«Хwә ль сәр Баwәрийа Хwә йа Һәри Пироз Ава Бькьн»

1, 2. Әм чь гәрәке ава кьн у qәwи кьн у чьма?

ӘМ ГЬШК жи дьхwазьн сьһʹәт-qәwат у qәwи бьн. Сәва әм сьһʹәт-qәwат бьн мәрʹа лазьм ә хwарьна баш бьхwьн, спортева мьжул бьн, бәдәна хwәй qәwи кьн. Әwе йәке әм гәрәке тʹьме бькьн. Бона wе йәке, лазьм ә qәwате хәрщ кьн. Рʹаст ә әw йәк нә һеса йә, ле чьмки wе йәкева жийина мә у ахьрийа мә гьредайи йә, ләма жи әм гәрәке тʹәрк нәдьн бәдәна хwә qәwи кьн. Диса тьштәк һәйә кö һежа йә wәки әм мьqат бьн у дина хwә бьдьне. Wаре әм пебьһʹәсьн кʹа әw чь йә.

² Чахе Щьһуда һелан да Мәсиһийа wәки «хwә дь һʹьзкьрьна Хwәдеда бьгьрьн», әwи öса жи кʹьфш кьр кö әве йәке ча бькьн: «Хwә ль сәр баwәрийа хwә йа һәри пироз ава бькьн» (Щьһуда 20, 21, ИМ). Тö ча дькари хwә у баwәрийа хwә ава ки, демәк qәwи ки, сәва кö хwә нава һʹьзкьрьна Хwәдеда хwәй ки? Ньһа әме бьньһерʹьн се тьшта дәрһәqа qәwибуна тәйә рʹöһʹани.

БАWӘРИЙА ХWӘ QӘWИ КӘ ҺЬНДАWА QАНУНЕД ЙАҺОWАЙӘ РʹАСТ

3. Шәйтʹан чьда дьхwазә мә бьхапинә?

³ Бәри әʹwльн, мәрʹа лазьм ә баwәрийа хwә qәwи кьн һьндава qанунед Хwәде. Бь һинбуна ве кʹьтебе тö пеһʹәсийайи дәрһәqа гәләк дәʹwакьрьнед Йаһоwа, бона рʹабун-рʹуньштандьна мә. Тö ча дьньһерʹи сәр wан дәʹwакьрьнед Йаһоwа? Шәйтʹан дьхwазә тә бьхапинә, wәки тö бьфькьри кö принсип, qанун у нормед Йаһоwа сәрт у гьран ьн. Шәйтʹан әве методе жь бахче Адәнеда һʹәта ньһа дьдә хәбате у wирʹа те стандьн (Дәстпебун 3:1-6). Гәло әw wе бькарьбә тә жи бьхапинә? Әв йәк тәва гьредайи йә.

4, 5. Әм гәрәке ча бьн һьндава qанунед Хwәде у әм чь гәрәке фәʹм кьн у qәбул кьн? Бь мәсәле шьровәкә.

⁴ Бьдә бәр чʹәʹве хwә, тö бахчәки бәдәwда дьгәрʹи у ньшкева чʹәʹве те дьчә сәр бахчәки дьн. Әw бахчә зәʹф бәдәw ә, у тö дьхwази һәрʹи wи бахчәйи. Ле дьвини wәки әw бь сурәкә бьльнд суркьри йә. Пешийе тә хаш найе, тә тʹьре әw сур наһелә тö аза би. Ле паше тö тʹәхмин дьки кö wе дәре шерәки хоф һәйә, кʹижан кö һеса дькарә тә бьхwә. Һьнге тö фәʹм дьки кö әw сур тә хwәй дькә. Дь жийина мәда шерәки һе хоф һәйә. Хәбәра Хwәде мә ширәт дькә: «Сәрwахт бьн, һʹьшйар бьминьн! Мирещьне нәйаре wә мина шер мьрʹә-мьрʹа wи йә, дьгәрʹә кʹа кʹе һʹуфи хwә кә» (1 Пәтрус 5:8).

