Сәрһати 108
Ль Сәр Рʹийа Шаме
ЗАНИ әв мере кӧ кʹәтийә әʹрде кʹи йә? Әв Шаԝул ә. Те бира тә, чахе Стәйфан дабунә бәр кәвьра, Шаԝул жи ль ԝьр бу у мьԛати кʹьнща дьбу. Ле ньһа дина хԝә бьдә ча рʹонайикә ԛайим шәԝԛ дьдә! Гәло ль вьр чь дьԛәԝьмә?
Паши ԝе йәке ча Стәйфан һатә кӧштьне, Шаԝул дәстпекьр пәй шагьртед Иса бькʹәвә, у сәркʹартийа ԝи шьхӧли һьлда сәр хԝә. Әԝ дькʹәтә мала, жьн у мера кʹаши дәрва дькьр у ԝана давитә кәле. Гәләка жь шагьрта дәрбази шәһәре дьне дьбун у ль ԝьр дәстпедькьрьн «мьзгинийа хере» даннасин бькьн. Ле Шаԝул дьчу ԝан шәһәра жи у шагьрта дьзеранд. Дәрбәке, чахе әԝ дьчу Шаме, рʹева тьштәки бь кʹәрәмәт сәре ԝи ԛәԝьми.
Ньшкева жь әʹзмана рʹонайикә ԛайим дора ԝи шәԝԛ да. Ча ль сәр шькьл жи те кʹьвше, Шаԝул кʹәтә әʹрде, у дәнгәк ԝирʹа гот: «Шаԝул! Шаԝул! Тӧ чьма мьн дьзерини?» Меред кӧ тʹәви Шаԝул бун, әԝ рʹонайи дитьн у әԝ дәнг жи бьһистьн, ле әԝи дәнги чь дьгот ԝана фәʹм нәдькьр.
Шаԝул пьрс кьр: «Тӧ кʹи йи Хӧдан?»
Ԝи дәнги готе: «Әз әԝ Иса мә, йе кӧ тӧ дьзерини». Гәло Иса чьрʹа ӧса гот? Чьмки чахе шагьртед ԝи дьзерандьн, әԝи хԝә ӧса тʹәхмин дькьр те бе жи ԝи дьзериньн.
Ԝи чахи Шаԝул гот: «Хӧдан әз чь гәрәке бькьм?»
«Рʹабә һәрә Шаме, у ль ԝьр те пебьһʹәси чь гәрәке бьки», Иса готә ԝи. Чахе Шаԝул рʹабу у чʹәʹве хԝә вәкьр, әԝи ида тьштәки нәдьдит. Әԝ кор бьбу! Ләма жи әв меред кӧ тʹәви ԝи бун, дәсте ԝи гьртьн у ԝи бьрьнә Шаме.
Ԝи чахи Иса готә шагьртәки хԝә дь Шамеда: «Һананийа, рʹабә һәрә ль кʹуче кӧ ԝирʹа Рʹаст дьбежьн. Ль ԝьр бькʹәвә мала щьһуйәки бь наве Шаԝул. Чьмки әԝ ԝе бьбә ԛӧльхкʹарәки мьнә башԛә у дәлал».
Һананийа гӧрʹа Иса кьр. Чахе әԝ рʹасти Шаԝул һат, әԝи дәсте хԝә дани сәр Шаԝул у гот: «Хӧдан әз шандьмә щәм тә, ԝәки тӧ диса бьбини у бь Рʹӧһʹе Пироз тʹьжи би». Ԝи чахи ньшкева тьштәк мина капәке жь чʹәʹвед Шаԝул кʹәт, у әԝи пашда дәстпекьр бьвинә.
Паши ве йәке Шаԝул дәстпекьр бь хирәте, гәлә мьләтарʹа, даннасин бькә. Әԝ һатә наскьрьне ча Паԝлосе шанди. Паше әме һе зедә дәрһәԛа ԝи пебьһʹәсьн. Ле кʹа әм пешийе пебьһʹәсьн Хԝәде чь шьхӧл дьдә Пәтрус у ԝи дьшинә кʹидәре.
Кʹаред Шандийа 8:1-4; 9:1-20; 22:6-16; 26:8-20.