Мерәк бь наве Мәмоa дьбежә: «Әз тʹәви жьна хwә Әʹйше, 39 сала зедәтьр зәwащеда бум. Паше әw бь нәхwәшийа гьран нәхwәш кʹәт у мьр. Саләке, мьн хwә öса тʹәхмин дькьр, кö тебежи пʹарәкә мьн мьрийә. Һәвалед мьн гәләк али мьн дькьрьн, у әз һьнә тьштава мьжул дьбум, кö еша дьле хwә һәвәки сьвьк кьм. Щарщара ньшкева һʹәwаса мьн дькʹәт. Ида wәкә се сал ә кö Әʹйше мьрийә, ле һʹәта ньһа әв кöл жь дьле мьн дәрнайе».

Дьqәwьмә тә жи мәрьве хwәйи незик öнда кьрийә, у тö рʹьнд һʹале Мәмо фәʹм дьки. Мьрьна мер йан жьн, мәрьве незик йан һәвале баш, ешәкә гьран дькә дьле мерьв. Зандаред кö әве пьрсе леколин дькьн, ве йәкерʹа qайил ьн. Дь журналәкеда бь наве «Thе Amеrican Journal of Psychiatry», һәбу готарәк, кʹидәре кö дьһатә готьне, wәки «гава кәсәк мәрьве хwәйә һʹьзкьри öнда дькә, әwи тʹьре кö сәр һʹәта-һʹәтайе öнда дькә, у жь бо wе йәке еша дьле wи даһа гьран дьбә». Әwед кö жь бо мьрьна мәрьвед хwә, шине дькьн, дьqәwьмә öса дьфькьрьн: «Гәло, һʹәта кʹәнге әв дәрд wе дьле мьн бешинә? Әзе бькарьбьм диса бәхтәwар бьм? Чаwа әз дькарьм дьлбинийе бьстиньм?»

Әва журнала «Һʹьшйар Бьн!» wе щаба wан пьрса шеwьр кә. Готара дöдада wе бе готьне, кö чь һеви һәйә бона мьрийа. Готаред дьн жи, wе дина мә бьдьн wе йәке, кö чь дькарә али мә бькә, wәки еша дьле хwә һәвәки сьвьк кьн.

Әм баwәр ьн, wәки әв готар wе дьлрʹәһьтийе бьдьнә wан һʹәму мәрийа, кʹижан кö дәрдәки гьран дькʹьшиньн жь бо мьрьна мәрьвед хwәйи һʹьзкьри.

Рʹаст ә һьнә зандар дьбежьн wәки һʹәму шин мина һәв тенә дәрбазкьрьне, ле бь рʹасти дьлшәwатийа мәрьва нә мина һәв ьн. Әв кö дьлшәwатийа wан жь һәв щöдә дьбә, гәло те һʹәсабе кö һьнә мәрьв һьндьк бәрхwә дькʹәвьн жь бо мьрьна мәрьвед хwә, йан жи әwана һәстед хwә нав хwәда дьтәмьриньн? Һәмьки на. Бь рʹасти чахе мәрьв дьлшәwати у һәстед хwә вәнашерә, әв йәк бона сьһʹәт-qәwате һе баш ә. Гәләк щар шинкьрьн гьредайи йә тʹәви култура мәрьва, хәйсәте wан, qәwьмандьнед әʹмьре wан, у ве йәкева, кö чь щурʹәйи мәрьве хwә öнда кьрийә.

ӘВ ДӘРД WЕ ЧЬQАС ГЬРАН БӘ?

Мәрьве кö шине дькә, дьqәwьмә ньзанә кö жь бо мьрьна мәрьве wи, чь дькарә бьqәwьмә. Чь жи һәбә, wан дәрәщада емосийа, чәтьнайи пешда тен у әв йәк тʹәбйәти йә. Кʹа әм һе кʹур шеwьр кьн:

