Бьра Шьхöлед Wәйи Рʹәзәдьли Шькьрийе Бьдьнә Йаһоwа

1, 2. а) Әлифаз у Билдад чь дәрәw кьрьн дәрһәqа хьзмәтийа мә Хwәдерʹа? б) Ве дәрәщеда Йаһоwа ча хwә да кʹьфше?

«ГӘЛО мәрьв дькарә кери Хwәде бе? Йан жи йәки фәʹмкʹар дькарә кʹаре бьдә wи? Гәло йе Һьмзор жь тә рʹази йә бона һәqийа тә, йан жи кʹара wи чь йә кö тö хwә рʹийа беqьсур дьгьри?» (Иб. 22:1-3, ДТʹ). Тö qә фькьрийи сәр щаба wан пьрса? Һәвале Ибо Әлифаз әw пьрс данә Ибо. Әлифаз баwәр дькьр кö мәрьв кери Хwәде найен! Һәвале wи Билдад, һәла һе кʹәтә дәʹwе жи у гот кö мәрьв нькарә бәр чʹәʹве Хwәде һәq бә. (Бьхунә Ибо 25:4.)

² Әлифаз у Билдад йанчь бәр дьле Ибода дьһатьн. Wана дьготьн кö йанчь щәфе мә кʹижан кö әм бона шьхöле Хwәде дькьн, бадиһәwа йә у кö qимәте мә бәр чʹәʹве Хwәде wәкә qимәте кʹезьк у кöрма йә (Иб. 4:19; 25:6). Те бежи әwана мьлук бун, ләма әw гьли готьн (Иб. 22:29). Бәле, һәрге жь сәре чʹийайе бьльнд йан жи жь агушка тәйаре сәр мәрьва бьньһерʹьн, мәрьв у шьхöлед wан qә тьштәк ниньн. Ле гәло әw те һʹәсабе кö Йаһоwайе Һәри бьльнд, сәр щәфе мә кö әм бона шьхöле wи дькьн, öса дьньһерʹә? Тʹö щар на! Йаһоwа сәр Әлифаз, Билдад у Зофар һерс кʹәт, чьмки wана дәрһәqа wи дәрәw кьрьн. Йаһоwа wанрʹа гот, кö әw Ибо qәбул дькә у wи һʹәсаб дькә хьзмәткʹаре хwә (Иб. 42:7, 8). Демәк, әм гәрәке qә дöдьли нәбьн кö әм мәрьвед гöнәкʹар дькарьн «кери Хwәде» бен.

«ТÖ ЧЬ ДЬДИ WИ?»

3. Әлиһу чь гот дәрһәqа щәфе мә бона хьзмәтийа Йаһоwарʹа, у әwи бь wан гьлийа чь дьхwәст бьгота?

³ Әлиһу йе кö гöһ дьда хәбәрдана wан, дәрһәqа Йаһоwа пьрс да Ибо: «Һәрге тö рʹаст и, тö чь дьди wи [Хwәде]? Йан жи әw чь дьстинә жь дәсте тә?» (Иб. 35:7, ДТʹ). Гәло бь wан гьлийа Әлиһу дьхwәст бьгота wәки щәфе мә кö әм бона шьхöле Хwәде дькьн бадиһәwа йә? На. Ләма жи бона wан гьлийа Йаһоwа сәр wи һерс нәкʹәт, ча сәр Әлифаз у Билдад, чьмки Әлиһу бь wан гьлийа да кʹьфше кö Хwәде һʹәwще хьзмәтийа мә нинә. Әw тʹам ә у һʹәwще тʹö тьшти нинә. Әм нькарьн wи һе дәwләти кьн йан жи һе qәwат кьн. Ле дәwсе һәр һʹöнöр, фәрәсәт у qәwат әм жь Хwәде дьстиньн, у әw дина хwә дьдә кö әм ча wан пʹешкʹеша дьдьнә хәбате.

4. Чахе әм мәрьварʹа qәнщийе дькьн, Йаһоwа ча дьньһерʹә сәр ве йәке?

