«Һʹакьме Тʹәмамийа Дьнйайе» Тʹьме Һәq ә

1. Бьраһим ча да кʹьфше кö дöдьли нинә һәqийа Йаһоwада? (Бьньһерʹә шькле әʹwльн.)

«ӘВ ЙӘК набә кö һʹакьме тʹәмамийа дьнйайе диwана рʹаст нәкә» (Дәстп. 18:25). Бь wан гьлийа Бьраһим да кʹьфше кö әw дöдьли нәдьбу, wәки Йаһоwа wе бь һәqи диwана Содом у Гоморайе бькә. Бьраһим сәд сәләфи заньбу, wәки Йаһоwа wе тʹö щар нәһәqийе нәкә у «рʹаста тʹәви нәqәнща» öнда нәкә. Һʹьше Бьраһимрʹа жи дәрбаз нәдьбу кö Хwәде дькарә тьштед öса бькә. Wәкә 400 сал дәрбаз бун, Йаһоwа дәрһәqа хwә гьлийед öса гот: «Әw Qәйа йә, кьрьна wи кʹамьл ә, чьмки һʹәму рʹийед wи һәqи нә. Хöдан амьн ә, нәһәqи щәм wи тʹöнәйә, әw һәq ә у ль сәр һәqийе йә» (Qан. Дщр. 31:19; 32:4).

2. Чьрʹа Йаһоwа нькарә нәһәqийе бькә?

² Ле чьрʹа Бьраһим сәд сәләфи баwәр бу, кö Йаһоwа тʹьме диwана рʹаст дькә? Чьмки Йаһоwа хwәха һәqийе у рʹастийеда мәсәләкә лапи мәзьн ә. Хәбәред Ибрани кö һатьнә wәлгәрʹандьне ча «һәqи» у «рʹасти», Кʹьтеба Пирозда гәләк щар кʹеләка һәв тенә ньвисаре. Дькарьн бежьн кö ортʹа wан дö хәбәрада фьрqи тʹöнә. Бәле, Йаһоwа рʹаст ә, демәк әw тʹьме бь һәqийе тьшта сафи дькә. Чаwа кö Хәбәра wи дьбежә, «әw рʹастийе у һәqийе һʹьз дькә» (Зәб. 33:5).

3. Мәсәле гьли кьн кö мәрьв ве дьнйайеда рʹасти чь щурʹә нәһәqийа тен.

³ Әм дьлрʹьһʹәт ьн чьмки заньн wәки Йаһоwа тʹьме һәq ә. Ле әв дьнйа бь нәһәqийе тʹьжә йә. Мәсәлә, һьнә мәрьв кʹәтьнә кәле, чьмки шәрʹ авитьнә wан. Тʹәне wан пашwәхтийада чахе техноложи пешда чу, һьнә мәрьвед бесущ кö бь дәһа сала кәледа бун, дәркʹәтьн жь кәле. Чьмки бь сайа wан техноложийа һатә избаткьрьне, wәки әwана нә нәһәq бун. Бәле, чахе әм нәрʹастийед öса педьһʹәсьн, әм бинтәнг дьбьн у һәла һе жи һерс дькʹәвьн. Ле щара әм рʹасти нәһәqийед öса жи тен, кʹижан кö дьһа чәтьн ә сәбьр кьн.

НӘҺӘQИ ЩЬВАТЕДА

4. Чь дәрәщада баwәрийа мә дькарә бе щерʹьбандьне?

⁴ Бь рʹастийе әм әʹщебмайи наминьн чахе ве дьнйайеда рʹасти нәһәqийе тен. Ле баwәрийа мә дькарә бе щерʹьбандьне, чахе мәва те кʹьфше кö щьватеда нәһәqи те кьрьне. Һуне ча хwә бьдьнә кʹьфше, һәрге щьватеда һун нәрʹастийе бьвиньн, йан жи һәрге хушкәк йан бьрак һьндава wә нәһәqийе бькә? Һуне бьлькʹöмьн?

5. Чьрʹа әм гәрәке әʹщебмайи нәминьн һәрге щьватеда нәһәqийе дьвиньн?