⁵ Бәле, Шәйтʹан мина тәрәwьләки хоф ә. Ле Йаһоwа нахwазә wәки Шәйтʹан мә һʹуфи хwә кә. Ләма жи әwи qанун данә, кʹижан кö мина суре, мә жь тʹәлькед Шәйтʹан хwәй дькьн (Әфәси 6:11). Һәр щар, чахе әм дьфькьрьн сәр qанунед Хwәде, әм гәрәке фәʹм бькьн у qәбул кьн, кö Хwәде жь һʹьзкьрьне qанун данә мә. Öса әме бь шабун wан qануна бьдьнә хәбате у әw qанун wе мә бьпарезьн. Аqуб ньвиси: «Әwе кö чʹәʹве хwә жь qануна кʹамьлә кö аза дькә набьрʹә у нава wеда дьминә, . . . әw wан кьрьнед хwәда хwәзьли йә» (Аqуб 1:25).

6. Сәва кö баwәрийа мә һьндава qанунед Хwәде qәwи бә, әм чь гәрәке бькьн? Мәсәле бинә.

⁶ Сәва кö баwәрийа мә һьндава биланийа Хwәде у qанунед wи qәwи бә, әм гәрәке wан qануна бьqәдиньн. Мәсәлә, йәк жь wан qануна һәйә «qануна Мәсиһ». Бьqәдиньн «qануна Мәсиһ» әв те һʹәсабе, кö һʹәму тʹәмийед Иса мәрийа һин кьн (Галати 6:2; Мәтта 28:19, 20). Әм öса жи гәрәке бьqәдиньн тʹәмийа Хwәде, кö гәрәке тʹьме ль сәр щьвата тʹәвайи тʹоп бьн, wәки һәвдö бьшьдиньн (Ибрани 10:24, 25). Диса qанунәкә Хwәде әw ә, кö әм гәрәке wирʹа тʹьме бь дьл дöа бькьн (Мәтта 6:5-8; 1 Тʹесалоники 5:17). Чахе әм wан qануна дьqәдиньн, әм фәʹм дькьн кö Хwәде әw qанун жь һʹьзкьрьне данә мә. Чахе әм бь wан qануна дьжин, әм бәхтәwарийа öса дьстиньн, кö дь wе дьнйайеда тʹö щики нькарьн бьстиньн. Чахе әм дьфькьрьн ль сәр wе йәке кö qанунед Хwәде чьqас керһати нә, баwәрийа мә һьндава qанунед wи һе qәwи дьбә.

7, 8. Хәбәра Хwәде ча дьдә баwәркьрьне wан мәрьва, йед кö дьфькьрьн wәки qануне Хwәде чәтьн ьн, у дьтьрсьн кö wе нькарьбьн тʹәмамийа жийина хwәда бьqәдиньн?

⁷ Һьнә мәрьв дьфькьрьн wәки wанарʹа wе гәләк чәтьн бә qануне Хwәде тʹәмамийа жийина хwәда хwәй кьн. Әwана дьтьрсьн кö бал wана әw йәк wе нәйе стандьне. Һәрге әв тьрс щәм тә жи һәйә, лазьм ә бини бира хwә әван гьлийа: «Хöдан, Хwәдайе тә, йе кö тьште qәнщ фери тә кьрийә, дь рʹейа кö тöйе бьмәшә дә тә ажотийә әз ьм. Хwәзика тә әмьред мьн баш гöһдари бькьрана! Де wе гава сәламәта тә мина чʹәм у баwәрийа тә мина ләһийед бәһре бьбуна» (Ишайа 48:17, 18). Һәла бьфькьрә әв рʹез мә чьда дьдә баwәркьрьне?

⁸ Дь ван рʹезада Хwәде мә дьдә баwәркьрьне, кö һәрге әм qанунед wи бьqәдиньн, әме кʹәрәма бьстиньн. Йа әʹwльн, әʹдьлайа мә wе мина чʹәм дьреж у бесәкьнандьн бә. Йа дöда, рʹастийа мә wе мина пʹелед бәʹре бә. Чахе бәр дәве бәʹре дьсәкьни у дьньһерʹи ча пʹелед бәʹре йәк пәй йәке тен, тö фәʹм дьки кö әв йәк нә wәʹдәлу йә, пʹелед бәʹре wе тʹьме жи һәбьн. Йаһоwа мә дьдә баwәркьрьне, wәки рʹастийа мә, демәк qьраркьрьна мә кö һʹәму тьшти рʹаст бькьн, wе öса һәртʹьм бә. Һәрге әм тʹьме Йаһоwарʹа амьн бьминьн, әwе тʹö щар мә наһелә. (Бьхунә Зәбур 55:22.) Гәло әва соза баwәрийа тә һьндава Йаһоwа у qанунед wийә рʹаст, qәwи накә?

