Чь йә Пʹадшатийа Хwәде?

1. Дәрһәqа кʹижан дӧа әме дь ви сәрида хәбәр дьн?

ИСА Мәсиһ шагьртед хwә һин кьрьбу ча әwана гәрәке дӧа бькьн. Әва дӧа иро гәләк әʹйан ә. Дь ви дӧаида, фькьред гәләк фәрз һәнә. Се тьштед пешьн, йед кӧ дь ви дӧаида Иса жь Хwәде һиви дькьр, wе али мә бькьн, wәки әм пебьһʹәсьн кӧ Кʹьтеба Пироз чь һин дькә дәрһәqа Пʹадшатийа Хwәде.

2. Дәрһәqа чь се тьшта Иса готә шагьртед хwә, wәки әwана дӧа бькьн?

² Дь ви дӧайида Иса гьлийед ӧса гот: «Ле һун аһа дӧа бькьн: ‹Баве мәйи әʹзмана! Наве тә пироз бә, Пʹадшатийа тә бе, әʹмьре тә бә, чаwа ль әʹзмен, ӧса жи ль сәр әʹрде›» (Мәтта 6:9-13). Гәло әв се хwәстьн чь тенә һʹәсабе?

3. Әм чь гәрәке пебьһʹәсьн дәрһәqа Пʹадшатийа Хwәде?

³ Дәрһәqа наве Хwәде әм ида гәләки пеһʹәсийан. Әм пеһʹәсийан qьрара wи чь йә, ӧса жи әм пеһʹәсийан, Хwәде чь кьрийә у әw чь дьхwазә бькә сәва мәрийа ль ахьрийе. Ле гәло гава Иса дӧа дькьр, «Пʹадшатийа тә бе», әwи чь дьхwәст бьгота? Гәло Пʹадшатийа Хwәде чь йә? Ча Пʹадшатийа Хwәде wе наве Хwәде пироз бькә? У ортʹа Пʹадшатийа Хwәде у qәдандьна qьрара Хwәде чь тʹәвгьредан һәйә?

ПʹАДШАТИЙА ХWӘДЕ ЧЬ ЙӘ?

4. Чь йә Пʹадшатийа Хwәде у кʹи йә Пʹадшайе ве пʹадшатийе?

⁴ Пʹадшатийа Хwәде әw һәйә сәрwерти, йе кӧ жь Йаһоwа Хwәде һатә кʹьфшкьрьне. Ле гәло Хwәде кʹи кʹьфш кьр ча Пʹадша дь ве Пʹадшатийеда? Бәле, Йаһоwа Иса Мәсиһ кʹьфш кьр. Иса жь һʹәму сәрwеред дьнйайе баштьр у мәзьнтьр ә. Әw «Пʹадшайе пʹадшайа у Хӧдане хӧдана» йә (1 Тимотʹейо 6:15). Иса ль дьнйайе жь пʹадшайе лапи баш, баштьр ә у дькарә һе зедә тьштед баш бькә сәва мәрийа.

5. Пʹадшатийа Хwәде ль кʹидәре йә, у ль сәр чь wе сәрwерийе бькә?

⁵ Ле гәло Пʹадшатийа Хwәде ль кʹидәре йә, ль кʹижан али йә? Иса Мәсиһ ньһа ль кʹидәре йә, Пʹадшатийа Хwәде жи ль wе дәре йә. Дьбәк жи те бира тә, wәки паши мьрьне Иса һатә сахкьрьне у һьлкʹьшийа ль әʹзмана (Кʹаред Шандийа 2:33). Демәк, Пʹадшатийа Хwәде жи ль әʹзмана йә. Ләма жи дь Кʹьтеба Пирозда Пʹадшатийа Хwәде те навкьрьне ча «Пʹадшатийа . . . әʹзмана» (2 Тимотʹейо 4:18). Рʹаст ә Пʹадшатийа Хwәде ль сәр әʹзмана йә, ле әw wе ль сәр әʹрдерʹа пʹадшатийе бькә. (Бьхунә Әʹйанти 11:15.)

6, 7. Чьрʹа әм дькарьн баwәр кьн, кӧ Иса wе Пʹадшаки лапи баш бә?

