Кани бона «Бәрнама Щьвине, Бьжин у Хьзмәт кьн»
13-19 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘСТПЕБУН 31
«Аԛуб у Лабан Пәймана Әʹдьлайе Гьредан»
(Дәстпебун 31:44-46) Ньһа ԝәрә әз у тӧ пәймане гьредьн у бьра нава мьн у тәда бьбә шә′дәти». 45 Аԛуб кәвьрәк һьлда у әԝ һ′әйкәл да сәкьнандьне. 46 Аԛуб готә бьратийа хԝә: «Кәвьра т′оп кьн». Ԝан кәвьр анин ԛуч′ кьрьн у ль ԝьр щәм ԛуч′е нан хԝарьн.
it-1 883 ¶1
Галед
Аԛуб у Лабан карьбун ортʹа һәвда әʹдьлайе хԝәй кн у ләма жи пәймана әʹдьлайе гьредан. Сәва ве йәке Аԛуб ԛучʹкәк чекьр у готә «бьред» хԝә, ԝәки һәйкәләки чекьн, сәре кʹижани гәрәке пәʹн буйа, мина сьфре. Паше ль сәр ви һәйкәли ԝана нан хԝар, чь кӧ нишана ԝе йәке бу, кӧ ԝана пәйман гьреда. Бь зьмане Арамайи (Сурайи), Лабан наве ви щийи дани «Йигар-Саһадут», ле Аԛуб наве Ибрани дани «Галед», нета ԝан дӧ гьлийа йәк ә. Лабан гот: «Әва ԛуч′а иро [бь Ибрани, гал] нава мьн у тәда шә′дә йә [бь Ибрани, ед]» (Дсп. 31:44-48). Әв ԛучʹ бона һʹәмуйа шәʹдәти бу. Ль гора рʹеза 49, наве ԝе бь Ибрани данин «Миспаһ», йане Бьрща Ԛәрәԝьлийе. Әԝе дьани бира һʹәмуйа, ԝәки Аԛуб у Лабан соз данә һәв кӧ әʹдьлайе хԝәй кьн һьм ортʹа һәвда һьм жи малбәтед хԝәда (Дсп. 31:50-53). Ԝәʹдә шунда кәвьр бь ви щурʹәйи дьданә хәбате, ча шәʹдед лал (Йеш. 4:4-7; 24:25-27).
(Дәстпебун 31:47-50) Лабан наве ԝе ԛуч′е дани Йигар-Саһадут′а. Аԛуб наве ԝе дани Галед. 48 Һьнге Лабан гот: «Әва ԛуч′а иро нава мьн у тәда шә′дә йә». Ләма наве ԝе Галед һатә данине, 49 ӧса жи Миспаһ чьмки ԝи гот: «Хӧдан ль сәр мьн у тәда бьньһер′ә, гава р′уйе мә һәв дӧ нәк′әвә. 50 Һәгәр тӧ дьле ԛизе мьн бешини, йан жи жьнед башԛә сәр ԛизед мьнр′а бьстини, кәс нава мәда т′ӧнә, ле Хԝәде нава мьн у тәда шә′дә йә».
it-2 1172
Бьрща Ԛәрәԝьлийе
Наве ԛучʹка кәвьра кʹижан кӧ Аԛуб чекьр, «Галед» бу, чь кӧ дьһатә һʹәсабе «Ԛучʹа Шәʹдәтийе» у «Бьрща Ԛәрәԝьлийе». Лабан гот: «Хӧдан ль сәр мьн у тәда бьньһер′ә, гава р′уйе мә һәв дӧ нәк′әвә» (Дсп. 31:45-49). Әва ԛучʹа кәвьра шәʹде ԝе йәке бу, ԝәки Йаһоԝа пәй Аԛуб у Лабан дьньһерʹи, сәва кӧ әве пәймане бир нәкьн.
(Дәстпебун 31:51-53) Лабан сәрда зедә кьр у готә Аԛуб: «Ва йә әв ԛуч′а у әв һ′әйкәле кӧ мьн нава хԝә у тәда да сәкьнандьне. 52 Әва ԛуч′а шә′дә йә, әва һ′әйкәла шә′дә йә, кӧ әз жь ве ԛуч′е дәрбаз нәбьм, тӧ жи жь ве ԛуч′е у һ′әйкәли дәрбаз нәби бона хьрабийе. 53 Бьра Хԝәдейе Бьраһим у хԝәдейе Нәһор (хԝәдейе баве ԝан) нава мәда һ′акьм бьн». Аԛуб пе Хофа баве хԝә Исһаԛ ад-ԛьрар кьр.
