Сәрһати 59

Даԝьд Мәщбур Дьбә Кӧ Бьрʹәвә

ПАШИ ԝе йәке ча Даԝьд Голйатʹ кӧшт, сәркʹаре әскәред исраелийа бь наве Абнәр, Даԝьд ани бәр Шаԝул. Шаԝул жь Даԝьд гәлә ԛайил бу. Ләма жи әԝи Даԝьд кьрә сәркʹаре әскәра у ԝи тʹәглиф кьр кӧ дь мала ԝида бьжи.

Пашԝәхтийе, чахе әскәред исраели жь шәрʹе тʹәви фьльстиана вәдьгәрʹийан, жьнед исраели дь кʹӧлама хԝәда дьготьн: «Шаԝул һʹәзара кӧшт, ле Даԝьд һʹәзар-һʹәзара». Жь бо ве йәке Шаԝул дәстпекьр һʹәвсудийе Даԝьд бькә, чьмки щьмәʹте жь Шаԝул һе зедәтьр Даԝьд һӧрмәт дькьрьн. Ле кӧрʹе Шаԝул Йонатʹан йәки һʹәвсуд нибу. Әԝи Даԝьд гәлә һʹәз дькьр, у Даԝьд жи ԝи һʹәз дькьр. Ԝана соз дабу һәв кӧ тʹьме һәвале һәв бьн.

Даԝьд гәлә хԝәш чәнге дьхьст у Шаԝулрʹа кʹӧламед Даԝьд Шаԝулрʹа гәлә хԝәш дьһатьн. Ле рʹожәке жь бо һʹәвсудийе, Шаԝул нәһәԛи кьр. Дәма Даԝьд чәнге дьхьст, Шаԝул рʹьме хԝә һьлда авитә Даԝьд у готе: «Әзе Даԝьд бькʹӧтьм диԝерда!» Ле Даԝьд хԝә ԝеда кьр у рʹьм кʹеләкева дәрбаз бу. Һьнә ԝәʹдә шунда Шаԝул диса дәрбәки рʹьм авитә Даԝьд, ле ижар жи рʹьм ԝи нәкʹәт. Ньһа Даԝьд фәʹм кьр кӧ гәрәке һаш хԝә һәбә у архайин нәбә.

Те бира тә Шаԝул чь соз дабу ԝи кәси, кʹе кӧ Голйатʹ бькӧшта? Әԝи соз да кӧ ԛиза хԝә бьда ԝи. Ләма жи Шаԝул готә Даԝьд, кӧ һәрге әԝ 100 фьльстиана бькӧжә, ԝи чахи ԝе ԛиза хԝә бьдә ԝи жьнти. Һәла бьньһерʹә Шаԝул чь кьр! Бь рʹастийе гӧмана ԝи әԝ бу, кӧ Даԝьд ԝе бе кӧштьне жь дәсте фьльстиана. Ле Даԝьд сах ма. Ләма жи Шаԝул ԛиза хԝә дьдә Даԝьд.

Рʹожәке Шаԝул готә Йонатʹан у һʹәму ԛӧльхкʹаред хԝә, кӧ дьхԝазә Даԝьд бькӧжә. Ле Йонатʹан готә ԝи: «Дәсте хԝә нәдә Даԝьд. Әԝи тʹӧ щар тәрʹа хьрави нә кьрийә. Ле дәԝьсе жи бь һәр кьред хԝә Даԝьд кʹарәкә мәзьн тәрʹа дьани. Әԝи әʹмьре хԝә да бәр шьке сәва кӧ Голйатʹ бькӧшта, у ԝи чахи тә ԝи ԛәбул дькьр у шабуна тә беһʹәсав бу».

Шаԝул гӧрʹа кӧрʹе хԝә кьр у соз да кӧ дәсте хԝә надә Даԝьд. Даԝьд пашда вәгәрʹандьн кӧ диса жи дь мала Шаԝулда ԛӧльх бькә. Ле рʹожәке, дәма Даԝьд чәнге дьхьст, Шаԝул диса щарәке рʹьм авитә Даԝьд. Ижар әԝи анщах хԝә хьлаз кьр. Әв ида щара сьсийа бу! Ньһа Даԝьд фәʹм кьр кӧ гәрәке жь вьр бьрʹәвә!

Ԝе шәве Даԝьд чубу мала баве хԝә. Ле Шаԝул мер шандьбу пәй ԝи кӧ ԝи бькӧжьн. Микʹале нета баве хԝә заньбу, ләма жи әԝе готә мере хԝә: «Һәрге тӧ ишәв жь вьр нәрʹәви, тӧйе бейи кӧштьне». Ве шәве Микʹал али Даԝьд кьр кӧ әԝ бьрʹәвә у хԝә вәшерә. Ӧса Даԝьд ԝәкә һʹәфт сала жь щи щийа щиԝар дьбу, сәва кӧ Шаԝул ԝи нәгьрә у нәкӧжә.

1 Самуйел 18:1-30; 19:1-18.