⁶ Чьрʹа әм дькарьн баwәр кьн, кӧ Иса Пʹадшаки лапи баш ә? Йа пешьн, кӧ әw тʹӧ щар намьрә. Дь Кʹьтеба Пирозда те готьне, фьрqийа ортʹа wи у пʹадшед дьнйайе әw ә, кӧ «әw нәмьри йә, нава рʹонайийеда йә» (1 Тимотʹейо 6:16). Әв те һʹәсабе, кӧ һʹәму кьред баш йед кӧ Иса wе бькә, һʹәта-һʹәтайе wе кʹаре мәрʹа бинә. У әм дькарьн гӧман бьн, wәки әw бь рʹастийе жи сәва кʹара мәрийа гәләк тьштед баш wе бькә.

⁷ Ишайа пʹехәмбәр жи дәрһәqа Иса Мәсиһ ледькьр, у жь гьлийед wи әм педьһʹәсьн, кӧ ль сәр Иса wе рʹӧһʹе Хwәде һәбә. Әw wе Пʹадшаки аqьл у билан, баш у дьлрʹәʹм, у ӧса жи qайим бә. Әw wе жь Хwәде хоф бькә у һʹәму мәрийед һесир у бәләнгаз, бь рʹастийе у һәqийе диwан кә (Ишайа 11:2-4). Тәйе бьхwәста бьн һʹӧкӧмәта Пʹадшаки ӧса бьжита?

8. Кʹи диса wе тʹәви Иса пʹадшатийе бькә?

⁸ Жь Кʹьтеба Пироз әм ӧса жи педьһʹәсьн, кӧ wе һәбьн кәсед ӧса, йед кӧ тʹәви Иса wе пʹадшатийе бькьн. Мәсәлә, Паwлосе шанди гьлийед ӧса готә Тимотʹейо: «Һәгәр әм сәбьр кьн, әме пʹадшатийе жи тʹәви wи бькьн» (2 Тимотʹейо 2:12). Бәле, Паwлос, Тимотʹейо у ӧса жи мәрийед дьн кӧ амьн бун, жь алийе Хwәдеда һатьнә жьбартьне, сәва кӧ тʹәви Иса дь Пʹадшатийа әʹзманада пʹадшатийе бькьн. Ле гәло чьqас мәрьв wе qәдрәки ӧса бьстиньн?

9. Чьqас мәри wе тʹәви Иса пʹадшатийе бькьн, у кʹәнге Йаһоwа дәстпекьр ван мәрьва бьжберә?

⁹ Жь ве кʹьтебе дь сәре 7-да әм пеһʹәсийан, кӧ Йуһʹәннайе шанди дитьнока ӧса дит: «Бәрх [Иса Мәсиһ] ль сәре чʹийайе Сийоне сәкьни бу [ль әʹзмана, щийе хwәйә пʹадшатийе] у сәд чьл чар һʹәзар мәрьв тʹәви wи бун, кӧ ль сәр әʹнийа wан наве wи у наве Баве wи ньвисар бун». Ле гәло әв 144 000 мәрьв кʹи нә? Йуһʹәнна ӧса шьровәкьр: «Әвана пәй Бәрх дьчьн, кʹӧда кӧ әw дьчә. Әwана жь нава мәрьва һатьнә кʹьрʹине, чаwа бәре дәрәмәта пешьн кӧ Хwәде у Бәрхрʹа бенә дайине» (Әʹйанти 14:1, 4). Бәле, ль вьр хәбәрдан дьчә дәрһәqа шагьртед Исайә амьн, йед кӧ ль сәр әʹзмана тʹәви Иса wе пʹадшатийе бькьн. Гава әwана бенә сахкьрьне сәва жийина ль сәр әʹзмана, әwана wе бьбьнә пʹадша, wәки «ль сәр дьнйайе пʹадшатийе бькьн» (Әʹйанти 5:10). Жь шандийед Иса дәстпебуйи, Йаһоwа мәсиһийед амьн дьжберә wәки һʹәсабе wан бьбә 144 000 мәрьв.

10. Чьрʹа әw йәк кӧ Йаһоwа Иса Мәсиһ у 144 000 мәрьв жьбарт ча Пʹадша, һʹьзкьрьнәкә мәзьн ә?