Хьзна Кʹьтеба Пироз Бьгәрʹьн
(Дәстпебун 31:19) Лабан чубу кӧ пәзе хԝә бьбьр′ә, Р′аһел п′утед мала баве хԝә дьзин.
it-2 1087-1088
Пʹут
Ль Мезопотамйайе у дәр-доре ԝе археоложа һьнә пʹут дитьн, чь кӧ роләкә фәрз дьлист бона ԝан мәрийа, йед кӧ һәбука мала баве хԝә ԝар дьбун. Ль щийе бь наве Нузи, археоложа кәвьрәк дитьн, кʹидәре һатьбу готьне, һәрге щәм зәʹва әв пʹут һәбуна, һьнге гава хәзуре ԝи дьмьр, әԝи дькарьбу бьчуйа диԝане у һәбука хәзур хԝәрʹа бьстанда (Ancient Near Eastern Texts, edited by J. Pritchard, 1974, pp. 219, 220, and fth 51). Дьԛәԝьмә ләма Рʹаһел пʹутед мала баве хԝә дьзикава һьлдабу. Әԝе тʹьре кӧ изьна ԝе һәйә әве йәке бькә, чьмки баве ԝе нәрʹаст бу һьндава мере ԝе Аԛубда (Бәрамбәр кә тʹәви Дсп. 31:14-16). Һьм жи ньһа фәʹмдари йә чьма Лабан ӧса дьхԝәст әԝан пʹута пашда вәгәрʹинә. Әԝи һәла һе бьред хԝә жи тʹәви хԝә һьлда у һʹәфт рʹожа пәй Аԛуб кʹәт, сәва кӧ ԝан пʹута пашда һьлдә (Дсп. 31:19-30). Һәмьки Аԛуб ньзаньбу кӧ Рʹаһеле әв пʹут һьлдабун (Дсп. 31:32), нә жи тʹӧ щийа те готьне кӧ Аԛуб әԝ пʹут дьданә хәбате, сәва кӧ һәбука кӧрʹед Лабан хԝәрʹа һьлдә. Щәм Аԛуб пʹутед ӧса тʹӧнә бун у әԝи нә жи ԝана дьда хәбате. Әԝ пʹут һатьбун кʹӧтакьрьне, дьԛәԝьмә чахе Аԛуб бьн бахәки мәзьн незики Шәкәме һʹәму хӧданед хәриб кʹӧта кьр, кʹижан кӧ мәрьвед ԝи дабун ԝи, йан жи дьбә кӧ һе пешийа ве йәке һатьбун кʹӧтакьрьне (Дсп. 35:1-4).
(Дәстпебун 31:41, 42) Бист сали һ′але мьн мала тәда аһа буйә. Мьн чардәһ сала бона һәр дӧ ԛизед тә тәр′а хӧламти кьр, шәш сала жи бона пәзе тә. Ле тә дәһә щара һәԛе мьн гӧһаст. 42 Һәгәр Хԝәдейе баве мьн, Хԝәдейе Бьраһим у Хофа Исһаԛ нә т′әви мьн буйа, тәйе ньһа әз р′аст дәствала вәр′екьрама. Хԝәде зәлулийа мьн у хәбат дәсте мьн дит у шәва дәрбазбуйи ль тә һьлат».
(1 Пәтрус 2:18) Хӧламно, бь хофк′ешикә мәзьн гӧр′а ахайед хԝәда бьн, нә кӧ т′әне гӧр′а йед ԛәнщ у бәрбьһерада бьн, ле гӧр′а зӧлмк′арада жи.
ԝ13 15/3 21 ¶8
Йаһоԝа Сьтара Мә йә
8 Чахе Аԛуб һатә Һаране, хале ԝи Лабан, бь дьлгәрми әԝ ԛәбул кьр у ԛизед хԝә Леа у Рʹаһел, жьнти да ԝи. Ԝәʹдә шунда Лабан бона кʹара хԝә Аԛуб дьда хәбате у дәһ щара һәԛе ԝи дьгӧһаст! (Дсп. 31:41, 42). Аԛуб бәр ве нәһәԛийе тәйах дькьр у баԝәр дькьр, кӧ Йаһоԝа ԝе диса жи бона ԝи хәм бькә. Һәма ӧса жи бу! Чахе Хԝәде готә Аԛуб вәгәрʹә Кәнане, һьнге әԝ ида «хԝәйе кәрийед пезә мәзьн, щарийа, хӧлама, дәва у к′әра» бу (Дсп. 30:43). Аԛуб бь шькьрдарийе Хӧдерʹа дьгот: «Әз нә һежайи т′әмамийа һ′ӧб у амьнийа тәйә ԛәдим ьм, к′ижан кӧ тә ԛуле хԝәр′а кьрьнә, чьмки әз бь шьвдара дәсте хԝә жь ве Урдӧне дәрбаз бум у ньһа бумә хԝәйе дӧ п′ара» (Дсп. 32:10).
