Пʹадшатийа Хwәде Wе Чь Бьдә Һьлдане?

1, 2. а) Әве дьнйайе чьда дькарьн бәрамбәри qачах бькьн, йе кö щәзакьрьна бь мьрьне гәрәке бьстинә? (Бьньһерʹә шькле әʹwльн.) б) Чьрʹа щәзакьрьна ве дьнйа хьраб тʹö кәс нькарә бьдә сәкьнандьне?

«ВА МЬРИ ТЕ!» Әwан гьлийа нобәдар пәй qачахәки хоф дькьнә гази у wи жь отʹаха кәле дәрдьхьн. Әw мер нә бәр мьрьне йә, нә жи нәхwәш ә, әw сах-сьламәт ә. Wәки öса нә, чьрʹа нобәдар әви гьли сәр wи дьбежьн? Чьмки әwана wи qачахи дьбьнә щийе щәзакьрьна бь мьрьне у ләма бона wан әw ида ча мьри йә.a

² Әве дьнйайе әм дькарьн бәрамбәри wи qачахи бькьн, йе кö бь мьрьне гәрәке бе щәзакьрьне. Әв дьнйа хьраб жи ида диwана хwә стандийә у зутьрәке wе бе щәзакьрьне. Кʹьтеба Пироз дьбежә: «Дьнйайе . . . дәрбаз бә» (1 Йуһʹн. 2:17). Ле ортʹа ахьрийа ве дьнйайе у ахьрийа wи qачахида фьрqи һәйә. Гәло чьда? Wәʹде щәзакьрьна qачах, кәсәк дькарә qайил нибә у бежә кö әw щәза нә бь һәqийе һатә сафикьрьне, йан дьбәкә сәр чәнд дәqа щәзакьрьна wи паш хьн. Ле qьрʹа wе дьнйайе wе әʹсә бе, чьмки диwана ве алийе Йе Һәри Жорьнда бь һәqийе һатийә кьрьне (Qан. Дщр. 32:4). Тʹö кәс нькарә әwе щәзакьрьне бьдә сәкьнандьне, у тʹö кәс wе дöдьли нәбә кö әw щәзакьрьн бь һәqи һатийә кьрьне. Чахе диwана ве дьнйайе бе, дьнйа әʹлам wе qайил бә wәки әw бь һәqи һатийә кьрьне. Wи wәʹдәйи wе рʹьһʹәти бе!

3. Кʹижан чар тьшта әме шеwьр кьн йед кö wәʹде һатьна Пʹадшатийе wе бенә һьлдане?

³ Гәло чь те һʹәсабе кö әв «дьнйа» wе «дәрбаз бә»? Гәләк мәрьв дьфькьрьн кö әм ньһа ча дьжин wе öса жи бьминә у тʹö тьшт wе нәйе гöһастьне. Ле wе öса нибә, әв дьне wе әʹсә бе һьлдан. Әв әʹламәти нәбаш ә? Һәмьки баш ә, чьмки әw әʹламәти һәйә пʹара «мьзгинийа Пʹадшатийе» (Мәт. 24:14). Wәрә ньһа әм дина хwә бьдьне, кö чахе Пʹадшатийа Хwәде бе, wе чь бе һьлдане. Әме ньһа хәбәр дьн тʹәне дәрһәqа чар тьшта: мәрьвед зöлм, тʹәшкиләтед хьраб, кьред хьраб у һʹале хьраб. Әме öса жи шеwьр кьн кö әw һәр чар тьшт 1) ча ньһа сәр мә һʹöкöм дьбьн, 2) Йаһоwа wе чь бькә, у 3) ча Йаһоwа әwан тьшта wе бьгöһезә сәр тьштед баш.

МӘРЬВЕД ЗÖЛМ

4. Мәрьвед хьраб ча сәр мә һʹöкöм дькьн?

⁴ Иро мәрьвед зöлм ча сәр мә һʹöкöм дькьн? Паwлосе шанди пешда гот wәки ван рʹожед ахьрийеда «зәманед хьраб» wе һәбьн. Паши wан гьлийа әwи гот: «Мәрьвед хьрабә хwәйифел wе хьрабийеда пешда һәрʹьн» (2 Тимтʹ. 3:1-5, 13). Һун дьвиньн әw пʹехәмбәрти ча те сери? Дьqәwьмә мә алийе мәрьвед хьрабда зийан стандийә, мәсәлә жь qачахед берʹәʹм, йан жи жь фанатикед зöлм. Һьнә мәрьвед хьраб, хьрабийа хwә әʹйан дьдьн кʹьфше, һьнәк жи рʹуйе хwә вәдьшерьн у хwә дәwса мәрьвед qәнщ датиньн. Дьбәкә әw мәрьв хут мәрʹа зийан нәданә, ле йәкә хьрабийа wан һʹöкöм дьбә сәр мә. Әм бинтәнг дьбьн чахе дәрһәqа кьред wани бехwәдети педьһʹәсьн. Әw мәрьвед зöлм тьштед нәмәрьвайи дькьн, мина һʹәйwанед бәйани у һәла һе жи мина щьна (Аqуб 3:15). Ле шькьр жь Йаһоwарʹа кö әw бь сайа Хәбәра хwә мьзгинийа пʹьрʹ ша дьдә мә.