«ЛӘЗКʹӘВЬН БӘРБЬ ГЬҺИШТИБУНЕ»

9, 10. (а) Чьма баш ә кö Мәсиһи нете бьдә пешийа хwә, wәки бьбә гьһишти? (б) Фькьрандьна сәр тьштед рʹöһʹани ча шабуне тинә?

⁹ Дәрһәqа wе йәке кö диса чь щурʹәйи әм дькарьн рʹöһʹанида qәwи бьн, те кʹьфше жь ван гьлийа: «Бенә сәр һинбуна гьһишти» (Ибрани 6:1). Wе баш бә кö һәр Мәсиһи нете бьдә пешийа хwә кö бьбә гьһишти. Рʹаст ә әм иро нькарьн бьбьнә кʹамьл, ле әм дькарьн бьбьнә гьһишти. Чьqас һе зедә Мәсиһи дьбә гьһишти, һаqас һе зедә шабуне дьвинә дь хьзмәта хwәда.

¹⁰ Мәсиһийе гьһишти, әw һәйә мәрьве рʹöһʹани. Әw сәр һʹәму тьшти бь ньһерʹандьна Йаһоwа дьньһерʹә (Йуһʹәнна 4:23). Паwлос ньвисийә: «Йед кö ль гора бьнйатʹа мәрьвайе дьжин, әw сәр тьштед бьнйатʹа мәрьвайе дьфькьрьн, ле йед ль гора Рʹöһʹ дьжин әw сәр тьштед Рʹöһʹ дьфькьрьн» (Рʹомайи 8:5). Кʹи кö дьфькьрә сәр тьштед бьнйатʹа мәрьвайи, әw шабуне настинә, чьмки хwәһʹьз ә, дурдити нинә у һʹьш аqьле wи сәр һәбуке йә. Ле мәрьве кö дьфькьрә сәр тьштед рʹöһʹани, ша йә, чьмки әw хьзмәт дькә «Хwәдейе хwәзьли» Йаһоwарʹа (1 Тимотʹейо 1:11). Мәрьве рʹöһʹани щерʹьбандьнада жи шабуна хwә öнда накә, чьмки әw дьхwазә дьле Йаһоwа ша кә. Щерʹьбандьнада, wирʹа мәщал чедьбә кö әw дьле баве хwәйи әʹзмана ша кә у избат кә wәки Шәйтʹан дәрәwин ә. (Мәтʹәлок 27:11; бьхунә Аqуб 1:2, 3.)

11, 12. (а) Паwлос чь готийә дәрһәqа «тегьһиштьна» Мәсиһийа у чь те һʹәсабе әw хәбәра кö һатийә wәлгәрʹандьне ча «һинкьрьн»? (б) Бәдәнерʹа чь һинбун лазьм ә сәва кö әw бьбә гьһишти у гöһдар?

¹¹ Сәва кö рʹöһʹанида гьһишти бьн лазьм ә qәwате хәрщ кьн. Wәрә әм бьфькьрьн сәр рʹезәкә öса: «Хwарьна гьран жь бо йед гьһишти йә. Тегьһиштьна wан бь кʹаранине һатийә пʹәрwәрдәкьрьн [һинкьрьн], да кö qәнщи у хәрабийе жь һәв дәрхьн» (Ибрани 5:14, ИМ). Чахе Паwлос дәрһәqа «һинкьрьна» тегьһиштьне гот, әwи да хәбате хәбәра Йунани кʹижан кö qьрʹна 1 Д.М. дь Йунаньстанеда дьһа зәʹф нава спортсменада дьһатә хәбате. Әwе хәбәре дькарьн аһа жи wәлгәрʹиньн «һинбуна мина гимнаст». Wәрә ньһа әм бьньһерʹьн кʹа чь дькʹәвә нава wе һинбуне.

