Мина Йаһоwа Һәq бьн

1, 2. а) Чь нәһәqи һатә кьрьне һьндава Набот у кöрʹед wи? б) Әме ве готареда дәрһәqа кʹижан дö һʹöнöра шеwьр кьн?

БЬДЬНӘ бәр чʹәʹве хwә әве дәрәще. Шәрʹәки мәзьн авитьнә мерькәки. Дö мәрьвед зöлм дәрһәqа wи шәʹдәтийа дәрәw дан у öса кьрьн кö әw мер данә бәр кәвьра. Ле нә кö тʹәне әw мер һатә кöштьне, ле кöрʹед wи жи. Бьдьнә һʹәсабе хwә wәки мәрьвед wани незик ча дьлшкәсти бун у тʹәвһәв бун, чьмки заньбун кö әwана бе мәʹни һатьнә кöштьне. Дьле wан дьшәwьти бона ве нәһәqийа бехwәдети. Бь рʹастийе әw сәрһати чʹирок нинә. Әw йәк qәwьми тʹәви Набот, хьзмәткʹаре Йаһоwайи амьн, йе кö wәʹде сәрwертийа Аһаб Пʹадша дьжит (1 Пʹадш. 21:11-13; 2 Пʹадш. 9:26).

² Ве готареда әме шеwьр кьн сәрһатийа Набот. Öса жи әме шеwьр кьн кö рʹуспики амьн йе кö qьрʹна йәкеда дьжит, чь шашикә мәзьн кьр. Жь wан сәрһатийа әме пебьһʹәсьн ча дькарьн чʹәʹв бьдьнә һәqийа Йаһоwа, чахе щьватеда рʹасти нәһәqийе тен. Әме öса жи бьвиньн wәки чьqас фәрз ә мьлук бьн у һазьр бьн тʹьме бьбахшиньн.

НӘҺӘQИЙА БЕХWӘДЕТИ

3, 4. Набот мәрьвәки ча бу, у чьрʹа әw qайил нәбу рʹәзе тьрийе хwә бьфрошә Аһаб?

³ Гәләк Исраели чʹәʹв дьданә Аһабе хьраб у жьна wийә зöлм Изабеле. Wана сәре хwә бәр хöдане qәлп Баәʹл датанин, Йаһоwа беһöрмәт дькьрьн у qануне wи пьшт гöһе хwәва дьавитьн. Ле Набот мина wан нибу, әw Йаһоwарʹа амьн бу у һәләqәтийа хwә тʹәви Йаһоwа һәла һе сәр әʹмьре хwәрʹа жи дьгьрт.

⁴ Бьхунә 1 Пʹадшати 21:1-3. Аһаб Наботрʹа гот wәки дьхwазә рʹәзе тьрийе wи бькʹьрʹә йан жи дәwсе рʹәзәки дьн бьдә wи. Набот qайил нәбу. Гәло чьрʹа? Әwи Аһабрʹа шьровәкьр: «Бьра Хöдан мьн бьпарезә кö әз мьраза бапиред хwә бьдьм тә». Набот qайил нәбу, чьмки qануна Йаһоwа кö Исраелийарʹа һатә дайине, qәдәхә дькьр мьлкʹе кал-баве хwә бьфрошьн (Qан. Кʹаһ. 25:23; Жьмар 36:7). Бәле, Набот гöрʹа Йаһоwа дькьр.

5. Изабеле чь кьр сәва Набот бе кöштьне?

⁵ Сәд һʹәйф, Аһаб у жьна wи, бәла Набот дане чьмки әwи рʹәзе хwә нәда wан. Сәва кö әв рʹәзе тьрийа бькʹәвә дәсте Аһаб, жьна wи Изабеле öса кьр, кö шәрʹ бавежьнә Набот. У йазьх, бона ве йәке Набот у кöрʹед wи һатьнә кöштьне. Ле Йаһоwа гәло чь кьр чахе әw нәһәqийа мәзьн дит?