5. а) Бона мәрьвед хьраб чь мәщал һәйә? б) Wе ча бә ахьрийа мәрьвед хьраб йед кö нахwазьн бенә гöһастьне?

⁵ Йаһоwа wе чь бькә? Ньһа Йаһоwа мәщале дьдә һәр мәрьвәки хьраб, wәки бенә гöһастьне (Иша. 55:7). Рʹаст ә әв дьнйа wе зутьрәке бе кʹöтакьрьне, ле Хwәде диwана wанә хьлазийе һе нәкьрийә. Ле чь wе бьбә тʹәви wан мәрьва, йед кö нахwазьн бенә гöһастьне у һʹәта дәстпебуна тәнгасийа мәзьн диса жи пьштгьрийа ве дьнйайе бькьн? Йаһоwа соз да wәки wе qьрʹа мәрьвед хьраб бинә. (Бьхунә Зәбур 37:10.) Әw мәрьвед хьраб дьбәкә бьфькьрьн wәки жь диwана Хwәде wе хьлаз бьн. Ве дьнйайеда әwана һин бунә кьред хwә вәшерьн, у щәза хwә настиньн (Иб. 21:7, 9). Ле Кʹьтеба Пироз мәрʹа дьбежә: «Чʹәʹвед [Хwәде] ль сәр рʹейед зьлам ьн у һʹәму гавед wи дьвинә. Тәʹри нинә у сийа мьрьне нинә кö, . . . йед хьрабийе кьрьбьн хwә ль wьр вәшерьн» (Иб. 34:21, 22). Бәле, тʹö кәс нькарә хwә жь Йаһоwа Хwәде вәшерә. Тʹö мәрьве һʹьләкʹар нькарә wи бьхапинә. Тʹö щики öса тʹöнә кö чʹәʹве Хwәде нәвиньн чь дьqәwьмә. Паши Һармәгәдоне, дьбәкә әм бьгәрʹьн кʹа мәрьвед хьраб кʹидәре нә, ле әме wана нәвиньн. Әwана wе һʹәта-һʹәтайе öнда бьн һәрʹьн (Зәб. 37:12-15).

6. Кʹе wе бьжи сәр дьнйайе, у чьрʹа әw мьзгиникә пʹьрʹ ша йә?

⁶ Кʹе wе сәр дьнйайе бьминә? Йаһоwа созәки дьлгәрм дьдә мә: «Мьлуке әʹрде wар бьн, хер-хwәшийева wе хьне бьн у ша бьн». Паше диса ве зәбуреда әм дьхуньн: «Рʹасте ль әʹрде wар бьн у һәр-һәйе wе сәр бьжин» (Зәб. 37:11, 29). Гәло кʹе нә әw мәрьвед «мьлук» у йед «рʹаст»? Йед мьлук әw ьн, кö  бь дьл һинкьрьн у рʹебәрийа Йаһоwа qәбул дькьн. Ле йед рʹаст әw ьн кö һʹьз дькьн wан тьшта бькьн, кʹижан кö бәр чʹәʹве Йаһоwа рʹаст ьн. Иро һәжмара мәрьвед хьраб жь йа мәрьвед рʹаст гәләк зедәтьр ә. Ле дьнйа тʹәзәда мәрьвед хьраб wе qә тʹöнә бьн, сәр әʹрде тʹәне мәрьвед рʹаст wе бьжин! Мәрьвед wи щурʹәйи wе әʹрде бькьнә щьнәт!

ТʹӘШКИЛӘТЕД ХЬРАБ

7. Иро тʹәшкиләтед хьраб ча сәр мә һʹöкöм дьбьн?

