ӘWАНА БЬ РʹӘЗӘДЬЛИ ХЬЗМӘТ ДЬКЬН ль Окйанусйайе

РЕНЕ wәкә 30 сали йә, әw мәзьн буйә дь Австралйайеда малбәта Шәʹдед Йаһоwада, кʹижан кӧ хирәт ьн дь хьзмәткьрьнеда. Рене гьли дькә: «Әм гәләк щар дәрбази wан щийа дьбун, кʹидәре кӧ һʹәwщәтийа мьзгинвана һәбу, сәва кӧ аликʹарийе бьдьн. Бь сайа де у баве мьн, мә чь шьхӧл жи дькьр, мьнрʹа һʹәwас бу у мьн шабун дьстанд! Чахе дӧ зарʹ мьнрʹа һатьн буйин, мьн дьхwаст кӧ жийина wан жи ӧса бә».

Мере Рене Шан wәкә 40 сали йә. Нетед wийи рʹӧһʹани жи әw бун чаwа йе жьна wи. Әw гьли дькә: «Паши буйина зарʹа мәйә дӧда, мә «Бьрща Qәрәwьлийеда» готар хwәнд дәрһәqа малбәтәкә Шәʹдед Йаһоwа, кʹижан кӧ бь гәмийа хwә дәрбази Окйануса башурарʹоһьлате бун, сәва кӧ мьзгине бәла кьн ль гьравед Тонгайе.a Әве готаре әм һелан кьрьн кӧ нәʹме бьньвисьн филиалед Шәʹдед Йаһоwарʹа ль Австралйайе у Зәланда Нуда, сәва кӧ бьпьрсьн һәла кʹидәре һәйә һʹәwщәтийа мьзгинванед Пʹадшатийе.b У щаб сәр ве нәʹмәке әw бу, кӧ әм һатьнә тʹәглифкьрьне wәки дәрбази Тонга бьн, демәк wи щийи дәрһәqа кʹижани мә хwәндьбу!»

Шан, Рене, у зарʹед wана, Щейкоб у Скаи, дь Тонгайеда тʹәне wәкә саләке ман. Чьмки дь шәһәрда дәрәщед хоф һәбун у әwана вәгәрʹийанә ль Австралйайе. Ле нета wан дәрһәqа хьзмәткьрьна дь щийед кӧ һʹәwщәти һәбу, нә һатә гӧһастьне. У дь сала 2011, әwана дәрбази гьравәкә бьчʹук бун йа Океануса Мәзьн, бь наве Гьрава Норфолке. Әw гьрав wәкә 1 500 км алийе Австралйа рʹоһьлате йә. Ле гәло әwе йәке wанарʹа кʹар ани? Иро, Щейкоб кӧ 14 сали йә дьбежә: «Йаһоwа нә кӧ тʹәне мьqати мә бу, ле әwи ӧса жи хьзмәткьрьна мә һʹәwас кьр!»

ХЬЗМӘТКЬРЬНА ТʹӘВИ МАЛБӘТЕ

Мина Шан, Рене у зарʹед wан, малбәтед дьн жи кӧ Шәʹдед Йаһоwа нә, бь рʹәзәдьли хьзмәт дькьн wан щийа кʹидәре кӧ һʹәwщәти һәйә. Ле гәло чь wана һелан кьр кӧ дәрбази wан щийа бьн?

Барнет у Саимон, мер у жьн wәкә 30 сали, у кӧрʹед wан, Естон у Калеб, йед кӧ ньһа 12 у 9 сали нә, дәрбази шәһәре Барктауне бун, кʹижан кӧ шәһәре башqә бу ль Куинслендеда, Австралйайе. «Шәʹдед Йаһоwа ль wедәре тʹәне се йан чар сала щарәке мьзгин бәла дькьрьн», Барнет шьровәдькә. «Һʹәwаса гәләк мәрьва мьзгинерʹа дьһат. У мә дьхwаст wана һелан кьн кӧ әwана тʹьме һинбуна Кʹьтеба Пироз дәрбаз бьн».

Марк у Карен, кʹижан wәкә 50 сали нә, дь һьнә щьватада хьзмәт кьрьнә незики шәһәре Сидней, Австралйайе. Ле пешийа ве йәке әwана тʹәви се зарʹед хwә Щесикайе, Щим у Щек дәрбази Нәләнбои бун, дь Територийа Бакʹуреда. Марк дьбежә: «Әз мәрьва һʹьз дькьм, ләма жи дьхwазьм дәрбази wе щьвате бьм кʹидәре кӧ лазьм ә аликʹарийе бьдьн щьвате, гәләк тьштада у ӧса жи хьзмәткьрьнеда». Ле Карен дӧдьли дьбу. «Паши wе йәке кӧ Марк у һьнәкә дьн әз qәwи кьрьм, әз һазьр бум кӧ бьщерʹьбиньм. Ньһа әз ша мә кӧ дәрбаз бумә!»