Чахе емосийа, мә зәфт дькьн. Щарна мәрьв дәстпедькә бьгьри, чьмки гәләк һьзрәта мәрьве хwәйә мьри йә, у емосийед wи тʹьме тенә гöһастьн. Емосийа wи чахи пешда тен, гава тьштәк мәрьве wийи мьри тинә бира wи, йан жи гава йе мьри хәwнеда дьвинә. Пешийе реаксийа мәрийа öса нә, wәки әw гәләк дьлтәнг дьбә у нькарә баwәр кә, кö мәрьве wи ида тʹәв wи нинә. Тʹина йа кö мере хwә öнда кьрийә дьбежә: «Пешийе әз сәр һʹьше хwә нибум у нькарьбум бьгьрим. Емосийа у һәстед мьн öса әз зәфт кьрьбум, wәки щарна мьнрʹа чәтьн бу бина хwә бькʹьшиньм. Нәдькʹәтә һʹьше мьн, wәки әв йәк һатийә сәре мьн».

Wәʹде хәмгинийе, һерсе, у хwәнәһәqкьрьне пешда тен. Мәщит дьбежә «Паши мьрьна кöрʹе мьн Надьр, йе кö 24 сали бу, әз у жьна мьн Асе гәләк һерскʹәти бун! Әм жь бо ве йәке әʹщебмайи бун, чьмки әм тʹö щар мәрьвнә һерс нибун. Мә хwә нәһәq дькьр, чьмки әм дьфькьрин кö дьqәwьмә мә епʹещә тьшт нәкьр, wәки ча лазьм ә али кöрʹе хwә бькьн». Әʹли, жьна кʹижани кö жь бо нәхwәшийа гьран мьр, дьбежә: «Пешийе мьн тʹьре, кö һәрге Хwәде дьһелә wәки әз һаqас бьчәрчьрьм, демәк әз мәрьвәки баш ниньм. Паше мьн дәстпекьр Хwәде нәһәq кьм wе йәкеда чь кö qәwьми». Мәмо дәрһәqа кʹижани кö готара пешьнда һатьбу готьне, дьбежә: «Щар-щара әз һәла һе жи сәр жьна хwә Әʹйше һерс дькʹәтьм, кö әw мьр у әз тʹәне һиштьм. Паше әз сәр хwә жи һерс дькʹәтьм, кö әз öса дьфькьрим, чьмки бь рʹасти әв гöне wе нибу, кö һʹәму тьшт öса qәwьми».

Чахе фькьред нәлогики пешда тен. Wәʹде öса жи һәйә, гава фькьред мерьв тенә гöһастьне у дьбьнә нәлогики. Мәсәлә, әwе кö шине дькә дькарә wива öса бе кʹьфше, кö әw йанчь мьрийе хwә дьвинә, дәнге wи дьбьһе, йан жи öса тʹәхмин дькә, кö мьрийе wи кʹеләка wи йә. Ви мәрьвирʹа öса жи чәтьн ә һʹьше хwә тʹопи сәр һәв кә у тьшта бира хwәда хwәй кә. Тʹина дьбежә: «Щарна wәʹде хәбәрдане, мьн тʹәхмин дькьр, wәки һʹьше мьн дьчә щики дьн! Жь бо дәрәщед мьрьна кöрʹе мьва гьредайи, әз тʹьме ләз дькʹәтьм. У мьрʹа чәтьн бу бь тʹәмами дина хwә бьдьмә сәр тьштәки, чьмки әз стреседа бум».

Чахе дьхwази хwә башqә ки. Мәрьве кö шине дькә, щарна тʹәвһәвбуйи йә у жь мәрьвед дәр-доре хwә әʹщез дьбә. Мәмо дьбежә: «Чахе әз тʹәви щотед зәwьщи бум, мьн тʹьре әз нав wанда зедә мә у тʹәви мәрьвед нәзәwьщи жи мьн хwә нәрʹьһʹәт тʹәхмин дькьр». Жьна Мәщит, Асе тинә бира хwә: «Әз әʹщьз дьбум чахе нав мәрьвада бум, йед кö газне хwә дькьрьн жь бо проблемед хwә, кʹижан кö һьмбәри проблемед мә, нә тʹö тьшт бун! Щарна әм нав wан мәрьвада бун, кʹижана бона кьред зарʹе хwәйә баш хәбәр дьдан. Һәмьки әз бона wан ша дьбум, ле мьнрʹа гәләк чәтьн бу әве йәке бьбьһем. Мьн мере хwәва фәʹм кьр, wәки әʹмьр бәрдәwам дьбә, ле хwәстьн у сәбьра мә тʹöнә бу, wәки бәр проблема хwә тәйах кьн».

