Сәрһати 95
Иса Бь Мәсәла Һин Дькә
ДӘРБӘКИ Иса готә йәкирʹа, кӧ әԝ гәрәке һәвале хԝә һʹәз бькә. Әв мәри пьрс да Иса: «Һәвале мьн кʹи йә?» Ле бь рʹастийе Иса заньбу сәва чь әв мер пьрсе ӧса дьдә ԝи. Әв мер дьшьрмиш дьбу, кӧ һәвале ԝи тʹәне әԝ ьн, кʹи жь мьләте у дине ԝи нә. Кʹа әм пебьһʹәсьн Иса чь щав да.
Щарна Иса мәрийа бь мәсәлә һин дькьр. У ньһа әԝ ӧса жи дькә. Әԝи мәсәлә щьһуйәки у самәриәйки гьли дькә. Пешда әм ида һьнә пеһʹәсийан кӧ щьһу самәрийа һʹәз нәдькьрьн. Аһан Иса мәсәла чь гьли кьр:
Дәрбәке мәрьвәк жь Оршәлиме бәржери Әриһайе дьбу. Әԝ кʹәтә дәсте ԛачаха, ԝана пʹәред ԝи стандьн, әԝ кʹӧтан у нивкӧшти һиштьн.
Ӧса ԛәԝьми кӧ кʹаһинәк ԝе рʹева дьһат. Кʹаһин һʹале ви мәрьви дит. Ча тӧ дьшьрмиш дьби әԝ ԝе чь бькә? Кʹаһин кʹеләкева дәрбаз бу у алийе дьнва чу. Паше мәрьвәки хԝәденас жи ԝе рʹева дәрбаз бу. Әв леԝи бу. Ле гәло әԝ ԝе бьсәкьнә йан на? На, әԝ жи нәсәкьни кӧ али ԝи һесири бькә, әԝ жи бәррʹа дәрбаз бу у чу. Ль сәр шькьли тӧ дькари бьвини кӧ әԝана ча кʹеләкева дәрбаз дьбьн у дьчьн.
Ле ньһа дина хԝә бьдә кӧ кәсәк бәр ԝи мерьки щьһу сәкьни у али ԝи дькә. Әԝ жь сәмарийа йә. Әԝи бьринед ԝи бь һьнә дәрман ле хьст у пʹечʹа. Паше әԝи әв щьһу бьрә щики ӧса, кӧ әԝ бькарьбә һеса бә у ԛәнщ бә, у хԝәха жи чу рʹийа хԝә.
Чахе Иса сәрһатийа хԝә хьлаз кьр, әԝи пьрс да ԝи мерьки: «Ньһа тʹәхмина тә, жь ԝан һәрсека кʹижан бу һәвале ԝи мәрьви кӧ кʹәтә дәсте ԛачаха? Кʹаһин, Леԝи йан Самәри?»
Әԝи жи гот: «Самәри. Чьмки әԝи гӧне хԝә ле ани у али ԝи кьр».
Иса ԝирʹа гот: «Тӧ рʹаст и. Ләма жи һәрʹә у тӧ жи ӧса бькә».
Дьвини Иса ча рʹьнд һин дькә? Тӧ бәгәм дьки? Әм дькарьн гәлә тьштед фәрз жь Иса һин бьн, һәрге гӧһ бьдьнә һинкьрьна Иса, йе кӧ дь Кʹьтеба Пирозда ньвисийә.