⁴ Чахе әм хушк-бьрарʹа qәнщийе дькьн, Йаһоwа һʹәсаб дькә кö әм wирʹа qәнщийе дькьн. Мәтʹәлок 19:17-да әм дьхуньн: «Йе кö аликʹарийа кʹәсиб дькә, дәйн дьдә Хöдан у Хöдане жь бәр дайина wива, wи хәлат кә». Бәле, Йаһоwа һәр qәнщикә кö әм мәрьвед бәләнгазрʹа дькьн, дьвинә. У рʹаст ә әw Әʹфрандаре гәрдуне йә, ле бьдьнә һʹәсабе хwә кö чахе әм кәсәкирʹа qәнщийе дькьн, әw хwә ча дәйндаре мә һʹәсаб дькә. У әw wи дәйне мә бь ве йәке дьдә, кö мә qәбул дькә у кʹәрәма хwә дьдә. Кöрʹе Хwәде хwәха әw йәк избат кьр. (Бьхунә Луqа 14:13, 14.)

5. Кʹижан пьрса әме ньһа шеwьр кьн?

⁵ Йаһоwа Ишайа пʹехәмбәррʹа гот кö жерʹа хьзмәт кә у гьлийед wи әʹлами Исраелийа бькә. Бь ве йәке Йаһоwа да кʹьфше кö wи хwәш те чахе мәрьвед амьн qьрара wи тиньн сери (Иша. 6:8-10). Ишайа бь дьл у щан qәбул кьр тʹәглифкьрьна Хwәде. Иро жи бь һʹәзара хушк-бьра тʹәглифкьрьна Йаһоwа qәбул кьрьнә у мина Ишайа готьнә: «А вай әз, мьн бьшинә!» Әwана һәр шьхöли qәбул дькьн у һазьр ьн щурʹә-щурʹә дәрәщада у щийада шьхöле wи пешда бьвьн. Ле һьнәк дьбәкә пьрсед öса дьдьнә хwә: «Гәло щәфе мьн шьхöле Хwәдеда qә бона wи тьштәк те һʹәсабе? Нә бей мьн жи Йаһоwа дькарә шьхöле хwә пешда бьвә у qьрара хwә бинә сери?» Wәрә әм шеwьр кьн сәрһатийа Дәборайе у Барак, у щаба wан пьрса бьвиньн.

ХWӘДЕ МЕРХАСИЙЕ ДЬДӘ

6. Чь фьрqи һәбу ортʹа Исраелийа у ордийа дьжмьна?

⁶ Исраели жь дәсте пʹадше Кәнане Йабин, 20 сала дьчәрчьрин. Әwана һәла һе дьтьрсийан дәренә дәрва жи. Һьн жи, нә чʹәкед wанә шәрʹкьрьне һәбун, нә жи тьштед сәва хwә хwәй кьрана. Ле щәм дьжмьна 900 әʹрәбед бь кʹеләндийед һʹәсьн һәбун (Һʹакьм. 4:1-3, 13; 5:6-8).a

7, 8. а) Йаһоwа бь Дәборайе чь тʹәми да Барак? б) Исраелийа ча дьжмьнед хwә алт кьрьн? (Бьньһерʹә шькле әʹwльн.)

⁷ Бәле, ордийа дьжмьна гәләк qәwи бу, ле Йаһоwа бь Дәбора пʹехәмбәр тʹәми да Барак: «Һәрʹә у жь лаwед Нафтали жь лаwед Зәбун дәһ һʹәзар кәси бьгьрә щәм хwә у бькʹьшинә чʹийайе Тәборе . . . У әзе Сисәрайе сәроке артеша Йабин у әʹрәбед wи йед щәнге у ләшкәред wи бькʹьшиньм чʹәме Кишоне, щәм тә у әзе wи бьдьм дәсте тә» (Һʹакьм. 4:4-7).

⁸ Әw әʹламәти зузу бәла бу у мәрьвед бь рʹәзәдьли тʹоп бун сәр чʹийайе Тәборе. У чаwа Йаһоwа рʹебәри да, Барак чу шәрʹ пешийа дьжмьна. (Бьхунә Һʹакьмти 4:14-16.) Таанакеда, щийе кö wана шәрʹ дькьр, ньшкева барана qайим бари у әʹрд бу һʹәрʹи-чамурʹ. Барак пәй ордийа Сисәра кʹәт у wәкә 24 километра пәй wан чу, һʹәта Һарошәте. Рʹева әʹрәба Сисәра кʹәтә һʹәрʹийе, у әw мәщбур бу әʹрәба хwәйә бекер щида бьһелә у бьрʹәвә. Жь тьрсе әw рʹәви у чу алийе Тсаананниме. Сәва кö хwә вәшерә, ль wе дәре әw кʹәтә мала жьнькәкә бь наве Йаел. Сисәра qайим wәстийайи бу, у чу рʹаза. Чахе әw кʹур рʹазайи бу, һьнге Йаеле wи кöшт (Һʹакьм. 4:17-21). Бәле, бь аликʹарийа Йаһоwа Исраелийа дьжмьнед хwә алт кьрьн.b

НЬҺЕРʹАНДЬНА НӘРʹАСТ СӘР ХЬЗМӘТИЙА БЬ РʹӘЗӘДЬЛИ

9. Чь те готьне Һʹакьмти 5:20, 21-да дәрһәqа шәрʹе Исраелийа тʹәви Сисәра?