⁵ Әм гьшк гöнәкʹар ьн у бьн һʹöкöме гöнәда ньн, ләма жи әм фәʹм дькьн кö щара щьватеда жи әм дькарьн һьндава хwә йан һьндава кәсәки дьн нәһәqийе бьвиньн (1 Йуһʹн. 1:8). Рʹаст ә әw йәк һʹәзара щарәке дьqәwьмә, ле Мәсиһийед амьн әʹщебмайи наминьн у нә жи дьлькʹöмьн һәрге нәһәqийе дьвиньн. Чахе әм алийе хушк-бьрада нәрʹастийе дьвиньн, әw йәк һеса нинә. Сәва кö wе дәрәщеда амьнийа хwә хwәй кьн, Йаһоwа Хәбәра хwәда мәрʹа ширәтед баш дайә (Зәб. 55:12-14).

6, 7. Бьраки мә щьватеда рʹасти чь нәһәqийе һат, у ве дәрәщеда әwи бь сайа кʹижан һʹöнöра хwә рʹаст да кʹьфше?

⁶ Дина хwә бьдьнә сәрһатийа бьраки бь наве Wили Дел. Дәстпека сала 1931-да, Дел бь амьни хьзмәт дькьр Бәйтʹәла Бернеда, (Сwисрә). Сала 1946-да, әw чу Мәкʹтәба Гиләде Нийу Йоркеда. Паши хьлазкьрьна ве мәкʹтәбе, әw Сwисрәйеда һатә кʹьфшкьрьне wәки шьхöле бәрпьрсийартийе бькә. Дәрһәqа хwә әwи гьли кьр: «Мәһа Гöлане сала 1949-да, мьн филиала Бернеда гот wәки әз дьзәwьщьм». Гәло филиале чь щаба хwә да? Щаб әw бу: «Хенщи пешәнгтийе, щабдарийед дьн тöйе нәстини». Дел гьли кьр: «Мьнрʹа изьн нәдьдан кö готара жи бьхуньм. . . . Гәләк хушк-бьра ида сьлав жи нәдьданә мә, у әwана тʹәви мә öса бун, те бежи әм жь щьвате һатьбунә дәрхьстьне».

⁷ Гәло Дел ве дәрәщеда ча хwә да кʹьфше? Әwи гьли кьр: «Мә заньбу wәки Кʹьтеба Пироз qәдәхә накә кö бьзәwьщьн, ләма жи мә бь дöа аликʹари жь Йаһоwа дьхwәст у мә баре хwә да сәр wи». Ахьрийеда, ньһерʹандьна нәрʹаст сәр зәwаще һатә рʹасткьрьне у Делрʹа диса щабдари дан. Бәле, амьнийа wи һьндава Йаһоwа һатә кʹәрәмкьрьне.a Wе керһати бә һәрге әм пьрсед öса бьдьнә хwә: «Гава әз рʹасти нәһәqийе бем, әзе жи ча мәрьвәки рʹöһʹани хwә бьдьмә кʹьфше? Гәло әзе бь сәбьр һивийа Йаһоwа бьм, йан әзе әwе дәрәще һьлдьмә дәсте хwә у бь сәри хwә сафи кьм?» (Мәтʹлк. 11:2; бьхунә Миха 7:7.)

8. Чьрʹа щара дькарә бь шаши мәва бе кʹьфше кö һьндава мә йан жи кәсәки дьн нәһәqи һатийә кьрьне?

⁸ Щара дькарә бь шаши мәва бе кʹьфше кö һьндава мәда йан жи кәсәки щьватеда, нәһәqи һатийә кьрьне. Әw йәк дькарә бьqәwьмә чьмки әм гöнәкʹар ьн у бь щурʹәки майин дьньһерʹьн сәр дәрәща, йан жи дәрһәqа дәрәще әм нә һәр тьшт заньн. Ле фьрqи тʹöнә әм шаш дьбьн, йан жи сәд сәләфи рʹаст öса нә, фәрз ә бь дöа итʹбарийа хwә Йаһоwа биньн у амьнийе хwәй кьн. Öса әме тʹö щар «һьндава Хöданда бинтәнг» нәбьн. (Бьхунә Мәтʹәлок 19:3.)

