Чар Сийар бь Рʹасти Кʹи нә?

Дькарә öса бе кʹьфше кö әв чар сийар реали ниньн у бь хоф ьн, ле бь рʹасти гәрәке öса һʹәсаб нәкьн. Чьма? Чьмки Кʹьтеба Пироз у qәwьмандьнед тʹәрихийа модерн, али мә дькьн тедәрхьн wәки һәр сийарәк чь те һʹәсабе. У рʹаст ә дәркʹәтьна wан сийара кöл-дәрд дьанин сәр әʹрде, ле әв öса жи дькарә мьзгинийа баш бе һʹәсабе сәва тә у малбәта тә. Гәло чаwа? Wәрен пешийе әм шеwьр кьн, кö һәр йәк жь wан сийара чь те һʹәсабе.

СИЙАРЕ ҺӘСПЕ БОЗ

Әw хәйал öса дәстпедьбә: «Мьн дина хwә дайе, ва һәспәки боз хöйа бу, дәсте йе лесийарбуйида тиркәванәк һәбу, кʹофик wирʹа һатә дайине у әw чаwа әʹгит чу, wәки сәркʹәвә» (Әʹйанти 6:2).

Кʹи йә сийаре һәспе боз? Щаба wе йәке әм дьвиньн һәма ве кʹьтеба Әʹйантида, йе кö wи сийаре әʹзмани әʹйан дькә ча «Хәбәра Хwәде» (Әʹйанти 19:11-13). Әв сәрнав демәк Хәбәр, сәр Иса Мәсиһ те готьне, чьмки әw wәк хәбәрване Хwәде бу (Йуһʹәнна 1:1, 14). Әw öса жи әʹйан дьбә ча йәки «Амьн у Рʹаст» у те навкьрьне «Пʹадше Пʹадша у Хöдане Хöдана» (Әʹйанти 19:16). Зәлал ә кö һʹöкöмдарийа wи һәйә, сәва кö wәк пʹадша шәрʹа бькә. У әw һöкöмдарийа хwә рʹаст дьдә хәбате. Ле йәкә һьнә пьрс пешда тен.

Кʹи һʹöкöмдари дайә дәсте Иса кö сәркʹәвә? (Әʹйанти 6:2). Данийел пʹехәмбәр хәwн-хәйаләк дитьбу, кʹидәре кö Мәсиһ бәрамбәри «лаwе мьров» дьбу у кʹижанирʹа кö «сәрwәри . . . мәзьнаһи» у пʹадшати һатьбу дайине. У әw һʹәму тьшт Йаһоwа Хwәде дайә Иса, чьмки Йаһоwа һәйә Хwәдейе «рожен . . . кәвн»a (Данийел 7:13, 14). Демәк Хwәдайе Һьмзор qәwат дайе Иса, һьм жи изьн кö сәрwертийе бькә у диwане бькә. Һәспе боз симболәкә лайиq ә сәва Кöрʹе Хwәде, йе кö wе бь һәqи шәрʹ бькә. У Ньвисаред Пирозда жи гәләк щар рʹәнге сьпи бь симболик те һʹәсабе һәqи йан рʹасти (Әʹйанти 3:4; 7:9, 13, 14).

Гәло әw сийар чь чах дәркʹәт? Дина хwә бьдьне кö сийаре пешьн демәк Иса, һьнге дәркʹәт чахе кʹофи йане тʹащ станд (Әʹйанти 6:2). Ле чь чах Иса ль әʹзмана ча Пʹадша һатьбу кʹьфшкьрьне? Әw йәк wи чахи нибу гава әw паши мьрьна хwә вәгәрʹийа ль әʹзман. Ле Кʹьтеба Пироз нишан дькә, кö һьнге әwе һе һьвийе бу (Ибрани 10:12, 13). Иса шагьртед хwәрʹа нишан һиштьн, бь сайа чь жи wана дькарьбу тедәрхьстана кö чь чах әwи ль әʹзмана дәстпекьр пʹадшатийе бькә. Әwи гот кö дәстпека сәрwертийа wи, һʹале дьнйайе ве даһа хьраб бә. Демәк wе шәрʹ, хәлайи-щәлайе у мина нәхwәшийа һʹал wе һәбьн (Мәтта 24:3, 7; Луqа 21:10, 11). Зутьрәке дь сала 1914-да паши Шәрʹе Һʹьмдьнйайейә I, зәлал бу кö инсанәт кʹәтийә зәманәки пʹьрʹ хьраб, сәр кʹижани Кʹьтеба Пироз дьбежә «рʹожед ахьрийе» (2 Тимотʹейо 3:1-5).