⁹ Кʹьтеба Һʹакьмти сәре 4 у 5 гәрәке тʹәвайи бенә хwәндьне, чьмки әwана һәвдö тʹәмам дькьн. Мәсәлә, Һʹакьмти 5:20, 21-да те готьне: «Стейрка жь әʹзманава щәнге [шәрʹ] кьрьн, ль дьжи Сисәра жь дәстәкед хwәва щәнге кьрьн. Чʹәме Кишоне, әw чʹәме мәзьн, . . . wан малтьн у бьрьн». Гәло әwана бь аликʹарийа мьлйакʹәта сәркʹәтьн, йан баран qайим бари, ләма öса qәwьми? Кʹьтеба Пироз рʹастә-рʹаст ве йәке набежә, ле фәʹмдари йә Йаһоwа öса кьр кö һәма wәʹде шәрʹ баранәкә qайим бари. Жь wе баране әʹрд öса бу һʹәрʹи, кö 900 әʹрәбед дьжмьна теда ман дәрнәкʹәтьн. Һʹакьмти 4:14, 15-да чәнд щийа ньвисар ә, wәки бона сәркʹәтьне Исраели шькьри дьданә Йаһоwа. Бәле, әw 10 000 Исраели кö бь рʹәзәдьли чунә шәрʹ, пʹайе хwә нәдан кö wана хwәха дьжмьн алт кьр.

10, 11. Чь йә «Мәроз» у чьрʹа әw һатә ньфьрʹкьрьне?

¹⁰ Ньһа wәрә дина хwә бьдьне паше чь qәwьми. Паши сәркʹәтьне, Дәбора у Барак бона пәсьне Йаһоwа дьстьран. Wана кʹьламеда гьлийед öса готьн: «Мьлйакʹәте Йаһоwа гот: ‹Ньфьрʹа ль Мәроз бькьн! Ньфьрʹа бьнәлийед wи бькьн! Чьмки әwана нәһатьн аликʹарийе бьдьн Йаһоwа, нәһатьн сәва аликʹарийе бьдьн Йаһоwа тʹәви йед qәwат›» (Һʹакьм. 5:23, ДТʹ).

¹¹ Әм дәрһәqа Мәроз тʹö тьшти ньзаньн, чьмки дьqәwьмә әw öса һатә ньфьрʹкьрьне кö öнда бу чу. Дьбәкә Мәроз әw шәһәр ә, бьнәлийед кʹижани нәһатьн аликʹарийе бьдьнә Барак. Әʹламәти кö лазьм ьн мәрьв сәва бь рʹәзәдьли һәрʹьнә шәрʹ, һʹәму дәра бәла бьбу, чьмки жь щурʹә-щурʹә шәһәра 10 000 мәрьв бь рʹәзәдьли һатьн шәрʹ. Йан жи дьбәкә Мәроз әw шәһәр ә, кʹижанирʹа Сисәра рʹәви, у бьнәлийе ве әw нәгьртьн. Бьдьнә бәр чʹәʹве хwә, wәки бьнәлийед Мәрозе дьвиньн, кö чаwа Сисәрайе зöлм кʹуче wанда дьрʹәвә, тʹәне йә у тʹәвһәв ә. Wана әw дәрәщә дькарьбун бьдана хәбате, сәва qьрара Йаһоwа биньн сери у бона ве йәке Йаһоwа wе wана кʹәрәм кьра. Ле ча те кʹьфше, тʹалаша wан нибуйә кö чь дьqәwьмә у чь лазьм ә бькьн. Рʹасти жи әwана чьqас щöдә дьбун жь Йаеле, йа кö гәләк мерхас бу (Һʹакьм. 5:24-27).

12. Һʹакьмти 5:9, 10-да кʹижан дö щурʹә мәрьв тенә бәрамбәркьрьне, у әw чь дәрс ә иро бона мә?

