Әз Әскәре Мәсиһ Мә, Нә кö йе ве Дьнйайе

ӘЗ ҺАТЬМӘ буйине сала 1926. Жь 8 зарʹа әз йе 7 бум. Мә Йунаньстанеда гöндәки бьчʹукда дьжит наве кʹижани Каритса йә. Де-баве мьн мәрьвнә хәбатһʹьз бун.

Сала 1925-да, демәк саләк пешийа буйина мьн, де-баве мьн рʹасти Щон Папаризос һатьн. Әw Леколинкʹаре Кʹьтеба Пироз бу, wи wәʹдәйи Шәʹдед Йаһоwа öса нав дькьрьн. Әw йәки хирәт у хәбәрхwәш бу. Де-баве мьн әʹщебмайи ман, чахе Щон бь аqьлайи у сәрwахти Кʹьтеба Пироз wанрʹа шьровәдькьр. Әwе йәке wана һелан кьр бенә сәр щьвина Леколинкʹаред Кʹьтеба Пироз, кʹижан кö гöнде мәда дәрбаз дьбу. Дийа мьн qайим Йаһоwа Хwәде баwәр дькьр. Рʹаст ә әw нәхwәнди бу, ле чьqас дькарьбу мәрьварʹа дәрһәqа Хwәде гьли дькьр. Ле сәд һʹәйф, баве мьн сәва шашийед һьнәкә майин рʹöһʹанида кʹәт у ида нәдьһатә сәр щьвате.

Мьн у хушк-бьред мьн, мә Кʹьтеба Пироз qимәт дькьр, ле һʹьш-аqьле мә тʹәне сәр wәʹдәдәрбазкьрьне бу. Ле сала 1939-да, чахе Шәрʹе Һʹәмдьнйайе йа дöда Әwропайеда дәстпедьбу, гöнде мәда тьштәки öса qәwьми, кö әм сәр һʹьше хwәда һатьн. Николас Псарас кöрʹап-пьсмаме мә, йе кö һьн жи щинаре мә бу, гази кьрне һәрʹә әскәрийа Йунаньстане. Әw 20 сали бу у тʹәзә һатә ньхöмандьне. Николас бь мерхаси готә сәрwеред әскәрийе: «Әз нькарьм шәрʹ бькьм, чьмки әз әскәре Мәсиһ мә». Паши wе йәке, wи бьрьнә бәр диwана әскәрийе у сәр 10 сала кьрьнә кәле. Әwе qәwьмандьне әм гәләк әʹщебмайи кьрьн.

Ле сала 1941-да, чахе ордийа кö пьштгьрийа Йунаньстане дькьр, кʹәтә нав Йунаньстане, Николас жь кәле һатә азакьрьне. Әw диса вәгәрʹийа Каритсе. Гава әw һат, бьре мьни мәзьн Илиас дәрһәqа Кʹьтеба Пироз пьрс сәр пьрса дьда wи. Мьн жи гöһе хwә дьда wан. Паши ве йәке, Илиас у әз тʹәви хушка хwәйә бьчʹук Ефморфиа, мә дәстпекьр Кʹьтеба Пироз һин бьн, у әм тʹьме дьһатьнә щьвате. Паши саләке, мә һәрсека жи хwә тʹәсмили Йаһоwа кьр у һатьнә ньхöмандьне. Паши ве йәке, чар хушк-бьред мьн жи һатьнә ньхöмандьне.

Сала 1942, щьвата Каритседа нәһ хушк-бьред щаһьл һәбун, йед кö wәкә 15-25 сали бун. Мә гьшка заньбу wәки әме рʹасти чәтьнайед гьран бен. Ләма сәва баwәрийа хwә qәwи кьн, әм тʹәвайи щики тʹоп дьбун у мә Кʹьтеба Пироз леколин дькьр, кʹьламед бона Хwәде дьстьра у дöа дькьр. Әwе йәке баwәрийа мә гәләк qәwи кьр.