⁷ Иро тʹәшкиләтед хьраб ча сәр мә һʹöкöм дьбьн? Һʹәчʹи зәʹф хьраби кö ве дьнйайеда дьqәwьмьн жь тʹәшкиләта тен. Мәсәлә, тʹәшкиләтед религи милйона мәрьва дьхапиньн. Әwана Хwәде нәрʹаст дәрдьхьн, Кʹьтеба Пироз нәрʹаст шьровәдькьн, у дәрһәqа ахьрийа әʹрде у инсанәте нәрʹастийе дьбежьн. Диса һәнә тʹәшкиләтед öса кö шәрʹа гöрʹ дькьн у фьрqийе дькьнә ортʹа мьләта, у бона ве йәке гәләк шәрʹ-дәʹw пешда тен. Мәрьвед сьст у пьшта кʹижана тʹöнә, тенә зерандьне. Һьн жи әw тʹәшкиләт рʹöшәте һьлдьдьн у тʹәне мәрьвед хwә qәбул дькьн у али wан дькьн. Хенщи wан тʹәшкиләта, һәнә корпорасийед тьма, йед кö әʹрде хьраб дькьн у ресурсед тʹәбийәте вала дькьн. Әw корпорасийа, мәрьвед дьлсах дьхапиньн сәва бизнеса хwә пешда бьвьн у паше щева һьнә мәрьва тʹьжә кьн. Ле бь милйона мәрьв иро кʹәсиббунеда ньн. Бешьк, ве дьнйайеда мәʹнийа гәләк кöл-дәрда кö мәрьв дькʹьшиньн, жь wан тʹәшкиләта тен.

8. Ль гора Кʹьтеба Пироз, чь wе бьqәwьмә тʹәви wан тʹәшкиләта, йед кö бәр чʹәʹве гәләк мәрьва qәwи нә?

⁸ Йаһоwа wе чь бькә? Кʹьтеба Пироз һʹәму религийед qәлп нав дькә жьна qав, демәк Бабилона Мәзьн. Wәʹде дәстпебуна тәнгасийа мәзьн, сәрwеред ве дьнйайе (qәwатед политики) wе мьqабьли һʹәму религийед qәлп дәрен (Әʹйан. 17:1, 2, 16; 18:1-4). Әw һʹәму тʹәшкиләтед религи wе бенә кʹöтакьрьне. Ле тʹәви тʹәшкиләтед дьнә хьраб wе чь бьqәwьмә? Кʹьтеба Пироз әwан тʹәшкиләта нав дькә ча чʹийа у гьрав, кʹижан кö бәр чʹәʹве мәрьва зәʹф qәwи нә у те бежи найенә һьлшандьне. (Бьхунә Әʹйанти 6:14.) Ле Кʹьтеба Пироз пʹехәмбәртийе дькә, wәки һʹәму сәрwерти у тʹәшкиләтед кö wанва гьредайи нә, wе бенә кʹöтакьрьне. Тәнгасийа мәзьн wе хьлаз бә бь кʹöтакьрьна wан һʹәму сәрwертийед дьнйайе у йед кö пьштгьрийа wан дькьн у мьqабьли Пʹадшатийа Хwәде дәрдькʹәвьн (Йерәм. 25:31-33). Паши ве йәке, тʹö тʹәшкиләт ида wе тʹöнә бьн!

9. Чьрʹа әм дькарьн дöдьли нәбьн wәки әʹрде тʹәзәда wе тʹәрбәти һәбә?

⁹ Дәwса wан тʹәшкиләтед хьраб чь wе бьминә? Паши Һармәгәдоне, гәло сәр әʹрде qә wе диса тʹәшкиләт һәбьн? Кʹьтеба Пироз дьбежә: «Әм һивийа әʹрдәки ну у әʹзманед ну нә, ль гора созе wи, кʹижанада рʹастийе бьминә» (2 Пәт. 3:13). Әʹзман у әʹрде бәре, әw һәнә сәрwертийед хьраб у мәрьвед бьн һʹöкöме wанда, кʹижан кö wе бенә кʹöтакьрьне. Ле гәло чь wе дәwса wан бьгьрә? «Әʹрдәки ну у әʹзманед ну». Әʹзманед ну әw сәрwертийа тʹәзә йә, демәк Пʹадшатийа Хwәде, ле әʹрдәки ну әw һәйә бьнәлийед тʹәзә сәр әʹрде, йед кö бьн ве сәрwертийеда бьжин. Әw Пʹадшатийа бьн сәрwертийа Иса Мәсиһ, wе бь тʹәмами әʹйан кә wәки Йаһоwа Хwәде йәки ча нә. Бәле, Йаһоwа Хwәде бепʹәргал нинә (1 Корн. 14:33). Ләма жи әw wе «әʹрдәки ну» саз кә, кʹидәре кö меред qәнщ wе рʹебәрийе бькьн (Зәб. 45:16). Иса у öса жи 144 000 wе рʹебәрийа wан бькьн. Бьдьнә бәр чʹәʹве хwә, кö wе wәʹдәки чьqас хwәш бә чахе һʹәму тʹәшкиләтед хьраб кʹöта бьн у дәwсе сәрwертийа тʹәк һәбә. Бьн wе сәрwертийеда wе тʹьме йәкти һәбә у әw wе тʹö щар нәйе хьрабкьрьне.

