Хwәйе Сонда Хwә бә

1. а) Йәфтаһ у Һанна чьда мина һәв бун? (Бьньһерʹә шькле әʹwльн.) б) Әме ве готареда кʹижан пьрса шеwьр кьн?

ЙӘФТАҺЕ һʹакьм у Һанна жьна Әлкана, һьнә тьштада мина һәв бун. Һәрдö жи мәрьвнә баш бун. Йәфтаһ сәроке qәwи у әскәре мерхас бу. Һанна кʹöлфәтәкә гöһдар, мьлук у кәваникә баш бу. Әwана һәрдö жи Хwәдекирʹа хьзмәт дькьрьн. Ле диса һәбу тьштәк, чьда жи әwана мина һәв бун. Wана һәрда жи бәр Хwәде сонд хwарьбун у бь амьни сонда хwә анинә сери. Рʹасти жи wана мәсәләкә баш һишт бона wан, йед кö сафи дькьн бәр Йаһоwа сонд бьхwьн. Ле дәрһәqа ве йәке пьрс пешда тен: Гәло чь те һʹәсабе сонд? Чьqас фәрз ә кö әм бәр Хwәде сонд дьхwьн? У чь дәрсе әм жь Йәфтаһ у Һаннайе һин дьбьн?

2, 3. а) Чь те һʹәсабе сонд? б) Кʹьтеба Пироз чь дьбежә дәрһәqа сонде кö бәр Хwәде дьхwьн?

² Хәбәра сонд кö Кʹьтеба Пирозда те хәбьтандьне, те һʹәсабе созе фәрз кö мәрьв дьдә Хwәде. Мәсәлә, әв мәрьв соз дьдә Хwәде, wәки wе фьлан тьшти бькә, qöрбане йан жи пʹешкʹеше бинә, щурʹе хьзмәткьрьне дәстпекә, йан жи соз дьдә wәки һьнә тьшта wе тʹәрк бьдә. Мәрьв бь рʹәзәдьли у бь хwәстьна хwә сонде дьхwә. Ле йәкә әw сонд бәр чʹәʹве Хwәде пироз ә у ча пәйман ә. Әw мина ад-qьраре йә, демәк мәрьв Хwәдерʹа соз дьдә, wәки әw wе фьлан тьшти бькә йан жи фьлан тьшти нәкә (Дәстп. 14:22, 23; Ибрн. 6:16, 17). Кʹьтеба Пироз дьдә кʹьфше, wәки сонда бәр Хwәде тьштәки гәләк фәрз ә.

³ Qануна Мусада дьһатә готьне: «Гава мерәк ль бәр Хöдан ад-qьрар бькә йан сонд бьхwә . . . әw гәрә иди хәбәра хwә нәтʹәрʹьбинә, ле һәр тьшт чь кö жь дәве wи дәркʹәтийә, гәрәке бинә сери» (Жьмар 30:2). Паше, Сьлеман жи бь рʹебәрийа Хwәде әw гьли ньвиси: «Гава тö сонде бәр Хwәде дьхwи, паш нәхә wәки әве сонде бини сери, чьмки әw беаqьла һʹьз накә. Тә чь сонд хwарийә, бинә сери» (Wаиз 5:4, ДТʹ). Иса жи избат кьр кö гәләк фәрз ә сонда хwә биньн сери. Әwи гот: «Пешийарʹа һатийә готьне: ‹Дәрәw сонд нәхwә у сонде хwә ль бәр Хöдан бинә сери›» (Мәт. 5:33).

4. а) Сонда бәр Хwәде чьqас фәрз ә? б) Әме чь шеwьр кьн дәрһәqа Йәфтаһ у Һаннайе?

⁴ Әшкәрә йә, кö чахе әм Хwәдерʹа тьштәки соз дьдьн, әw йәк тьштәки бьчʹук нинә. Әw йәк кö әм ча сонда хwә тиньн сери, һʹöкöм дькә сәр достийа мә тʹәви Йаһоwа. Даwьд ньвиси: «Кʹи дькарә һьлкʹьшә чʹийайе Йаһоwа, кʹи дькарә һьлкʹьшә щийе wийи пироз? Йе . . . кö бь наве Мьн [Йаһоwа] дәрәw сонд нәхwарийә у сонда дәрәw нәдайә» (Зәб. 24:3, 4, ДТʹ). Wәрә әм шеwьр кьн кö Йәфтаһ у Һаннайе чь сонд хwарьн. Гәло wанрʹа һеса бу сонда хwә биньн сери?

ӘWАНА ХWӘЙЕ СОНДЕ ХWӘ БУН

5. Йәфтаһ чь сонд хwар, у ахьрийа сонде wи чь бу?

