝә бькарьби, у пешийа кӧ тьштәки бежи, тӧйе бьфькьри. Һәрге тә ида тьштәк хәйд готийә, мьлукти ԝе али тә бькә паш нәхи у бахшандьне бьхԝази! (Мәтта 5:23, 24). Бьра әв йәк тәрʹа бьбә ширәт, ԝәки тӧ сәр хԝә бьхәбьти кӧ ида шашийед ӧса бәрнәди.