Гәло Шәʹдед Йаһоԝа Ча Дьньһерʹьн сәр Стандьна Хԝәндьне?

Ньһерʹандьна мә дәрһәԛа стандьна хԝәндьне, сәр һʹиме принсипед Кʹьтеба Пироз ә. Һәр Шәʹде Йаһоԝа гӧһ дьдә исафа хԝәйә бь Кʹьтеба Пирозә һинкьри, у сафи дькә ча ԝан принсипа бьдә хәбате.a

• Стандьна хԝәндьне фәрз ә

• Гәрәке ньһерʹандьна мә сәр хԝәндьне рʹаст бә

• Стандьна хԝәндьна бьльнд дькарә зийане бьдә

• Гәло бал Шәʹдед Йаһоԝа мәкʹтәбед рʹелиги сәва зарʹа һәнә?

Стандьна хԝәндьне фәрз ә

Гава мәрьв һин дьбә, әԝ «аԛьл у фьрасәте» дьстинә, у Кʹьтеба Пироз ԝан һʹӧнӧра гәләк ԛимәт һʹәсаб дькә (Мәтʹәлок 2:10, 11; 3:21, 22). Хенщи ве йәке, Иса готә шагьртед хԝә кӧ бьбьнә дәрсдар, ԝәки мәрьва тʹәмийед ԝи һин бькьн (Мәтта 28:19, 20). Ләма жи әм баԝәрмәндед хԝә һелан дькьн, кӧ һаш жь гәләк тьшта һәбьн: хԝәндьн у ньвисаре бьзаньбьн, бькарьбьн фькьред хԝә шьровәкьнb, у ӧса жи дәрһәԛа религийа у културед майин бьзаньбьн (1 Корьнтʹи 9:20-22; 1 Тимотʹейо 4:13).

Гәләк ԝәлатада сәрԝеред дәԝләте фәʹм дькьн кӧ чьԛас фәрз ә мәрьв хԝәнди бьн, ләма жи дәʹԝа дькьн кӧ зарʹ әʹсәйи хԝәндьна мәкʹтәбе бьстиньн. Әм гӧрʹа сәрԝеред дәԝләте дькьн, чьмки Кʹьтеба Пироз дьбежә: «Һәр мәрьвәк бьра гӧрʹа ԝан һʹӧкӧмәтийада бә, кӧ сәр ԝирʹа нә» (Рʹомайи 13:1). Хенщи ве, әм зарʹед хԝә һелан дькьн кӧ хирәт бьн у мәкʹтәбеда рʹьнд һин бьн, нә тʹәне сәва атестате бьстиньн.c Хәбәра Хԝәдеда те готьне: «Чь жи бькьн, бь дьл у щан бькьн, чаԝа бона Хӧдан, нә кӧ бона мәрьва» (Колоси 3:23).

Стандьна хԝәндьне али мә дькә әʹбура малбәта хԝә бькьн. Ль гора Кʹьтеба Пироз, «һәгәр мәрьвәк бона хԝәхатийа хԝә, илаһи бона мала хԝә хәм накә, әԝи баԝәри инкʹар кьрийә у жь нәбаԝәра жи хьрабтьр ә» (1 Тимотʹейо 5:8). Һинбуна мәкʹтәбе дькарә али мә бькә, кӧ әве борщдарийе биньн сери. Енсиклопедийәкеда һатә готьне (The World Book Encyclopedia), нета стандьна хԝәндьне әԝ ә, кӧ мәрьв бькарьбә пешдачуйи бә у бьбә хәбатчики баш. Мәрьве хԝәнди у йе дәстпʹешәрʹа һеса йә хәбате хԝәрʹа бьвинә у әʹбура малбәта хԝә бькә, нә кӧ ԝи мәрьвирʹа, йе кӧ мәкʹтәб хьлаз нәкьрийә у тʹӧ пʹешә нәстандийә (Мәтʹәлок 22:29).