Хԝәндьна Кʹьтеба Пироз
(Дәстпебун 31:1-18) Аԛуб хәбәрдана кӧр′ед Лабан бьһистьн кӧ дьготьн: «Аԛуб һ′әму һәбука баве мә бьр у жь һәбука баве мә һаԛас һәбук т′оп кьр». 2 У Аԛуб ч′ә′в Лабан к′әт, дина хԝә дайе кӧ Лабани һьндава ԝида нә йе бәре йә. 3 Һьнге Хӧдан готә Аԛуб: «Вәгәр′ә ԝәлате кал-бавед хԝә, ль щи-мьск′әне хԝә, әзе т′әви тә бьм». 4 Аԛуб чоле ль бәр пез бу, әԝи шанд гази Р′аһеле у Леайе кьр 5 у готә ԝан: «Әз дина хԝә дьдьмә мьр′узе баве ԝә, әԝ һьндава мьнда нә йе бәре йә. Ле Хԝәдейе баве мьн, т′әви мьн буйә. 6 Ԝәва жи ә′йан ә, кӧ мьн бь т′әмамийа ԛәԝата хԝә баве ԝәр′а хӧламти кьрийә. 7 Ле баве ԝә әз дьхапандьм, дәһә щара һәԛе мьн гӧһаст, ле Хԝәде нәһьшт кӧ әԝ зийанәке бьдә мьн. 8 Гава ԝи дьгот: ‹Бьра йед дәԛ-дәԛи бәр һәԛе тәва бьн›, һьнге т′әмамийа пез, дьза дәԛ-дәԛи данин. Ле гава ԝи дьгот: ‹Бьра йед шьв-шьви бәр һәԛе тәва бьн›, һьнге т′әмамийа пез, дьза шьв-шьви данин. 9 Бь ви аԝайи Хԝәде һ′әйԝанед баве ԝә жь ԝи стандьн у данә мьн. 10 Щарәке ԝәхте пез фә′ла бу, мьн сәре хԝә бьльнд кьр у хәԝнеда дина хԝә дайе, ва йә кәри бь нерийед шьв-шьви, дәԛ-дәԛи у бәләк дьһатьнә фә′ла. 11 Һьнге мьлйак′әте Хԝәде хәԝнеда мьнр′а гот: ‹Аԛуб!› У мьн гот: ‹Ләбе, әзи ва мә›. 12 Әԝи гот: ‹К′әрәма хԝә, сәре хԝә бьльнд кә у дина хԝә бьде, ванә һ′әму нерийед кӧ пәз бь ԝан тенә фә′ла, шьв-шьви, дәԛ-дәԛи у бәләк ьн, чьмки мьн дит һәр тьштед кӧ Лабан сәре тә кьрьн. 13 Әз Хԝәдейе Бет′-Еле мә, ԝе дәра кӧ тә һ′әйкәл р′ун кьр у ль ԝьр мьнр′а ад-ԛьрар кьр, ньһа р′абә жь ви ԝәлати дәре у вәгәр′ә ль щи-мьск′әне хԝә›». 14 Һьнге Р′аһеле у Леайе ле вәгәр′андьн у готьне: «Гәло иди мала баве мәда, п′ар у ԝартийа мә һәйә? 15 Гәло бона ԝи әм һ′әсаб набьн мина хәриба? Чьмки әԝи әм фьротьн у п′әре мә жи хԝарьн. 16 Ләма жи әԝ һ′әму һәбука кӧ Хԝәде жь баве мә станд, йа мә у зар′окед мә йә, ньһа һәр тьштед кӧ Хԝәде готийә, бькә». 17 Аԛуб р′абу, жьн у зар′ед хԝә ль дәва сийар кьрьн. 18 Әԝи һ′әму һ′әйԝанед хԝә, һ′әму һәбука хԝәйә кӧ ԛазьнщ кьрьбу у һ′әйԝанед хԝәйе кӧ ль Паддан-Арамеда ԛазьнщ кьрьбу, һьлдан р′ек′әт, кӧ һәр′ә щәм баве хԝә Исһаԛ, ԝәлате Кәнане.
20-26 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘСТПЕБУН 32-33
«Тӧ бона Кʹәрәмед Хԝә Шәрʹ Дьки?»
(Дәстпебун 32:24) Аԛуб т′әне ма. Мәрьвәк һ′әта саре сьбәһе жер′а к′әтә дәстәгӧлаше.
ԝ03 15/8 25 ¶3
Тӧ бь Хирәт Йаһоԝа Дьгәрʹи?
Ньвисаред Пирозда гәләк сәрһатийед ԝан мәрийа һәнә, йед кӧ ԛәԝат дьданә хәбате сәва кӧ Йаһоԝа бьгәрʹьн. Йәк жь ԝан мәрийа Аԛуб бу, кʹижан кӧ һʹәта сәре сьбәһе тʹәви мәләк кʹәтьбу гӧлаше. Паши ԝе йәке наве Аԛуб һатьбу гӧһастьне сәр Исраел чь кӧ те һʹәсабе «Тʹәви Хԝәде кʹәтийи һʹӧщәте». Әв нав лайиԛи ԝи бу, чьмки әԝ тʹәви Хԝәде кʹәтьбу «һʹӧщәте», йан бь гьлийе майин бежьн, әԝ бь «хирәт сәр йа хԝә дьсәкьни», «һʹәму ԛәԝата хԝә дьда хәбате». Мәләк жь бо хирәта ԝи, дӧа ль ԝи кьр (Дәстпебун 32:24-30, спартьн).