¹² Чахе әм һатьн буйине, бәдәна мә нәһинкьри бу. Мәсәлә, зарʹа тʹәзәбуйи нькарә дәст у ньге хwә рʹаст бьдә хәбате. Әw дәсте хwә дьбә-тинә у щара öса сәрчʹәʹве хwә дьхә, кö хwәха әʹщебмайи дьминә. Ле һеди-һеди зарʹ һин дьбә бәдәна хwә бьдә хәбате. Пешийе әw чәләпийа дьчә, паше рʹе дьчә у паше жи дьрʹәвә. Ле дәрһәqа гимнаст әм чь дькарьн бежьн? Чахе тö дьвини ча гимнаст һәwеда дьзвьрʹә, у һʹәму тьшти öса рʹаст, бь һостати дькә, тә тʹьре бәдәна wи мина механизмәке йә. Һостатийа öса хwәха пешда найе. Әw жь wе йәке йә, кö гәләк wәʹдә спортева мьжул дьбьн. Ле ча кö Кʹьтеба Пироз дьбежә, «һиндарийа qальб кери һьндьк тьшти те». Дьһа керһати йә, кö тегьһиштьна хwәйә рʹöһʹани һин кьн (1 Тимотʹейо 4:8).

13. Әм ча дькарьн тегьһиштьна хwә һин кьн?

¹³ Дь wе Кʹьтебеда мә гәләк тьшт шьровәкьр, кʹижан кö wе али тә бькьн wәки тегьһиштьна хwә һин ки, у бь wе йәке те бьби мәрьвәки рʹöһʹани у Хwәдерʹа амьн. Чахе тö жийина хwәйи һәр рʹожида тьштәки сафи дьки, дöа кә у бьфькьрә сәр принсип у qанунән Хwәде. Һәр гав пьрсе бьдә хwә: «Кʹижан qанун йан жи принсипед Кʹьтеба Пироз бона ве пьрсева гьредайи нә? Wан принсипа ча дькарьм бьдьмә хәбате? Кʹижан сафикьрьн wе Баве мьни әʹзмана бьдә шакьрьне?» (Бьхунә Мәтʹәлок 3:5, 6; Аqуб 1:5.) Һәрге бь wи щурʹәйи сафикьрьна бьки, тöйе тегьһиштьна хwә һин ки. Һинкьрьна öса wе али тә бькә, кö бь рʹасти жи рʹöһианида qәwи би у бьби мәрьвәки гьһишти.

14. Чь әм гәрәке зәʹф бьхwазьн, сәва кö рʹöһʹанида мәзьн бьн, у чь гәрәке бир нәкьн?

¹⁴ Мәрьве гьһиштирʹа жи лазьм ә һәртʹьм рʹöһʹанида һе мәзьн бә. Ле мәзьнбун гьредайи йә хwарьнева. Ләма жи Паwлос кʹьфш кьр: «Хwарьна гьран жь бо йед гьһишти йә». Сәва кö баwәрийе qәwи кьн, йа лапә фәрз әв ә кö тʹьме хwарьна рʹöһʹанийә гьран бьхwьн. Чахе тö тьштәки һин дьби у әве рʹаст бьди хәбате, ль сәр ве йәке дьбежьн занийари. Дь Кʹьтеба Пирозда те готьне кö занийари «гава пешин ә». Ләма жи лазьм ә әм әве рʹастийа qимәт, йе кö Баве мәйи әʹзмана дьдә мә, зәʹф бьхwазьн бьстиньн (Мәтʹәлок 4:5-7; 1 Пәтрус 2:2). Әм гәрәке бир нәкьн кö занәбуна мәзьн у биланийа жь Хwәде, гәрәке нәбә мәʹни кö хwәрʹази у qöрʹә бьн. Гәрәке әм тʹьме мьqати хwә бьн wәки qöрʹәбун йан жи сьстбунәкә дьн бал мә пешда нәйе. Паwлос ньвиси: «Һун дьле хwә бьщерʹьбиньн у дина хwә бьдьне, кʹа һун нава баwәрийеда нә? Хwә әʹнәнә кьн» (2 Корьнтʹи 13:5).

15. Чьма сәва кö рʹöһʹанида мәзьн бьн, лазьм ә һʹьзкьрьн?

¹⁵ Мәрьв дькарә сьһʹәт-qәwат бә һәрге бәрдәwам кә тʹьме пәй сьһʹәт-qәwата хwә бьньһерʹә. Ле чь лазьм ә сәва бьбьнә гьһишти у рʹöһʹанийа хwә хwәй кьн? Бәри әʹwльн лазьм ә һʹьзкьрьн. Мәрʹа лазьм ә бәрдәwам кьн зедә кьн һʹьзкьрьна хwә һьндава Йаһоwа у хушк-бьра. Һәрге һʹьзкьрьна мә тʹöнә бә, wәки öса нә һʹәму зандарийа мә у шьхöле мә бекер ьн, ча дәнгәки вала (1 Корьнтʹи 13:1-3). Бь сайа һʹьзкьрьне әме бьбьнә Мәсиһийед гьһишти у һе зедә рʹöһʹанида мәзьн бьн.