Де-бав али зарʹед хԝә дькьн, нә тʹәне алийе материалида. Ле әԝана ӧса жи ԝана һазьр дькьн, ԝәки хԝәха сәре хԝә хԝәй кьн, у әԝана фәʹм дькьн кӧ бона ве йәке һинбуна мәкʹтәбе гәләк фәрз ә (2 Корьнтʹи 12:14). Әм де-бава һелан дькьн, кӧ зарʹед ԝан хԝәндьне бьстиньн, ԝи чахи жи һәрге ԝәлате ԝанда әԝ йәк пʹәрәти йә, чәтьн ә хԝәндьне бьстиньн, йан жи култура ԝанда әв йәк әʹдәт нинә.d Әм ӧса жи ширәта дьдьнә де-бава, ԝәки әԝана али зарʹед хԝә бькьн кӧ рʹьнд һин бьн.e

Гәрәке ньһерʹандьна мә сәр хԝәндьне рʹаст бә

Әм сәр бьжартьна хԝәндьне сьвьк наньһерʹьн. Кʹьтеба Пироз дьбежә: «Мәрьве сахьке дьле хԝә һәр готьне баԝәр дькә, ле йе аԛьл дина хԝә дьдә гавед хԝә» (Мәтʹәлок 14:15). Әм әве принсипе һьлдьдьн һʹәсаб, гава сафи дькьн паши мәкʹтәбе кӧ чь щурʹә хԝәндьне бьстиньн. Әм ӧса жи һьлдьдьн һʹәсабе кӧ бона ве йәке чьԛас хәрщ лазьм ә, у ӧса жи кʹара ве һинбуне. Бәʹса хәбәре, һәрге кәсәк мәкʹтәбеда хԝәндьне дьстинә, әԝ дькарә ԝәʹдәки кьнда пʹешәки бьстинә.

Дьһа ԛимәт ә рʹӧһʹанида хԝәнди бьн. Занәбуна дәрһәԛа Хԝәде дькарә әʹмьре мәрьв хьлаз кә, ле нә хԝәндьна мәкʹтәбеда нә жи хԝәндьна бьльнд, нькарә ве йәке бьдә (Йуһʹәнна 17:3). Әԝ ӧса жи мәрьва һини нав-намусийе дькә, у али дькә «рʹастийе, ԛьраре, һәԛийе ... у сәрда жи һәр шьвәрʹийед ԛәнщ» нав хԝәда пешда бинә (Мәтʹәлок 2:9). Паԝлосе шанди хԝәндьнәкә ӧса станд, кӧ әм иро дькарьн бәрамбәри хԝәндьна университете бькьн. Ле йәкә бона ԝи занәбуна дәрһәԛа Иса Мәсиһ дьһа ԛимәт бу (Филипи 3:8; Кʹаред Шандийа 22:3). Иро жи гәләк Шәʹдед Йаһоԝа йед кӧ хԝәндьна бьльнд стандьнә, хԝәндьна рʹӧһʹани дьһа ԛимәт дькьн.f

Стандьна хԝәндьна бьльнд дькарә зийане бьдә

Мәтʹәлокәкә Кʹьтеба Пироз дьбежә: «Йе аԛьл хьрабийе кӧ дьбинә һʹәвза хԝә дькә» (Мәтʹәлок 22:3). Шәʹдед Йаһоԝа заньн, ԝәки һьнә университетада һʹаләки ӧса йә, кӧ дькарә алийе намусийеда у рʹӧһʹанида зьраре бьдә студента. Ләма жи, һьнә Шәʹдед Йаһоԝа сафи кьрьнә, кӧ хԝә у зарʹед хԝә нәкьнә бьн ве хофе. Әԝана дьфькьрьн кӧ һьнә унивеситетада ньһерʹандьнед нәрʹаст сәр студентава дькьн. Мәсәлә йед ӧса:

• Хальфандьн: Пʹәрә мәрьва бәхтәԝар дькьн у хԝәй дькьн

  Гәләк мәрьв дьфькьрьн кӧ хԝәндьна бьльнд әʹсәйи йә, ԝәки хәбатәкә баш бьвиньн у пʹәре ԛальм ԛазанщ кьн. Ләма жи гәләк щаһьл тʹәне бона ве йәке хԝәндьна бьльнд дьстиньн, ԝәки ахьрийеда бь әʹмьрәки дәԝләмәнд бьжин. Һьнәк дьфькьрьн кӧ пʹәрә ԝе ԝана бәхтәԝар кә у хԝәй кә, ле Кʹьтеба Пироз тʹәви ве йәке ԛайил нинә (Ԝаиз 5:10). Кʹьтеба Пироз һәла һе жи дьбежә кӧ «пʹәрәһ′ьзи каникә һәр щурʹә хьрабийе йә» (1 Тимотʹейо 6:10). Шәʹдед Йаһоԝа нахԝазьн бькʹәвьнә тʹәлька «дәрәԝед дәԝләтийе» (Мәтта 13:22).