(Дәстпебун 32:25, 26) Әԝи дит кӧ ль Аԛуб нькарә, әԝ ль севька ԛарч′ька ԝи к′әт у дәма дәстәгӧлаше Аԛуб ԛарч′ькеда сьст бу. 26 Һьнге әԝи готә Аԛуб: «Мьн бәр′дә әз һәр′ьм, чьмки ва йә сьбәһ зәлал дьбә». Аԛуб гот: «Һ′әта тӧ дӧа ль мьн нәки әз тә бәр′надьм».
it-2 190
Тʹопал
Аԛубе Тʹопал. Чахе Аԛуб 97 сали бу, әԝ тʹәмамийа шәве тʹәви мәләке Хԝәде кʹәтьбу гӧлаше. Аԛуб мәләк бәрнәдьда, һʹәта әԝи дӧа ль Аԛуб нәкьр. Ԝәʹде гӧлаше, мәләк ль севька ԛарч′ька ԝи к′әт у ԛарч′ька ԝи сьст бу. Паши ԝе йәке Аԛуб тʹопал бу (Дсп. 32:24-32; Һс. 12:2-4). Ԝәʹдә шунда тʹопалбуна Аԛуб дькьрә бира ԝи, кӧ рʹаст ә әԝ тʹәви Хԝәде [мәләке Хԝәде] у мәрьва, кʹәтьбу «һʹӧщәте», ле бь рʹасти әԝ һʹӧщәта тʹәви мәләке Хԝәдеда, сәрнәкʹәтьбу. Аԛуб тʹәви мәләк кʹәтьбу гӧлаше, чьмки Хԝәде һиштьбу у әԝ ль гора ԛьрара ԝи бу. Ӧса Аԛуб мәщал сьтанд избат кә, кӧ фәʹм дькә, ԝәки кʹәрәма Хԝәде чьԛас фәрз ә.
(Дәстпебун 32:27, 28) Әԝи готә ԝи: «Наве тә чи йә?» Аԛуб гот: «Аԛуб ә». 28 Әԝи гот: «Иди наве тә Аԛуб нәйе готьн, ле Исраел, чьмки тӧ Хԝәде у мәрьвар′а к′әти һ′ӧщәте у тӧ сәр к′әти».
it-1 1228
Исраел
1. Әв һәйә наве Аԛуб кӧ Хԝәде дабу ԝи, гава әԝ 97 сали бу. Һәма ԝе шәве, Аԛуб дәшта чʹәме Йабоԛрʹа дәрбаз бу, сәва кӧ рʹасти бьре хԝә Әʹсаԝ бе. Аԛуб ве гӧлашеда нәсәкьни, һʹәта хьлазийе хԝә ԛайим дьгьрт, у ләма жи наве ԝи һатьбу гӧһастьне сәр Исраел, чь кӧ дьда кʹьфше ԝәки Хԝәде әԝ кʹәрәм кьрьбу. Аԛуб наве ԝи щи дани Пьнӧел, сәва әве ԛәԝьмандьне бира хԝәда хԝәй кә (Дсп. 32:22-31; бьньһерʹә АԚУБ № 1.) Ԝәʹдә шунда Бәйтʹәледа, Хԝәде диса щарәке дәстур кьр, ԝәки наве Аԛуб бь рʹасти һатийә гӧһастьне. Жь ԝи чахи дәстпебуйи һʹәта хьлазийа әʹмьре ԝи, гәләк щар сәр Аԛуб дьготьн Исраел (Дсп. 35:10, 15; 50:2; 1 Др. 1:34). Хәбәра «Исраел» дь Кʹьтеба Пирозда 2 500 щара зедәтьр һатийә ньвисаре, у гәләк щар бь ве хәбәре дьданә кʹьфше щьмәʹта Исраел, кʹижан кӧ зӧрʹәтед Аԛуб бун (Дркʹ. 5:1, 2).
Хьзна Кʹьтеба Пироз Бьгәрʹьн
(Дәстпебун 32:11) К′әрәма хԝә, мьн жь дәсте бьре мьн Әсаԝ хьлаз кә, чьмки әз же дьтьрсьм, нәбә кӧ әԝ бе, мьн, де у зар′окава хә.
(Дәстпебун 32:13-15) Аԛуб шәва хԝә ль ԝе дәре дәрбаз кьр, р′абу жь һәр тьште хԝә, бьре хԝә Әсаԝр′а п′ешк′еш һазьр кьрьн. 14 Дӧсьд бьзьн, бист нери, дӧсьд ми, бист бәран, 15 си дәвед зайи щә′шькед ԝанва, чьл ч′еләк, дәһә бохә, бист к′әре ме у дәһә йе нер вәԛәтандьн.
ԝ10 15/6 22 ¶10-11
Хәбәрдана Мәʹрифәти, Әʹдьлайе Пешда Тинә
10 Хәбәрдана мәрифәти аликʹарийе дьдә, ԝәки әʹдьлайе хԝәй кьн. Бь рʹасти жи чахе әм жь алийе хԝәда һʹәму тьшти дькьн, кӧ тʹәви мәрийа һәләԛәтийа баш хԝәй кьн, ӧса ортʹа мә баш дьбә. Һәрге әм бь дьл у щан мәрийарʹа ԛәнщийе дькьн, пʹешкʹеша дьдьн ԝан у меванһʹьзийе әʹйан дькьн, әв йәк али мә дькә кӧ әм һеса дьле хԝә һәврʹа вәкьн. Бь ве йәке әм ча бежи «пьриске егьр сәр сәре ԝи» тʹоп дькьн, у мәщале дьдьне кӧ хәйсәтед хԝәйә баш әʹйан кә, чь кӧ ԝе али мә бькә һеса проблемед хԝә сафи кьн (Рʹм. 12:20, 21).
