Даwьд дәрһәqа Голйатʹ, гьлийед öса готә пʹадше: «Бьра дьле тʹö кәси бәр wи мәрьви нәләрьзә». Бь рʹасти жи дьле Шаwул у әскәред wи бәр Голйатʹ ләрьзин. Wана шаши бәрда кö хwә бәрамбәри ви мәрьви кьрьн, у дьтьрсийан чахе дьфькьрин кö әwана qә ниве бәжна wи жи ниньн. Wана ида дьда бәр чʹәʹве хwә кö Голйатʹе тәрьки, wе һеса wана алт кә. Ле Даwьд öса нәдьфькьри. Әwи ль сәр ве дәрәще бь щурʹәки майин дьньһерʹи. Ләма жи әв һазьр бу хwәха тʹәви Голйатʹ шәрʹ кә (1 Самуйел 17:32).

Даwьд кор нибу у дьдит кö Голйатʹ у чʹәкед wи пʹьрʹ мәзьн ьн. Ле әwи нәһишт кö әв тьшт wи бьтьрсиньн у әw бьләрьзә. Әwи мина Шаwул у әскәред wи, шашийа öса бәрнәда, демәк нәтьрсийа. Даwьд хwә бәрамбәри Голйатʹ нәкьр. Дәwсе әwи ль сәр Голйатʹ бь чʹәʹве Йаһоwа дьньһерʹи. Рʹаст ә бьльндайа Голйатʹ 2.9 метр бу, у әw жь һʹәму мәрьвед дьн зәʹф бьльндтьр бу, ле һьмбәри Хwәдейе Һьмзор бьльндайа wи, тʹö тьшт нибу. Бәле, һьмбәри Хwәде, Голйатʹ мина кʹезькәке бу, у Йаһоwа wе әw кʹöта кьра.

Даwьд бь ләзә-ләз бәрбь дьжмьне хwә дьчә, у жь чәнте хwә кәвьр дәрдьхә. Әwи кәвьркана хwә һазьр дькә, у ль сәр сәре хwәрʹа qайим дьзьвьринә. Wи чахи Голйатʹ жи тʹәви чʹәкдаре хwә, пешда те. Жь бо бьльндайа Голйатʹ, чʹәкдаре wийи ньмьз, нькарьбу мәртʹал епʹещә бьльнд кьра, сәва кö Голйатʹ бькарьбә сәре хwә бьпʹарезә. Нә һʹәма нета Даwьд жи әw бу (1 Самуйел 17:41).

1 | Гәло бь рʹасти бьльндайа бәндә дькарә wәкә 3 метр бә?

Кʹьтеба Пироз дьбежә кö бьльндайа Голйатʹ wәкә 3 метр бу (1 Самуйел 17:4). Һьнәк мәрьв баwәр накьн кö Голйатʹ һаqас бьльнд бу. Ле һун заньн wәки ль горʹа леколине һатә кʹьфше кö дәwрана мәда жи мәрьве лапи бьльнд һәбу у бьльндайа wи 2.7 метр зедәтьр бу. Ләма жи әм дькарьн баwәр бьн кö Голйатʹ жи гәләк бьльнд бу. Әw жь рькʹьнйата Рʹьфайи бу йед кö бәжбьльндайа хwәда гәләк әʹйан бун. Документед Мьсьрйада, йа qьрна 13 Б.Д.М. һатьбу готьне, кö һәрәма Кәнанеда әʹскәред хоф һәбун, бьльндайа кʹижана кö 2.4 метр зедәтьр бу. Ләма жи әм дькарьн бежьн, кö бь рʹасти Голйат йәки гәләк бьльнд буйә.