¹² Һʹакьмти 5:9, 10-да, әм дьвиньн фьрqийа ортʹа wан мәрьвед кö чун пьштгьрийа Барак бькьн, у йед кö нәчун. Дәбора у Барак пʹайе сәрокед Исраеле дан, чьмки әwана бь рʹәзәдьли тʹәви щьмәʹте чун. Әwана щöдә дьбун жь сийаред «кʹәре сьпи», йед кö öса qöрʹә бун хwә нәдьгьртьн һәрʹьн шәрʹ. У öса жи йед кö «ль сәр хәличәйан» рʹудьньштьн у йед кö «рʹеда» дьчун, жийина рʹьһʹәт у дәwләмәнд һʹьз дькьрьн. Wана нәдьхwәст щәфе бьдьнә хwә у һәрʹьнә шәрʹ. Ле әwед кö бь рʹәзәдьли чунә шәрʹ сәва пьштгьрийа Барак бькьн, чунә сәр тʹәпе Тәборе у ль нәwала Кишонейә һʹәрʹи. Ләма жи wан мәрьварʹа йед кö тʹәне рʹьһʹәти у дәwләмәндти һʹьз дькьрьн, һатә готьне кö дина хwә бьдьнә wан, йед кö бь рʹәзәдьли чунә шәрʹ. Бәле, әwана гәрәке кʹур бьфькьрийана кö wана чь мәщал öнда кьр сәва пьштгьрийа qьрара Йаһоwа бькьн. Иро әм жи гәрәке хwә бьщерʹьбиньн, һәла әм ча дьньһерʹьн сәр хьзмәтийа хwә Хwәдерʹа.

13. Чьда бәрәка Рубен, Дан у Ашер щöдә дьбу жь бәрәка Зәбулон у Нәфтәли?

¹³ Әwед кö бь рʹәзәдьли чубунә шәрʹ, дькарьбун дәсте Йаһоwайи һьмзор бьдитана. Wана дькарьбун гьли кьрана дәрһәqа «кʹаред Хöдан йед рʹаст» (Һʹакьм. 5:11). Ле һʹьш-аqьле бәрәка Рубен, Дан у Ашер тʹәне сәр һәбуке бу. Чаwа Һʹакьмти 5:15-17-да әм дьхуньн, һʹьш-аqьле wан сәр кәрийед wан, гәми у щийед wани рʹьһʹәт бу, нә кö сәр шьхöле Йаһоwа. Ле бәрәка Зәбулон у Нәфтәли, әʹмьре хwә жи кьрьнә бьн хофе, сәва пьштгьрийа Дәборайе у Барак бькьн (Һʹакьм. 5:18). Жь wан һәрдö щурʹә мәрьва, әм дькарьн хwәрʹа дәрсәкә фәрз һьлдьн.

«ШЬКЬРИЙЕ БЬДЬНӘ ЙАҺОWА»

14. Иро ча әм пьштгьрийа сәрwертийа Йаһоwа дькьн?

¹⁴ Иро әм сәва пьштгьрийа Йаһоwа бькьн начьнә шәрʹ, ле qәдьрәки мәйи мәзьн һәйә кö әм дькарьн бь мерхаси у бь хирәт шьхöле Хwәде бькьн. Илаһи иро тʹәшкиләта Йаһоwада лазьм ьн мәрьвед кö бь рʹәзәдьли шьхöле wи бькьн. Милйон хушк-бьра бь рʹәзәдьли ча хьзмәткʹаред һәртʹьм хьзмәт дькьн. Мәсәлә, ча пешәнг, йан Бәйтʹәледа хьзмәт дькьн, һьнәк жи бь рʹәзәдьли авакьрьна Одед Щьватада йан жи одед щьватед мәзьнда аликʹарийе дьдьн. Һьн жи щабдарийед мәзьн сәр стуйе гәләк рʹуспийа нә, йед кö хьзмәт дькьн комитейа һәвкʹарийа тʹәви нәхwәшхана. Һьнәк жи щьватед мәзьн саз дькьн. Тʹö щар дöдьли нәбьн, wәки Йаһоwа гәләк qимәт дькә рʹәзәдьлийа wә у тʹö щар шьхöле wә бир накә (Ибрн. 6:10).

15. Ча әм дькарьн хwә бьщерʹьбиньн һәла әм хирәт ьн шьхöле Хwәдеда йан на?