11 Аԛуб пʹехәмбәр фәʹм дькьр, кӧ чьԛас фәрз ә ԛәнщийе бькьн. Бьре ԝи Әсаԝ ӧса сәр ԝи һерс бу, ԝәки Аԛуб тьрсийа кӧ әԝе ԝи бькӧжә, у ләма жь ԝи рʹәви. Паши гәләк сала Аԛуб вәдьгәрʹә. Әсаԝ дьчә кӧ рʹасти ԝи бе, у 400 мәрьв тʹәви хԝә һьлдьдә. Аԛуб бона аликʹарийе Йаһоԝарʹа дӧа дькә. Паше әԝ гәләк һʹәйԝан пешийа хԝә дьшинә, кӧ пʹешкʹеши Әсаԝ бькә. Бь ԝан пʹешкʹеша Аԛуб гьһиштә нета хԝә. Чахе бьра рʹасти һәв һатьн, дьле Әсаԝ нәрм бу, у әԝ рʹәвә-рʹәв бәрбь Аԛуб чу у хԝә авитә пʹесира ԝи (Дсп. 27:41-44; 32:6, 11, 13-15; 33:4, 10).
(Дәстпебун 33:20) Ль ԝьр горигәһәк чекьр у наве ԝе дани Ел-Әлоһе-Исраел.
it-1 980
Хԝәде, Хԝәдайе Исраеле йә
Паши шәрʹе Аԛуб тʹәви мәләк ль Пьнӧеле, әԝи навәки тʹәзә станд, демәк Исраел. Чахе әԝ тʹәви бьре хԝә Әсаԝ ль һәв һат, әԝ ль Сукоте щиԝар бу, паше жи дәрбази Шьхәме бу. Ль ԝьр әԝи жь зар′ед Һаморе әʹрд кʹьри, у ԝедәре коне хԝә вәгьрт (Дсп. 32:24-30; 33:1-4, 17-19). Әԝи ӧса жи «горигәһәк чекьр у наве ԝе дани Ел-Әлоһе-Исраел» (Дсп. 33:20). Аԛуб ль сәр горигәһе наве хԝәйи тʹәзе демәк Исраел ньвиси, чь кӧ дьда кʹьфше ԝәки әԝ әви нави ԛәбул дькә у рʹази йә бона рʹебәрийа Хԝәде, кʹижан кӧ али ԝи кьр сах-сьламәт вәгәрʹә Әʹрде Создайи. Кʹьтеба Пирозда тʹӧ щийа, әв нав ида найе дитьне.
Хԝәндьна Кʹьтеба Пироз
(Дәстпебун 32:1-21) Аԛуб р′ийа хԝәда чу. Мьлйак′әтед Хԝәде р′асти ԝи һатьн. 2 Гава Аԛуб әԝ дитьн гот: «Әва зома ордийа Хԝәде йә». Наве ԝе дәре дани Маһ′анайим. 3 Аԛуб пешийа хԝә ԛасьд шандьнә ԝәлате Сеһире, т′опрахе Әдоме, щәм бьре хԝә Әсаԝ. 4 У т′әми да ԝан у гот: «Аһа бежьнә хԝәйе мьн Әсаԝ, кӧ хӧламе тә Аԛуб аһа дьбежә: ‹Әз ль щәм Лабан бумә, һ′әта ньһа жи щәм ԝи хәрибийеда мамә. 5 Га, к′әр, кәрийед пез, хӧлам у щари мьн ԛазьнщ кьрьнә. Ньһа әз дьшиньм, хԝә хԝәйе хԝәва дьдьмә һ′әсандьне, кӧ әз бәр ч′ә′вед тә к′әрәме бьбиньм›». 6 Ԛасьд ль сәр Аԛубда вәгәр′ийан у готьне: «Әм чунә щәм бьре тә Әсаԝ, ва йә әԝ чарсьд мәрьвива пешийа тәда те». 7 Аԛуб гәләки тьрсийа у т′әвиһәв бу у р′абу мәрьвед т′әви хԝә, пәз у дәԝар, дәвә кьрьнә дӧ п′ара. 8 Дьгот: «Һәгәр Әсаԝ ль сәр п′арәкеда бьгьрә у лехә, һәма п′арадьн же хьлаз бә». 9 Һьнге Аԛуб гот: «Йа Хԝәдейе баве мьн Бьраһим у Хԝәдейе баве мьн Исһаԛ, Хӧдано! Кӧ тә мьнр′а гот: ‹Вәгәр′ә ԝәлате хԝә, ль ԝат′ане хԝә, әзе ԛәнщийе ль тә бькьм!› 10 Әз нә һежайи т′әмамийа һ′ӧб у амьнийа тәйә ԛәдим ьм, к′ижан кӧ тә ԛуле хԝәр′а кьрьнә, чьмки әз бь шьвдара дәсте хԝә жь ве Урдӧне дәрбаз бум у ньһа бумә хԝәйе дӧ п′ара. 11 К′әрәма хԝә, мьн жь дәсте бьре мьн Әсаԝ хьлаз кә, чьмки әз же дьтьрсьм, нәбә кӧ әԝ бе, мьн, де у зар′окава хә. 12 Нә тә готийә: ‹Әзе ә′сәйи ԛәнщийе ль тә бькьм у зӧр′әта тә бькьмә ԝәкә ԛума бә′ре, кӧ жь гәләкбуне ԝе нәйе жьмаре›». 