ШӘРʹ WӘЛАТДА

Гава Шәрʹе Һʹәмдьнйайе йа дöда хьлаз бу, комунистед Йунани мьqабьли дәwләте рʹабун, у бона ве йәке wәлатда шәрʹәки гьран дәстпебу. Партизанед комунист щи-щийа дьгәрʹийан, у дәсте зоре гöнди дьбьрьн сәва тʹәви мьqабьлибуна wан бьбьнә йәк. Чахе әwана гьһиштьнә гöнде мә, се Шәʹдед Йаһоwа гьрт ьн у бьрьн. Йәк жь wан әз бум, йе дöда бьре мьн Илиас бу у Антонио Сукарис бу. Мә wанрʹа дьгот wәки әм Мәсиһи нә у начьнә шәрʹ, ле йәкә wана дәсте зоре әм бьрьн чʹийайе Олимпусе, кö жь гöнде мә рʹийа wәкә 12 сьһʹәта дур бу.

Паше һьнә wәʹдә дәрбаз бу, офисере комунист фәрман да, wәки әм тʹәви мьqабьлибуна партизана бьбьн йәк. Чахе мә wанрʹа шьровәкьр wәки Мәсиһийед рʹаст чʹәк һьлнадьнә дәстед хwә сәва мәрьва бькöжьн, әw офисер һерс кʹәт у әм кʹаши щәм генерал кьрьн. Чахе мә жерʹа wәкʹьланд кö әм Мәсиһи нә, әwи генерали фәрман да: «Дә wәки öса нә, qантʹьрʹәки һьлдьн у жь шәрʹ әскәред бьриндар бьдьнә сәр у бьвьнә нәхwәшхане».

Мә жь wи пьрси: «Ле һәрге әскәред дәwләте мә бьгьрьн, гәло wе нәфькьрьн кö әм жи әскәр ьн?» Әwи гот: «Дә әскәрарʹа нан бьвьн». Әм фькьрин у мә гот: «Ле һәрге офисер бьвинә кö qантʹьрʹе мә һәйә у мәрʹа бежә кö пе qантʹьрʹ чʹәк бьвьн щийе шәрʹ?» Генерал кʹур фькьри у ахьрийе гот: «Wәки öса нә һун дькарьн бәр пез бьн! Сәр чʹийе бьминьн у мьqати кәрийе пез бьн».

Дор бәре мә шәрʹәки гьран бу, ле исафа мә һәрсека тʹәмьз бу, чьмки мә пьштгьрийа шәрʹ нәдькьр, ле тʹәне мьqати кәрийе пез бун. Саләк дәрбаз бу, у Илиасрʹа чаwа кöрʹе мәзьнрʹа, изьн дан кö вәгәрʹә мал, сәва кö мьqати дийа мәйә жьнәби бә. Антонио жи аза кьрьн чьмки әw нәхwәш кʹәт. Ле әз диса жи дилтийеда мам.

Wи wәʹдәйи, ордийа Йунанийа пәй комуниста дькʹәт. Кʹома комуниста кö мьн бьрьбун дилтийе, мьн һьлдан у әм чʹийарʹа рʹәвин бәрбь Албанйайе. Незики синоре Албанйайе, ньшкева әскәред Йунани дора мә гьртьн. Әw комунист тьрсийан у рʹәвин. Мьн хwә бәр бахе кʹәти вәшарт, у чь кö мьн дәстпекеда гьли кьр әw һәма әw дәрәщә бу.

Чахе мьн әскәре Йунанирʹа гот кö комуниста әз дилти гьртьм у бьрьм, әwи мьн бьрә бәр диwана зома әскәрийеда кö незики Веройа бу. Әw шәһәре бәре бу, кö Кʹьтеба Пирозда те навкьрьне Бәройа. Ль wедәре готьнә мьн wәки чʹәʹла бькʹöльм сәва wәʹде шәрʹ, әскәр хwә теда вәшерьн. Чахе мьн гот кö әз нькарьм ве йәке бькьм, әw офисере мәзьн тʹәми да wәки мьн аксор кьн гьрава бь наве Макронисос, кʹидәре кö щәзайе гьран бу.

