ДӘРСА 17

Бь Рʹасти Иса Йәки Чаԝа нә?

Йе Нәшьркьри

Чахе әм дәрһәԛа готьн у кьред Иса педьһʹәсьн, әм хәйсәт-һʹӧнӧред ԝийи ӧса дьвиньн, кʹижан кӧ мә һелан дькьн дьһа незики ԝи у Баве ԝи Йаһоԝа бьн. Гәло әв чь һʹӧнӧр ьн? У чаԝа әм дькарьн жийина хԝәда чʹәʹв бьдьнә Иса?

1. Чьда Иса мина Баве хԝә йә?

Иса ль әʹзмен бь милйарда сала дина хԝә дьда Баве хԝәйи һʹьзкьри у жь ԝи һин дьбу. Ләма жи фькьр, һәст у кьред ԝи мина йе Баве ԝи нә (Бьхунә Йуһʹәнна 5:19.) Иса ӧса рʹьнд чʹәʹв дьдә һʹӧнӧред Баве хԝә, ԝәки гот: «Йе кӧ әз дитьмә, Бав дитийә» (Йуһʹәнна 14:9). Тӧ чьԛас һе зедә дәрһәԛа Иса пебьһʹәси, һаԛас те һе рʹьнд Йаһоԝа нас бьки. Мәсәлә, дьлрʹәʹмийа Иса һьндава мәрьвада дьдә кʹьфше, ԝәки Йаһоԝа бона тә чьԛас хәм дькә.

2. Иса ча да кʹьфше ԝәки әԝ Йаһоԝа һʹьз дькә?

Иса гот: «Ле бьра дьнйа бьзаньбә ԝәки әз Баве һʹьз дькьм у Баве чаԝа тʹәми ль мьн кьрийә әз ӧса дькьм» (Йуһʹәнна 14:31). Чахе Иса сәр әʹрде бу әԝи һʹьзкьрьна мәзьн һьндава Баве хԝә бь ԝе йәке дьда кʹьфше, ԝәки һәла һе нава чәтьнайада жи гӧрʹа ԝи дькьр. Әԝи ӧса жи һʹьз дькьр дәрһәԛа Баве хԝә хәбәр дә, у али мәрийа бькә, ԝәки бьбьнә достед Хԝәде (Йуһʹәнна 14:23).

3. Иса ча да кʹьфше ԝәки әԝ мәрийа һʹьз дькә?

Кʹьтеба Пирозда Иса дәрһәԛа мәрийа ӧса дьбежә: «Әшԛа мьн әԝләдед инсен» ә (Мәтʹәлок 8:31). Һʹьзкьрьна ԝи ԝе йәкеда һатә кʹьфше, кӧ әԝ бәр дьле мәрьвада дьһат у бь дьл али ԝан дькьр. Әԝи ӧса жи кʹәрәмәт дькьрьн, кʹижан кӧ нә тʹәне ԛәԝата ԝи әʹйан дькьрьн, ле ӧса жи дьлрʹәʹмийа ԝи (Марԛос 1:40-42). Әԝ һьндава мәрьвада ԛәнщ бу у фьрԛи нәдькьрә ортʹа ԝан. Гьли у кьред ԝи бәрдьли у һеви дьданә мәрьвед дьлсах, йед кӧ гӧһ дьданә ԝи. Иса жь һʹьзкьрьна хԝәйә һьндава инсанәте, һазьр бу бьчәрчьрә у һәла һе әʹмьре хԝә жи бона ԝан бьдә. Әԝ илаһи ԝан мәрийа һʹьз дькә, кʹижан кӧ һинкьрьнед ԝи пек тиньн (Бьхунә Йуһʹәнна 15:13, 14.)

КʹУР ЛЕКОЛИН КӘ

Һе зедә дәрһәԛа Иса пебьһʹәсә. У шеԝьр кә, кӧ чаԝа мина Иса тӧ дькари һʹьзкьрьн у мәрʹданийа хԝә бьди кʹьфше.

4. Иса Баве хԝә һʹьз дькә

Иса мәрʹа мәсәлә йә, кӧ чаԝа әм дькарьн һʹьзкьрьна хԝә һьндава Хԝәде бьдьнә кʹьфше. Бьхунә Луԛа 6:12 у Йуһʹәнна 15:10; 17:26. Паши хԝәндьна ван рʹеза, әве пьрсе шеԝьр кә:

Чаԝа әм дькарьн чʹәʹв бьдьнә Иса у нишан кьн, ԝәки әм Йаһоԝа һʹьз дькьн?

Иса дӧа дькә. — Иса Баве хԝәйи әʹзмана һʹьз дькьр, у тʹьме бь дӧа тʹәви ԝи хәбәр дьда

5. Иса бона мәрийа хәм дькә

Иса һе зедә бона мәрийа хәм дькьр, нә кӧ бона хԝә. Әԝи ԝәʹдә у ԛәԝата хԝә хәрщ дькьр, ԝәки али мәрийа бькә һәла һе һьнге жи гава ԝәстийайи бу. Бьхунә Марԛос 6:30-44, у паше щаба ван пьрса бьдә:

Ль гора ве сәрһатийе, Иса ча да кʹьфше ԝәки бона мәрийа хәм дькә? (Бьньһерʹә рʹезед 31, 34, 41 у 42.)
Чь Иса һелан дькьр, ԝәки али мәрийа бькә? (Бьньһерʹә рʹеза 34.)
Тӧ дәрһәԛа Йаһоԝа чь һин дьби жь ԝе йәке, кӧ Иса чʹәʹв дьда һʹӧнӧред ԝи?
Әм ча дькарьн мина Иса бона мәрийа хәм бькьн?

Иса бь кʹәрәмәти бь һʹәзара мәрьва пе пенщ нана у дӧ мәʹсийа тʹер дькә.

6. Иса йәки мәрʹд ә

Рʹаст ә Иса дәԝләти нибу, ле мәрʹд бу, у әԝ мә һелан дькә, әм жи мәрʹд бьн. Бьхунә Кʹаред Шандийа 20:35, у паше әве пьрсе шеԝьр кә:

Әм ча дькарьн мина Иса бәхтәԝар бьн?

Вехә ВИДЕО, у паше әве пьрсе шеԝьр кә:

ВИДЕО: «Хԝәзи ль Дайийа»; Пʹарәк (4:00)

Һәрге дәсттәнг бьн жи, әм чаԝа дькарьн мәрʹд бьн?

Ԝә заньбу?

Кʹьтеба Пироз мә һин дькә, ԝәки әм бь наве Иса Йаһоԝарʹа дӧа бькьн (Бьхунә Йуһʹәнна 16:23, 24.) Чахе әм ви щурʹәйи дӧа дькьн, әм дьдьнә кʹьфше ԝәки жь Иса рʹази нә бона ԝан тьшта, чь кӧ әԝи бона мә кьр, ԝәки әм бьбьнә достед Йаһоԝа.

ҺЬНӘ МӘРЬВ ДЬБЕЖЬН: «Хԝәде бона мә хәм накә.»

Кьред Иса ча избат дькьн, кӧ Йаһоԝа бона мә хәм дькә?

ТʹӘМАМКЬРЬН

Иса Йаһоԝа һʹьз дькә у әԝ ӧса жи мәрийа һʹьз дькә. Әԝ чʹәʹв дьдә Баве хԝә, ләма жи тӧ чьԛас һе зедә дәрһәԛа ԝи пебьһʹәси, һаԛас те һе рʹьнд Йаһоԝа нас бьки.