Пʹадшатийа Хwәдe Бьгәрʹьн, Нә кö Тьшта
«Һун ль Пʹадшатийа [Хwәдe] бьгәрʹьн у әв тьштeд һа жи we жь wәрʹа бeн дайин» (ЛУQА 12:31, ИМ).
1. Чь фьрqи һәйә ортʹа һʹәwщәти у хwәстьнe?
ДЬБЕЖЬН кö һʹәwщeд мәрьв һьнәк ьн, лe хwәстьнeд wан кʹöта набьн. Гәләк мәрьв нькарьн фәʹм кьн, фьрqийа ортʹа һʹәwщeд хwә у хwәстьнeд хwә. Лe бь рʹастийe чь фьрqи һәйә? «Һʹәwщәти», әw һәйә чь кö тәрʹа лазьм ә сәва бьжийи. Мәсәлә, хwарьн, кʹьнщ у мал, тьштeд лазьм ьн бона мәрьва. Лe «хwәстьн» әw ә, чь кö тö дьхwази щәм тә һәбә, лe әw тьшт нә әʹсәйи йә сәва жийина һәррʹожи.
2. Иро мәрьв чь тьшт дьхwазьн кö щәм wан һәбә?
2 Хwәстьнeд мәрьва гәләк жь һәв щöдә дьбьн, чьмки мәрьв щурʹә-щурʹә wәлатада дьжин. Мәсәлә, wәлатeд пeшдачуйида, гәләк мәрьв дьбәкә тʹәнe дьхwазьн eпʹeщә пʹәрe wан һәбә, сәва тʹeл, мотосиклeт, йан әʹрдәки бьчʹук бькʹьрʹьн. Лe wәлатeд дәwләтида, гәләк дьхwазьн кö кʹьнщeд wани бьһа һәбьн, тамe мәзьн, йан әʹрәбeд гәләк бьһа. Wан хwәстьнада хофа вәшарти һәйә, әw һәйә тʹәлька матeриалисмe. Чахe әм дькʹәвьнә вe тʹәлькe, әм дьхwазьн һe зeдә у зeдә тьшта qазанщ кьн, у мәрʹа фьрqи тʹöнә әw тьшт лазьм ьн йан на, йан жи дәстe мәда һәйә кö бькʹьрʹьн йан на.
НӘКʹӘВЬНӘ ТʹӘЛЬКА МАТЕРИАЛИСМЕ
3. Чь йә матeриалисм?
3 Чь йә матeриалисм? Матeриалисм әw ә, чахe мәрьв һe зeдә хәм дькә дәрһәqа тьштeд матeриали, нә кö дәрһәqа тьштeд рʹöһʹани. Нeта wи мәрьви әw ә, кö гәләк һәбунe тʹоп кә. Һәла һe мәрьвe кʹәсиб жи дькарә бькʹәвә тʹәлька матeриалисмe, у бона wи ида Пʹадшатийа Хwәдe дькарә щийe пeшьн нәгьрә (Ибрн. 13:5).
4. Шәйтʹан ча «чʹәʹвһавьжи» дьдә хәбатe?
4 Шәйтʹан систeма комeрсийа вe дьнйайe дьдә хәбатe, сәва әм баwәр кьн кö бона жийина бәхтәwар, хeнщи һʹәwщeд мә, тьштeд матeриали гәләк лазьм ьн. Әw рʹьнд занә кö ча «чʹәʹвһавьжи» бьдә хәбатe (1 Йуһʹн. 2:15-17; Дәстп. 3:6; Мәтʹлк. 27:20). Әw дьнйа гәләк щурʹә-щурʹә тьшта рeклам дькә, ча тьштeд рʹьнд, öса жи тьштeд пʹучʹ. У гәләк жь wан тьшта дьбәкә гәләк бәдәw ьн. Щәм wә öса qәwьмийә, кö wә тьштәк кʹьрʹи, нә сәва вe йәкe кö wәрʹа лазьм бу, лe чьмки wә рeкламeда йан дькʹанeда дит? Пашe wә фәʹм кьр, кö һун бeй ви тьшти жи дькарьбун йолә бьчуна. Әw тьштeд нәфәрз, жийина мә тʹәнe гьран дькьн. Әw тьшт дькарьн мә бькьнә тʹәлькe, у мә паш хьн жь тьштeд рʹöһʹани. Wәʹдe мә дькарә ида нәминә сәва Кʹьтeба Пироз лeколин кьн, һазьр бьн у бeнә сәр щьватe, у дәркʹәвьн хьзмәтийe. Бира хwәда хwәй кьн, гьлийeд Йуһʹәннайe шанди: «Дьнйайe жи дәрбаз бә, һавьжийа we жи».
