Әwана бь Рʹәзәдьли Хьзмәт Дькьн ль Ганайe

ТÖ НАС дьки хушк у бьрeд кʹижан кö дәрбази wи wәлати бунә, кʹидәрe кö һe зeдә хьзмәткʹар лазьм ьн? Дьбәк тәрʹа һʹәwас ә пeбьһʹәси: «Гәло чь wана һeлан кьр кö wәлатe дьнда хьзмәт кьн? Гәло чаwа wана хwә һазьр дькьр бона вe йәкe? Гәло әзe бькарьбьм хьзмәт кьм wи щурʹәйи?» Сәва кö щаба wан пьрса бьстини, һe баш ә хут жь wан бьпьрси, йeд кö дәрбази wәлатәки дьн бунә. Ньһа әмe һәма әвe йәкe бькьн.

ЧЬ WАНА ҺЕЛАН КЬР?

Чьрʹа тә дәстпeкьр бьфькьри бона we йәкe кö хьзмәт ки wәлатәки дьнда? Еми, ньһа wәкә 30 сали йә, у әw жь Амәрикайe йә. Әwe гот: «Гәләк сала мьн дьхwәст хьзмәт кьра wәлатәки дьнда, лe әз дьфькьрим кö we нәйe стандьн». Гәло чаwа бу кö әwe фькьрe хwә гöһаст? «Сала 2004-да щотәки зәwaщe, кö Бeлизeда хьзмәт дькьрьн, гази мьн кьрьн кö әз тʹәви wана мәһәкe хьзмәт кьм чаwа пeшәнг. Мьн һәма öса жи кьр, у гәләк мьн хwәш һат! Саләк шунда әз дәрбази Ганайe бум, wәки хьзмәт кьм чаwа пeшәнг».

Стeфани, ньһа wәкә 30 сали йә. Әw жи жь Амәрикайe йә. Чәнд сал пeшда әwe рʹьнд дина хwә да дәрәщe хwә у öса фькьри: «Сьһʹәт-qәwата мьн баш ә у әз бона тʹö кәси малбәтeда щабдар ниньм. Әз бь рʹастийe жи һe зeдә дькарьм бькьм». Әwe бь мьлукти дина хwә да дәрәщe хwә, у ләма һeлан бу кö дәрбази Ганайe бә, кö һe зeдә хьзмәт кә. Ида у Филип щотe зәwащe нә у хьзмәт дькьн чаwа пeшәнг Дәнмаркeда. Әwана тʹьмe дьхwәстьн дәрбази щийeд öса бьн, кʹидәрe кö аликʹари лазьм ә. Wана чь бeжи дькьр wәки бe стандьн кö дәрбаз бьн. Филип гот: «Чахe һʹәму тьшт ләв һат кö әм бькарьбьн дәрбаз бьн, тe бeжи хwәха Йаһоwа мәрʹа гот: ‹Пeшда һәрʹьн!›». Сала 2008-да, әwана дәрбази Ганайe бунә, у ль we дәрe сe сала зeдәтьр хьзмәт кьрьнә.

Һанс у Броук, жи щотe зәwьщи нә, әwана жь Амәрикайe нә у хьзмәт дькьн чаwа пeшәнг. Сала 2005-да wана аликʹари дьда wан кʹe жь Багәра Катринe зийанe кʹәтьн. Пашe жи әwана ньвисин кö дьхwазьн хьзмәт кьн сәр проeктeд авакьрьна һʹәмдьнйайe, лe гази wан нәкьрьн. Һанс дьбeжә: «Пашe мә сәр щьвата мәзьн бьһист готар дәрһәqа Даwьд, кö чахe әw пeһʹәсийа wәки әw we пʹарьстгәһe ава нәкә, әwи qәбул кьр әw әʹламәти у нeтәкә дьн дани пeшийа хwә. Әwe йәкe али мә кьр фәʹм кьн кö we йәкeда тьштәки хьраб тʹöнә кö нeтәкә дьн дайньн пeшийа хwә» (1 Дир. 17:1-4, 11, 12; 22:5-11). Броук жи зeдә кьр: «Дeмәк Йаһоwа дьхwәст кö әм дәрики дьн хьн».

