Ньһерʹандьна Кʹьтеба Пироз сәр wе йәке, Чахе Башqә Дьжин у жь Һәв Дьqәтьн

Йаһоwа дьхwазә, wәки әwе кö зәwащеда нә, һьндава созе хwәйә зәwаще, амьн бьминә. Чахе Йаһоwа мер у жьна пешьн кьрә йәк, һьнге әwи гот: «Мере де у баве хwә бьһелә, хwә ль жьна хwә бьгьрә у бьбьнә бәдәнәк». Паше Иса Мәсиһ әв гьли wәкʹьланд у сәрда зедә кьр: «Бона ве йәке әwед кö Хwәде кьрьнә йәк, бьра мәрьв жь һәвдö нәqәтинә» (Дәстпебун 2:24; Мәтта 19:3-6). Ча те кʹьфше Йаһоwа у Иса зәwаще һʹәсаб дькьн ча йәктийа, кö тʹәне мьрьн дькарә wана жь һәв бьqәтинә (1 Корьнтʹи 7:39). Чьмки зәwащ йәктийа пироз ә, ләма жи изьн тʹöнә бона тьштед бьчʹук жь һәв бьqәтьн. Йаһоwа нәфрʹәт дькә чахе һәвqәтандьн нә ль сәр һʹиме Ньвисаред Пироз ә (Малахи 2:15, 16).

Ле чь чах һәвqәтандьн дькарә ль сәр һʹиме Ньвисаред Пироз бә? Йаһоwа нәфрʹәт дькә qави у бенамусийе (Дәстпебун 39:9; 2 Самуйел 11:26, 27; Зәбур 51:4). Йаһоwа, qавийе һʹәсаб дькә ча тьштәки хьраб, у ль сәр һʹиме ве йәке изьн дьдә жь һәв бьqәтьн (Дәрһәqа wе йәке кö чь йә qави у чь дькʹәвә нава wе йәке, те шьровәкьрьне сәре 9-да, абзаса 7-да). Йаһоwа изьне дьдә жьн йан мере нәгöнәкʹар, wәки хwәха сафи кьн кö тʹәви йе (йа) гöнәкʹар зәwащеда бьминьн йан на (Мәтта 19:9). Ләма жи кʹи кö нәгöнәкʹар ә, һәрге сафи дькә жь мер йан жьна хwә бьqәтә, Йаһоwа wи щәза нәкә. Ле щьвата Мәсиһитида тʹö кәс һелан накә кö йед зәwащи жь һәв бьqәтьн. Әwе кö нәгöнәкʹар ә дьqәwьмә кö жь бо һьнә мәʹнийа, дьбахшинә мер йан жьна хwә, илаһи чахе жьн йан мер бь дьл пʹошман дьбә. Дәрһәqа ве пьрсе әw хwәха дьфькьрә, чьмки ахьрийе әw рʹасти чь жи бе, гәрәке хwәха ида сафи кә (Галати 6:5).

Дьqәwьмә дәрәщә бьгьһижә wе йәке кö Мәсиһи сафи кә wәки жь мер йан жьна хwә бьqәтә, йан жи башqә бьжи, ле мер йан жьна wи qави нәкьрийә. Дәрһәqа дәрәща öса Кʹьтеба Пироз дьбежә, wәки әwана гәрәке нәкʹәвьнә зәwаща тʹәзә, йан жи гәрәке «хwәрʹа ль һәв» бен (1 Корьнтʹи 7:11). Изьна Мәсиһийед öса тʹöнә wәки кәсәки дьн бьстиньн (Мәтта 5:32). Wәрә әм хәбәр дьн дәрһәqа чәнд дәрәщед öса, кʹижан кö һьнәк һʹәсаб дькьн wәки мәʹни кö башqә бьжин.