Проблемед сьһʹәт-qәwатева гьредайи. Мәрьве кö шине дькә, мәʹде хwә öнда дькә, жар дьбә у хәwа wи дьтʹәqьсә. Арам тинә бира хwә сала пәй мьрьна баве хwәрʹа: «Хәва мьн һәвкʹәтьбу. Һәр шәв, wәʹдәкида әз һʹьшйар дьбум у дәрһәqа баве хwә дьфькьрим».

Әʹли тинә бира хwә дәрһәqа проблемед сьһʹәтqәwата wива гьредайи. Әw дьбежә: «Чәнд щара дохдьр тʹәсәлийа мьн дькьр у әз дьдамә баwәркьрьне, wәки әз сахләм ьм. Мьн фәʹм кьр, wәки мьн шин дькьр, ләма нишанед нәхwәшийе щәм мьн пешда һатьн». Wәʹдә шунда әв нишан öнда бун. Ле чи жи һәбә, Әʹли аqьлайи кьр, кö чу щәм дохдьр. Гава мәрьв шина кәсәки дькә, жь бо ве йәке имунитета wи сьст дьбә, сьһʹәт-qәwата wи дьһа хьраб дьбә у нәхwәшийед дьн пешда тен.

Чәтьнайед кö пешда тен. Бәдьр дьбежә: «Чахе Надьр мьр, мә гәрәке дәрһәqа wе йәке әʹлам кьра нә тʹәне һәвал у пьзмамарʹа, ле öса жи мәзьне хәбата wи у мәрьвед дьнрʹа. Һьм жи лазьм бу чәнд документед qануни тʹьжә кьн. Паше мә гәрәке бона тьштед Надьр хәм кьра. Раст ә wи чахи алийе физикида, емосийалида әм qöдум кʹәтьбун, ле диса жи мә гәрәке рʹьнд дина хwә бьда wан һʹәму тьшта».

Wәʹдә шунда һьнә чәтьнайед мәзьн пешда тен, мәсәлә лазьм ә wан һʹәму шьхöла биньн сери, чь кö пешда йе мьри дькьр. Мәсәла Тʹинайе әве йәке рʹьнд дьдә кʹьфше. Әw дьбежә: «Тʹәмо тʹьме хәм дькьр бона шьхöлед мәйи банкева гьредайи у шьхöлед бизнесе. Ньһа әв йәк ида бунә щабдарийед мьн, жь бо чь жи стреса мьн даһа зедә буйә. Гәло әзе бькарьбьм әwан һʹәму тьшта биньм сери?»

Әw чәтьнайед кö жоре һатьнә готьне әʹйан дькьн, wәки бь рʹасти гәләк чәтьн ә чахе мәрьве мәйи незик дьмьрә. Рʹаст ә мьрьна мәрьве незик дькарә ешәкә гьран мәрьварʹа бинә, ле чахе әве йәке пешда зани, дькарә али тә бькә тәйах ки. Бир нәкә, wәки нә һәр кʹәс сәр хwә ве йәке тʹәхмин дькә, чь кö жоре һатьбу готьне. Һәла һе әw мәрьв жи кʹижанирʹа кö гәләк чәтьн ә, дькарә дьлрʹьһʹәтийе бьстинә, чахе занә кö әw емосийед wи нормал ьн.

ӘЗЕ БЬКАРЬБЬМ ДИСА БӘХТӘWАР БЬМ?

Һивийа чь бьм: Еша дьл кö шинева гьредайи йә һәрһәйи накʹьшинә, у һеди-һеди әв сьвьк дьбә. Ле әв еш педа жь дьле мәрьва дәрнайе, у мәрьв нькарә мьрийе хwә бира бькә. Һьм жи wәʹдә шунда мәрьв те сәр һʹьше хwә у ида хwә нәһәq накә. Щар-щара тьштед öса ча мәсәлә рʹожа дәwата wан, йан рʹожа мьрьне у тьштед дьн, дькарьн ньшкева мьрийед wан биньн бира wан. Ле wәʹдә шунда алийе емосйалида мәрьв дәстпедькә хwә бьгьрә у диса вәдьгәрʹә жийина хwәйә һәр рʹожи. Мәрьв һьнге дькарә рʹьнд тәйах кә у жийина хwә бәрдәwам кә, гава нәфәред мала wи али wи дькьн.