ДИWАНА ХWӘДЕЙЕ ҺӘQ

6, 7. Йаһоwа ча да кʹьфше wәки әw һәqийе һʹьз дькә, у чьрʹа әw йәк дьле мәрьвед Набот рʹьһʹәт дькьр?

⁶ Йаһоwа дәрберʹа Елйас пʹехәмбәр шандә бал Аһаб. Елйас wи нәһәq кьр кö әw меркöж ә у дьз ә. Гәло Йаһоwа ча Аһаб щәза кьр? Йаһоwа гот кö һәма әw бәла кʹижан һатә сәре Набот у кöрʹед wи, wе бе сәре Аһаб, жьна wи, у кöрʹед wи (1 Пʹадш. 21:17-25).

⁷ Нәфәр у һәвалед Набот дьнәʹлийан, чьмки Аһаб зöлмәкә гьран кьрьбу. Ле дьле wанда рʹьһʹәти жи һәбу, чьмки wана заньбу кö Йаһоwа һʹаш жь ве нәһәqийе һәйә у пьшт гöһе хwәва нәавит. Ле йәкә мьлукти у итʹбарийа wан һьндава Йаһоwа һатә щерʹьбандьне, чахе тьштәк һатә гöһастьне.

8. Аһаб чь кьр чахе дәрһәqа диwана Хwәде пеһʹәсийа, у ахьрийа ве йәке чь бу?

⁸ Гава Аһаб диwана Йаһоwа һьндава хwә бьһист, «кʹьнще хwә чʹьранд у пәрталәки ль сәр бәдәна хwәва пʹечʹа кьр у рʹожийе гьрт» у дьлтәнг дьчу-дьһат. Бәле, Аһаб хwә ньмьз кьр у бона кьред хwә пʹошман бу. Ле ахьрийа ве йәке чь бу? Йаһоwа готә Елйас: «Чьмки әwи ль бәр мьн хwә ньмьз кьр, әзе әwе бәлайе рʹожед wида нәйньм. Әзе рʹожед кöрʹед wида әwе бәлайе биньм сәр мала wи» (1 Пʹадш. 21:27-29, ДТʹ; 2 Пʹадш. 10:10, 11, 17). Йаһоwа, йе кö «дьла дьщерʹьбинә», һьндава Аһаб рʹасти жи рʹәʹма мәзьн да кʹьфше (Мәтʹлк. 17:3).

МЬЛУКТИ WЕ МӘ ХWӘЙ КӘ

9. Мьлуктийе чьда дькарьбу али нәфәр у һәвалед Набот бькьра?

⁹ Гәло әw сафикьрьна Хwәде ча һʹöкöм бу сәр нәфәред Набот, йед кö һʹаш жь зöлмийа Аһаб һәбун? Баwәрийа нәфәр у һәвалед Набот дькарьбу бьһата щерʹьбандьне, чьмки әwана һивийе бун кö Аһаб wе һәqе хwә бьстинә. Ле мьлуктийе wе али wан бькьра баwәрийа хwә öнда нәкьн. Гәло чаwа? Һәрге әwана мьлук буна, wана wе бәрдәwам кьра диса Йаһоwарʹа хьзмәт кьрана у дöдьли нәбуна кö Хwәде нькарә нәһәqийе бькә. (Бьхунә Qануна Дöщари 32:3, 4.) Чахе Йаһоwа Набот, кöрʹед wи у малбәта wи жь мьрьне рʹакә, һьнге әwана wе бь тʹәмами һәqийа Йаһоwа бьвиньн (Иб. 14:14, 15; Йуһʹн. 5:28, 29). Мәрьве мьлук дöдьли нинә кö Хwәде wе диwана һәр тьшти бькә, «дьхwазә бьра баш бә йан жи хьраб бә, тʹәви һәр тьштед вәшарти» (Wаиз 12:14). Бәле, чахе Йаһоwа диwане дькә, һәр тьшти һьлдьдә һʹәсаб, кʹижан кö дьбәкә әм һʹаш пе тʹöнә нә. Ләма жи сәва әм баwәрийа хwә һьндава Йаһоwа öнда нәкьн, лазьм ә әм мьлук бьн.