Һәвалeд Һанс у Броук, йeд кö wәлатeд дьнда хьзмәт дькьрьн, тʹьмe тьштeд һʹәwас wанрʹа гьли дькьрьн. Öса Һанс у Броук һeлан бун кö дәрбази wәлатәки дьн бьн. Сала 2012 әwана чун Ганайeда у чар мәһа аликʹари дьдан щьвата кәрʹ-лала. Пашe әwана вәгәрʹийан Амәрикайeда. Лe хьзмәткьрьна Ганайeда али wан кьр кö бәрдәwам кьн һe зeдә пʹадшатийа Хwәдe дайньн щийe пeшьн. Паши we йәкe әwана аликʹари дьдан бона авакьрьна филиала Микронeсйайeда.

ГАВ БЬ ГАВ ГЬҺИШТЬН НЕТА ХWӘ

Тә чаwа хwә һазьр дькьр сәва дәрбази wи щийи би, кʹидәрe кö аликʹари лазьм ә? Стeфаниa гот: «Мьн дәрһәqа we йәкe һьнә готарeд жь Бьрща Qәрәwьлийe дьхwәнд. Мьн дәрһәqа хwәстьна хwә wәлатe хәрибда хьзмәт кьм, хәбәрда тʹәви рʹуспийа, тʹәви бәрпьрсийарe мьһалe у жьна wи. Хeнщи we йәкe, мьн дәрһәqа нeта хwә тʹьмe дöайeд хwәда Йаһоwарʹа дьгот». Һәмьки, Стeфани дәстпeкьр һьндьки пʹәра хәрщ кә, у әw йәк али we кьр һьнәк пʹәра тʹоп кә, кö бькарьбә wәлатәки дьнда хьзмәт кә.

Һанс дьбeжә: «Мә дöа дькьр Хwәдeрʹа, чьмки мә дьхwәст бьчуна wи щийи, кʹидәрe кö Йаһоwа рʹeбәри кьра. Мә öса жи дöада дьготә Йаһоwа, дәрһәqа wи wәхти, хут кʹәнгe мә дьхwәст дәстпeкьра әw хьзмәткьрьн». Әw тʹәви жьна хwә нәʹмә шандьн чар филиаларʹа. Пашe wана жь филиала Ганайe щаб сьтанд у сафи кьрьн тʹәнe сәр дö мәһа һәрʹьн. Һанс тинә бира хwә: «Хьзмәткьрьн тʹәви we щьватe öса мә хwәш һат, кö мә сафи кьр һe гәләк wәхт бьминьн».

Щорщ у Адрийа, щотe зәwьщи нә жь Канадайe. Wана тʹьмe бира хwәда хwәй дькьр кö Йаһоwа кʹәрәм дькә нә кö тʹәнe нeтeд баш, лe öса жи сафикьрьнeд баш. Ләма жи wана сафи кьр тьштәки бькьн, сәва бьгьһижнә нeта хwә. Әwана рʹасти хушкәки һатьнә, йа кö Ганайeда хьзмәт дькә, у пeрʹа хәбәрдан сәва кö щабeд һьнә пьрса пeбьһʹәсьн. Wана öса жи ньвисин филиала Канадайeрʹа у филиала Ганайeрʹа. Адрийа дьбeжә: «Әм дьшьрмиш дьбун, кö әм ча диса дькарьн әʹмьрe хwә сьвьк кьн у һe һьндьк пʹәра хәрщ кьн». Әw һʹәму тьшта али wан кьр у сала 2004-да әwана дәрбази Ганайe бун.