Ле чьма жь сала 1914 чахе Иса тʹаще хwә станд, һʹале дьнйайе баш набә ле сәрда һе хьраб дьбә? Чьмки wи чахи Иса ль әʹзмана дәстпекьр сәрwертийе бькә, нә кö ль сәр әʹрде. Ль әʹзмана шәрʹ дәстпебу, у Пʹадше тʹәзә кʹьфшкьри демәк Иса, йе кö öса жи әʹйан ә ча Мьхайил, Шәйтʹан у щьнед wи жь әʹзмен авитә сәр рʹуйе әʹрде (Әʹйанти 12:7-9, 12). Наһа Шәйтʹан сәр әʹрде йә у әw жь һерсе хwә дьхwә, чьмки занә кö рʹожед wи һьндьк манә. Бь рʹасти әв wәʹдә wе дьреж нәкʹшинә. Хwәде wе qьрара хwә ль сәр әʹрде бинә сери у Шәйтʹан бьдә һьлдане (Мәтта 6:10). Ле наһа wәрен әм бьньһерʹьн кö чаwа се сийаред дьн али мә дькьн избат бькьн, кö әм бь рʹасти жи «рʹожен ахрийеда» дьжин, йан на. Сийаре пешьн бь шькле мәрьвәки әʹйан дьбә. Ле се сийаред дьн жи әʹйан дькьн һʹале тʹәмамйа дьнйайе йе кö wе жийина инсанәте пʹьрʹ хьраб кә.

СИЙАРЕ ҺӘСПЕ СОР

«Һьнге һәспәки дьне сор дәркʹәт у жь сийаре wирʹа дәстур һат дайин, кö аштийе [әʹдьлайе] жь дьнйайе рʹакә у мьрова бь һәвду бьдә шәржекьрьн. У шурәке мәзьн жь wирʹа һат дайин» (Әʹйанти 6:4, ИМ).

Әw сийар те һәсабе шәрʹ. Дина хwә бьдьне, кö әw әʹдьлайе дьдә һьлдане нә кö тʹәне нава чәнд мьләта, ле нава тʹәмамйа дьнйайе. Дь сала 1914-да, щарʹа пешийе дь тʹәрихийеда шәрʹе һʹәмдьнйайе бу. Паши wе йәке шәрʹе һʹәмдьнйайейә дöда qәwьми, йе кö зийанәкә даһа мәзьн ани. Ль гора һʹәсабед һьнә щийа, жь бо шәрʹа у шәрʹ-дәwед дьн, жь сала 1914 wәке 100 милиона мәрьва зедәтьр мьрьнә! Гәләк кәсед дьн жи чәрчьринә жь бо зийанед дьн кö стандьнә.

Гәло рʹожа иройин шәрʹ чьqаси бәла буйә? Наһа әм wәʹдәки öсада дьжин, кö qәwата мәрийа дьгьһиже жийина тәмамийа инсанәте кʹöта кә. Ле һәла һе тʹәшкиләтед öса ча Мьләтед Йәкбуйи, нькарә дәркʹәтьн у һатьна сийаре һәспе сор, бьдә сәкьнандьн.

СИЙАРЕ ҺӘСПЕ РʹӘШ

«Мьн дина хwә дайе, ва һәспәки рʹәш у дәсте сийаре wида мезинәк һәбу. Һьнге те бежи мьн дәнгәк бьһист, жь нава һәр чар рʹöһʹбәра дьһат кö дьгот: ‹Чапәкә гәньмә бьчʹук пе зивәки у се чапед бьчʹук щәһ пе зивәки. Ле зьраре нәдә зәйтʹе у шәраве›» (Әʹйанти 6:5, 6).

Әв сийар хәлайи-щәлайе дьдә кʹьфше. Жь рʹезед кʹьфшкьри те кʹьфше кö кемасийа хwарьне wе һәбә. Мәсәлә чапәкә гәньмә бьчʹук (0.7 кило) wе зивәк бә, йе кö һәqе тʹәмамйа рʹоже бу дь qьрна йәкеда! (Мәтта 20:2). Һәма пе ви зивәки дькарьбун се чапед бьчʹукә щәһ бькʹьрйана (2.1 кило). Гәньм һьмбәри щәһ, даһа баһа бу. Бь рʹасти жи чьqас чәтьн бу малбәтәкә мәзьн тʹер кьн. Ләма жи wан чаха мәрьв нькарьбун гәләк хwарьн хwәрʹа бькʹьрйана, һәла һе жи тьштед һәр рʹожи йед öса ча бьзьре зәйтʹуне у шәрав, чь кö ль гора култура wан гәрәки щәм wана һәбуйа.

Жь сала 1914 әм дьвиньн кö әw сийаре һәспе рʹәш ида дәркʹәтийә у кʹар дькә? Бәле! Нава qьрна 20-да wәкә 70 милион мәрьв жь бо хәлайи-щәлайе мьрьн. Һʹәсабәкида һатьбу готьне: «Дь сала 2012-2014-да, нав тʹәмамйа дьнйайе 805 милион мәрьв, демәк жь һәр нәһә мәрьва йәк, тʹер нәдьхwарьн». Һʹәсабаки дьн жи дьбежә: «Жь бо хәлайи-щәлайе һәр сал даһа зедә мәрьв дьмьрьн, нә кö жь бо ӘИДЗЕ (нәхwәшийа спид), тʹайе, у нәхwәшийа зьрав». Рʹаст ә мәрьв гәләк qәwате дьдьнә хәбате сәва кö йед бьрчийа тʹер кьн, ле йәкә сийаре һәспе рʹәш, рʹийа хwә бәрдәwам дькә у насәкьнә.