РʹЬНД ХWӘЙ КӘ WЕ БАWӘРИЙЕ КÖ ЙАҺОWА ДЬДӘ

16. Шәйтʹан чь щурʹәйи дьхwазә сәр фькьред мә һʹöкöм кә, ле Йаһоwа чь мәщал дайә мә, сәва кö хwә хwәй кьн?

¹⁶ Wәрә әм бьньһерʹьн ча әм дькарьн диса бь щурʹәки майин жи, рʹöһʹанида qәwи бьн. Сәва кö әм рʹаст у бь дьл пʹегәһа Исада һәрʹьн, лазьм ә мьqати фькьред хwә бьн. Шәйтʹан, мире ве дьнйайе, мәрьва һелан дькә, wәки нәрʹаст бьфькьрьн, сәва кö дәст хwә бәрʹдьн, бебаwәрийе бьн у амьнийа хwә кәсәки нәйньн (Әфәси 2:2). Фькьред öса бона Мәсиһийа һаqас зийандар ьн, чьqас кö даред рʹьзийайи бона авакьрьна мале. Ле баш ә кö Йаһоwа мәщаләкә qәwи дайә мә, wәки әм бькарьбьн хwә хwәй кьн. Әв һәйә баwәри.

17. Дь Кʹьтеба Пирозда ча те кʹьфше кö баwәри фәрз ә?

¹⁷ Дь Кʹьтеба Пирозда һатийә ньвисаре дәрһәqа щурʹә-щурʹә чʹәкед рʹöһʹани, кʹижан кö мәрʹа лазьм ьн сәва кö әм мьqабьли Шәйтʹан у ве дьнйайе һәрʹьн. Йәк жь wан чʹәкед фәрз, әв һәйә кʹöмзьрьһʹ йан жи баwәри кö хьлаз бьн (1 Тʹесалоники 5:8). Бәре әскәр заньбу, wәки шәрʹда бе кʹöмзьрьһʹ әw wе зийана гьран бьстинә. Әw кʹöмзьрьһʹ, кʹöмәки жь һʹәсьн бу у бьнива жи чʹәрм бу. Чахе дәрб сәре әскәр дькʹәт, бь сайа wи кʹöмзьрьһʹи әскәр зийана гьран нәдьстанд. Öса жи әм дькарьн бежьн дәрһәqа баwәрийе, әw хwәй дькә һʹьш у фькьре мә.

18, 19. Иса чь мәсәлә мәрʹа һишт у ча әм дькарьн чʹәʹв бьдьнә wи?

¹⁸ Иса мәсәла лапә баш һишт сәва wе йәке, кö әм ча баwәрийе хwәй кьн. Әм биньн бира хwә, кö әwи wәʹде жийина хwәйи ль сәр әʹрде, шәва хьлазийә чь чәтьнайи дәрбаз кьр. Һәваләки wийи незик әw пʹәрʹәти фьрот. Йәки дьн, әw инкʹар кьр, гот әз wи нас накьм. Йед майин жи Иса һиштьн у рʹәвин. Бьнәлийед wәлате wи жи мьqабьли wи дәркʹәтьн у дәʹwа кьрьн wәки әскәред Рʹомайи wи бьчәрчьриньн у бькöжьн. Иса жийина хwәда щерʹьбандьнед öса дит, кö әм баwәр накьн wәки кәсәк жь мә щерʹьбандьнед öса бьвинә. Ле чь али wи кьр, wәки әwи бәр һаqас тьшт тәйах кьр? Дь Ибрани 12:2-да те готьне: «Бона wе шабуна пешийа хwә хач һьлани, шәрм бәр тьштәки һʹәсаб нәкьр, паше кʹеләка Хwәдейә рʹасте сәр тʹәхт рʹуньшт». Иса тʹьме бира хwәда хwәй дькьр «шабуна пешийа хwә».