13 Аԛуб шәва хԝә ль ԝе дәре дәрбаз кьр, р′абу жь һәр тьште хԝә, бьре хԝә Әсаԝр′а п′ешк′еш һазьр кьрьн. 14 Дӧсьд бьзьн, бист нери, дӧсьд ми, бист бәран, 15 си дәвед зайи щә′шькед ԝанва, чьл ч′еләк, дәһә бохә, бист к′әре ме у дәһә йе нер вәԛәтандьн. 16 Һәр кәри, башԛә-башԛә, данә дәсте хӧламед хԝә у готә хӧлама: «Пешийа мьн һәр′ьн, бьра һәр кәри дури һәв, ль пәй һәв һәр′ьн». 17 Ә′мьр ль йе пешийе кьр у готе: «Гава бьре мьн Әсаԝ р′асти тә бе у жь тә бьпьрсә: ‹Тӧ к′е йи у те к′ӧда һәр′и? У әвед ль пешийа тә йед к′е нә?› 18 Һьнге тӧ бежә: ‹Әв йед хӧламе тә Аԛуб ьн, әвана п′ешк′еш хԝәйе хԝә Әсаԝр′а шандьнә, ва йә әԝ хԝәха жи ль пәй мә те›». 19 Аһа жи т′әми да йе дӧда, йе сьсийа у һ′әмуйед кӧ ль пәй кәрийа дьчун у гот: «Аһа бежьне гава һун р′асти Әсаԝ бед 20 у бежьне: ‹Ва йә хӧламе тә Аԛуб жи ль пәй мә те›». Чьмки әԝи хԝәха хԝәр′а дьгот: «Бь ван п′ешк′ешед кӧ әз бәри хԝә дьшиньм, әзе дьле ԝи бьк′ьр′ьм, паше р′уйе ԝи бьбиньм, бәлки әԝ мьн ԛәбул кә». 21 П′ешк′еш пешийа ԝи чун, ле Аԛуб шәва хԝә зомеда дәрбаз кьр.
27 НИСАНЕ-3 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ДӘСТПЕБУН 34-35
«Ахьрийа Хьраб жь бо Һәвалтийа Хьраб»
(Дәстпебун 34:1) Дина, ԛиза Леайе бу, кӧ Аԛубр′а ани бу, әԝ дәрк′әт кӧ ԛизед ԝи ԝәлати бьбинә.
ԝ97 1/2 30 ¶4
Шәкәм; Бажар ль Дәштеда
Хортед ви бажари, дәрһәԛа Динайе чь дьфькьрин, гава дьдитьн кӧ әԝ һәр гав тʹәне дьчу ԝедәре? Кӧрʹе ахайе ԝи ԝәлати «әԝ дит, дәст авитә ԝе у бь дәсте зоре әԝ р′ур′әш кьр». Динайе чьма тʹәви Кәнанийед бенамус, һәвалти дькьр? Дьбә кӧ әԝе тʹәхмин дькьр кӧ һʹәԝще һәвалтийа ԝан ә? Йан дьбә кӧ әԝ мина һьнә бьред хԝә, хԝәсәрихԝә бу? Бьхуньн сәрһатийа жь Дәстпебун у фәʹм бькьн, кӧ әԝе чьԛас дәрд-кӧл у еш Аԛуб у Леайерʹа ани, бь һәвалтийа хԝә тʹәви Кәнанийа (Дәстпебун 34:1-31; 49:5-7; бьньһерʹә «Бьрща Ԛәрәԝьлийе», 15 Һʹәзиране, сала 1985, рʹупʹела 1).
(Дәстпебун 34:2) Шьхәме кӧр′е Һаморе һ′иԝи, ахе ԝи ԝәлати әԝ дит, дәст авитә ԝе у бь дәсте зоре әԝ р′ур′әш кьр.
«Жь Ԛавийе Бьрʹәвьн!»
14 Шәкәм әԝ тьшт дькьрьн, чь кӧ сәва ԝи нормал у тʹәбийәти бун. Әԝи Дина бәгәм кьр, ләма жи «дәст авитә ԝе у бь дәсте зоре әԝ рʹурʹәш кьр». (Бьхунә Дәстпебун 34:1-4.) Жь бо ԝе йәке һьн әԝе зийан станд, һьн жи малбәта ԝе (Дәстпебун 34:7, 25-31; Галати 6:7, 8).
(Дәстпебун 34:7) Кӧр′ед Аԛуб гава бьһистьн әԝ жи жь чоле һатьн, бина хԝә тәнг кьрьн у гәләки һерс к′әтьн. Чьмки әви намуса Исраелер′а лист, ԝәки дәст авитә ԛиза Аԛуб. Әԝи тьштәки нәбуйи кьр.