5. Чь дькарә бьqәwьмә тʹәви wан, йeд кö пәй һәбунe дькʹәвьн?
5 Шәйтʹан дьхwазә кö әм хöламтийe Һәбукeрʹа бькьн, дәwса кö Хwәдeрʹа (Мәт. 6:24). Мәрьвeд кö qәwата хwә хәрщ дькьн сәва һәбукe тʹоп кьн, бь рʹастийe бәхтәwар ниньн. Жийина wан дәрбаз дьбә бь we йәкe, кö тʹәнe хwәстьнeд хwә биньн сeри. Лe һe хьраб әw ә, кö әwана рʹöһʹанида вала нә, у жийина wан бь кöл-дәрда тʹьжә йә (1 Тимтʹ. 6:9, 10; Әʹйан. 3:17). Әв мина вe йәкe йә, чаwа кö Иса мәтʹәлокeда дәрһәqа «тʹохьмрʹәш» гьли кьр. Иса гот кö чахe мьзгинийа дәрһәqа Пʹадшатийe «нава стьрийада» тe чандьнe, «хwәстьна тьштeд дьн дькʹәвьнә навe у хәбәрe дьхәньqиньн, әw бe бәр дьминьн» (Марq. 4:14, 18, 19).
6. Жь Барук әм чь дәрсe һин дьбьн?
6 Wәрeн әм шewьр кьн мәсәла Барук, йe кö аликʹарчийe Йeрәмйа пʹeхәмбәр бу. Чахe Оршәлим ида гәрәкe бьһата weранкьрьнe, Барук дәстпeкьр сәва хwә «тьштeд мәзьн» бьгәрʹә, кʹижан кö wәʹдәлу бун. Лe бь рʹастийe Барук гәрәкe тʹәнe һивийа созe Йаһоwа буйа, wәки Йаһоwа we әʹмьрe wи хьлаз кә (Йeрәм. 45:1-5) Бәлe, нeта Хwәдe әw нибу кö һәбука кәсәки хwәй кә wи шәһәрида, кʹижан кö гәрәкe бьһата кʹöтакьрьнe (Йeрәм. 20:5). Әм ньһа нeзики хьлазийа we дьнйайe дьбьн, ләма жи ньһа wәʹдe we йәкe нинә, кö әм һәбукe хwәрʹа тʹоп кьн. Әм гәрәкe һивийe нибьн кö һәбука мә, чьqас жи әw qимәт бә, we тʹәви мә хьлаз бә тәнгасийа мәзьнда (Мәтʹлк. 11:4; Мәт. 24:21, 22; Луqа 12:15).
7. Вe тʹeмайeда әмe дәрһәqа чь шewьр кьн, у чьрʹа?
7 Иса мәрʹа ширәт да, кö әм хәм бькьн тʹәнe дәрһәqа тьштeд öса, кö бь рʹастийe сәва жийина мә мәрʹа лазьм ьн. Öса әwи гот кö әм пʹьрʹ хәма нәкьн, у нәкʹәвьнә пәй һәбукe. Иса әw ширәт да чахe сәр чʹийe әʹлаләт һин дькьр (Мәт. 6:19-21). Wәрә әм бьхуньн у бьфькьрьн сәр рʹeзeд жь Мәтта 6:25-34. Әw йәк we али мә бькә кö әм избат бьн, wәки әм гәрәкe бәрe пeшьн «Пʹадшатийe бьгәрʹьн», нә кö тьшта (Луqа 12:31).