ГЬРАВА ЗЕРАНДЬНЕ

Әw гьрав мина зьнар ә, кʹижан кö вәкьри у бе ав бу, у qьжә-qьжа гәрме бу. Әw гьрав бәр дәве бәʹре йә, наве wи щийи Атика йә, әw wәкә 50 км., дури Атʹина йә. Дьрежайа ве гьраве 13 км., ле бәрайа wе щийе лапә зәʹф 2.5 км ә. Рʹаст ә гьрав гәләк бьчʹук ә, ле сала 1947-1958, ль wедәре 100 000 зедәтьр гьрти һәбун. Нава wан гьртийада комунист һәбун у йед кö нәкомунист бун ле әскәра тʹьре әwана комунист ьн, öса жи йед кö бәре рʹабәр бун. Хенщи wан ль wедәре гәләк Шәʹдед Йаһоwайи амьн жи һәбун.

Чахе дәстпека сала 1949-да әз һатьмә wедәре, гьрти сәр зома пʹаравәбун. Мьн щики öсада щиwар кьрьн, кʹидәре кö qә хwәйкьри нибу у бь сәда гьрти һәбун. Жь мә wәкә 40 мәрьв чадьре брезентда рʹадьзан кö бона 10 мәрьва бу. Мә ава qьреж вәдьхwар у хwарьна мә һʹәчʹи зәʹф ниск у бадрищан бу. Ль wедәре тʹьме тʹоз у ба бу, у әwе йәке жийин лап чәтьн дькьр. Ле баш бу кö мә кәвьред гьран нәдьбьр-нәдьани ча гьртийед дьн дькьрьн, чьмки әw гәләк чәтьн бу у хьраб һʹöкöм бу сәр сьһʹәт-qәwата wан һьн физикида һьн жи емосийалида.

Щарәке чахе әз бәр дәве бәʹре дьгәрʹийам, әз рʹасти чәнд Шәʹдед Йаһоwа һатьм, йед кö жь зомәкә дьн бун. Әw йәк бона мә шабунәкә гәләк мәзьн бу! Әм гәләк фәсал рʹасти һәв дьһатьн сәва нәкʹәвьнә чʹәʹва. Һьн жи мә фәсал гьртийарʹа мьзгини гьли дькьр, йед кö ахьрийеда бунә Шәʹдед Йаһоwа. Әw йәк у дöа гәләк али мә кьрьн wәки рʹöһʹанида qәwи бьминьн.

КʹӘТЬМӘ АГЬР

Паши дәһә мәһа, әскәред кö әз гьртьбум, сафи кьрьн wәки ида wәʹдә йә әз кʹьнще әскәрийе хwә кьм. Ле чахе мьн гот wәки әзе хwә нәкьм, wана әз кʹаши бал сәроке зоме кьрьм. Мьн ньвисарәк да wи, кʹидәреда ньвиси бу: «Әз дьхwазьм тʹәне әскәре Мәсиһ бьм». Чахе wана әз дамә тьрсандьне, әwи сәроке әз бьрьм щәм кʹәшише мәзьн йе дера Йунанийа, йе кö кʹьнще кʹәшишайә мәхсус хwә кьрьбу. Гава кö мьн сәр пьрсед wи жь Кʹьтеба Пироз щаба хwә дьда, әwи жь һерсе кьрә qарини: «Wи бьвьн, әw фанатик ә!»

Шәбәqа дьн, әскәра диса мьнрʹа готьн wәки кʹьнще әскәрийе хwә кьм. Чахе мьн гот wәки әзе хwә нәкьм, wана бь кʹöлма у бь дар әз кʹöтам. Паше wана әз бьрьм нәхwәшхана зоме, сәва бьньһерʹьн һәстийед мьн шкәстьнә йан на, у паше диса әз бьрьм чадьра мьн. Wана 2 мәһа öса сәре мьн дькьр.

Әз сәр йа хwә сәкьнибум, ләма гәләк һерса әскәра рʹабу, wана дьхwәст бь щурʹәки дьн мьн бьдьнә тьрсандьне. Wана дәстед мьн данә пьшт мьн у гьредан, у берʹәʹмти пе qамчийа бьне ньгед мьн дьхьстьн. Бьн еша гьранда мьн гьлийед Иса кьрә бира хwә: «Хwәзи ль wә, гава бона наве мьн wә беһöрмәт кьн, бьзериньн . . . Әшq у ша бьн, чьмки һәqе wә ль әʹзмана гәләк ә. Бь ви щурʹәйи пʹехәмбәред кö бәри wә һәбун, зерандьн» (Мәт. 5:11, 12). Мьн тʹьре әw йәк wе хьлаз нәбә у ахьрийеда әз хәрьqим.