⁵ Аммонйа щьмәʹта Хwәде дьзерʹандьн у чахе Йәфтаһ чу сәр wан шәрʹ, һьнге әwи сонд хwар бәр Йаһоwа у сонда хwә ани сери (Һʹакьм. 10:7-9). Йәфтаһ гәләк дьхwәст wи шәрʹида сәркʹәта, у ләма әwи бәр Хwәде аһа сонд хwар: «Һәгәр тöйе . . . лаwед Аммон, бьди дәсте мьн, де wе гаве öса бьбә кö, дәма әз бь сьламәтийе жь лаwед Аммонва вәгәрʹьм, йе бона пергинийа мьн бькьн, жь дәрийед мала мьнва дәркʹәвә, wе бьбә йе Хöдан». Паше чь qәwьми? Йәфтаһ Аммонйа алт кьр, у чахе әw вәгәрʹийа мала хwә, qиза wи дәркʹәтә пешийа wи. Демәк, һәма qиза wи, гәрәке бьбуйа йа «Хöдан» (Һʹакьм. 11:30-34). Гәло бона qиза Йәфтаһ әw чь дьһатә һʹәсабе?

6. а) Чьрʹа нәһеса бу бона Йәфтаһ у qиза wи, сонда хwә биньн сери? б) Жь рʹезед Qануна Дöщари 23:21, 23 у Зәбур 15:4, чь дьле wә дьгьрә?

⁶ Qиза Йәфтаһ сәва сонда баве хwә бинә сери, гәрәке һәртʹьм пирозгәһа Йаһоwада хьзмәт кьра. Ле гәло Йәфтаһ беһʹәмде хwә сонд хwар? На, чьмки әwи заньбу wәки дьqәwьмә йа пешийе qиза wи бә кö жь мал дәркʹәвә у бе пешийа wи. Йәкә Йәфтаһрʹа у qиза wирʹа гәләк чәтьн бу, чьмки әw йәк бона һәрда жи qöрбанәкә мәзьн бу. Гава кö Йәфтаһ qиза хwә дит, «кʹьнще хwә чьрʹанд» у гот wәки дьле wи шкәст. Qиза wи жи «qизтийа хwәрʹа» гьрийа. Гәло чьрʹа? Чьмки кöрʹе Йәфтаһ тʹöнә бу, ле qиза wи гәрәке тʹö щар мер нәкьра у нә жи зарʹ жерʹа бьбуна. Ләма жи наве Йәфтаһ wе жь малбәта wи бьһата һьлдане у мьлкʹе wи жи нәгьһишта тʹö кәси. Ле Йәфтаһ бона wан тьшта гәләк бинтәнг нәбу. Бона wи йа лапә фәрз әw бу, кö сонда хwә бәр Хwәде бинә сери. Әwи гот: «Мьн жь Хöданрʹа гот, иди әз нькарьм вәгәрʹьм». Qиза wи готә баве хwә: «Чаwа жь дәве тә дәркʹәтьбә, öса бькә» (Һʹакьм. 11:35-39). Бәле, Йәфтаһ у qиза wи мәрьвнә амьн бун. Чьqас гьран жи сәр wан рʹуньшта, йәкә qә һʹьше wанрʹа жи дәрбаз нәдьбу, wәки созе хwә кö wана Хwәдейе Һәри Жорьнрʹа бьда, нәйньн сери. (Бьхунә Qануна Дöщари 23:21, 23; Зәбур 15:4.)

7. а) Һаннайе чь сонд хwар у чьрʹа, у әw сонд бона wе чь дьһатә һʹәсабе? б) Сонда Һаннайе бона Самуйел чь дьһатә һʹәсабе? (Бьньһерʹә спартьн.)

⁷ Һаннайе жи бь амьни сонда хwә кö бәр Йаһоwа хwар, ани сери. Һанна безöрʹәт бу у әw йәк бона wе дәрдәки гьран бу, чьмки һәла һе сәрда жи әw беһöрмәт дькьрьн кö нькарә зарʹа бинә (1 Сам. 1:4-7, 10, 16). Һанна дöада дәрде хwә Хwәдерʹа гьли кьр, у бәр wи сонд хwар: «Йа Хöдане Артешан! Һәгәр бь рʹасти тö зәбунийа [кöла] щарийа хwә бьньһерʹә у мьн дь бира хwәда бинә у һәгәр тö щарийа хwә жь бир нәкә у лаwәки бьдә щарийа хwә, әзе дь тʹәмамийа рʹожед жийана хwәда wи бьдьм Хöдан у wе гузан сәре wива нәкʹәвә»a (1 Сам. 1:11). Хwәде щаба дöа-дьрозге wе да, у кöрʹ жерʹа бу. Бьдьнә бәр чʹәʹве хwә, дьле wе чьqас ша дьбу! Ле Һаннайе сонда хwә кö бәр Хwәде дабу бир нәкьр. Гава кöрʹ жерʹа бу, әwе гот: «Wи жь Хöданва хwәстьм» (1 Сам. 1:20).