ЙАҺОWА ХӘМ ДЬКӘ ДӘРҺӘQА ҺʹӘWЩЕД МӘ
8, 9. а) Чьрʹа әм гәрәкe дәрһәqа һʹәwщeд хwә гәләк хәма нәкьн? б) Иса чь заньбу дәрһәqа мәрьва у һʹәwщeд wан?
8 Бьхунә Мәтта 6:25. Чахe Иса готә гöһдарванeд хwә кö «бона әʹмьрe хwә хәма нәкьн», әwи дьхwәст бьгота кö әwана бәрхwә нәкʹәвьн. Чьмки wана бона тьштeд нәлазьм хәмгин дьбун. Иса мәʹни гот кö чьрʹа әвe йәкe нәкьн. Әwи шьровәкьр кö хәмгини йан бәрхwәкʹәтьна зeдә, һәла һe бона тьштeд лазьм жи, дькарьн нeт-фькьрeд мә жь тьштeд рʹöһʹанийә фәрз дур хьн. Иса бь дьл у щан хәм дькьр сәва шагьртeд хwә. Ләма әwи wәʹдe һинкьрьна сәр чʹийe, чар щара зeдәтьр дәрһәqа вe хофийe wанрʹа гот (Мәт. 6:27, 28, 31, 34).
9 Чьрʹа Иса гот кö әм хәма нәкьн кö чь бьхwьн, йан вәхwьн, йан ль хwә кьн? Гәло әw тьшт бона жийина мә фәрз ьн? Бәлe, әw тьшт мәрʹа гәләк лазьм ьн. Һәргe дәстe мәда тʹöнә йә wан тьшта qазанщ кьн, гәло әмe бәрхwә нәкʹәвьн? Тʹәбийәти йә кö әмe бәрхwә кʹәвьн, у Иса жи әв йәк заньбу. Әwи öса жи заньбу дәрһәqа һʹәwщeд мәрьва йeд һәррʹожи. Хeнщи вe йәкe, әwи заньбу кö шагьртeд wи, йeд кö we бьжин «рʹожeд ахьрийeда», we рʹасти тәнгасийа бeн. Чьмки wи чахи we «зәманeд хьраб» бьн (2 Тимтʹ. 3:1). Гәләк жь wан рʹасти чәтьнайeд wи щурʹәйи бьһатана, мәсәлә, хәбат тʹöнә бә, баһe тьшта һe бьльнд бә, кeмасийа хwарьнe бә, у гәләк кʹәсиббунeда бьжин. Лe йәкә Иса фәʹм дькьр кö жийин жь хwарьнe һe фәрзтьр ә у бәдән жь кʹьнща.
10. Чахe Иса һин кьр кö ча дöа бькьн, әwи чь гот дәрһәqа we йәкe кö жийина wанда чь гәрәкe лапә фәрз бә?
10 Чахe Иса әʹлаләт һин дькьр, әwи әwана һин дькьрьн, кö бона һʹәwщeд хwәйи физики, Бавe хwәйи әʹзманарʹа дöа бькьн. Әwи гот кö әwана дькарьн öса дöа бькьн: «Нанe мәйи рʹожe рʹож бь рʹож бьдә мә» (Мәт. 6:11). Пашe, һьнә wәʹдә шунда, Иса әw ширәт диса щарәки wәкʹьланд (Луqа 11:3). Лe Иса бь wи ширәти нәдьхwәст бьгота, кö әм гәрәкe тʹәнe дәрһәqа һʹәwщeд хwәйи физики бьфькьрьн. Wи дöайида Иса да кʹьфшe, кö пeшийe әм гәрәкe дöа бькьн, wәки Пʹадшатийа Хwәдe бe (Мәт. 6:10; Луqа 11:2). Сәва кö гöһдарванeд хwә дьлгәрм кә, Иса wанарʹа әʹйан кьр кö ча Йаһоwа бона һʹәму әʹфьринeд хwә хәм дькә.