СИЙАРЕ ҺӘСПЕ ШИНОQИ

«Мьн дина хwә дайе, ва һәспәки шиноqи, кö наве сийаре wи Мьрьн бу, Дийаре Мьрийа пәй wи дьһат. Һʹöкöм wирʹа һатә дайине сәр пʹарәкә жь чар пʹаред дьнйайе, wәки пе шур, хәлайийе, нәхwәшийа һʹал у рʹәʹwьред дьнйайе wан бькöжә» (Әʹйанти 6:8).

Сийаре чара дьдә кʹьфше мьрьне жь бо сәбәба нәхwәшийед һʹал у тьштед дьн. Паши сала 1914 нәхwәшийа Испани бь 10 милиона мәрьв кöшт. Wәкә 500 милион мәрьв бь ве нәхwәшийе нәхwәш кʹәтьн, демәк жь һәр се мәрьва йәк!

Ле нәхwәшийа Испани әw тʹәне дәспек бу. Мәрьвед зандар дьбежьн кö wәкә 300 милион мәрьва зедәтьр дь qьрна 20-да мьрьн жь бо нәхwәшийа хöри. Һʹәта рʹожа иройин бь милиона мәрьв мьрьн ә жь бо нәхwәшийа ӘИДЗЕ, тʹайе, у нәхwәшийа зьрав. У тʹö медисина нькарә чʹарә ве йәке бькә.

Жь бо шәрʹа, хәлайи-щәлайе у нәхwәшийа, гәләк мәрьв мьрьн. Дийаре мьрийа демәк мәзәл гәләк мәрьва һуфи хwә дькә, ле әв мәзәл тʹö ахьрийе надә мәрийа.

АХЬРИКӘ БАШ ҺИВИЙА МӘ ЙӘ!

Әв wәʹде кöл-дәрда у чәтьнайа wе зутьрәке хьлаз бә. Һәла бькнә бира хwә: Иса дь сала 1914-да «ча әʹгит чу», у Шәйтʹан авитә сәр рʹуйе әʹрде. Ле wи чахи Иса һәла һе бь тʹәмами нета хwә нәани сери (Әʹйанти 6:2; 12:9, 12). Зутьрәке wәʹде Һармагедоне, Иса wе öса бькә кö Шәйтʹан нькарьбә ль сәр әʹрде һöкöм кә. У öса жи Иса wе кʹöта кә wан һʹәму мәрьва йед кö пьштгьрийа Мире-щьна дькьн (Әʹйанти 20:1-3). Иса wе нә кö тʹәне wан се сийара бьдә сәкьнандьне, ле öса жи wе бьгöһезә нета wанә кʹöтакьрьне. Ле ча? Кʹа әм бьньһерʹьн Кʹьтеба Пироз чь соз дьдә.

Дәwса шәрʹа, wе әʹдьлайи бә. Йаһоwа «шәрʹа дьдә сәкьнандьне, һәр чар qöлбед дьнйайе, тир-кәвана дьшкенә, рʹьма һур-һури дькә у мәртʹала бь егьр дьшәwьтинә» (Зәбур 46:9). Ле мәрьвед әʹдьлайиһʹьз «жь зедәһийа аштийе [әʹдьлайе] бьбиньн ләзәт» (Зәбур 37:11, ИМ).

Дәwса хәлайи-щәлайе wе зедәйа хwарьне бә. «Ль әʹрде, ль сәре чʹийан, бь зедәбари гәним һәбә!» (Зәбур 72:16, ИМ).

Дәwса нәхwәшийед мина һал, һʹәму мәрьв wе сьһʹәт-qәwат бьн у һʹәта-һʹәтайе бьжин. Хwәде wе «жь чʹәʹвед wан һʹәму һесьред wан паqьж кә у иди мьрьне тʹöнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4).

Чахе Иса сәр әʹрдә бу, әwи нишан кьр кö ль ахьрийе бьн сәрwертийа wида жийина мә wе чаwа бә. Әwи әʹдьлайе пешда дьбьр, бь кʹәрәмәти һәзарʹа мәрьв тʹер дькьрьн, нәхwәши qәнщ дькьрьн, у һәла һе мьри жи сах дькьрьн (Мәтта 12:15; 14:19-21; 26:52; Йуһʹәнна 11:43, 44).

Шәʹдед Йаһоwа wе һазьр бьн, бь Кʹьтеба Пироз wәрʹа нишан кьн кö чаwа һун дькарьн хwә һазьр кьн, чахе сәкьнандьна wан сийарʹа незик бә. Һун дьхwазьн һе зедә пебьһʹәсьн?