Әз сәр һʹьше хwәда һатьм отʹаха кәлейә сарда, тʹи-бьрчи у бе ләʹйиф. Ле һәла һе wи һʹалида жи әз рʹьһʹәт бум у хwәгьрти бум. Чаwа Кʹьтеба Пироз соз дьдә «әʹдьлайийа Хwәде» дьл у фькьред мьн хwәй дькьр (Фили. 4:7). Рʹожа дьн әскәрәки һʹәйф нан, ав у пʹот да мьн. Паше әскәрәки дьн ниве хwарьна хwә да мьн. Wе дәрәщеда у диса дәрәщед дьнда мьн дәсте Йаһоwа сәр хwә тʹәхмин дькьр.

Сәрока ча рʹабәр әз һʹәсаб дькьрьм у әз бьрьм Атʹинайеда бәр диwана әскәрийе. Ль wедәре әз шандьмә кәла гьрава Йаросе сәр се сала, кʹижан кö 50 км., дури рʹоһлата Макронисос ә.

«ӘМ ДЬКАРЬН ИТʹБАРИЙА ХWӘ WӘ БИНЬН»

Кәла Йаросе авайики мәзьн бь агуред сор бу, кʹидәре кö 5 000 гьрти һәбун, йед кö мьqабьли сәрwертийе дәркʹәтьбун. Öса жи 7 Шәʹдед Йаһоwа жи һәбун, у гьшк жи сәва тʹәвнәбуйине кʹәтьбунә кәле. Әм дьзикава тʹәвайи тʹоп дьбун wәки Кʹьтеба Пироз леколин бькьн, ле әw йәк qәдәхәкьри бу. Мә һәла һе жи дьзикава «Бьрща Qәрәwьлийе» дьстанд, кʹижан кö паше мә пе дәста копи дькьр сәва һинбуне.

Щарәке чахе әм дьзикава тʹоп бун, нобәдарәки әм дитьн, кʹижани кö жь мә әʹдәбйәт стандьбу. Әwи әм бьрьн щәм бәрдәстийе сәрwере кәле, у мә тʹьре кö ида әм жь кәле хьлаз набьн. Ле әwи мәрʹа гот: «Әм заньн һун кʹе нә, у әм qәдьре баwәрийа wә дьгьрьн. Әм заньн кö әм дькарьн итʹбарийа хwә wә биньн. Һәрʹьн сәр шьхöле хwә». Әwи шьхöләки öса һеса да мә һьнәка, кö әм гәләк рʹази бун у ша бун. Дьле мә ша дьбу кö һәла һе кәледа жи амьнийа мә һöрмәте дьда Йаһоwа.

Амьни у мерхасийа мә бәре дьн жи ани. Гьртики йе кö бәре професоре математикайе бу, дина хwә дьда рʹабун-рʹуньштьна мә у пьрс дьда мә. У паше чахе сала 1951-да әм Шәʹдед Йаһоwа аза бун, әw жи аза бу. Паше әw ча Шәʹде Йаһоwа һатә ньхöмандьне у бу хьзмәткʹаре һәртʹьм.

ДИСА ӘСКӘР ЬМ

Чахе әз дәркʹәтьм жь кәле, әз вәгәрʹийамә Каритсайе малбәта хwә. Паше әз тʹәви гәләк бьнәлийед wәлат дәрбази Мелбурне бум, (Австралйа). Ль wедәре әз рʹасти хушкәкә гәләк баш һатьм наве wе Щанет ә, у мә һәв станд. Мәрʹа кöрʹәк у се qиз бун, әwана жи ньһа сәр рʹийа Хwәде нә.

Иро, әз ида 90 сали зедәтьр ьм, у ча рʹуспи хьзмәт дькьм. Жь бо бьринед бәре щара бәдәна мьн у ньгед мьн дешьн, илаһи чахе әз дьчьм хьзмәтийе. Ле йәкә ча бәре öса жи иро, әз диса «әскәре Мәсиһ» мә (2 Тимтʹ. 2:3).