Әwе чьqас wәхт бькʹьшинә? Һьнәк мәрьв мәһа шьне дькьн. Ле гәләкарʹа саләк йан дöдö лазьм ә, wәки дьле wан һьнәки һеса бә. Һьнәкарʹа жи даһа зедә wәхт лазьм әa. Әʹли дькә бира хwә: «Мьн wәкә се сала шине дькьр».

Зәʹф тьшт жь хwә дәʹwа нәкә. Рʹожәке хwәрʹа бьжберә у әwе рʹоже öса дәрбаз кә ча бәре, те бежи тьштәк нә qәwьмийә у бьзаньбә кö еша дьле тә wе һәр-һәйи нәкʹьшинә. Бь wе йәке тöйе бькарьби еша дьле хwә һәвәки сьвьк ки у әwе дьреж нәкʹьшинә.

Щарна чахе тö дьлрʹьһʹәтийе дьгәрʹи, сәва һʹале хwәда тәйах ки, тö бь һʹәзара ширәта дькари бьвини. Һьнә жь wан ширәта дькарьн керһати бьн, һьнәк жи на, чьмки чаwа пешда һатьбу готьне, һәр кәс нә мина һәв шине дькә. Һьм жи әв чь кö дькарә али мәрьвәки бькә, йед дьнрʹа дькарә керһати нибә.

Бь рʹасти һәнә ширәтед сәрәкә, кö гәләкарʹа кʹарәкә мәзьн анинә. Әw ширәт гәләк психолог дьдьн wан мәрьва йед кö шине дькьн, у әw ширәт сәр һʹиме wан принсипа йә, кö бәреда кʹьтебәкә кәвьнда, Кʹьтеба Пирозда һатьнә ньвисаре.

1: ЖЬ НӘФӘР У ҺӘВАЛА АЛИКʹАРИЙЕ QӘБУЛ КӘ

• 

  Һьнә експерт дьбежьн wәки дәрде хwә сьвьк кьн, әв йәк лапә фәрз ә. Щара дьбәкә һун дьхwазьн тʹәне бьминьн. Дьqәwьмә щарна һун һәла һе һерс дьбьн сәр wан, йед кö дьхwазьн али wә бькьн. Әв йәк тьштәкә нормал ә.

• Әʹсәйи нинә wәки тʹьме дор-бәре тә кәсәк һәбә, ле йәкә wана жь хwә бь тʹәмами дур нәхә, чьмки ахьрийеда тәрʹа аликʹарийа wан wе лазьм бә. Нәрм wанарʹа бьдә кʹьфше, кö wи wәʹдәйи чь тәрʹа лазьм ә у чь на.

• Ортʹа зерин бьвинә, у ль гора һʹәwщед хwә öса бькә, wәки нә бь тʹәмами хwә жь мәрьва башqә ки, нә жи тʹьме тʹәне бьмини.

ПРИНСИПА КʹЬТЕБА ПИРОЗ: «Дö кәс жь кәсәки qәнщтьр ә . . . Жь бәр кö, һәгәр бькʹәвьн, wе йәк һәвале хwә рʹакә» (Wаиз 4:9, 10).

2: ХWАРЬНА РʹАСТ БЬЖБЕРӘ У СПОРТЕВА МЬЖУЛ БӘ

• Һәрге тö хwарьне рʹаст бьжбери, әw йәк wе али тә бькә гәләк нәкʹәви стресе. Щурʹә-щурʹә емиш, пʹьнщар, у öса жи хwарьна гьран бьхwә.

• Гәләк ав у ава емиша вәхwә.