¹⁰ Әw йәк кӧ Йаһоwа жьбарт Иса Мәсиһ у 144 000 мәрьв ча Пʹадша, кʹьфш дькә һʹьзкьрьна Йаһоwа һьндава мәрийа. Чьмки Иса Мәсиһ рʹьнд занә әʹмьре мәрийа ча нә у чь чәтьнайе мәрийа һәнә. Паwлос дәрһәqа Иса гьлийед ӧса гот: «Сәрәккʹаһинәки мәйи ӧса тʹӧнә, кӧ тәнгасийед мәда дьле wи сәр мә нәшәwьтә, ле әw жь һʹәму алийада щерʹьбанди йә мина мә, ле тʹәне бегӧнә» (Ибрани 4:15; 5:8). 144 000 мәрьв жи, йед кӧ wе тʹәви Иса пʹадшатийе бькьн, ль сәр әʹрде дьжитьн у рʹасти кӧл-дәрда у проблема дьһатьн. Ча һʹәму мәрьв ӧса жи әwана тʹәви гӧнәкʹарийа хwә шәрʹ дькьрьн у мина һʹәму мәрийа нәхwәш дькʹәтьн. Ләма жи әм дькарьн гӧман бьн, кӧ чахе әм рʹасти проблема бен, әwана wе мә рʹьнд фәʹм бькьн.

ПʹАДШАТИЙА ХWӘДЕ WЕ ЧЬ БЬКӘ?

11. Чьрʹа Иса готә шагьртед хwә, wәки әwана гәрәке дӧа бькьн, сәва кӧ ль сәр әʹзмана әʹмьре Хwәде бә?

¹¹ Чахе Иса Мәсиһ готә шагьртед хwә кӧ әwана гәрәке дәрһәqа Пʹадшатийа Хwәде дӧа бькьн, әwи ӧса жи готә wан wәки әwана дӧа бькьн, кӧ бьра qьрара Хwәде бә «чаwа ль әʹзмен, ӧса жи ль сәр әʹрде». Хwәде ль сәр әʹзмана йә, у ль wьр мьлйакʹәтед wийи амьн, тʹьме qьрара wи дьqәдиньн. Ле жь ве кʹьтебе дь сәре 3-да, әм пеһʹәсийан кӧ мьлйакʹәтәк гӧрʹа Хwәде нәкьр у дәwда Адәм у Һеwа wәки әwана гӧнә бькьн. Дь сәре 10-да wе һур бь һур бе шьровәкьрьне, кӧ чь дьбежә Кʹьтеба Пироз дәрһәqа ви мьлйакʹәти, демәк Мире-щьна. Чьмки пешийе Хwәде һишт кӧ Шәйтʹан Мире-щьна у әw мьлйакʹәт йед кӧ пәй wи чун, демәк щьн, ль әʹзмен бьжин, ләма жи әм дькарьн бежьн кӧ һәбу wәʹдә, кӧ ль сәр әʹзмана нә һʹәму жь әʹфьринед рʹӧһʹани qьрара Хwәде дьqәдандьн. Ле әв йәк гәрәке бьһата рʹасткьрьне чахе Пʹадшатийа Хwәде сәрwертийа хwә дәстпекьра. Гава Иса Мәсиһ бьбуйа Пʹадша, пешийе wе тʹәви Мире-щьна шәрʹ кьра. (Бьхунә Әʹйанти 12:7-9.)

12. Дәрһәqа кʹижан дӧ тьштед фәрз, дь кʹьтеба Әʹйанти 12:10-да те гьликьрьне?

¹² Дь Кʹьтеба Пирозда дәрһәqа ве йәке ӧса те пʹехәмбәрти кьрьне: «Һьнге мьн ль әʹзмен дәнгәки бьльнд бьһист кӧ дьгот: «Ньһа йә wәхте хьлазкьрьн, qәwат у пʹадшатийа Хwәдейе мә, ӧса жи һʹӧкӧме Мәсиһе wи. Чьмки әw хәйбкьре хушк-бьред мә [Мире-щьна] жорда һатә авитьне, йе кӧ шәв у рʹож бәр Хwәдейе мә хәйба wан дькьр» (Әʹйанти 12:10). Тә дина хwә дайе кӧ ль вьр дәрһәqа дӧ тьштед фәрз те готьне? Йа пешьн, кӧ Пʹадшатийа Хwәде бь сәрwертийа Иса Мәсиһ wе дәстпекә пʹадшатийе бькә. Йа дӧда жи, Мире-щьна жь әʹзмана wе бе авитьне ль сәр әʹрде.

13. Паши wе йәке ча Мире-щьна жь әʹзмана һатә авитьне, чь qәwьми?