¹⁹ Кʹижан шабун пешийа Иса бу? Әwи заньбу кö һәрге әw һʹәта хьлазийе тәйах кә, wе наве Хwәде пироз кә у wе бьбә избаткьрьнәкә мәзьн кö Шәйтʹан дәрәwин ә. Тʹö баwәрийа дьн wе Иса һе зедә ша нәкьра. Әwи öса жи заньбу кö Хwәде wе бь мәрʹдани wи хәлат кә бона амьнийа wи у wәки wәʹдәки кьнда, wе диса бал Баве хwә бә. Әв шабун у баwәри тʹьме бира Исада бу илаһи чахе әw чәтьнайада бу. Wе йәкеда әм гәрәке чʹәʹв бьдьнә wи. Шабунәкә мәзьн ль ахьрийе һивийа мә йә. Йаһоwа qәдрәки мәзьн дайә мә у әм дькарьн наве wи пироз кьн. Әм öса жи дькарьн избат кьн, кö Шәйтʹан дәрәwин ә. Йа пешьн, әм гәрәке Йаһоwа qәбул кьн ча сәрwере хwә. Öса жи чахе әм wәʹде щерʹьбандьна у чәтьнайа хwә нава һʹьзкьрьна Баве хwәйи әʹзманада хwәй дькьн.

20. Чь wе али тә бькә wәки ньһерʹандьна тә рʹаст бә у wәки баwәрийа хwә хwәй ки?

²⁰ Йаһоwа нә кö тʹәне дькарә, ле öса жи дьхwазә хьзмәткʹаред хwәйә амьн хәлат кә. (Ишайа 30:18; бьхунә Малахи 3:10.) Әw ша дьбә чахе хwәстьнед wанә рʹаст тинә сери (Зәбур 37:4). Ләма жи әw тьштед кö һивийа тә нә, бьра тʹьме бәр чʹәʹве тә бьн. Тʹö щар нәһелә кö ньһерʹандьна дьнйа Шәйтʹанә хьраб у бенамус ль сәр тә һʹöкöм бә. Һәрге тö тʹәхмин дьки, wәки әw ньһерʹандьн дькʹәвә һʹьш у дьле тә, бь дьл Йаһоwарʹа дöа бькә wәки әw «әʹдьлайийа . . . кö жь һәр һʹьш-аqьли дәрбазтьр ә» бьдә тә. Һьнге әw әʹдьлайа кö Хwәде дьдә, wе һʹьш у дьле тә хwәй кә (Филипи 4:6, 7).

21, 22. (а) Әʹлаләтәкә мәзьн сәр чь баwәр ьн? (б) Wе баwәрийеда чь дьһа зәʹф тә хwәш те у тә чь qьрар кьрийә?

²¹ Һәла бьфькьрә, ль ахьрийе чьqас тьштед баш һивийа тә нә! Һәрге тö жь әʹлаләтәкә мәзьн и у тöйе «тәнгасийа мәзьнрʹа» дәрбаз би, бьфькьрә кö зутьрәке жийина тә wе чьqас баш бә (Әʹйанти 7:9, 14). Шәйтʹан у щьнед wи ида wе нькарьбьн сәр тә һʹöкöм бьн. Һьнге мәрьв wе һесабунәкә ча бьстиньн, әве йәке әм нькарьн һʹәта хьлазийе фәʹм кьн, чьмки дьнйа тʹьме бьн һʹöкöме Шәйтʹанда буйә. Әме шабунәкә чьqас мәзьн бьстиньн чахе бь сәрwертийа Иса у 144 000 һәвалсәрwеред wи, әʹрде бькьнә щьнәт. Öса жи чахе һʹәму нәхwәши бенә һьлдане у әм мәрьвед хwәйә мьри, сах бьвиньн әв йәк жи шабуна беһʹәсаб wе мәрʹа бинә. Ле чахе әм бьгьһижнә кʹамьлбуне, әв wе хәлатәкә мәзьн бә, чьмки әме «тʹәви азайи у рʹумәта зарʹед Хwәде бьн» (Рʹомайи 8:21).

²² Йаһоwа дьхwазә wәки тö азайикә öса бьстини кʹижан кö ньһа әм нькарьн бьдьнә бәр чʹәʹве хwә, кö әw wе чаwа бә. Әве азайе тö дькари бьстини тʹәне бь сайа гöһдарибуне. Гәло бона ве азайе һежа нинә qәwате хәрщ кьн, чаwа ньһа тö хәрщ дьки сәва кö һәр рʹож гöрʹа Йаһоwа бьки? Ләма жи бәрдәwам кә хwә ль сәр баwәрийа хwәйә һәрә пироз ава бькә, сәва кö һʹәта-һʹәтайе хwә нава һʹьзкьрьна Хwәдеда хwәй ки!