¹⁵ Wе баш бә һәрге щара хwә бьщерʹьбиньн, һәла әм ча дьньһерʹьн сәр хьзмәтийа рʹәзәдьли. Пьрсед öса бьдьнә хwә: «Гәло әз шьхöле хwә давежьм сәр стуйед хушк-бьра? Әз пәй тьштед материали дькʹәвьм, йан бь дьл у щан дьхwазьм Хwәдерʹа хьзмәт кьм? Гәло әз чʹәʹв дьдьмә баwәри у мерхасийа Барак, Дәборайе у 10 000 Исраелийа кö бь рʹәзәдьли чунә шәрʹ? Гәло әз һʹәму тьшти дькьм, сәва хьзмәтийеда хирәт бьм? Гәло нета мьн әw ә кö дәрбази шәһәр йан wәлатәки майин бьм, сәва гәләк пʹәра хwәрʹа qазанщ кьм?» Һәрге öса нә, гәло тö дöа дьки Хwәдерʹа сәва әw тәрʹа әʹйан кә, һәла әw йәк wе ча сәр нәфәред тә у сәр щьвате һʹöкöм бә?c

16. Чь тьште qимәт әм дькарьн бьдьнә Йаһоwа?

¹⁶ Йаһоwа qәдьрәки мәзьн да мә, кö әм дькарьн пьштгьрийа сәрwертийа wи бькьн. Шәйтʹан öса кьр кö мәрьвед пешьн Адәм у Һеwа мьqабьли Йаһоwа рʹабун у әw һʹәта ньһа жи дьхwазә мәрьва жь Хwәде дур хә. Ле чахе әм пьштгьрийа сәрwертийа Йаһоwа дькьн, әм Шәйтʹанрʹа әʹйан избат дькьн wәки әм алийе Хwәде нә. Баwәри у амьнийа мә һьндава Йаһоwа, мә һелан дькә кö бь рʹәзәдьли жерʹа хьзмәт кьн, у әw йәк дьле wи гәләк ша дькә (Мәтʹлк. 23:15, 16). Амьнийа мә мәщале дьдә Йаһоwа кö щаба qәрфе Шәйтʹан бьдә (Мәтʹлк. 27:11). Тьштәки qимәт кö әм дькарьн бьдьнә Йаһоwа, әw һәйә гöһдари. Бәле, чахе әм гöрʹа wи дькьн, дьле wи гәләк ша дьбә.

17. Һʹакьмти 5:31 чь мәрʹа әʹйан дькә дәрһәqа ахьрийе?

¹⁷ Зутьрәке wе тʹәмамийа әʹрде бь wан мәрьва тʹьжә бә, йед кö пьштгьрийа сәрwертийа Йаһоwа дькьн. Рʹасти жи әм чьqас һивийа ве рʹоже нә! Әм жи мина Дәборайе у Барак, дьбежьн: «Йа Хöдан, бьра һʹәму нәйаред тә бь wи авайи тʹöнә бьбьн; ле бәле йед кö жь тә һʹьз дькьн, бьра бьбьн мина рʹожа кö дь һеза тәда дәрдькʹәвә!» (Һʹакьм. 5:31). Әw гьли wе бенә сери, чахе Йаһоwа qьрʹа дьнйа Шәйтʹан бинә. Гава кö шәрʹе Һармәгәдон дәстпебә, wе нәлазьм бьн мәрьвед кö шәрʹ бькьн сәва qьрʹа дьжмьна биньн. Wи чахи әме бьсәкьньн у бьвиньн кö Йаһоwа wе ча мә хьлаз кә (2 Дир. 20:17). Ле ньһа, гәләк мәщалед мә һәнә кö бь мерхаси у хирәт пьштгьрийа Йаһоwа бькьн.

18. Һәрге тö бь рʹәзәдьли Хwәдерʹа хьзмәт дьки, әw йәк wе сәр йед дьн ча һʹöкöм бә?

¹⁸ Чахе Дәбора у Барак шәрʹда сәркʹәтьн, wана бь кʹьламе рʹумәт данә Йе Һәри Жорьн. Wана дьстра: «Бона рʹәзәдьлийа щьмәʹте, шькьрийе бьдьнә Йаһоwа!» (Һʹакьм. 5:1, 2, ДТʹ). Бәле, һәрге әм бь рʹәзәдьли Йаһоwарʹа хьзмәт дькьн, йед дьн жи wе һелан бьн «шькьрийе бьдьнә Йаһоwа!»