Сала 2011 Бенжамин у Каролин тʹәви һәр дӧ qизед хwә Жад у Брайа йед кӧ һе нәдьчунә мәкʹтәбе, жь Квинсленда Австралйайе пашда вәгәрʹийанә шәһәре бьчʹук Тимор-Лесте, кʹижан дькʹәвә нава гьравед Әндонезийайе. Бен дьбежә: «Пешда, мьн у Каролине ча пешәнгед мәхсус хьзмәт дькьр дь Тимор-Лестеда. Хьзмәткьрьна мә гәләк һʹәwас у баш бу, у бьра гәләк пьштгьрийа мә дькьрьн. Дьле мә дьешийа кӧ wи щийи дьһельн. У мә сафи кьр кӧ диса вәгәрʹьн ль wьр. Чахе зарʹ мәрʹа һатьн буйине, мә нете хwә да алики, ле йәкә нәгӧһаст». Каролин сәрда зедә дькә: «Мә дьхwәст wәки зарʹед мә нава мисйонера, хьзмәткʹаред Бәйтʹәле, у пешәнгед мәхсусда бьн, сәва кӧ чьqас дькарьн әwана рʹӧһʹанида мәзьн бьн».

ҺАЗЬРБУН БОНА ЩИГӦҺАСТЬНЕ

Иса шагьртед хwәрʹа дьгот: «Жь wә кʹижан ә, кӧ бьхwазә бьльндщикә нобәдара чекә, пешийе рʹунәни нәдә бәр һʹәсеб?» (Луqа 14:28). Чахе малбәт сафи дькә дәрбази щики дьн бә, гәләк фәрз ә кӧ пешда һʹәсабе хwә бькьн у тьшта пешда сафи кьн. Ле малбәт чь гәрәке һьлдьнә һʹәсаб?

ҺʹАЛЕ РʹӦҺʹАНИ: Бен дьбежә: «Мә дьхwәст мәрьварʹа qӧльх кьн нә кӧ бьбьнә баре гьран». Пешийа wе йәке кӧ әм дәрбаз буна, мә рʹӧһʹанида хwә qәwи кьр. Мә һе зедә wәʹдә хәрщ дькьр бона хьзмәткьрьне у шьхӧлед дьн дь щьватеда.

Щейкоб дәрһәqа кʹижани кӧ жоре һатьбу готьне, гьли дькә: «Пешийа кӧ әм дәрбази Гьрава Норфолке буна, мә гәләк сәрһатийед дь «Бьрща Qәрәwьлийеда» у «Һʹьшйар Бьн!» хwәнд дәрһәqа wан малбәта, кʹижан кӧ хьзмәт кьрьнә wан щийа кʹидәре кӧ һʹәwщәти һәбуйә. Мә шеwьр дькьр дәрһәqа wан чәтьнайа, кʹижан кӧ рʹасти wан һатьбун у ча Йаһоwа мьqати wан бу». Хушка wи Скаи кӧ 11 сали йә зедә дькә: «Мьн гәләк дӧа дькьр, һьн хwәха, һьн жи тʹәви де-баве хwә!»

ҺʹАЛЕ ЕМОСЙАЛИ: Рене гьли дькә: «Чьмки әм кʹеләка малбәта хwә у һәвалед хwәйи незик дьман, демәк ль wи щийи кʹидәре кӧ мьн һʹьз дькьр, ләма жи мәрʹа дьһа һеса бу кӧ wедәре бьмана. Ле дәwса кӧ бьфькьрийама сәр wе йәке чь кӧ мьн дьһишт, әз дьфькьрим дәрһәqа wе йәке кӧ дәрбазбуна мә wе чь кʹаре бинә малбәта мәрʹа».

КУЛТУРА: Гәләк малбәт пешийа кӧ дәрбази щийе майин бьн, леколина дькьн у педьһʹәсьн дәрһәqа wи щийи, кʹидәре кӧ әwана дьхwазьн дәрбаз бьн. Марк дьбежә: «Мә чьqас дькарьбу, гәләк дьхwәнд дәрһәqа Нәләнбойе. Бьрайед кӧ ль wе дәре дьжитьн мәрʹа рʹожнамед wи шәһәри шандьн, у жь wан рʹожнама мә һьнә информасийа станд дәрһәqа щьмәʹта wедәре у дәрһәqа култура wан».