10, 11. а) Кʹижан дәрәщада баwәрийа мә дькарә бе щерʹьбандьне? б) Мьлукти чь щурʹәйи мә хwәй дькә?

¹⁰ Һәрге щьватеда рʹуспийа тьштәк сафи кьрьнә, ле тö qайил нини тʹәви ве сафикьрьне, тöйе чь бьки? Бәʹса хәбәре, тöйе ча хwә бьди кʹьфше һәрге щьватеда щабдари жь тә йан жь мәрьве кö тö һʹьз дьки стандьнә? Йан жи һәрге нәфәрәки тә йан һәвале тә жь щьвате һатийә дәрхьстьне, ле тö сафикьрьна рʹуспийарʹа нәqайил и? Йан тöйе чь бьки һәрге кәсәк гöнә кьрийә, у һьндава wида рʹәʹмти данә кʹьфше, ле бь рʹастийе әw нәһежа бу? Әw дәрәщә дькарьн баwәрийа мә һьндава Йаһоwа у тʹәшкиләта wи, бьщерʹьбиньн. Wан дәрәщада мьлукти wе али мә бькә. Гәло чаwа? Wәрә дö тьшта шеwьр кьн.

¹¹ Йа пешьн, һәрге әм мьлук ьн, әме рʹази бьн кö әм һәр тьшти ньзаньн. Һәрге жи әм дьфькьрьн кö дәрһәqа ве дәрәще һәр тьшти заньн, йәкә тʹәне Йаһоwа дькарә дьле wи мәрьви бьхунә (1 Сам. 16:7). Һәрге әм әве йәке бир нәкьн, әме бь мьлукти биньн сәр хwә кö синоред мә һәнә у чахе лазьм бә әме фькьред хwә бьгöһезьн. Йа дöда, һәрге әм мьлук бьн, әме гöрʹа Йаһоwада бьн у бь сәбьр һивийе бьн кö Йаһоwа wе һʹәму нәһәqийа рʹаст кә. Кʹьтеба Пироз дьбежә: «Жь йед кö жь Хwәдева дьтьрсьн . . . wе бьбә qәнщи, . . . ле бәле wе жь йе хьрабрʹа нәбә qәнщи у wе рʹожед wан . . . дьреж нәкә» (Wаиз 8:12, 13). Бәле, һәрге әм мьлук бьминьн, әм у йед дьн wе кʹаре бьстиньн. (Бьхунә 1 Пәтрус 5:5.)

ДÖРʹУТИ

12. Әме кʹижан сәрһатийе шеwьр кьн у чьрʹа?

¹² Qьрʹна йәкеда Мәсиһийед жь Әнтакйа Сурйайе, рʹасти чәтьнайе һатьн. Әwана һатьнә щерʹьбандьне һәла wе мьлук бьминьн у һазьр бьн сәва бьбахшиньн. Wәрә шеwьр кьн ве сәрһатийе у хwә бьщерʹьбиньн һәла әм һеса дьбахшиньн йан на. У әме фәʹм кьн кö чахе әм дьбахшиньн, әw йәк тʹәви һәqийа Йаһоwа ча гьредайи йә.

13, 14. Чь щабдарийед Пәтрус һәбун, у әwи ча мерхаси да кʹьфше?

¹³ Гәләк Мәсиһийа рʹьнд нас дькьрьн Пәтрусе шанди кö рʹуспи бу. Әw һәвале Иса бу у гәләк щабдарийед wийи мәзьн һәбун (Мәт. 16:19). Мәсәлә, сала 36 Д.М., щабдарийа Пәтрус әw бу кö һәрʹә мала Корʹнелйо, сәва wи у малбәта wирʹа мьзгинийе гьли кә. Әw шьхöле wи мәхсус бу, чьмки Корʹнелйо нә жь мьләте Щьһу бу, демәк нәсьнәткьри. Чахе Корʹнелйо у малбәта wи рʹöһʹе пироз стандьн, Пәтрус гот: «Иди кʹи дькарә нәһелә кö әвана пе аве бенә ньхöмандьне, йед кö мина мә рʹöһʹе пироз жи стандьн?» (Кʹар. Шанд. 10:47).