• Һәрге мәʹде тә тʹöнә, рʹожеда гәләк щар һьндьк-һьндьк бьхwә. Wе баш бә öса жи һʹәкиме хwәрʹа бежи, wәки тәрʹа витамина бьньвисә.a

• Һеди-һеди бьрʹәвә у диса спортед дьнва мьжул бә, чьмки әw йәк wе али тә бькә гәләк бона дәрд-кöла хwә нәфькьри. У öса жи wе али тә бькә, кö бона хwә бьфькьри, йан жи дина хwә дәрбази тьштәки дьн ки.

ПРИНСИПА КʹЬТЕБА ПИРОЗ: «Бәдәна тʹö кәси бәр чʹәʹве wи нә рʹәш ә, ле wе тʹер дькә у хwәй дькә» (Әфәси 5:29).

3: ХӘWА ХWӘ БЬСТИНӘ

• 

  Хәw гәләк фәрз ә илаһи бона wан йед кö шине дькьн, чьмки wи чахи qәwата wан һе зәʹф дьчә.

• Фәсал бә кö гәләк кофеин у алкоһол вәнәхwи, чьмки әw йәк дькарә хәwа тә бьтʹәqьсинә.

ПРИНСИПА КʹЬТЕБА ПИРОЗ: «Бь арамийе тʹьжибуна ләпәки, жь дö ләпед тʹьжи йед кö бь кʹәде у жь хәбата кö жь бо гьртьна байе qәнщтьр ә» (Wаиз 4:6).

4: ХWӘ БАШQӘ НӘКӘ

• 

  Бир нәкә wәки һʹәму мәрьв мина һәв шине накьн. Ләма жи тö хwәха гәрәке тедәрьхи, кö чь дькарә хут али тә бькә.

• Гәләк дьбежьн wәки чахе дәрде хwә кәсәкирʹа гьли дькьн, әw али wан дькә тәйах кьн, ле йед дьн дьбежьн wәки һе баш ә дьле хwәда хwәй кьн. Експерт щурʹә-щурʹә ширәта дьдьн, һәла лазьм ә wи wәʹдәйи дьле хwә кәсәкирʹа вәкьн. Һәрге һун дьхwазьн тʹәви кәсәки хәбәр дьн, ле шәрм дькьн, wе баш бә дәстпекьн һеди-һеди һәвале хwәйи незикрʹа дьле хwә вәкьн, у һуне даһа һеса хwә тʹәхмин кьн.

• Һьнә мәрьв дьбежьн кö чахе әwана дьгьрин, әw али wан дькә еша хwә сьвьк кьн, ле йед майинрʹа һе баш ә хwә бьгьрьн у нәгьрин.

ПРИНСИПА КʹЬТЕБА ПИРОЗ: «Һәр дьл дәрд у кöлед хwә занә» (Мәтʹәлок 14:10).

5: ХWӘ ЖЬ ТЬШТЕД ЗИЙАН ДУР БЬГЬРӘ

• 

  Һьнәк кö шине дькьн, еша хwә пе ичʹкәвәхwарьне йан жи наркотикайе сьвьк дькьн. Öса йанчь әwана дьхwазьн бир кьн дәрде хwә. Әw рʹьһʹәти кö йанчь әw тьшт тиньн, wәʹдәки кьн дькʹьшинә у һьм жи ахьрийа хьраб тинә. Дәрде хwә пе тьштед керһати сьвьк кьн.

ПРИНСИПА КʹЬТЕБА ПИРОЗ: «Дә әм хwә жь һʹәму кʹьретийа . . . хwә паqьж кьн» (2 Корьнтʹи 7:1).

6: WӘʹДЕ ХWӘ РʹАСТ ХӘРЩ КӘ

• Гәләк дьбежьн кö лазьм ә щара wәʹдәки шьхöлед дьнва мьжул бьн, сәва һәртʹьм бона кöл-дәрде хwә нәфькьрьн у хwә нәчәрчьриньн.

• Бәʹса хәбәре, һәвалед тʹәзә хwәрʹа бьвиньн йан һе незик бьн тʹәви һәвалед хwә, фәрәсәтед тʹәзә һин бьн, у щики һеса бьн.

• Wәʹдә дәрбаз бә у һуне һини ве дәрәще бьн. Һуне дьбәкә тʹәхмин кьн кö ида һаqас дьлтәнг набьн. Öса һун жь еша дьл qәнщ дьбьн.

