Чьрʹа Хwәде иро щьмәʹт хwәрʹа жьбартийә?

1. Чьрʹа Хwәде исраелийед бәре жьбарт, кӧ бьбьнә щьмәʹта wи?

Хwәде зӧрʹәтед Бьраһим пʹехәмбәр бәрәкʹәт кьр. Әwана жь һәв зедә бун, бунә щьмәʹтәкә мәзьн, у Хwәде qанунед хwә да wан. Хwәде әв щьмәʹт нав кьр «Исраел» у хwәрʹа жьбарт, wәки әwана qӧльхкьрьна рʹаст у хәбәра wи хwәй кьн (Зәбур 147:19, 20). Ләма жи мәрийед жь һʹәму мьләта бь сайа щьмәʹта Исраел гәрәке бьһатана кʹәрәмкьрьне. Бьхунә Дәстпебун 22:18.

Хwәде щьмәʹта Исраел жьбарт, wәки әwана бьбьнә шәʹдед wи. Тʹәрихийа щьмәʹта Исраел нишан дькә, кӧ чахе щьмәʹте гӧрʹа qанунед Хwәде дькьр, әwана гәләк бәхтәwар бун (Qануна Дӧщари 4:6). Һәма ӧса, бь сайа щьмәʹта Исраел, мьләтед дьн жи гәрәке һин буна дәрһәqа Хwәдайе рʹаст. Бьхунә Ишайа 43:10, 12.

2. Хwәде чьрʹа дьхwазә, wәки qӧльхкʹаред wийи иройин тʹәвайи бьн?

Пәй гәләк wәʹдәрʹа щьмәʹта Исраел qәбулкьрьна Хwәде ӧнда кьр, у Йаһоwа Хwәде дәwса wан, щьвата Мәсиһийа жьбарт (Мәтта 21:43; 23:37, 38). Ньһа дәwса щьмәʹта Исраел, мәсиһийед рʹаст шәʹдәтийе дьдьн дәрһәqа Йаһоwа Хwәде, у qӧльх дькьн ча шәʹдед Йаһоwа. Бьхунә Кʹаред Шандийа 15:14, 17.

Иса Мәсиһ шагьрт тʹӧп кьрьн, wәки әwана даннасин бькьн һʹәму мьләтарʹа у wана бькьнә шагьрт (Мәтта 10:7, 11; 24:14; 28:19, 20). Әв шьхӧл тʹӧ щар ӧса нәһатийә кьрьне ча рʹожед иройин, демәк дь рʹожед хьлазийа дьнйа хьрабда. Рʹожед иройин Йаһоwа Хwәде бь милйона мәри жь щурʹә-щурʹә мьләта тʹоп кьрийә, дь нава тʹәрихийеда әв щара пешьн ә кӧ һаqас мәри тʹоп бунә, сәва кӧ wирʹа рʹаст qӧльх кьн (Әʹйанти 7:9, 10). Мәсиһийед рʹаст һатьн тʹопкьрьне, wәки һәвдӧ дьлгәрм кьн у али һәв бькьн. Ӧса жи, wәки дь тʹәмамийа дьнйайеда ль сәр һʹәму щьвата, бь бәрнәмәке Кʹьтеба Пироз һин бьн. Бьхунә Ибрани 10:24, 25.

3. Ча рʹожед иройин тʹәшкиләта, демәк организасиона Шәʹдед Йаһоwа пешда һат?

Дь сала 1870-да кʹомәкә бьчʹук, йед кӧ Кʹьтеба Пироз леколин дькьрьн, дәстпекьрьн әʹйан кьн һьнә һинкьрьнед жь Кʹьтеба Пироз, йед кӧ вәшарти бун. Wана заньбу кӧ Иса Мәсиһ ләма саз кьр щьвата мәсиһийа, wәки әwана даннасин бькьн. Ләма жи wана саз кьрьн даннасинкьрьна дәрһәqа пʹадшатийе ль нав тʹәмамийа дьнйайе. Дь сала 1931-да wана наве ӧса данә сәр хwә «Шәʹдед Йаһоwа». Бьхунә Кʹаред Шандийа 1:8; 2:1, 4; 5:42.

4. Ча шьхӧле даннасинкьрьна Шәʹдед Йаһоwа те рʹебәрикьрьне?

Дь qӧрʹна йәкеда, һәбу кʹома меред маqул у щерʹьбанди, йед кӧ ль сәр щьватед дь щурʹә-щурʹә wәлатада бәрпьрсийари дькьрьн. Әван мера qәбул дькьрьн, кӧ Иса Мәсиһ йә сәркʹаре щьвате (Кʹаред Шандийа 16:4, 5). Рʹожа иройин жи, Шәʹдед Йаһоwа тенә рʹебәрикьрьне бь сайа кʹома бьред маqул у щерʹьбанди, әва кʹома бьра тенә навкьрьне ча Кʹома рʹебәрийе. Әwана ль сәр һʹәму филиалед Шәʹдед Йаһоwа бәрпьрсийарийе дькьн. Филиал жи бәрпьрсийар ә кӧ әʹдәбйәтед сәва һинбуна Кʹьтеба пироз, ль сәр 600 зьмана бе wәлгәрʹандьне, нәшьркьрьне у бәлакьрьне. Кʹома рʹебәрикьрьне ӧса жи рʹебәрийе дьдә у дьлгәрм дькә хушк-бред жь 100 000 щьвата зедәтьр ль сәр тʹәмамийа дьнйайе. Дь һʹәму щьватада меред лайиq qӧльх дькьн ча рʹуспи, демәк бәрпьрсийар. Әв мер бь дьл у щан хәм дькьн дәрһәqа qӧльхкʹаред Хwәдейә рʹаст. Бьхунә 1 Пәтрус 5:2, 3.

Шәʹдед Йаһоwа һатьнә сазкьрьне, сәва кӧ бәла кьн мьзгинийа хере, у мәрийа бькьнә шагьрт. Мина шандийед дь qӧрʹна йәкеда, әм жи мал бь мал шәʹдәтийе дьдьн (Кʹаред Шандийа 20:20). Әм ӧса жи тʹәглиф дькьн мәрийед һʹәлал, йед кӧ рʹастийе һәʹз дькьн, тʹәви мә Кʹьтеба Пироз һин бьн. Ле Шәʹдед Йаһоwа нә кӧ тʹәне тʹәшкиләт ә. Әм чаwа зарʹед бавәки нә, йе кӧ мә гәлә һʹәз дькә. Әм чаwа хушк у бьра дәрһәqа һәв хәм дькьн (2 Тʹесалоники 1:3). Рʹаст ә Шәʹдед Йаһоwа һатьнә сазкьрьне, wәки qьрара Хwәде бьqәдиньн у аликʹарийе бьдьнә мәрийа, ле wана сәрда жи саз кьрийә малбәтәкә жь һʹәмушка бәхтәwар ль нав тʹәмамийа дьнйайе. Бьхунә Зәбур 33:12; Кʹаред Шандийа 20:35.