9. Әме ве готареда у готара дьнда кʹижан сәрһатийа шеwьр кьн?

⁹ Бәре нава щьмәʹта Йаһоwада жи щара нәһәqи дьһатә кьрьне. Дәрһәqа ве йәке wәрә әм се сәрһатийа шеwьр кьн. Ве готареда әме шеwьр кьн чь qәwьми ортʹа нәбичʹьрʹке Бьраһим Усьв у бьред wида. Готара дьнда әме шеwьр кьн, кö Йаһоwа ча бу һьндава Пʹадше Исраеле Аһаб, у öса жи чь qәwьми тʹәви Пәтрусе шанди чахе әw Әнтакйа Сурйайеда бу. Wәʹде шеwьркьрьна wан сәрһатийа, дина хwә бьдьне һун чь дәрсе дькарьн һин бьн. Әw йәк wе али wә бькә рʹöһʹанида сьст нәбьн у һәләqәтийа хwә тʹәви Йаһоwа хwәй кьн чахе рʹасти нәһәqийе бен.

НӘҺӘQИЙА ҺЬНДАВА УСЬВ

10, 11. а) Усьв рʹасти чь нәһәqийе һат? б) Усьв чь дәрәщә да хәбате чахе гьрти бу?

¹⁰ Усьв хьзмәткʹаре Йаһоwайи амьн, әʹмьре хwәда гәләк нәһәqи дит. Әwи нә кö тʹәне жь хәлqе нәһәqи дит, ле öса жи жь бьред хwәйи һʹәлал. Әwе йәке дьле wи гәләк ешанд. Чахе Усьв щаһьл бу, бьред wи әw ча дил дьзива фротьн. Паше, дәсте зоре әw бьрьнә Мьсьре, wәлате хәриб (Дәстп. 37:23-28; 42:21). Паши һьнә wәʹдә, Усьв нәһәq кьрьн йанчь әwи дьхwәст бь дәсте зоре тʹәви жьна ахайе хwә рʹазе. У ләма әw бе диwан кьрьнә кәле (Дәстп. 39:17-20). Тәнгасийа Усьв ча дил у гьрти wәкә 13 сала кʹьшанд. Гәло әм чь дькарьн һин бьн жь Усьв, һәрге әм алийе хушк-бьред щьватеда нәһәqийе бьвиньн?

¹¹ Тʹәви Усьв кәледа гьртик һәбу, йе кö бәре шәравдаре пʹадша бу. Чахе әwана кәледа бун, шәравдар хәwн дит у Усьв әw хәwн жерʹа шьровәкьр. Усьв гот wәки әw шәравдар wе диса вәгәрʹә щийе хwә, у бьбә шәравдаре Фьрәwьн. Гава Усьв әw хәwн бь аликʹарийа Хwәде шьровәкьр, әwи әw дәрәщә да хәбате сәва һʹале хwә жерʹа гьли кә. Әм дькарьн дәрсәкә баш хwәрʹа һин бьн, нә тʹәне жь ве йәке кö Усьв чь жерʹа гьли кьр, ле öса жи чь гьли нәкьр (Дәстп. 40:5-13).

12, 13. а) Гьлийед кö Усьв шәравдаррʹа гот, ча дьдьнә кʹьфше wәки әw бетʹалаш нибу кö чь һатьбу сәре wи? б) Хәбәрдана Усьв тʹәви шәравдар ча әʹйан дькә wәки әwи нә һʹәму тьшт жерʹа гьли кьр?

¹² Бьхунә Дәстпебун 40:14, 15. Дина хwә бьдьне wәки ль wьр Усьв сәр хwә дьбежә кö әw һатә «дьзине». Бәле, әʹйан те кʹьфше wәки нәһәqийа мәзьн һьндава wи һатә кьрьне. Усьв рʹастә-рʹаст гот wәки гöне wи нибу кö әw кʹәтә кәле. Ләма жи, Усьв һиви шәравдар кьр wәки бәр Фьрәwьн wи бинә бира хwә. Гәло чьрʹа? Әwи жерʹа нета хwә вәкьр у готе: «Мьн жь ве мале дәрхи».

