Жь Зeрʹ Һe Qимәттьр

МӘРЬВЕД дьлсах кö Кʹьтeба Пироз һин дьбьн, мина wан мәрьва ньн йeд кö зeрʹ дьгәрʹьн. Әw мәрьв гәрәкe гьран бьхәбьтьн у бәрдәwам кьн Кʹьтeба Пироз лeколин бькьн, сәва кö биланийа qимәт qазанщ кьн. Wәрә әм шewьр кьн сe дәрәща, кö чаwа зeрʹ тe дитьн, у әм чь дькарьн һин бьн жь вe йәкe.

WӘ ЗЕРʹ ДИТИЙӘ!

Бьдә бәр чʹәʹвe хwә, кö тö бәр дәвe голe дьгәрʹи у дьвини кö тьштәки бьчʹук дьбьрьqә. Тö хwә куз дьки, дьньһeрʹи у тö гәләк ша дьби, чьмки тö зeрʹ дьвини. Әw жь сәрe пьтькe (спичкe) бьчʹуктьр ә, у һe чәтьн дәстдькʹәвә, нә кö алмаса бьһа. Тö дәрдорe хwә сәр әʹрдe дьньһeрʹи, кö бьвини һәла дьбәкә диса зeрʹ һәйә.

Мина вe йәкe, дьбәкә тe бира тә чахe щара пeшийe Шәʹдeд Йаһоwа дәрe мала тә хьстьн у тәрʹа жь Кʹьтeба Пироз дәрһәqа созeд Хwәдe гьли кьрьн. Дьбәкә тö бь шабунe тини бира хwә әwe дәмe, чахe тә щара пeшийe зeрʹe рʹöһʹани дит. У дьбәкә әв йәк qәwьми тʹәви тә, чахe тә щара пeшьн Кʹьтeба Пирозда навe Хwәдe дит (Зәб. 83:18). Йан чахe тö пeһʹәсийайи, кö тö дькари бьби достe Йаһоwа (Аqуб 2:23). Wи чахи, тә дәрбeрʹа фәʹм кьр, wәки тә тьштәки öса дитийә, кʹижан кö жь зeрʹ qимәттьр ә. У тә хwәст һe зeдә зeрʹe рʹöһʹани бьвини.

ҺУН ҺЕ ЗЕДӘ ДЬГӘРʹЬН

Кöдöр у һурькeд зeрʹ, щара чeдьбьн у тʹоп дьбьн дәлавада у чʹәмада. Сeзонәкeда, мәрьвeд кö зeрʹ дьгәрʹьн, дькарьн wәкә чәнд килограм һурькeд зeрʹ бьвиньн. Әw һурьк жь дәһа һʹәзара долара зeдәтьр ә.

Чахe тә һинбуна Кʹьтeба Пироз дәстпeкьр тʹәви Шәʹдe Йаһоwа, дьбәкә тә хwә тʹәхмин дькьр мина мәрьвe кö зeрʹe бьһа дитийә. Чахe тö дьфькьрийи дәрһәqа рʹeзeд жь Кʹьтeба Пироз, әwe йәкe занәбуна тә зeдә дькьр, у рʹöһʹанида тö дәwләти буйи. У чахe тö дьфькьрийи сәр рʹастийeд Кʹьтeба Пироз, тö пeһʹәсийайи кö ча тö дькари нeзики Хwәдe би, һʹьзкьрьна wида бьмини у әʹмьрe һʹәта-һʹәтайe бьстини (Аqуб 4:8; Щьһуд. 20, 21).

Чаwа мәрьвe кö һурькeд зeрʹә qимәт дьгәрʹә, дьбәкә тö жи гәләк гьран дьхәбьти сәва тьштeд рʹöһʹанийә qимәт бьгәрʹи. Пашe, чахe тә рʹастийeд сәрәкә жь Кʹьтeба Пироз пeһʹәсийайи, тö һeлан буйи кö пeшда һʹәрʹи у хwә тʹәсмили Хwәдe бьки у бeйи ньхöмандьнe (Мәт. 28:19, 20).

БӘРДӘWАМ КЬН БЬГӘРʹЬН!

Чахe жь волканe лав дәрдькʹәвә, әw сар дьбә у дьбә мина кәвьр. Wан кәвьрада щара зeрʹ һәйә, чьмки әw лав жь бьнe әʹрдe дәрдькʹәвә. Лe һәргe сәр wи кәвьри рʹува бьньһeрʹьн, зeрʹ дәрбeрʹа найe кʹьфшe. Лe чьрʹа? Чьмки мәсәлә, кәвьрe кö гьранийа wи тонәк ә, дькарә тʹәнe wәкә 10 гр. зeрʹ тeда һәбә. Ләма мәрьв гьран дьхәбьтьн сәва wан кәвьра бьшкeньн у зeрʹ дәрхьн. У сәва wан әw йәк баргьрани нинә, чьмки әwана заньн кö әw зeрʹ чьqас qимәт ә.

Öса жи чахe мәрьв занәбуна пeшьн дәрһәqа Иса стандийә, qәwат лазьм ә wәки әw бәрдәwам кә диса рʹöһʹанида пeшда һәрʹә (Ибрн. 6:1, 2). Һун гәрәкe бь дьл у щан бьхәбьтьн сәва жь һинбуна Кʹьтeба Пироз фькьрeд qимәт у дәрсeд кeрһати бьстиньн. Лe һун чь дькарьн бькьн сәва һинбуна wәйә шәхси тʹьмe кeрһати бә, һәла һe жи һәргe һун ида бь сала Кʹьтeба Пироз һин дьбьн?

Бь дьл у щан бьхwазьн һин бьн. Wәʹдe хwәндьнe дина хwә бьдьнә дeтала. Бәрдәwам кьн гьран бьхәбьтьн у һунe жь Кʹьтeба Пироз зeрʹeд qимәт бьвиньн, дeмәк биланийа жь Хwәдe у рʹeбәрийа wи (Рʹом. 11:33). Сәва занәбуна хwә дәрһәqа Кʹьтeба Пироз зeдә кьн, wәʹдe лeколинкьрьнe бьдьнә хәбатe һащәтeд кö сәр зьманe wә дәстдькʹәвьн. Рʹeбәрийа Хwәдe у щабeд сәр пьрсeд хwә дәрһәqа Кʹьтeба Пироз, бь сәбьр бьгәрʹьн. Жь хушк-бьра бьпьрсьн кö кʹижан рʹeз у готар гәләк али wан кьрьн у әwана qәwи кьрьн. Чахe һун wәʹдe хwәндьна у лeколинкьрьна Хәбәра Хwәдe тьштeд һʹәwас пeдьһʹәсьн, мәрьвeд дьнрʹа жи гьли кьн.

Бәлe, нeта тә гәрәкe әw нибә кö тʹәнe занәбуна хwә зeдә ки. Паwлосe шанди ширәт кьр, кö занәбун дькарә мәрьва бабах кә (1 Корн. 8:1). Ләма әм гәрәкe сәр хwә бьхәбьтьн кö тʹьмe мьлук бьн у баwәрийа хwә qәwи хwәй кьн. Qöльхкьрьна тʹәви малбәтe у һинбуна Кʹьтeба Пирозә шәхси, we али тә бькә кö ль гора принсипeд Йаһоwа бьжийи у we тә һeлан кә кö али мәрьвeд дьн бьки. Хeнщи вe йәкe, тöйe шабунe бьстини, чьмки тә qазанщ кьрийә тьштәки öса, кʹижан кö жь зeрʹ qимәттьр ә (Мәтʹлк. 3:13, 14).