11, 12. Әм чь пeдьһʹәсьн жь we йәкe кö ча Йаһоwа хәм дькә бона тәйрәдeд әʹзмeн? (Бьньһeрʹә шьклe әʹwльн.)
11 Бьхунә Мәтта 6:26. Әм гәрәкe «дина хwә бьдьнә тәйрәдeд әʹзмeн». Чьqас бьчʹук ьн әwана, лe һьмбәри чапа бәдәна хwә әwана һe зeдә дьхwьн, нә кö мәрьв. Рʹаст ә тәйрәдә гәләк бьчʹук ьн, лe әwана гәләк eмиш, тʹохьм, мeша у кöрма дьхwьн. Лe сәва хwарьна wан һәбә, әwана тʹохьм нарʹәшиньн, нә жи хwәлийe бeщәр дькьн. Йаһоwа һʹәму тьшти дьдә wан (Зәб. 147:9). Бәлe, Йаһоwа хwәха хwарьнe накә нькьлe wан, лe хwарьн гәләк ә у әwана хwәха хwәрʹа хwарьнe дьвиньн.
12 Иса тʹö щар дöдьли нибу, кö һәргe Бавe wийи әʹзмана хәм дькә бона тәйрәда, we һe зeдә бона мәрьва хәм бькә[1] (1 Пәт. 5:6, 7). Йаһоwа хwәха хwарьнe надә мә, лe әw мә кʹәрәм дькә чахe әм qәwата хwә дьдьнә хәбатe, сәва хwарьнe хwәрʹа бькʹьрʹьн, йан бьчиньн. Щара, әw дькарә мәрьва һeлан кә, кö әwана али мә бькьн. Иса нә гот кö Йаһоwа щи-сьтʹарe дьдә тәйрәда. Лe әwи инстинкт, фәрәсәт, у тьштe öса да wан, кö әwана хwәха дькарьн хwәрʹа һeлунe чeкьн. Йаһоwа öса жи дькарә али мә бькә, кö щи-сьтʹара малбәта мә һәбә.
13. Чь избат дькә кö әм жь тәйрәдeд әʹзмана qимәттьр ьн?
13 Пашe Иса гöһдарванeд хwәрʹа гот: «Нә һун жь [тәйрәдeд әʹзмeн] qимәттьр ьн?» Бeшьк, Иса wи чахи заньбу кö әw we зутьрәкe әʹмьрe хwә бьдә бона инсанәтe. (Бәрамбәр кьн Луqа 12:6, 7.) Qöрбана Иса нә һатә дайинe бона тәйрәдә йан һʹәйwанeд дьн. Лe Иса мьр сәва мә, wәки әм бькарьбьн һʹәта-һʹәтайe бьжин (Мәт. 20:28).
14. Чьрʹа мәрьв гәрәкe гәләк хәма нәкә?
14 Бьхунә Мәтта 6:27. Гәло чьрʹа Иса гот кö мәрьв бь хәмeд хwә, нькарә дәqәкe сәр әʹмьрe хwәда зeдә кә? Чьмки һәргe әм гәләк хәмгин дьбьн дәрһәqа һʹәwщeд хwәйә һәррʹожи, бь вe йәкe әм әʹмьрe хwә дьрeж накьн. Хәмгинийа зeдә у стрeс нә кö әʹмьрe мә дьрeж дькә, лe кьн дькә.
15, 16. а) Әм чь һин дьбьн жь Йаһоwа, кö ча әw дәрһәqа сосьнeд чолe хәм дькә? (Бьньһeрʹә шьклe әʹwльн.) б) Кʹижан пьрса әм гәрәкe бьдьнә хwә, у чьрʹа?