ПРИНСИПА КʹЬТЕБА ПИРОЗ: «Дәма һәр тьшти . . . һәйә; wәхта гьрине һәйә у wәхта кʹәнине һәйә; wәхта ль хwә хьстьне һәйә у wәхта листьне һәйә» (Wаиз 3:1, 4).

7: ҺӘР ТЬШТИ WӘʹДӘДА БЬКӘ

• 

  Чьqас дькари, зу вәгәрʹә жийина хwәйә бәре.

• Һәрге тö хәwа хwә бьстини, бьхәбьти, йан жи шьхöлед хwә wәʹдәда бьки, öса те вәгәрʹи жийина хwәйә бәре.

• Чахе тö wан шьхöлава мьжул дьби, кʹижанарʹа һʹәwаса тә те, әв йәк wе али тә бькә кем бәрхwә кʹәви.

ПРИНСИПА КʹЬТЕБА ПИРОЗ: «Жь бәр кö wе бь зедәйи рʹожед тәмәна хwә дь бира хwәда нәйнә; жь бәр кö wе Хwәде дь кʹефхwәшийа дьле wида бәрсьве бьдә» (Wаиз 5:20).

8: WИ WӘʹДӘЙИДА САФИКЬРЬНЕД ФӘРЗ НӘКЬН

• Гәләк мәрьв, йед кö сафикьрьнед фәрз паши мьрьна мәрьве хwәйи незик кьрьнә, wәʹдә шунда пʹошман бунә.

• Һәрге дьбә, ләз нәкʹәвә мәсәлә дәрбази щики дьн би, йан хәбата хwә бьгöһези, йан жи тьштед мәрьве мьри жь мале дәрхи, йед кö тö ида нади хәбате.

ПРИНСИПА КʹЬТЕБА ПИРОЗ: «Тʹьвдира мәрьве хирәт әʹсә кʹаре тинә, ле һәр кәсе ләз кʹәти әʹсә зьраре тинә» (Мәтʹәлок 21:5).

9: БИР БИНӘ МӘРЬВЕ ХWӘЙИ ҺʹЬЗКЬРИ

• 

  Гәләк мәрьв тедәрхьстьнә, wәки чахе әwана wан тьштава мьжул дьбьн, чь кö мәрьве wанә мьри дькә бира wан, әв йәк али wан дькә.

• Дьбәкә бона тә öса жи керһати бә, һәрге тö һьнә шькла тʹоп ки йан жи журналәкә öса чеки, кʹидәре кö те бьньвиси һьнә qәwьмандьн у сәрһатийед дәрһәqа жийина мәрьве хwә, кʹижани кö тö нахwази бир ки.

• Тьштед öса, чь кö биранина мәрьве тәва гьредайи нә, хwәй кә. Ле чахе еша дьле тә һәвәки сьвьк бә, һьнге дькари дәрхи у бьньһерʹи.

ПРИНСИПА КʹЬТЕБА ПИРОЗ: «Бир бинә р′ожед бәре» (Qануна Дöщари 32:7, ПКʹМ)

10: ҺӘРʹӘ ЩИКИ ҺЕСА БӘ

• Һәрʹә хwәрʹа щики һеса бә.

• Һәрге тö нькари ль сәр гәләк wәхт һәрʹи һеса би, тö дькари һәма сәр рʹожәк йан дö рʹожа жи һәрʹи һеса би, мәсәлә һәрʹи парке, бәр дәве бәре, йан жи тʹәви һәвалед хwә һәрʹә рʹеwитийе.

• Һәла һе шьхöлед дьн жи, кö тә бәре нәкьрийә, дькарә али тә бькә дьлрʹьһʹәт би.

ПРИНСИПА КʹЬТЕБА ПИРОЗ: «Т′әне һәр′ьнә щики хәwлә у һьнәки р′ьһ′әт бьн» (Марqос 6:31).

11: АЛИ МӘРИЙА БЬКӘ

• 

  Бир нәкә, wәки чахе тö али мәрийа дьки, бь wе йәке тö али хwә жи дьки.