¹³ Жь гьлийед Усьв әм нькарьн бежьн wәки qә тʹалаша wи нибу чь сәре wи qәwьми. Усьв фәʹм дькьр wәки һьмбәри wи гәләк нәһәqи һатийә кьрьне. Ләма әwи һʹале хwә шәравдаррʹа гьли кьр, йе кö дькарьбу али wи бькьра. Ле дина хwә бьдьн кö Кʹьтеба Пирозда тʹö щикида найе готьне wәки Усьв кәсәкирʹа, йан жи Фьрәwьнрʹа шькйате бьред хwә кьр у гот wәки wана wи дьзива фротьн. Чахе бьред Усьв һатьн Мьсьре у тʹәви wи һәв һатьн, Фьрәwьн меванһʹьзи бьред wирʹа да кʹьфше. Әwи wана тʹәглифи Мьсьре кьр сәва wедәре бьжин у «хер-хьзна wәлате» Мьсьре бьстиньн. Жь ве йәке жи те кʹьфше wәки Усьв дәрһәqа бьред хwә гьли нәкьрийә (Дәстп. 45:16-20).

14. Чахе щьватеда әм рʹасти нәһәqийе бен, чь дькарә али мә бькә wәки хwә жь гәвәстийе дур бьгьрьн?

¹⁴ Һәрге кәсәк щьватеда нәһәqийе мә бькә, әм гәрәке фәсал бьн wәки гәвәстийа wи мәрьви нәкьн. Һәмьки әм дькарьн аликʹарийе жь рʹуспийа бьхwазьн, у һәрге кәсәки гöнәки мәзьн кьрийә рʹуспийарʹа бежьн (Qан. Кʹаһ. 5:1). Ле һәрге әwи кәси гöне мәзьн нәкьрийә, һе баш ә әве чәтьнайе ортʹа һәвдöда сафи кьн у рʹуспийа нәкьнә ортʹе. (Бьхунә Мәтта 5:23, 24; 18:15.) Wәрә әм тʹьме ль гора принсипед Кʹьтеба Пироз чәтьнайа сафи кьн. Һьнә дәрәщада мәрʹа дькарә бе кʹьфше wәки һьндава мә нәһәqи кьрьнә, ле бь рʹастийе дьбәкә әw öса нинә. Ләма жи чьqас баш ә бöхдана нәвежьн хушк-бьра у чәтьнайе гöрʹ нәкьн. Фьрqи тʹöнә әм рʹаст ьн йан нәһәq ьн, чәтьнайи wе тʹö щар сафи нәбә һәрге әм гәвәстийе бькьн. Амьни һьндава Йаһоwа у хушк-бьра wе мә бьгьрә wәки шашикә öса нәкьн. Зәбурбеж дәрһәqа мәрьве кö «бе ләкʹә дьмәшә» гот, wәки әw «бь зьмане хwә бöхдана накә у хьрабийе тʹö кәси накә, щинаре хwә беһöрмәт накә» (Зәб. 15:2, 3; Аqуб 3:5).

ДОСТИЙА ХWӘЙӘ ЛАПӘ QИМӘТ ÖНДА НӘКЬН

15. Ча достийа Усьв тʹәви Йаһоwа жерʹа кʹәрәм анин?

¹⁵ Әм дәрсәкә гәләк фәрз һин дьбьн жь достийа Усьв тʹәви Йаһоwа. Усьв нава 13 салед тәнгасийа хwәда нишан кьр, кö әw сәр һәр тьшти пе чʹәʹве Йаһоwа дьньһерʹә (Дәстп. 45:5-8). Әwи тʹö щар Йаһоwа нәһәq нәдькьр чьрʹа әw бәла һатә сәре wи. Рʹаст ә әwи бир нәкьр кö чь нәһәqи һьндава wи кьрьн, ле әw тʹö щар нәбу йәки зöлм. Лапә фәрз әw ә, кö әwи изьн нәдьда wәки кемаси у кьред мәрьва йед хьраб, wи жь Йаһоwа бьqәтиньн. Усьв Йаһоwарʹа амьн ма, ләма жи әwи дит кö Йаһоwа ча әw нәһәqи рʹаст кьрьн у wи у малбәта wи кʹәрәм кьр.

