Чьрʹа Хwәде дьһелә, wәки зӧлми у кӧл-дәрд һәбьн?

1. Ча зӧлми пешда һат?

Зӧлми ль сәр әʹрде пешда һат, чахе Шәйтʹан дәрәwа пешьн кьр. Сәре-серида Шәйтʹан мьлйакʹәтәки беqӧсур бу, ле әwи хwә дь рʹастийеда нәгьрт (Йуһʹәнна 8:44). Әwи тьштәки ӧса хwәст, кӧ тʹәне Хwәде һежайи ве йәке бу, әwи хwәст кӧ һәр кәс wирʹа qӧльх кә, нә кӧ Хwәдерʹа. Шәйтʹан жьна пешьн Һеwа хапанд, у ӧса кьр кӧ Һеwайе гӧрʹа wи кьр, нә кӧ гӧрʹа Хwәде. Адәм жи дь ве гӧрʹанәкьрьнеда тʹәви Һеwайе бу йәк. Әв кьред Адәм, пешда ани чәрчьрандьн у мьрьн. Бьхунә Дәстпебун 3:1-6, 19.

Бь wе йәке кӧ Шәйтʹан һелан да Һеwайе гӧрʹа Хwәде нәкә, Шәйтʹан мьqабьли Хwәде дәркʹәт у изьна Хwәде сәркʹартийе бькә кьрә бьн шьке. Паши ве йәке гәләка инкʹар кьр сәркʹартийа Хwәде у бь ве йәке тʹәви Шәйтʹан бунә йәк. Ӧса Шәйтʹан бу «сәрwере ве дьнйайе». Бьхунә Йуһʹәнна 14:30; 1 Йуһʹәнна 5:19.

2. Дь әʹфьринед Хwәдеда кемаси йан qӧсур һәбу, йан на?

Һʹәму кьред Хwәде бекемаси у беqӧсур ьн. Хwәде мәри у мьлйакʹәт ӧса әʹфьрандьнә, wәки әwана бькарьбьн бь беqӧсуртийе гӧрʹа wи бькьн (Qануна Дӧщари 32:4, 5). Ле Хwәде ӧса жи әм бь азабуна бьжартьне әʹфьрандьнә, wәки әм хwәха бьжберьн qәнщийе бькьн йане хьрабийе. Әв азабуна бьжартьне мәщале дьдә мә, wәки әм һʹәзкьрьна хwә һьндава Хwәде кʹьфш кьн. Бьхунә Аqуб 1:13-15; 1 Йуһʹәнна 5:3.

3. Чьрʹа Хwәде һишт кӧ һʹәта иро кӧл-дәрд һәбьн?

Йаһоwа Хwәде һишт wәки мьqабьлийа һьндава сәркʹартийа wи, йе кӧ дь бахче Адәнеда дәстпебу, диса һьнәк wәʹдә дьреж бә. Ле гәло чьрʹа? Сәва кӧ бе кʹьфше, wәки сәркʹартийа бейи wи нькарә кʹаре мәрийарʹа бинә (Wаиз 7:29; 8:9). Паши ве йәке 6 000 сал дәрбаз бун, у жь тʹәрихийа дьнйайе әшкәрә дьбә кӧ сәркʹаред дьнйайе нькарьн шәрʹ, зӧлми, нәһәqи йан жи нәхwәшийе бьдьн һьлдане. Бьхунә Йерәмйа 10:23; Рʹомайи 9:17.

Бәле сәркʹартийа мәрийа нькарә кʹаре бинә мәрийарʹа, ле сәркʹартийа Хwәде ида кʹаре тинә wан мәрийарʹа, кʹи кӧ әве сәркʹартийе qәбул дькә (Ишайа 48:17, 18). Зутьрәке Хwәде wе һʹәму сәркʹартийед дьнйайе кʹӧтакә. Кʹи кӧ хwәрʹа сәркʹартийа Хwәде жьбартийә, тʹәне әw wе бьбьнә хwәйе әʹрде (Ишайа 11:9). Бьхунә Данийел 2:44.

Видео: Чьма Хwәде Дьһелә Wәки Әм Бьчәрчьрьн?

4. Бь сайа сәбьркьрьна Хwәде әм чь дькарьн бькьн?

Шәйтʹан шәрʹ авитә ль сәр һʹәмуйа, кӧ тʹӧ кәс бекʹар Хwәдерʹа wе qӧльх нәкә. Ле тӧ дьхwази избат ки, кӧ әв йәк дәрәw ә? Бәле, тӧ дькари әве йәке бьки! Бь сайа сәбьркьрьна Хwәде, wәʹде мә һәр кәси һәйә кӧ нишан кьн кʹижан сәркʹартийе әм дьжберьн, сәркʹартийа Хwәде йане йа мәрийа. Әв йәк дь әʹмьре мәда wе рʹьнд бе кʹьфше. Бьхунә Ибо 1:8-12; Мәтʹәлок 27:11.

5. Ча әм дькарьн ча сәркʹаре хwә бьжберьн Хwәде?

Әм дькарьн бьжберьн сәркʹартийа Хwәде, һәгәр әм жь Хәбәра Хwәде демәк Кʹьтеба Пироз, һин бьн ча рʹаст Хwәде бьһʹәбиньн, у паше әве занәбуне дь qӧльхкьрьнеда бьдьн хәбате (Йуһʹәнна 4:23). Ӧса жи әм дькарьн инкʹар кьн сәркʹартийа Шәйтʹан, һәгәр әм чʹәʹв бьдьнә Иса Мәсиһ у нәкʹәвьнә нав шьхӧлед политике у шәрʹкьрьне. Бьхунә Йуһʹәнна 17:14.

Шәйтʹан иро qәwата хwә дьдә хәбате, wәки тьштед һʹәрам, бенамуси у хьраб, мәрʹа ӧса бьдә кʹьфше ча тьштед баш. Һәгәр әм тʹәрка wан шьхӧлед хьраб бьдьн, дьбәк жи һәвал йан бьра-пьсмамед мә, ль сәр мә бькʹәньн, йан жи пьшта хwә бьдьнә мә (1 Пәтрус 4:3, 4). Ле әм гәрәке сафи кьн: Әм тʹәви wан мәрийа кʹи кӧ Хwәде һʹәз дькьн, һәвалтийе бькьн? Әм гӧрʹа qанунед Хwәдейә аqлайи у бь һʹәзкьрьн бькьн? Рʹаст ә чәтьнайи дькарьн һәбьн, ле һәгәр әм ӧса бькьн, әме избат кьн wәки гьлийед Шәйтʹан кӧ тʹӧ кәс дь нав чәтьнайада wе гӧрʹа Хwәде нәкә, дәрәw ә. Бьхунә 1 Корьнтʹи 6:9, 10; 15:33.

Хwәде wе әʹсәйи һʹәму зӧлмийе у чәрчьрандьне бьдә һьлдане, чьмки әw мәрийа һʹәз дькә. Кʹи кӧ әwе йәке баwәр дькә у баwәрийа хwә жи әшкәрә дькә, wе ль сәр әʹрде һʹәта-һʹәтайе бьжи. Бьхунә Йуһʹәнна 3:16.