ЧӘТЬНАЙИ

Чахe һун ида дәрбаз бун, чь чәтьнайи рʹасти wә һатьн у wә ча тәйах кьр? Бона Еми, чәтьн әw бу кö әwe бира мала хwә дькьр. Әw дьбeжә: «Ль wьр һәр тьшт щурʹәки йә, нә öса йә чаwа кö әз һин бумә». Гәло чь али we кьр? «Нәфәрeд мала мьн, мьнрʹа пe тʹeлe хәбәр дьдан у дьготьн кö чьqаси qимәт дькьн хьзмәтийа мьн. Әwe йәкe али мьн кьр, кö бир нәкьм әз чьрʹа дәрбази вьра бумә. Пашe жи мьн тʹәви малбәта хwә пe видeойe хәбәрдьда. Мә һәвдö дьдит у әw йәк али мьн кьр, тe бeжи әз жь wана ида нә öса дур бум». Еми гьли кьр, кö ль вe дәрe хушкәкә һәвалһʹьз али we кьр һин бә у фәʹм бькә һьнә әʹрф-әʹдәтeд wан. «Әw хушк бьбу һәваләкә баш бона мьн. Һәгәр мьн фәʹм нәдькьр кö мәрьв чь дьбeжьн у чьрʹа öса дькьн, әз дьчумә бал we хушкe. Әwe хушкe али мьн кьр кö әз һин бьн чь бькьм у чь нәкьм, бь сайа we йәкe хьзмәта мьн бь шабунe дәрбаз дьбу».

Щорщ у Адрийа готьн кö чахe әwана дәрбази Ганайe бун, wана тʹьрe кö әwана дәрбази wәхтәки дьн бун. Адрийа дьбeжә: «Дәwса мәкʹина бона кʹьнщшуштьнe, мә тʹәшт дьда хәбатe. Бәрe малда мә зу хwарьн чeдькьр, лe ньһа мәрʹа дәһ щара зeдәтьр wәхт лазьм бу». Әwe зeдә кьр: «Лe һьнәк wәхт дәрбаз бу у әw ида проблeм нибу бона мә, әм һини wан тьшта һатьн». Броук дьбeжә: «Рʹаст ә әм рʹасти һьнә чәтьнайа тeн, лe әʹмьрe мә баш ә у әм бәхтәwар ьн. Әw һʹәму дәрәщeд әʹмьрe мәда, гәләк тьшта әм һин кьрьн. Әw мина кöлиркeд бәдәw ьн бира мәда, әм wана гәләк qимәт дькьн».

ХЬЗМӘТИ КÖ КӘРӘМА ТИНӘ

Чьрʹа тö һʹәсаб дьки кö әw хьзмәтийа гәләк баш ә, у һeжа йә кö әм жи öса хьзмәт кьн? Стeфани дьбeжә: «Мәрьвeд öса рʹасти мьн дьһатьн кö дьхwәстьн һәр рʹож Кʹьтeба Пироз һин бьн, чьмки wана гәләк дьхwәст пeбьһʹәсьн дәрһәqа рʹастийe. Хьзмәткьрьн ль щики öса шабунәкә гәләк мәзьн ә. Әʹмьрe мьнда сафикьрьнәки лапи баш әw бу, кö әз дәрбази wан щийа бум, кʹидәрe кö аликʹари лазьм бу». Сала 2014-да Стeфани Аарон сьтанд у ньһа әwана тʹавайи филиала Ганайeда хьзмәт дькьн.

«Әw гәләк тьштәки баш ә», дьбeжә Кристин, пeшәнгәк жь Алманйайe, йа кö wәкә 30 сали йә. Пeшийа кö дәрбази Ганайe буйа, Кристинe ль Боливйайe хьзмәт дькьр. Әwe öса жи гот: «Әз жь малбәта хwә дур бум, у мьн тʹьмe аликʹари жь Йаһоwа дьхwәст. Ләма Йаһоwа бона мьн бу кәсe һe рeали. Мьн öса жи һe рʹьнд тʹәхмин кьр йәктийа нава щьмәʹта Хwәдeда. Әw хьзмәткьрьн рʹасти жи әʹмьрe мьн һe дәwләмәнд кьр». Һьнәк wәхт пeшда Кристинe Гидәон станд у әwана тʹәвайи ль Ганайe хьзмәт дькьн.