¹⁴ Сала 49 Д.М., шанди у рʹуспийед Оршәлимеда шеwьр дькьрьн, һәла лазьм ә мәрьвед жь мьләте нәщьһу кö бунә Мәсиһи бенә сьнәткьрьне. Сәр ве щьвине Пәтрус бь мерхаси хәбәр дьда у wан бьрарʹа дьгот кö чәнд сал пешда мәрьвед жь мьләте нәщьһу рʹöһʹе пироз стандьнә. У ве йәкеда Пәтрус хwәха шәʹдә бу, у ләма qьрʹна йәкеда кʹома рʹебәрийерʹа һеса бу кö сафикьрьне бькьн (Кʹар. Шанд. 15:6-11, 13, 14, 28, 29). Бәле, әм дькарьн бежьн wәки Щьһу у Мәсиһийед нә мьләте щьһу, wе рʹази буна кö Пәтрус бь мерхаси wан бьрарʹа шьровәкьр. Хушк-бьрарʹа һеса бу итʹбарийа хwә Пәтрус биньн, чьмки әw мәрьвәки рʹöһʹанида гьһишти бу (Ибрн. 13:7).

15. Пәтрус чь шаши кьр чахе Әнтакйа Сурйайеда бу? (Бьньһерʹә шькле әʹwльн.)

¹⁵ Һьнәк wәʹдә паши ве щьвине сала 49 Д.М., Пәтрус чу Әнтакйа Сурйайе. Чахе әw ль wедәре бу, әwи аза тʹәви хушк-бьред кö жь мьләтед дьн бун, хәбәр дьда у wәʹдә дәрбаз дькьр. Ле паше ньшкева әwи дәстпекьр дури wан гьрт у ида нә жи нан тʹәви wан дьхwар. Бьдьнә һʹәсабе хwә әwана чьqас зәндәгьрти ман у дьлтәнг бун гава әw йәк дитьн. Хенщи ве йәке, Щьһуйед wе щьватеда, у һәла һе Барнабас жи, чʹәʹв данә Пәтрус. Гәло чьрʹа Пәтрус кö Мәсиһийе гьһишти бу у рʹуспи бу, шашикә öса бәрʹда? Нә ахьр бона ве йәке щьват дькарьбу пʹарәвәбуйа? Гәло әм жь шашийа Пәтрус чь дәрсе дькарьн хwәрʹа һьлдьн, у әw йәк ча дькарә али мә бькә, һәрге рʹуспики бь гьлийа йан бь кьред хwә дьле мә ешандийә?

16. Пәтрус ча һатә ширәткьрьне, у чь пьрс пешда тен?

¹⁶ Бьхунә Галати 2:11-14. Һьнге тьрса мәрьва кʹәтә сәр Пәтрус (Мәтʹлк. 29:25). Рʹаст ә Пәтрус заньбу wәки Йаһоwа мьләтед дьн жи qәбул кьрийә, ле wи чахи Пәтрус тьрсийа кö Щьһуйед сьнәткьри wе чь бежьн. Чахе Пәтрус сәр щьвина Оршәлимеда дьгот кö Хwәде мьләтед дьн qәбул дькә, Паwлос жи ль wедәре бу. У гава Паwлос Антәкйайеда дöрʹутийа Пәтрус дит, мьqабьли wи рʹабу у дöрʹутийа wи да рʹуйе wи (Кʹар. Шанд. 15:12; Галт. 2:13). Ле гәло хушк-бьред кö нә мьләте Щьһу бун, ча ньһерʹин сәр ве нәһәqийа һьндава хwә? Гәло әwана лькʹöмин? Гәло Пәтрус сәва шашийа хwә щабдарийед хwә öнда кьр?