(Дәстпебун 34:25) Р′ожа сьсийа, гава әԝә һе ешеда бун, дӧ кӧр′ед Аԛуб, бьред Динайе, Шьмһ′ун у Леԝи, һәр йәки шуре хԝә һьлда у к′әтьнә бажер, т′ӧ кәс дәрнәк′әтә пешийа ԝан, һ′әму кӧ тәва зар′ед нерин кӧштьн.
ԝ09 1/9 21 ¶1-2
Чахе Һун Хәйиди нә
Гәләк щар мәрьва тʹьре бь кʹинажотьне, дьле ԝан рʹьһʹәт дьбә. Мәсәлә, Кʹьтеба Пироз дьбежә, ԝәки кӧрʹед Аԛуб пʹехәмбәре щьмәʹта Ибрани, «бина хԝә тәнг кьрьн у гәләки һерс к′әтьн» (Дәстпебун 34:1-7). Жь бо һерса хԝә, дӧ кӧрʹед Аԛуб сафи кьрьн кʹине бажон Шәкәмрʹа у малбәта ԝирʹа. Бь дәрәԝийа хԝә Шьмһун у Леԝи кʹәтьнә бажаре Кәнане, Шәкәм у һʹәму меред ви бажари кӧштьн (Дәстпебун 34:13-27).
Гәло бь ве хунрʹетьне проблем сафи бу? Чахе Аԛуб пеһʹәсийа дәрһәԛа кьред кӧрʹед хԝә, әԝи ԝана рʹәзил кьр у гот: «Ԝә әз ль бәр ч′ә′ве бьнәлийед кәнанийа у пьриззийа авитьм, әв бәла ани сәре мьн . . . ԝе т′опи сәр мьн бьн у мьн хьн, әзе мала хԝәва дәст у п′ийа һәр′ьм» (Дәстпебун 34:30). Бәле, ԝана бь кʹина хԝә проблем сафи нәкьр, ле дькарьн бежьн кӧ проблем һе зедә кьрьн; малбәта Аԛуб гәрәке фәсал буйа ԝәки щинаред ԝани һерс тьштәки сәре ԝан нәкьн. Ләма жи сәва кӧ тьштәки хьраб нәйе сәре ԝан, Хԝәде готә Аԛуб кӧ щьһе хԝә бьһелә у дәрбази Бәйтʹәле бә (Дәстпебун 35:1, 5).
Хьзна Кʹьтеба Пироз Бьгәрʹьн
(Дәстпебун 35:8) Хԝәйкьрийа Р′евекайе, Дьвора мьр, әԝ бьнийа Бет′-Еле, бьн мә′зеда һатә дәфьнкьрьне у наве ԝьр һатә данин Алон-Баԛут.
it-1 600 ¶4
Дәбора
1. Хԝәйкьрийа Рʹевекайе. Чахе Рʹевека мала баве хԝә Бетуел һишт, чу Палестинайе, сәва кӧ бьбә жьна Исһаԛ. Дәбора жи тʹәви ԝе чу (Дсп. 24:59). Гәләк сал Дәборайе мала Исһаԛда щарити дькьр у дьԛәԝьмә паши мьрьна Рʹевекайе әԝ мала Аԛубда дьжит. Ча те кʹьфше ԝәкә 125 сал шунда паши ԝе йәке, чахе Исһаԛ Рʹевека жьнти станд, Дәбора мьр у бьн бахәки мәзьн дь Бәйтʹәледа һатә дәфьнкьрьне. Наве ви бахи «Алон-Баԛут», чь кӧ те һʹәсабе «Мәʹза Шине», дьдә кʹьфше кӧ Аԛуб у малбәта ԝи, Дәбора зәʹф һʹьз дькьрьн (Дсп. 35:8).
(Дәстпебун 35:22-26) Гава Исраел ль ԝи ԝәлати дьма, Р′убен чу дәст авитә щарийа баве хԝә Билһайе. Исраел әв йәк бьһист. Донздәһ кӧр′ед Аԛуб һәбун. 23 Кӧр′ед Леайе: Ньхӧрийе Аԛуб Р′убен, Шьмһ′ун, Леԝи, Щьһуда, Исахар у Зәбулон бун. 24 Кӧр′ед Р′аһеле: Усьв у Бьнйамин бун. 25 Кӧр′ед щарийа Р′аһеле, Билһайе: Дан у Нәфтәли бун. 26 Кӧр′ед щарийа Леайе, Зилпайе: Гад у Ашер бун. Әвана бун кӧр′ед Аԛубә кӧ Паддан-Арамда жер′а бьбун.
Пьрсед Хԝәндәвана
Һена бәреда, гәло әʹсә бу ԝәки мер ньхӧри буйа, сәва кӧ бькʹәта рʹеза ԝан кал-бава жь кʹижана Мәсиһ гәрәке бьһата?
Әʹдәбйәтед мәда мә чәнд щара бәса ве пьрсе кьрийә. Ибрани 12:16-да те готьне, кӧ Әсаԝ «тьштед пироз ԛимәт нәкьр» у «мафе ньхӧритийа хԝә, бона зькә хԝарьн [Аԛубрʹа] фьрот, ДТʹ». Жь ве йәке те кʹьфше, кӧ чахе Аԛуб «мафе» ньхӧритийе станд, әԝ жи кʹәтә нава рʹеза кал-бава, жь кʹижана Мәсиһ гәрәке бьһата (Мәт. 1:2, 16; Луԛа 3:23, 34).