КЬРЕД ХЬРАБ

10. Кʹижан кьред хьраб бәлабуйи нә wи щийи кʹидәре кö тö дьжийи, у әw йәк ча сәр тә у малбәта тә һʹöкöм дьбә?

¹⁰ Кьред хьраб ча сәр мә һʹöкöм дьбьн? Әм дьнйа öсада дьжин кö бь кьред хьраб тʹьжә йә. Әw дьнйа те бежи нава кьред бехwәдети, бенамуси у qәлпийеда дьхәньqә. Де-бав һʹәму тьшти дькьн сәва зарʹед хwә жь wан кьред хьраб хwәй кьн. Иро медийа, интернет у тьштед майин кö мәрьв ве дьнйайеда пева мьжул дьбьн, хьрабийе öса бь һостати реклам дькьн, кö те бежи әw тьштәки баш ә. Һьн жи әwана принсипед Йаһоwа дәрһәqа qәнщийе у хьрабийе, бәр тьштәки һʹәсаб накьн у пе дькʹәньн (Иша. 5:20). Ле Мәсиһийед рʹаст жь ве йәке хwә дур дьгьрьн. Әwана ве дьнйайеда кʹижанеда кö принсипед Йаһоwа беһöрмәт дькьн, шәрʹ дькьн сәва амьнийа хwә хwәй кьн.

11. Әм чь һин дьбьн жь ахьрийа Содом у Гоморайе?

¹¹ Йаһоwа wе чь бькә һьндава кьред хьраб? Дина хwә бьдьне Йаһоwа чь кьр чахе дит кö Содом у Гомора бь кьред хьраб тʹьжә бьбун. (Бьхунә 2 Пәтрус 2:6-8.) Мәрьве рʹаст, Лут, бинтәнг дьбу сәва хьрабийе кö дор бәре wи у малбәта wи дьqәwьми. Чахе Йаһоwа әw дö шәһәр бь тʹәмами кʹöта кьр, нета wи тʹәне әw нибу кö хьрабийе бьдә һьлдане. Йаһоwа бь ве йәке «бона нәпʹакед пәй wанрʹа дәрсәк һьшт». Бәле, чаwа бәре Йаһоwа һʹәму кьред бенамуси да һьлдане, öса жи һʹәму кьред хьраб кö иро тенә кьрьне wе бьдә һьлдане. Әw йәк wе бьqәwьмә чахе Йаһоwа qьрʹа ве дьнйайе бинә.

12. Дьнйа тʹәзәда һун дьхwазьн кʹижан шьхöлава мьжул бьн?

¹² Дәwса wан кьред хьраб wе чь бьбә? Мәрьвед щьнәтеда wе бь шьхöлед һʹәwасва мьжул бьн. Мәсәлә, бьдьнә бәр чʹәʹве хwә wәки wе чьqас хwәш бә чахе әм әʹрде бькьн щьнәт, йан жи бона хwә у мәрьвед хwәйи незик ханийа ава бькьн. Бьфькьрьн һәла wе чьqас баш бә чахе милйона мәрьв wе жь мьрьне рʹабьн. Әме wана рʹейед Йаһоwа һин кьн у wанрʹа гьли кьн кö нава тʹәрихийеда Хwәде һьндава инсанәте чьqас qәнщ бу (Иша. 65:21, 22; Кʹар. Шанд. 24:15). Дьнйа тʹәзәда әʹмьре мә wе бь шьхöлед öса тʹьжә бә, кö мәрʹа шабуне бинә у әме пәсьна бьдьнә Йаһоwа!

ҺʹАЛЕ ХЬРАБ

13. Рʹабәрибуна Шәйтʹан, Адәм у Һеwайе, дьнйа кьрә чь һʹали?

