Сәрһати 50

Дӧ Жьнед Мерхас

ИСРАЕЛИ кʹәтьбун нава кӧл-дәрда у лавайа Хԝәде дькьрьн сәва аликʹарийе. Йаһоԝа жи али ԝан дькьр бь сәркʹаред мерхас. Кʹьтеба Пироз ль сәр ԝан һʹакьм дьвежә. Һʹакьме пешьн Йешу бу, у навед һьнә һʹакьме дьн жи әв ә: «Отнийел, Әһуд у Шамгар». Ле һәбун диса дӧ жьн йе кӧ али исраелийа дькьрьн, навед ԝан Дәбора у Йаел бу.

Дәбора пʹехәмбәр бу. Йаһоԝа әʹламәтийа дәрһәԛа ахьрийе дьда ԝе, у әԝ жи ԝан әʹламәтийа дәрбази мәрийа дькьр. Дәбора ӧса жи һʹакьм бу. Әԝ бьн дара хӧрм рʹудьньшт у щьмәʹт дьһатә бал ԝе, кӧ сәва сафикьрьна чәтьнайийед хԝә аликʹарийе жь ԝе бьстиньн.

Ԝи чахи пʹадше Кәнане Йаԝин бу. Әскәред ԝи гәләк бун, у ԝәкә 900 әʹрәбед ԝи һәбун. Ләма жи гәлә жь исраелийа дьхԝази-нахԝази дьбунә хӧламе ԝи. Наве сәркʹаре әскәред Йаԝин жи, Сисәра бу.

Дәрбәке Дәбора гази һʹакьмәки кьр, наве кʹижани Барак бу, у готә ԝи: «Йаһоԝа дьвежә: ‹10 000 әскәра һьлдә у ԝана бьвә ль сәр чʹийайе Тәбор. Әзе Сисәра биньмә ԝьр, у тӧйе бькарьби ԛьрʹа ԝи у әскәред ԝи бини у сәрфьнийаз би›».

Барак жи готә Дәборе: «Һәрге тӧ бейи тʹәви мьн әзе һәрʹьм». Дәбора тʹәви ԝи чу, ле сәрда гьлийе ӧса гот: «Тӧйе ԛәдрәки ӧса настини кӧ дь ви шәрʹида сәрфьнийаз би, чьмки Йаһоԝа Сисәра ԝе бь дәсте жьнәки бькӧжә». Ва чь ԛәԝьми паше.

Барак те бәрбь чʹийайе Тәбор, кӧ рʹасти әскәред Сисәра бе. Ньшкева Йаһоԝа лейикә мәзьн рʹадькә у ниве зәʹф жь әскәред Сисәра дьмьрьн. Ле хԝәха Сисәра ль сәр әʹрәба хԝә рʹудьне у дьрʹәвә.

Һьнә ԝәʹдә шунда Сисәра һатә бәрбь чадьра Йаел. Әԝе ԝи тʹәглифи мала хԝә кьр у ширәки ӧса да ԝи, кӧ әԝ перʹа-перʹа хәԝрʹа чу. Паше Йаеле мьхәки чадьре һьлда, һеди-һеди незики ԝи бу у мьх сәре ԝирʹа кьр. Чахе Барак һатә бәр чадьра Йаеле, әԝе Сисәрайе кӧшти нишани Барак кьр! Ньһа тӧ дьвини, кӧ гьлийед Дәборе ча һатьн сәри.

Ахьрийа-ахьрийе Йаԝин пʹадша жи һатә кӧштьне, у исраели һьнә ԝәʹдә диса жи дь әʹдьлайийеда дьжитьн.

Һʹакьмти 2:14-22; 4:1-24; 5:1-31.