¹³ Гәло паши ве йәке чь qәwьми? Дь Кʹьтеба Пирозда ӧса те готьне: «Аwа ша бьн, әʹзманно у йед кӧ wанда дьминьн» (Әʹйанти 12:12). Бәле, мьлйакʹәтед ль әʹзмана гәләк ве йәкерʹа ша дьбун, кӧ Мире-щьна у щьнед wи жорда һатьбунә авитьне, чьмки ль әʹзмана йед нәһәq ида тʹӧнә бун, у һʹәму әʹфьринед рʹӧһʹани ида Хwәдерʹа амьн бун. У ль wьр әʹдьлайи у тʹьфаqи ида һәйә. Ль әʹзмана бь рʹастийе жи qьрара Хwәде те qәдандьне.

14. Паши wе йәке ча Мире-щьна һатә авитьне ль әʹрде, чь qәwьми?

¹⁴ Ле чь әм дькарьн бежьн дәрһәqа әʹрде? Дь Кʹьтеба Пирозда ньвисар ә: «Ле wәй ль әʹрде у ль бәʹре, чьмки Мире-щьна жорда сәр wәда һатә авитьне у әw жь һерсе хwә дьхwә, кӧ занә wе һьндьки бьминә» (Әʹйанти 12:12). Ньһа Мире-щьна гәләк һерс ә, чьмки жь әʹзмен әw һатә авитьне у wәʹде wи һьндьк майә. Жь һерсбуна хwә, әw кӧл-дәрда мәрийарʹа тинә, демәк «wәй ль әʹрде» тинә. Дь сәре майинда әме һе зедә дәрһәqа ве йәке пебьһʹәсьн. Чахе әм ль сәр һʹале дьнйайе дьньһерʹьн, дьбәк әм ль сәр пьрсәкә ӧса дьфькьрьн: «Чаwа Пʹадшатийа Хwәде wе qьрара Хwәде ль сәр әʹрде бьqәдинә?»

15. Qьрара Хwәде сәва әʹрде чь йә?

¹⁵ Һәла бинә бира хwә, бь qьрара Хwәде һʹале әʹрде ча гәрәке бе гӧһастьне? Әв йәк дь сәре 3-да һатә шьровәкьрьне. Дь бахче Адәнеда Йаһоwа нишан кьр, кӧ әw дьхwазә wәки әʹрд бьбә щьнәт у мәрьв ль щьнәте һʹәта-һʹәтайе бьжин. Ле чьмки Мире-щьна Адәм у Һеwа да шашкьрьне, әw qьрара Хwәде һатә пашхьстьне. Ле qьрара Йаһоwа нәһатә гӧһастьне. Әw диса жи дьхwазә wәки әw гьли бенә сери: «Кәсед рʹаст wе рʹуйе әʹрде, бь мираси бьстиньн у һәр у һәр ль сәр бьжин» (Зәбур 37:29, АБ). Пʹадшатийа Хwәде бь рʹастийе жи wе әве йәке бинә сери. Ле гәло чь щурʹәйи?

16, 17. Жь кʹьтеба Данийел 2:44, дәрһәqа Пʹадшатийа Хwәде әм чь педьһʹәсьн?

¹⁶ Wәрә әм ньһа пебьһʹәсьн, кӧ дь кʹьтеба Данийел 2:44-да чь те пʹехәмбәртикьрьне. Ль wьр әм дьхуньн: «Дь рʹожед wан пʹадшада, Хwәдайе әʹзмана wе пʹадшатикә кӧ тʹӧ щара хәра нәбә дамәзьринә [кʹьфш бькә]. У һʹӧкӧмдарийа wи wе бь дәсте мьләтәки дьнва нәйе бәрʹдане. Әwе һʹәму пʹадшатийед дьн пʹарчә-пʹарчә бькә, ле әw бь хwә wе һәр у һәр бьминә, (ДТʹ)». Бь ве йәке дәрһәqа Пʹадшатийа Хwәде чь мәрʹа әʹйан дьбә?

¹⁷ Жь ван рʹеза әм се тьшта педьһʹәсьн. Йа пешьн, кӧ Пʹадшатийа Хwәде wе «дь рʹожед wан пʹадшада» бе кʹьфшкьрьне. Әв те һʹәсабе кӧ чахе Пʹадшатийа Хwәде бе кʹьфшкьрьне, пʹадшатийед дьн жи һе wе һәбьн. Йа дӧда, әм педьһʹәсьн кӧ Пʹадшатийа Хwәде wе «һәр у һәр» бьминә. Әw wе нәйе зәфткьрьне у нә жи wе бькʹәвә дәсте кәсәки. Йа сьсийа, әм дьбиньн кӧ ортʹа Пʹадшатийа Хwәде у пʹадшатийа дьнйайе, wе шәрʹ һәбә. Пʹадшатийа Хwәде әви шәрʹи wе бьбә. У дь хьлазийеда ль сәр мәрьва wе тʹәне сәрwертик һәбә. Ль wан чаха мәри бь рʹастийе жи wе бәхтәwар бьн, чьмки сәрwертикә ӧса баш тʹӧ щар дь тʹәрихийеда тʹӧнә буйә.