Ле жь һьнә сәрһатьйед Кʹьтеба Пироз те кʹьфше, кӧ мер сәва бькʹәвә нав рʹеза ԝан кал-бава, жь кʹижана Мәсиһ гәрәке бьһата, әʹсә нибу кӧ ньхӧри буйа. Ԝәрә чәнд избаткьрьнед ве йәке шеԝьр кьн:
Жь кӧрʹед Аԛуб (Исраел) кӧ Леайе жерʹа ани, ньхӧри Рʹубен бу. Ле кӧрʹе пешьн жь Раһеле, йа кӧ Аԛуб гәләк ле һʹьз дькьр, Усьв бу. Чахе Рʹубен гӧнә кьр, маф, демәк изьна ньхӧритийе, гьһиштә Усьв (Дәстп. 29:31-35; 30:22-25; 35:22-26; 49:22-26; 1 Дир. 5:1, 2). Ле йәкә әԝана һәрдӧ жи нәкʹәтьнә нав рʹеза ԝан кал-бава, жь кʹижана Мәсиһ гәрәке бьһата. Кӧрʹе Аԛуб йе чара Щьһуда, кʹижан кӧ Леайе жерʹа ани, кʹәтә нава ве рʹезе (Дәстп. 49:10).
Хԝәндьна Кʹьтеба Пироз
(Дәстпебун 34:1-19) Дина, ԛиза Леайе бу, кӧ Аԛубр′а ани бу, әԝ дәрк′әт кӧ ԛизед ԝи ԝәлати бьбинә. 2 Шьхәме кӧр′е Һаморе һ′иԝи, ахе ԝи ԝәлати әԝ дит, дәст авитә ԝе у бь дәсте зоре әԝ р′ур′әш кьр. 3 Дьле ԝи к′әтә ԛиза Аԛуб Динайе, бь дьл у щан әԝ бәгәм кьр у дьле ԝер′а хәбәрда. 4 Шьхәм готә Һаморе баве хԝә: «Ве ԛизьке мьнр′а бьхԝазә». 5 Аԛуб бьһист кӧ әԝи ԛиза ԝи Дина р′ур′әш кьрийә, ле чьмки кӧр′ед ԝи чоле ль бәр кәрийа бун, ԛәт дәнг нәкьр һ′әта кӧ әԝ һатьн. 6 Һаморе баве Шьхәм, чу Аԛубр′а кӧ хәбәр дә. 7 Кӧр′ед Аԛуб гава бьһистьн әԝ жи жь чоле һатьн, бина хԝә тәнг кьрьн у гәләки һерс к′әтьн. Чьмки әви намуса Исраелер′а лист, ԝәки дәст авитә ԛиза Аԛуб. Әԝи тьштәки нәбуйи кьр. 8 Һамор ԝанар′а к′әтә хәбәрдане у гот: «Дьле кӧр′е мьн Шьхәм к′әтийә ԛиза ԝә, һиви дькьм, әԝе бьдьнә ԝи. 9 Бьбьнә хьзьме мә. Ԛизед хԝә бьдьнә мә, ԛизед мә жи хԝәр′а бьбьн. 10 Т′әви мә бьминьн, әв ԝәлате бәр ԝә бә, навда бьминьн, т′ӧщарәтийе бькьн, навда хԝәр′а хьзне ԛазьнщ кьн». 11 Шьхәм готә бав у бьрайед кәч′ьке: «Бьра әз ль бәр ч′ә′ве ԝә к′әрәме бьбиньм, һун чь жь мьн бьхԝазьн, әзе бьдьм. 12 Ԛәлән у хәлатед гьран бькьнә сәр стуйе мьн, дәве ԝә чь бьхԝазә жи әзе бьдьм, т′әне ԝе ԛизе бьдьнә мьн». 13 Әԝи кӧ хушка ԝан Дина р′ур′әш кьрьбу, кӧр′ед Аԛуб бь һ′ьләк′ари щаба Шьхәм у баве ԝи Һамор дан 14 у готьнә ԝан: «Әм нькарьн ве йәке бькьн, кӧ хушка хԝә бьдьнә йәки нәсьнәт. Әва мәр′а ԛарәкә гьран ә. 15 Ле бәле әме т′әне бь ви шәрти т′әви ԝә ԛайл бьн, һәгәр һун бьбьнә мина мә, жь ԝә һәр ԛьсьме мер бе сьнәткьрьне, 16 һьнге әме ԛизед хԝә бьдьнә ԝә у ԛизед ԝә жи хԝәр′а биньн, әме т′әви ԝә бьминьн у бьбьнә щьмә′тәк. 17 Ле һәгәр һун гӧһдарийа мә нәкьн, нәйенә сьнәткьрьне, әме ԛиза хԝә һьлдьн у һәр′ьн». 18 Әв готьна ԝан ль Һамор у кӧр′е ԝи Шьхәм хԝәш һат. 19 Әԝи хорти әв йәк дәрәнги нәехьст, чьмки әԝи гәләки ԛиза Аԛуб бәгәм кьрьбу. Әԝ мала баве хԝәда, йе һәри хԝәйиԛәдьр бу.