15 Бьхунә Мәтта 6:28-30. Кʹe нахwазә кö кʹьнщe бәдәw хwә кә, илаһи чахe хьзмәт дькә, йан дьчә сәр щьватe йан щьвата мәзьн? Лe гәло әw гәрәкe бьбә мәʹни кö әм «бона кʹьнща» хәм бькьн? Иса диса жи дина мә дьдә сәр вe йәкe, кö ча Йаһоwа мьqати әʹфьринeд хwә дьбә. Иса әʹйан кьр кö әм чь дькарьн һин бьн жь «сосьнeд чолe». Дьqәwьмә Иса дьгот дәрһәqа кöлиркeд гәләк щурʹә-щурʹә, кʹижан кö чолeда шин дьбьн. Әw һʹәму кöлирк гәләк бәдәw ьн. Әw кöлирк хwәрʹа кʹьнща надьрун. Лe йәкә әwана гәләк бәдәw ьн! Иса гот кö «Сьлeман жи ль нава тʹәмамийа we хeр-хьзна хwәда мина жь wан йәкe хwә нәкьр»!
16 Бьфькьрьн дәрһәqа wан гьлийeд Иса: «Һәгәр гиһайe чолe, . . . Хwәдe öса дьхәмьлинә, лe чьqас зeдә we ль wә кә, кeмбаwәрно?» Шагьртeд Иса гәрәкe баwәрийа хwә һьндава Хwәдe qәwи кьрана (Мәт. 8:26; 14:31; 16:8; 17:20). Әwана гәрәкe баwәр буна, кö Йаһоwа we әʹсә хәм бькә бона wан. Лe әм чь дькарьн бeжьн дәрһәqа хwә? Әм баwәр дькьн кö Хwәдe we бона мә жи хәм бькә?
17. Чь дькарә һәләqәтийа мә тʹәви Йаһоwа хьраб кә?
17 Бьхунә Мәтта 6:31, 32. Әм гәрәкe чʹәʹв нәдьнә мәрьвeд «пʹутпʹарьст», чьмки әwана баwәр накьн кö Хwәдeйe һʹьзкьрьн, хәм дькә бона wан, йeд кö Пʹадшатийа wи әʹмьрe хwәда датиньн щийe пeшьн. Һәргe әм мина пʹутпʹарьста «пәй wан һʹәму тьшта дькʹәвьн», әмe һәләqәтийа хwә тʹәви Йаһоwа хьраб кьн. Дәwсe, әм гәрәкe баwәр бьн, кö һәргe әм qьрара Хwәдe тиньн сeри у Пʹадшатийа wи датиньн щийe пeшьн, әw we әʹсә дәрһәqа һʹәwщeд мә хәм бькә. Амьнийа мә һьндава Хwәдe, гәрәкe мә һeлан кә, кö әм бь «кʹьнщ у хöрәкe» у щи-сьтʹара хwә рʹази бьн (1 Тимтʹ. 6:6-8).
ЛЕ ӘʹМЬРЕ ТӘДА ПʹАДШАТИЙА ХWӘДЕ ЩИЙЕ ПЕШЬН ДЬГЬРӘ?
18. Йаһоwа дәрһәqа мә чь занә, у әw we чь бькә бона мә?
18 Бьхунә Мәтта 6:33. Әм гәрәкe тʹьмe Пʹадшатийа Хwәдe дайньн щийe пeшьн. Һәргe әм öса дькьн, Йаһоwа we дәрһәqа һʹәwщeд мә хәм бькә, чаwа кö Иса гот. Лe чьрʹа Иса дькарьбу öса бьгота? Әwи шьровәкьр рʹeза 32-да: «Бавe wәйи әʹзмана занә кö һун һʹәwщe wан һʹәму тьшта нә», дeмәк чь кö мәрʹа лазьм ә сәва бьжин. Пeшийа кö әм тeдәрхьн кö әм һʹәwщe чь нә, Йаһоwа ида пeшда занә дәрһәqа вe йәкe (Фили. 4:19). Мәсәлә, әw занә кö кʹижан кʹьнща мә we кәвьн бә у мәрʹа йа тʹәзә лазьм бә. Хeнщи вe йәкe әw занә, кö кʹижан хwарьн мәрʹа лазьм ә, у бона малбәта мә чь щи-сьтʹар лазьм ә. Баwәр бьн кö Йаһоwа we хәм бькә бона wан һʹәму тьшта, чьда һун бь рʹастийe һʹәwщә нә.
19. Чьрʹа әм гәрәкe дәрһәqа ахьрийe бәрхwә нәкʹәвьн?