18. Шәрʹе Пʹадшатийа Хwәде тʹәви пʹадшед ве дьнйайе ча те навкьрьне?

¹⁸ Кʹьтеба Пироз дәрһәqа шәрʹе Пʹадшатийа Хwәде тʹәви сәрwертийед ве дьнйайе, һур бь һур шьровәдькә. Мәсәлә, ль wе дәре те готьне кӧ рʹожед пашьн, щьн wе дәстпекьн дәрәwа бәла кьн wәки «һʹәму пʹадшед дьнйайе» бьдьнә шашкьрьне. Ле сәва чь? «Wәки wан бьщьвиньн, бона шәрʹе wе Рʹожа Мәзьн Хwәдейе Һʹәму Зорайийе». Һʹәму пʹадшед дьнйайе wе тʹоп бьн ль «wи щийи кӧ бь ибрани жерʹа ‹Һармәгәдон› те готьне» (Әʹйанти 16:14, 16). Ча те кʹьфше жь ван һәр дӧ рʹеза, шәрʹе Пʹадшатийа Хwәде тʹәви пʹадшед ве дьнйайе wе бе навкьрьне «Һармәгәдон».

19, 20. Чьрʹа иро ль сәр әʹрде qьрара Хwәде найе qәдандьне?

¹⁹ Ле бь шәрʹе Һармәгәдоне Пʹадшатийа Хwәде wе бьгьһижә чь нете? Wәрә әм диса щарәке биньнә бира хwә, qьрара Хwәде дәрһәqа әʹрде чь йә. Йаһоwа дьхwазә wәки әʹрд бьбә щьнәт, бь мәрьвед qәданди у амьн тʹьжи бьбә, у wәки әwана бь шабуне wирʹа qӧльх кьн. Чьрʹа әв йәк иро нькарә бьqәwьмә? Мәʹнийа әʹwльн әw ә, кӧ һʹәму мәрьв гӧнәкʹар ьн, кал пир дьбьн у дьмьрьн. Ле дь сәре 5-да әм пеһʹәсийан, кӧ Иса Мәсиһ сәва мә әʹмьре хwә да у бь сайа ве йәке мәрьв диса wе бькарьбьн һʹәта-һʹәтайе бьжин. Дь кʹьтеба Йуһʹәнна 3:16-да гьлийед ӧса ньвисар ьн: «Чьмки Хwәде ӧса дьнйа һʹьз кьр, кӧ Кӧрʹе хwәйи тайе тʹәне бәрва да, wәки һәр кәсе кӧ wи баwәр бькә ӧнда нәбә, ле жийина wийә һʹәта-һʹәтайе һәбә».

²⁰ Мәʹнийа дьн жи әw ә, кӧ һәʹчʹи зәʹф жь мәрийа зӧлмийе дькьн. Әwана дәрәwа, qәлпийе у бенамусийе дькьн, у нахwазьн гӧрʹа Хwәде бькьн. Дь шәрʹе Хwәдеда, Һармәгәдонеда, һʹәму мәрьвед зӧлм wе бенә qьрʹкьрьне. (Бьхунә Зәбур 37:10.) Ле хенщи ван тьшта, диса мәʹник һәйә чьрʹа qьрара Хwәде иро ль сәр әʹрде найе qәдандьне. Чьмки сәрwертийед ве дьнйайе, мәрийа дәʹв надьн гӧрʹа Хwәде бькьн. Һьн жи әwана гәләк дьлсар ьн у бь нәһәqийе дьхwазьн бьбьнә хwәйе пʹәра. Дь Кʹьтеба Пирозда зәлал те готьне, кӧ мәрьв ль сәр мәрийа сәрwертийе дькә сәва зийане (Wаиз 8:9).

21. Ча Пʹадшатийа Хwәде wе qьрара wи ль сәр әʹрде бьqәдинә?