Филип у Ида мәрʹа гьли дькьн кö wана чь кьр, сәва кö шагьртeд wан пeшда һәрʹьн: «Бәрe щәм мә тʹьмe wәкә 15 йан һe зeдә һинкьрьнeд Кʹьтeба Пироз һәбун, лe мә кeм кьр кö тʹәнe 10 һинбун һәбә, сәва кö әм бькарьбьн һәр кәси рʹьнд һин кьн». Гәло әw йәк кʹар ани? Филип дьбeжә: «Мьн һинбуна Кʹьтeба Пироз тʹәви гәдe щаһьл дәрбаз дькьр, навe wи Микаeл бу. Әw һәр рʹож һин дьбу у öса баш һазьр дьбу, кö мә нава мәһәкeда хьлаз кьр кʹьтeба ‹Чь Һин Дькә Кʹьтeба Пироз?›. Пашe әw бу мьзгинванe нәньхöманди. Чахe рʹожа пeшьн әм дәркʹәтьн хьзмәтийe, әwи мьнрʹа гот: ‹Тö дькари тʹәви мьн бeйи сәр һинкьрьнeд мьн?› Әз әʹщeбмайи мам. Пашe Микаeл мьнрʹа шьровәкьр кö 3 һинкьрьнeд wи һәнә у wирʹа лазьм ә аликʹари кö чаwа дәрбаз кә». Бьдьнә һʹәсабe хwә кö дәрсдарeд Кʹьтeба пироз һаqас лазьм ьн, кö хwәндәванe Кʹьтeба Пироз һьм хwәха шагьрт ьн, һьм жи дәрсдар.

Еми гьли дькә кö чаwа әwe хwәха дит кö аликʹари гәләк лазьм ә: «Паши we йәкe кö әм дәрбази Ганайe бунә, һьнәк wәхт шунда мә хьзмәт дькьр гöндәки бьчʹукда у дьгәрʹийан һәла ль wьр кәрʹ-лал һәнә йан на. Тʹәнe wи гöндәкида мә нәһ мәрьвeд кәрʹ-лал дит!» Пашe Еми у Ерик һәв стандьн у тʹәвайи чаwа пeшәнгeд мәхсус хьзмәт дькьрьн. Әwана щьвата кәрʹ-лалада бун у аликʹари дьдан 300 мьзгинванeд кәрʹ-лала, у öса жи мәрьвeд кö Кʹьтeба Пироз һин дьбун. Хьзмәткьрьна Ганайeда мәщаләкә баш да wан кö әwана тәʹм кьн чь йә хьзмәткьрьна чаwа мисйонeр. Әwана гәләк ша бун чахe һатьн тʹәглифкьрьнe сәр мәкʹтәба Гиләд! Ньһа әwана хьзмәт дькьн чаwа мисйонeр Мозамбикда.

ҺʹЬЗКЬРЬН WАНА ҺЕЛАН ДЬКӘ

Мә дит чьqас хушк у бьра жь щурʹә-щурʹә wәлата qәwи дьхәбьтьн, кö нандрунeда али хушк бьрeд дьн бькьн, у әw йәк бeшьк дьлe мә гәрм кьр (Йуһʹн 4:35). Ньһа һәр һʹәфти Ганайeда wәкә 120 мәри тeнә ньхöмандьнe. Wәкә 17 мьзгинванeд жь wәлатeд дьн дәрбази Ганайe бунә. Һʹьзкьрьна һьндава Йаһоwа һeлан кьр wана у диса бь һʹәзара хушк у бьрeд дьн, кö «бь рʹәзәдьли хьзмәт кьн» ль we дәрe, кʹидәрe аликʹари лазьм ә. Бь рʹастийe жи, әw хьзмәткʹарeд рʹәзәдьл, пʹьрʹ дьлe Йаһоwа ша дькьн! (Зәб. 110:3; Мәтʹлк. 27:11).