• Бәʹса хәбәре али wан мәрьва бькә, кʹижан кö мина тә мәрьвед хwәйи незик öнда кьрьнә у әwана жи һʹәwще бәрдьлийе нә.

• Гава тö бәрдьле мәрьвада тейи, тö диса дьлша дьби у ча бәре әʹмре хwәрʹа ша дьби.

ПРИНСИПА КʹЬТЕБА ПИРОЗ: «Хwәзи ль дайийа, нә кö ль стандийа» (Кʹаред Шандийа 20:35).

12: БЬРА ТЬШТЕД ФӘРЗ, ДИСА ЩИЙЕ ПЕШЬН БЬН

• Бь дәрд-кöле хwә тö дькари тедәрхи, wәки жийина тәда бь рʹасти чь фәрз ә.

• Бьфькьрә, wәки тö чь щурʹәйи әʹмьре хwә дәрбаз дьки.

• Һәрге лазьм ә, әʹмьре хwәда гöһастьна бькә.

ПРИНСИПА КʹЬТЕБА ПИРОЗ: «Чуна мала шине, жь чуна мала зийафәте qәнщтьр ә, жь бәр кö даwийа һәр зьлами әw ә у йе кö, дьжи wе дьхә дьле хwә» (Wаиз 7:2).

Бь рʹасти, бьрина дьл бь тʹәмами qәнщ набә. Ле йәкә әwед кö мәрьвед хwә öнда кьрьнә, дьбежьн, wәки ширәтед жоре готи, али wан кьрьнә бәрдьлийе бьвиньн. Һәмьки ве готареда һур бь һур найе шеwьркьрьне wәки чь дькарә али мә бькә еша дьле хwә сьвьк кьн. Ле һәрге тö һьнә жь wан ширәта бьди хәбате, тöйе бәрдьлийе бьстини у бәр дәрд-кöле хwә тәйах ки.

WАН ПАШWӘХТИЙА, МӘРЬВ ГӘЛӘК ЛЕКОЛИНА ДЬКЬН, КÖ ЧА МЬРЬНА МӘРЬВА ҺʹÖКÖМ ДЬКӘ СӘР ӘʹМЬРЕ МӘРЬВЕ WИЙИ НЕЗИК. Чаwа кö пешда һатьбу готьне, психоложед һәри баш ширәтед хwә ль сәр һʹиме биланийа жь Кʹьтеба Пироз дьдьн. Әв йәк әʹйан дькә, wәки рʹебәрийа Кʹьтеба Пироз тʹö щар кәwьн набә. Хенщи wе йәке, дь Кʹьтеба Пирозда нә кö тʹәне рʹебәрийа керһати һәйә, ле һе зедә. Дь ве кʹьтебеда һәйә әʹламәтийа öса, йа кö тʹö щийа тʹöнә у дькарә бәрдьлийа мәзьн бьдә wан, йед кö дьлшкәсти нә жь бо мьрьна мәрьвед хwә.

• Баwәрийа wе йәке, кö мәрьвед мәйи мьри начәрчьрьн

  Кʹьтеба Wаиз 9:5 дьбежә: «Мьри . . . тьштәки ньзаньн». Ле Зәбурда ньвисар ә, wәки фькьред wан «тʹöнә дьбьн» (Зәбур 146:4, ДО). Ләма жи Кʹьтеба Пироз, мьрьне бәрамбри хәwа кʹур дькә (Йуһʹәнна 11:11).

• Баwәрийа qайим, кö Хwәдайе һʹьзкьри wе бәрдьлийе бьдә

  Дь Зәбура 34:15 те готьне: «Чʹәʹвед Йаһоwаa ль сәр кәсен раст ьн у гöһен wи, жь бо дöайен wан вәкьри нә». Гава әм дьле хwә дöакьрьнеда Хwәдерʹа вәдькьн, әм нә кö тʹәне рʹьһʹәт дьбьн, кö дькарьн дьле хwә кәсәкирʹа вәкьн йан фькьред хwә контрол кьн. Ле бь рʹасти әв али мә дькә һәләqәтийа баш тʹәви Әʹфьрандаре хwә чекьн, йе кö дькарә qәwата хwә öса бьдә хәбате кö бәрдьлийе бьдә мә.