ҺӘВДÖ БЬБАХШИНЬН

17. Пәтрус чь кʹар станд кö Йаһоwа бахшандә wи?

¹⁷ Пәтрус йәки мьлук бу у әwи ширәткьрьна Паwлос qәбул кьр. Кʹьтеба Пироз набежә кö Пәтрус щабдарийед хwәйә щьватеда öнда кьр. Бь рʹастийе, әwи паше бь рʹебәрийа Хwәде дö нәʹмә ньвисин, кʹижан кö бунә пʹара Кʹьтеба Пироз. Дина хwә бьдьне, кö Пәтрус нәʹма хwәйә дöдада сәр Паwлос дьбежә «бьре . . . дәлал» (2 Пәт. 3:15). Бәле, шашийа Пәтрус дьqәwьмә дьле хушк-бьред нә жь мьләте Щьһу ешанд, ле йәкә Иса сәре щьвате, диса жи wи qәбул дькьр (Әфәс. 1:22). Әwе дәрәще, мәщал чекьр wан хушк-бьрарʹа, сәва чʹәʹв бьдьнә Иса у Баве wи, у бьбахшиньн Пәтрус. Әм баwәр ьн кö жь wан хушк-бьра тʹö кәс сәва шашийа мәрьве гöнәкʹар нәлькʹöмийә.

18. Кʹижан дәрәщада әм дькарьн чʹәʹв бьдьнә һәqийа Йаһоwа?

¹⁸ Чаwа qьрʹна йәкеда, öса жи иро рʹуспийед бекемаси тʹöнә нә. Әм гöнәкʹар ьн у ләма «әм һʹәму жи гәләки шашийа дькьн» (Аqуб 3:2). Әм әве йәке рʹьнд заньн, ле чахе һьндава мәда шаши те кьрьне, әw ида нәһеса йә. Ләма жи пьрс пешда те, wан дәрәщада әме чʹәʹв бьдьнә һәqийа Йаһоwа? Бәʹса хәбәре, һуне ча хwә бьдьнә кʹьфше, һәрге рʹуспик тьштәки öса дьбежә кö те кʹьфше wәки әw фьрqийе дькә ортʹа хушк-бьра? Йан жи, һуне бьлькʹöмьн һәрге рʹуспик беһʹәмде хwә пе гьлики wә бьхәйидинә у дьле wә бешинә? Дәwса кö дәрберʹа бьфькьрьн wәки әw нәһежа йә рʹуспи бә, бь сәбьр һивийа Иса бьн, кö әw wе дәрәща рʹаст кә. Һе баш ә бьфькьрьн кö әw бьра ча нава салада бь амьни Хwәдерʹа хьзмәт дькә, нә кö һʹьш-аqьле хwә бьдьнә сәр шашийа wи. Ле гәло һуне ша бьн һәрге әw рʹуспийе кö нәһәqи һьндава wә кьрийә, диса рʹуспи дьминә у һәла һе сәрда жи щабдарийе зедә дьдьнә wи? Һәрге һун бь дьл у щан бьбахшиньнә wи бьрайи, бь ве йәке һуне нишан кьн кö чʹәʹв дьдьнә һәqийа Йаһоwа. (Бьхунә Мәтта 6:14, 15.)

19. Нета мә гәрәке чь бә?

¹⁹ Әм һәqийе һʹьз дькьн, у ләма һивийа wи wәʹдәйи нә чахе Йаһоwа кʹокева һʹәму нәһәqийа кö жь Шәйтʹан у дьнйа wийә хьраб тен, бьдә һьлдане (Иша. 65:17). Һʹәта әw wәʹдә бе, wәрә әм бь мьлукти биньн сәр хwә кö синоред мә һәнә у бь дьл у щан бьбахшиньнә wан йед кö һьмбәри мә гöнә дькьн. Чахе әм öса бькьн, әме чʹәʹв бьдьнә һәqийа Йаһоwа.