¹³ Һʹале хьраб ча сәр мә һʹöкöм дьбә? Мәрьвед хьраб, тʹәшкиләтед хьраб, у кьред хьраб, һʹале дьнйайе хьраб дькьн. Һʹәму мәрьв һʹаләкида ньн. Һьнәка дьбәкә жь шәрʹа зийан стандьнә, һьнәк кʹәсибийеда ньн, һьнәк жи дьqәwьмә жь бо расизме тенә зерандьн. Нәхwәши у мьрьн жи һәмьки гьшкарʹа те. Бәле, әм нә маләке нә, ле һʹаләке нә, демәк әм гьшк жи сәва wан тьшта кöл-дәрда дькʹьшиньн. Әм кʹәтьнә wи һʹали, чьмки се кәс мьqабьли Йаһоwа рʹабун, әw һәнә Шәйтʹан, Адәм у Һеwа. Сәд һʹәйф, ле тʹö кәс жь мә нькарә жь ве дьнйа һәвкʹәти бьрʹәвә.

14. Йаһоwа wе ча һʹале ве дьнйайе хwәш кә? Мәсәле биньн.

¹⁴ Йаһоwа wе һʹале хьраб ча рʹаст кә? Wәрә пешийе хәбәр дьн дәрһәqа шәрʹа. Йаһоwа соз дьдә wәки wе бь тʹәмами шәрʹа бьдә һьлдане. (Бьхунә Зәбур 46:8, 9.) Нәхwәши ида wе тʹöнә бьн (Иша. 33:24). Ле мьрьн? Йаһоwа wе мьрьне жи кʹокева кʹöта кә! (Иша. 25:8) Әw wе öса жи кʹәсиббуне бьдә һьлдане (Зәб. 72:12-16). Йаһоwа wе öса бькә wәки һʹале хьраб, демәк кöл-дәрд wе ида тʹöнә бьн. Һьн жи әw wе «һәwа» хьраб йа ве дьнйайе, демәк һʹöкöме Шәйтʹан у щьнед wи бәтаwәкә (Әфәс. 2:2).

15. Паши Һармәгәдоне wе кʹижан тьшт ида тʹöнә бьн?

¹⁵ Һун дькарьн бьдьнә бәр чʹәʹве хwә дьнйа бе шәрʹ, бе нәхwәши, у бе мьрьн? Бьдьнә һʹәсабе хwә wәки нә әскәр, нә чʹәк, нә нәхwәшханә, нә һʹәким у нә жи мәзәл wе тʹöнә бьн! Зорбәти wе тʹöнә бә, ләма тьрса тʹö кәси ида wе тʹöнә бә, нә полис wе лазьм бе, нә системед хwәйкьрьне, һәла һе дьбәкә нә жи кʹьлит! Һʹьш у дьле мәда тʹö тьрс у дәрд wе тʹöнә бә.

16, 17. а) Әwед кö Һармәгәдонеда хьлаз бьн, wе чь дьлрʹьһʹәтийе бьстиньн? б) Чьрʹа әм дькарьн дöдьли нәбьн wәки әме хьлаз бьн чахе әw дьне бе кʹöтакьрьне?

¹⁶ Әʹмьр wе ча бә чахе хьраби ида тʹöнә бә? Иро мәрʹа һьнәк чәтьн ә кö wи wәʹдәйи бьдьнә бәр чʹәʹве хwә. Чьмки әм ида ви һʹале хьрабда һаqас wәхт дьжин, wәки ида һини стресе бунә. Әw мина ве йәке йә, чахе мәрьвед кö незики щийе сәкьнандьна трене дьжин, ида һини дәнге wе бунә, йан жи мәрьвед кö незики щийе гәмаре дьжин, ида бина wе нә жи тʹәхмин дькьн. Ле wәрә дәрһәqа ве йәке нәфькьрьн, у бьдьнә бәр чʹәʹве хwә wәʹдәки чьqас хwәш һивийа мә йә.

¹⁷ Бәле, әме ида тʹö щар нәкʹәвьнә стресе, ле чаwа Зәбур 37:11-да те готьне, әме «хер-хwәшийева wе хьне бьн у ша бьн». Бешьк, әв гьли дьле мә дьгьрьн, чьмки әw йәк Йаһоwа бона мә дьхwазә. Ләма жи wәрә wан рʹожед чәтьнда чь дәсте мә те бькьн, сәва незики Йаһоwа Хwәде бьн у тʹәви тʹәшкиләта wи бьминьн. Баwәрийа хwә qәwи хwәй кьн, бьфькьрьн сәр wан тьшта кʹижан кö һивийа мә нә, әwан кʹәрәмәта бьдьнә бәр чʹәʹве хwә, у мәрьвед дьнрʹа жи гьли кьн дәрһәqа баwәрийа хwә (1 Тимтʹ. 4:15, 16; 1 Пәт. 3:15). Дöдьли нәбьн wәки wәʹде qьрʹа ве дьнйайе, һуне әʹсә хьлаз бьн у бәхтәwарийеда һʹәта-һʹәтайе бьжин!