• Ахьрийа баш йа кö әм һьзрәт ьн

  Бьдә бәр чʹәʹве хwә әw wәʹдә, гава ль ахьрийе әwед кö мьрьн ә, wе диса вәгәрʹьнә ль жийине сәр әʹрде! Кʹьтеба Пироз гәләк щар дәрһәqа ви wәʹдәйи дьбежә. Öса жи әw дина мә дьдә wе йәке, кö һʹале мә wе чаwа бә. Кʹьтеба Пироз дьбежә wәки Хwәде wе «жь ч′ә′вед wан һ′әму һесьред wан паqьж кә у иди мьрьне т′öнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:3, 4).

Гәләк жь wан мәрийа, йед кö баwәрийа хwә Йаһоwа Хwәде тиньн, qәwатәкә мәзьн стандьнә у карьбунә һʹале хwәйи чәтьнда тәйах кьн, чьмки әwана һинбунә итʹбарийа хwә Wи биньн. Мәсәлә, кʹöлфәтәк бь наве Хайлаз, йа кö мере хwә öнда кьрьбу, тʹәви кʹижани кö әw 65 сала жит, дьбежә: «Кʹьтеба Пироз мьн дьдә баwәркьрьне, wәки мәрьвед мә йед кö мьрьнә, начәрчьрьн у кö Хwәде wе сах кә wан һʹәму мәрийа, кʹижан кö бира wида ньн. Әз тʹьме әве йәке бира хwәда хwәй дькьм, хут гава мьрьна мере мьн дькʹәвә бира мьн. Әв йәк али мьн дькә хwә qайим бьгьрьм, у нәфькьрьм дәрһәqа ви кöл-дәрде, кö һатийә сәре мьн!»

Тина дәрһәqа кʹижани кö һатьбу готьне, дьбежә: «Жь wи чахи чаwа кö мьн Тʹәмо öнда кьр, әз ль сәр хwә тʹәхмин дькьм кö Хwәде пьштоване мьн ә. Мьн әʹшкәрә дьдит кö чаwа Йаһоwа али мьн дькьр wи wәʹде гьранда. У созе жь Кʹьтеба Пироз дәрһәqа сахкьрьна мьрийа, бона мьн гәләк реали йә. Әw йәк мьн дьшьдинә у һелан дькә хwә qайим бьгьрьм һʹәта wе рʹоже, чахе әзе диса Тʹәмо бьвиньм».

Бь милйона мәрийа баwәрийа хwә wан гьлийа тиньн у qәwата ве йәке сәр хwә тʹәхмин кьрьнә. Һәрге тö дьфькьри, wәки әв соз у рʹебәрийа жь Кʹьтеба Пироз нәреали йә йан жи чʹирок ә, wе баш бә wәки хwәха леколин бьки, кö ве йәкеда избат би. Те бьвини wәки Кʹьтеба Пироз бь рʹасти жи аликʹарийа һәри баш дьдә wан мәрийа, йед кö мәрьвед хwәйи незик öнда кьрьнә.

ҺЕ ЗЕДӘ ПЕБЬҺʹӘСЬН ДӘРҺӘQА СОЗЕ БОНА МЬРИЙА

Бьньһерʹә видео дәрһәqа ве йәке ль сәр малпәра мә, jw.org

ПАШИ МЬРЬНЕ ЧЬ ДЬQӘWЬМӘ?

Чь дьqәwьмә паши мьрьне? Щаба жь Кʹьтеба Пироз, бәрдьли у һевийе дьдә мә

Бьтькинә КʹЬТЕБХАНӘ > ВИДЕО (Видео: Кʹьтеба Пироз > Һинкьрьнед Кʹьтеба Пироз)

ҺУН ДЬХWАЗЬН МЬЗГИНИЙА ХЕРЕ ПЕБЬҺʹӘСЬН?

Иро әм һаqас дәнг-бәсед хьраб дьбьһен. Ле кʹидәре әм дькарьн мьзгинийа хере пебьһʹәсьн?

Бьтькинә ҺИНКЬРЬНЕД КʹЬТЕБА ПИРОЗ > ӘʹДЬЛАЙИ У БӘХТӘWАРИ