²¹ Паши шәрʹе Һармәгәдоне, ль сәр инсанәт тʹәне сәрwертик wе сәрwертийе бькә. Әв сәрwерти, демәк Пʹадшатийа Хwәде wе qьрара Хwәде бьqәдинә у гәләк qәнщийе wе бькә. Мәсәлә, әw wе инсанәт жь дәсте Мире-щьна у щьнед wи аза бькә (Әʹйанти 20:1-3). Wи чахи мәрьв wе бькарьбьн бь тʹәмами жь qӧрбана Иса кʹаре бьстиньн, әwана тʹӧ щар wе нәхwәш нәкʹәвьн у нә жи бьмьрьн. Wәʹде Пʹадшатийа Хwәде мәрьв wе һʹәта-һʹәтайе бьжин. (Бьхунә Әʹйанти 22:1-3.) Әʹрд wе бьбә щьнәт. Бь ве йәке Пʹадшатийа Хwәде ль сәр әʹрде qьрара Хwәде wе бьqәдинә у наве Йаһоwа пироз бькә. Бәле, һʹәму әʹфьринед бинбәр wе наве Йаһоwа һӧрмәт-рʹумәт кьн.

ПʹАДШАТИЙА ХWӘДЕ WЕ КʹӘНГЕ QЬРАРА ХWӘДЕ ЛЬ СӘР ӘʹРДЕ БЬQӘДИНӘ?

22. Чьрʹа әм дькарьн бежьн, кӧ Пʹадшатийа Хwәде wи чахи гава Иса һе ль сәр әʹрде бу йан жи чахе әw һьлкʹьшийа ль әʹзмана, һе нәһатьбу?

²² Иса Мәсиһ шагьртед хwә һин дькьр, wәки әwана дәрһәqа һатьна Пʹадшатийа Хwәде дӧа бькьн. Жь ве йәке те кʹьфше, кӧ wи чахи Пʹадшатийа Хwәде һе нәһатьбу. Ле әм дькарьн бежьн кӧ Пʹадшатийа Хwәде һат, гава Иса һьлкʹьшийа ль әʹзмана? На, чьмки ча те кʹьфше жь гьлийед Пәтрус у Паwлос, дәрһәqа Исайе сахбуйи пʹехәмбәртийа ӧса һатә сери: «Йаһоwа жь Әфәндийе мьнрʹа гот: ‹Һʹәта кӧ әз дьжмьнед тә жь льнгед тәрʹа пʹельк дайньм, тӧ ль алийе мьни рʹасте рʹуне›» (Зәбура 110:1, АБ; Кʹаред Шандийа 2:32-35; Ибрани 10:12, 13). Демәк wәʹдә гәрәке дәрбаз буйа.

23. (а) Пʹадшатийа Хwәде кʹәнге дәстпекьр сәрwертийе бькә? (б) Жь сәре майин әме дәрһәqа чь пебьһʹәсьн?

²³ Гәло чьqас wәʹдә гәрәке дәрбаз буйә, һʹәта кӧ Пʹадшатийа Хwәде бьһата? Дь сала 1870-да, кʹома мәрийа йед кӧ Кʹьтеба Пироз леколин дькьрьн, һʹәсаб кьрьн у һатьн ль сәр ве нете, кӧ Пʹадшатийа Хwәде гәрәке дь сала 1914-да бьһата. (Дәрһәqа ве йәке бьньһерʹә Әʹламәтийе Зедә сәр рʹупʹела 215-218.) Әв тьштед кӧ дь сала 1914-да qәwьмин, избат дькьн кӧ леколина wан рʹаст бу. Пʹехәмбәртийед Кʹьтеба Пироз, йед кӧ wи чахи һатьн сери, әшкәрә дькьн кӧ Иса дь сала 1914-да бу пʹадша у дәстпекьр дь Пʹадшатийа әʹзманада сәрwертийе бькә. Демәк wәʹде Шәйтʹан Мирещьна һьндьк майә, зутьрке әw wе бе гьртьне, әм жи һәма дь ви wәʹдәки кьнда дьжин, кʹижан кӧ Мире-щьнарʹа һәла һе майә (Әʹйанти 12:12; Зәбур 110:2). Ләма жи әм дькарьн бь баwәрбуне бежьн, кӧ зутьрәке Пʹадшатийа Хwәде wе дәстпекә qьрара Хwәде ль сәр әʹрде бьqәдинә. Жь бо ве йәке тӧ qә ша дьби? Баwәр дьки кӧ әв йәк зутьрәке wе бе сери? Жь сәре майин әме һе зедә пебьһʹәсьн, кӧ Кʹьтеба Пироз дәрһәqа ве йәке чь һин дькә.