Чахе кәсәк нахwазә хәм бькә бона малбәта хwә. Һәрге мер нахwазә хәм бькә бона малбәта хwә, жьн у зарʹед wи wе бькʹәвьнә тәнгасийе. Демәк әw тьштед кö бона жийине гәләк лазьм ьн, wе бал wан тʹöнә бә. Дь Кʹьтеба Пирозда те готьне: «Ле һәгәр мәрьвәк . . . бона мала хwә хәм накә, әwи баwәри инкʹар кьрийә у жь нәбаwәра жи хьрабтьр ә» (1 Тимотʹейо 5:8). Йане һәрге мер дькарә малбәта хwә хwәй кә, ле нахwазә у найе гöһастьне, һьнге жьн дькарә бона һʹалхwәшийа хwә у зарʹед хwә сафи кә, кö жь мере хwә башqә бьжи. Һәрге Мәсиһики нәһәq дькьн wә йәкеда кö әw нахwазә бона малбәта хwә хәм кә, рʹуспийе щьвате әwе пьрсе гәрәке һʹәсаб кьн ча пьрсәкә фәрз. Һәрге мәрьв бь рʹасти нахwазә хәм бькә бона малбәте, рʹуспи дькарьн wи жь щьвате дәрхьн.

Зийандайина физики. Мер йан жьн дьбәкә öса һерс бә кö кьред wи (wе) зийане бьдә жийин у сьһʹәт-qәwата йе дьн. Һәрге Мәсиһики ве йәкеда нәһәq дькьн, һьнге рʹуспийе щьвате гәрәке әwе йәке зәлал кьн, йане әв йәк рʹаст ә йан на. Чахе мәрьв гәләк һерс дькʹәвә у жь хwә дәрте, йан жи зийане дьдә малбәта хwә, әв дьбә мәʹни wәки wи жь щьвате дәрхьн (Галати 5:19-21).

Чахе рʹе дьгьрә сәва кö Йаһоwарʹа хьзмәт нәкә. Дьqәwьмә мер йан жьн дькарә зоре бькә һәвалзәwаща хwә, сәва кö әw Хwәдейе рʹастрʹа хьзмәт нәкә, йан жи зоре бьдә wи (wе) кö бь щурʹәки мьqабьли qанунед Хwәде һәрʹә. Дәрәща öсада, әwе кö рʹийа wи дьгьрьн, дьбәкә сафи кә башqә бьжи, чьмки әw тʹәне бь wи щурʹәйи дькарә бьqәдинә тʹәмийе: «Гöрʹа Хwәде бькьн, нә кö йа мәрьва» (Кʹаред Шандийа 5:29).

Wан һʹәму дәрәщада изьна мә тʹöнә, wәки хушк йан бьре нәнәһәq һелан кьн, сәва кö жь мер йан жьна хwә дуркʹәвә йан жи тʹәв бьминә. Рʹаст ә һәвалед рʹöһʹани у рʹуспи дькарьн ширәтед жь Кʹьтеба Пироз бьдьн, ле тʹö кәс һʹәта хьлазийе ньзанә кö ортʹа жьн у мерда бь рʹасти чь дьqәwьмә. Әwе йәке тʹәне Йаһоwа занә. Һәрге мер йан жьн проблема малбәте зедә дьдә кʹьфше сәва кö башqә бьжи, бь wе йәке әw һьм Хwәде у һьм жи йәктийа малбәте беһöрмәт дькә. Чахе мәрьв мәʹнийе дьгәрʹьн wәки башqә бьжин, әwе йәке чьqас жи вәшерьн, йәкә Йаһоwарʹа һʹәму тьшт әʹйан ә. Бь рʹасти «һәр тьшт ль бәр чʹәʹве wи вәкьри у әʹшкәрә йә, кö ль бәр кʹижани әме һʹәсабе хwә бьдьн» (Ибрани 4:13). Демәк тʹö кәс гәрәке сущдар нәкә wи Мәсиһийе кö сафи дькә башqә бьжи. Ахьрийа ахьрийе «әм һʹәмуйе жи ль бәр диwана Хwәде бьсәкьньн» (Рʹомайи 14:10-12).