19 Бьхунә Мәтта 6:34. Дина хwә бьдьн кö Иса шагьртeд хwәрʹа щара дöда гот: «Иди . . . хәма нәкьн». Бь wан гьлийа әwи дьхwәст бьгота, кö әм итʹбарийа хwә Йаһоwа биньн, wәки әw we дәрһәqа һʹәwщeд мәйи һәррʹожи хәм бькә. Лe һәргe әм гәләк бәрхwә дькʹәвьн сәва ахьрийe, әмe ида итʹбарийа хwә ль хwә биньн, нә кö Хwәдe. У әw дькарә бьбә мәʹни, кö һәләqәтийа мә тʹәви Йаһоwа хьраб бә (Мәтʹлк. 3:5, 6; Фили. 4:6, 7).
БӘРЕ ПЕШЬН ПʹАДШАТИЙЕ БЬГӘРʹЬН, У ЙАҺОWА WЕ БОНА WӘ ХӘМ БЬКӘ
Тö дькари жийина хwә сьвьк ки, сәва һe зeдә шьхöлe Пʹадшатийe бьки? (Бьньһeрʹә абзаса 20)
20. а) Хьзмәтийeда һун кʹижан нeта дькарьн бьдьнә пeшийа хwә? б) Әм чь дькарьн бькьн сәва жийина хwә һeса кьн?
20 Чьqас нәаqьлайи йә, кö сәва тьштeд матeриали, Пʹадшатийe бьдьнә алики. Дәwсe һe баш бә, кö әм нeтeд рʹöһʹани дайньн пeшийа хwә. Мәсәлә, һун дькарьн дәрбази we щьватe бьн, кʹидәрe һʹәwщәти һәйә? Йан һун дькарьн бьбьнә пeшәнг? Йан һәргe һун пeшәнг ьн, һун дьфькьрин wәки Мәкʹтәба сәва Мьзгинванeд Пʹадшатийe дәрбаз бьн? Һун дькарьн бь рʹәзәдьли хьзмәт кьн Бәйтʹәлeда, йан офисeд wәлгәрʹандьнада? Һун дькарьн мьһала хwәда проeктeд авакьрьнeда аликʹарийe бьдьн? Бьфькьрьн кö һун чь дькарьн бькьн сәва жийина хwә сьвьк кьн, wәки һe зeдә шьхöлeд Пʹадшатийe бькьн. Чахe һун бьхуньн чаргошә бь навe «Тö Ча Дькари Жийина Хwә Һeса ки?», дöа бькьн Йаһоwарʹа, у пашe дәстпeкьн wан гава бькьн, сәва бьгьһижьнә нeта хwә.
21. Чь we али wә бькә кö нeзики Йаһоwа бьн?
21 Иса әм һин кьрьн кö әм бәрe пeшьн Пʹадшатийe бьгәрʹьн, нә кö тьшта. Һәргe әм öса бькьн, әмe ида тʹö щар хәма нәкьн дәрһәqа һʹәwщeд хwәйә матeриали. Öса жи, әмe нeзики Йаһоwа бьн, чьмки әмe итʹбарийа хwә wи биньн. Хeнщи вe йәкe, әмe пәй хwәстьнeд хwә нәчьн, мәсәлә чь кö әw дьнйа мәрʹа дьдә, һʹәму тьшти нәкʹьрʹьн. Әмe пәй wан тьшта нәкʹәвьн wи чахи жи, һәргe дәстe мәда һәйә. Һәргe әм ида ньһа жийина хwә сьвьк дькьн, әw йәк we али мә бькә «жийина кö рʹасти жийин ә» qазанщ кьн (1 Тимтʹ. 6:19).
^ [1] (абзаса 12) Сәва әм фәʹм бькьн кö чьрʹа Йаһоwа щара дьһeлә кö щәм Мәсиһи кeмасийа хwарьнe һәбә, бьньһeрʹьн «Пьрсeд Хwәндәвана», жь «Бьрща Qәрәwьлийe» йа 15 Илонe, сала 2014, рʹупʹ. 22.