16. Чахе әм щьватеда рʹасти нәһәqийе тен, чьрʹа илаһи wи чахи лазьм ә незики Йаһоwа бьн?

¹⁶ Әм жи мина Усьв гәрәке достийа хwә тʹәви Йаһоwа qимәт кьн у хwәй кьн. Әм Йаһоwа гәләк һʹьз дькьн, ләма гәрәке тʹö щар нәһельн шашийед хушк-бьра бьбьнә мәʹни кö әм жь wи дур кʹәвьн (Рʹом. 8:38, 39). Чахе әм алийе хушк-бьрада нәһәqийе дьвиньн, wәрә чʹәʹв бьдьнә Усьв у һе незики Йаһоwа бьн у öса сәр дәрәща бьньһерʹьн чаwа Йаһоwа дьньһерʹә. Һәрге мә пе принсипед Кʹьтеба Пироз алийе хwәда һʹәму тьшт кьрийә сәва чәтьнайа мә сафи бә, йед майин ида бьдьнә дәсте Йаһоwа. Тʹö щар дöдьли нәбьн wәки Хwәде wе әʹсә wәхтда әwе дәрәще рʹаст кә.

ИТʹБАРИЙА ХWӘ «ҺʹАКЬМЕ ТʹӘМАМИЙА ДЬНЙАЙЕ» БИНЬН

17. Ча әм дькарьн амьнийе бьдьнә кʹьфше һьндава «һʹакьме тʹәмамийа дьнйайе»?

¹⁷ Һʹәта кö әм ве дьнйайеда дьжин, әме рʹасти нәһәqийа бен. Ле һʹәзара щарәке дьqәwьмә кö һун йан кәсәки дьн тʹәхмин кьн кö щьватеда нәһәqи һатә кьрьне. Ләма жи мьqати хwә бьн кö нәлькʹöмьн у жь рʹийа Хwәде дәрнәкʹәвьн (Зәб. 119:165). Бь амьни Хwәдерʹа хьзмәт кьн, жерʹа дöа бькьн у һәwара хwә wи биньн. Һьн жи, бь мьлукти биньн сәр хwә wәки дьqәwьмә һун дәрһәqа ве чәтьнайе, нә һʹәму тьшти заньн. Әм гöнәкʹар ьн у сәр тьшта бь щурʹәки майин дьньһерʹьн, ләма жи щара мәрʹа дькарә бе хане кö нәһәqийе мә дькьн, ле әw йәк öса нинә. Ча мә жь сәрһатийа Усьв дит, wе нәбаш бә һәрге әм гәвәстийе бькьн, чьмки әw йәк дькарә чәтьнайе һе мәзьн кә. Тʹö щар чәтьнайе бь һʹьш-аqьле хwә сафи нәкьн, ле тʹьме амьн бьминьн у бь сәбьр һивийа Йаһоwа бьн кö әw дәрәща wә рʹаст кә. Һәрге әм öса бькьн, Йаһоwа wе жь мә рʹази бә у wе мә кʹәрәм кә, чаwа Усьв кʹәрәм кьр. Qә дöдьли нәбьн кö «һʹакьме тʹәмамийа дьнйайе» тʹьме тьштед рʹаст дькә, чьмки «һʹәму рʹийед wи һәqи нә» (Дәстп. 18:25; Qан. Дщр. 32:4).

18. Готара дьнда әме дәрһәqа чь шеwьр кьн?

¹⁸ Готара дьнда әме шеwьр кьн сәрһати кö бәре нава щьмәʹта Йаһоwада qәwьми. Әме бьвиньн wәки ча әw сәрһати нишан дькьн wәки мьлукти у бахшандьн тʹәви һәqийа Йаһоwа гьредайи нә.