• Хальфандьн: Мәрьв гәрәке навдар бә, у бе хԝәндьна бьльнд әԝ йәк набә

  Дина хԝә бьдьн кӧ премйер-министре бәре йе Гӧрщьстане, Ника Гилаури чь гот дәрһәԛа ньһерʹандьна мәрьва сәр хԝәндьна бьльнд, ԝәлате хԝәда: «Гӧрщьстанеда, һәгәр мәрьв дьхԝазә навдар бә у хԝәйиԛәдьр бә, әʹсәйи йә диплома ԝийә университете һәбә. ... [Бәре] щаһьлед кӧ хԝәндьна бьльнд нәдьстандьн, наве малбәта хԝә дехьстьн».g Ле Кʹьтеба Пироз мәрʹа ширәте дьдә кӧ ве дьнйайеда нав у дәнге хԝә нәгәрʹьн. Иса сәрԝеред религийайерʹа йед кӧ пәй нав у дәнге хԝә дькʹәтьн, гот: «Һуне чаԝа бькарьбьн мьн баԝәр бькьн, һәгәр һун нав һәвда рʹумәта наве хԝә дьгәрʹьн?» (Йуһʹәнна 5:44) Ньһерʹандьн у фькьред кӧ университедеда бәлабуйи нә, дькарьн һʹьш-аԛьле мәрьва бьгӧһезьн у бәрбь ԛӧрʹәбуне бьвьн, чь кӧ бәр чʹәʹве Хԝәде рʹәш ә (Мәтʹәлок 6:16, 17; 1 Пәтрус 5:5).

• Хальфандьн: Изна һәр кәси һәйә кӧ хԝәха сафи кә чь ԛәнщ ә у чь хьраб ә

  Шәʹдед Йаһоԝа дәрһәԛа ԛәнщийе у хьрабийе ньһерʹандьна Хԝәде һьлдьдьн һʹәсаб (Ишайа 5:20). Журналәкеда, йа кӧ дәрһәԛа наркотика шьровәдькьр дьһатә готьне, кӧ шагьрт дькʹәвьнә бәр байе щаһьлед дьн у «сафикьрьнед ӧса дькьн кӧ һьмбәри ньһерʹандьна ԝанә йа сәр ԛәнщийе у хьрабийе йә».h Ләма жи Кʹьтеба Пироз дьбежә: «Һәвалтийа хьраб мәрьве хԝәйипʹәргал хьраб дькә» (1 Корьнтʹи 15:33). Университетада кьред ӧса бәлабуйи нә у һәла һе жи һелане дьдьнә щаһьла ван тьшта бькьн, чь кӧ бәр чʹәʹве Хԝәде рʹәш ьн, мәсәлә гәләк ичʹкәвәхԝарьн, хәбьтандьна наркотика у бенамуси (1 Корьнтʹи 6:9, 10; 2 Корьнтʹи 7:1).

• Хальфандьн: Хԝәндьна бьльнд али дькә кӧ дьнйа алийе башда бьгӧһезьн

  Рʹаст ә гәләк мәрьвед кӧ дьхԝазьн хԝәндьна бьльнд бьстиньн, нета ԝан нә әԝ ә кӧ дәԝләти бьн, бьбьнә мәрьвед навдәнг, у кʹефа хԝәрʹа бьжин. Ле нета ԝан әԝ ә кӧ хԝә у дьнйа, алийе башда бьгӧһезьн. Шәʹдед Йаһоԝа сәр ве йәке бь щурʹәки майин дьньһерʹьн. Мина Иса Мәсиһ, әм баԝәр дькьн кӧ тʹәне Пʹадшатийа Хԝәде дькарә дьне алийе башда бьгӧһезә (Мәтта 6:9, 10). Ле һʹәта әм һивийа Пʹадшатийа Хԝәде нә, кӧ ван проблемед дьнйайе сафи кә, әм бәтал рʹунәньштьнә. Дәԝсе, әм чʹәʹв дьдьнә Иса кӧ «Мьзгинийа Пʹадшатийе» ль нав тʹәмамийа дьнйайе бәла дькьн, у һәр сал али бь һʹәзара мәрьва дькьн әʹмре хԝә алийе башда бьгӧһезьнi (Мәтта 24:14).