Шан, кʹижан кӧ дәрбази Гьрава Норфолке бу, зедә дькә: «Лапә фәрз бона мьн әw бу, кӧ һʹӧнӧред Мәсиһити бал хwә һе баш кьм. Мьн заньбу кӧ һәрге әз дьлтʹәмьз, нәрм, намус у шьхӧлһʹьз бьм, әзе бькарьбьм нав тʹәмамийа дьнйайеда һәр щийада йолә һәрʹьм».

ДӘРБАЗКЬРЬНА ЧӘТЬНАЙА

Әwед кӧ дәрбази wан щийа бунә кʹидәре кӧ һʹәwщәти һәйә, дьбежьн wәки гәләк фәрз ә кӧ мәрьв позитив бә чахе рʹасти чәтьнайед ӧса те, һивийа кʹижана нинә. Wәрә әм һьнә мәсәла шеwьр кьн.

Рене гьли дькә: «Әз һин бум кӧ тьшта бь щурʹәки майин бькьм. Мәсәлә, чахе бәʹред Гьрава Норфолке тʹәвһәв дьбә, гәмийед кӧ хwарьне дәрбаз дькьн, нькарьн бьгьһижнә щийе хwә у бьсәкьньн, ләма хwарьн кем дьбә у бьһа дьбә. Ләма әз һин бумә кӧ хwарьне һе бь економи хәрщ кьм». Мере wе Шан, зедә дькә: «Мә ӧса жи хәрще хwә кем кьр, сәва кӧ пʹәре һʹәфтийе тʹера мә бькә».

Кӧрʹе wан Щейкоб дәрһәqа чәтьнайед дьн гьли дькә. «Дь щьвата мәйә тʹәзәда тʹәне һʹәфт әндәм һәбун, у әw гьшк жи мәрьвед мәзьн бун. У ләма һәвалед мьнә әʹмьрда wәкә мьн, тʹӧнә бун! Ле чахе мьн тʹәви мәрьвед әʹмьрда мәзьн хьзмәт дькьр, әм дьбунә һәвалед һәв».

Щим жи кӧ 21 сали йә, рʹасти чәтьнайикә ӧса һат. Әw дьбежә: «Щьвата дьн кӧ незики Нәләнбойе йә, жь мә wәкә 725 км дур ә. Ләма жи тʹәви хушк бьред майин әм тʹәне wәʹде щьвата мәзьн хәбәрдьдьн. Әм зу тенә ль сәр щьвата мәзьн, сәва кӧ тʹәви хушк-бьра хәбәрдьн у ша бьн. Сәр щьватед мәзьн әм дьньһерʹьн ча сәр qәwьмандьнед мәхсус, йе кӧ һәр сал дьqәwьмьн!»

«ӘЗ ГӘЛӘК ША МӘ КӦ ӘМ ҺАТЬНӘ ЛЬ WЬР!»

Кʹьтеба Пирозда те готьне: «Йе кәсан дәwләмәнд дькә, бәрәкʹәта Хӧдан ә» (Мәтʹлк. 10:22). Нав тʹәмамийа дьнйайе, йед кӧ дәрбази wан щийа бун кʹидәре кӧ һʹәwщәти һәйә, әw гьлийе рʹаст сәр хwә тʹәхмин кьрьнә.

Марк дьбежә: «Кʹәрәмәтәкә лапә мәзьн әw бу, кӧ дәрбазбуна мә ль щийед дьн гәләк һʹӧкӧм бу сәр зарʹед мә. Дӧ зарʹед мәйи мәзьн бь тʹәмами итʹбарийа хwә Йаһоwа тиньн, кӧ әw мьqати wан мәрьва дьбә, йед кӧ шьхӧле Пʹадшатийе датиньн щийе пешийе. Мәрьв нькарә әwе итʹбарийе бькʹьрʹә».

Шан дьбежә: «Әз тʹәви жьн у зарʹед хwә гәләк незик бумә. Чахе әз дьбьһем кӧ Йаһоwа бона wан чь кьр әз гәләк кʹефхwәш дьбьм». Кӧрʹе wи Щейкоб гьлийед баве хwәрʹа qайил дьбә: «Мьн wәʹдәки гәләк баш дәрбаз кьр. Әз гәләк ша мә кӧ әм һатьнә ль wьр!»