8. а) Чьрʹа Һаннайерʹа нә һеса бу сонда хwә бинә сери? б) Ча гьлийед жь Зәбур 61, тиньн бира wә ньһерʹандьна Һаннайе?

⁸ Гава Самуйел бу wәкә се сали у һатә ширәвәкьрьне, Һаннайе чь кö сонд хwарьбу бәр Хwәде, һәма әw йәк жи кьр. Qә һʹьше wерʹа жи дәрбаз нәбу, wәки сонда хwә нәйнә сери. Әwе Самуйел бьрә кон, щәм Әли сәрәккʹаһин у жерʹа гот: «Бона wи лаwьки дöа кьрьм у хwәстәка кö жь Хöданва хwәстьбум да мьн; мьн жи wи бь дийари да Хöдан; дь тʹәмамийа рʹожед кö wе бьжи wе жь Хwәдерʹа һатийә бь дийари кьрьн» (1 Сам. 1:24-28). Жь wи wәʹдәйи, «Самуйеле зарʹок ль бәр Хöдан мәзьн бу» (1 Сам. 2:21). Ле бона Һаннайе әw чь дьһатә һʹәсабе? Һаннайе кöрʹе хwә qайим һʹьз дькьр у жерʹа һеса нибу жь wи бьqәтә. Әwе ида нькарьбу һәр рʹож кöрʹе хwә бьдита у бьчʹуктайа wида перʹа шабуйа. Бьдьн бәр чʹәʹве хwә, кö әwе ча дьхwәст кöрʹе хwә qайим һʹәмез кьра у бьда бәр дьле хwә, тʹәви wи бьлиста, wи һин кьра у ширәт кьра. Һәр дайикәкә qәнщ зарʹа хwәрʹа ша дьбә, чахе дьвинә кö зарʹа wе ча мәзьн дьбә. Ле бьдьнә һʹәсабе хwә wәки Һанна qә жь сонда хwә пʹошман нәдьбу, чьмки дьле wе Йаһоwарʹа ша дьбу (1 Сам. 2:1, 2; бьхунә Зәбур 61:1, 5, 8.)

9. Кʹижан пьрса әме шеwьр кьн?

⁹ Бәле, фәʹмдари йә кö гәләк фәрз ә сонда хwә бәр Хwәде биньн сери. Ле ньһа wәрә әм шеwьр кьн wан пьрса: Әм чаwа Мәсиһи чь сонд, демәк чь соз дькарьн бьдьнә Хwәде? У чьрʹа әм гәрәке әʹсә сондед хwә биньн сери?

СОНДА ТʹӘСМИЛБУЙИНЕ

10. Кʹижан сонда лапә фәрз Мәсиһи дькарә бьдә, у әw сонд чь те һʹәсабе?

¹⁰ Сонда лапә фәрз кö Мәсиһи дькарә бьдә, әw һәйә сонда тʹәсмилбуйине. Ле чьрʹа әв сонд лапә фәрз ә? Чьмки Мәсиһи дöайе хwәда соз дьдә Йаһоwа wәки чь жи бьqәwьмә, йәкә әw wе һʹәта-һʹәтайе Хwәдерʹа хьзмәт бькә. Чаwа кö Иса гот, әw мәрьв «хwә инкʹар» дькә, демәк әw ида бона хwә нажи, у сонд дьхwә бәр Хwәде wәки әʹмьре хwәда qьрара wи сәр һʹәму тьштирʹа бьгьрә (Мәт. 16:24). Жь wи wәʹдәйи, әw Мәсиһи дьбә «пʹара» Йаһоwа (Рʹом. 14:8). Һәр кәсе кö сонд дьхwә wәки хwә тʹәсмили Хwәде дькә, гәрәке сьвьк нәньһерʹә сәр ве йәке. Ве йәкеда зәбурбеж мәсәләкә гәләк баш ә. Әwи гот: «Әз чь бьдьмә Хöдан, бона тʹәмамийа qәнщийа Wийә сәр мьн? Ад-qьраред мьн бәр Хöдан кьри, әзе ль бәр щьмәʹта Wи биньм сери» (Зәб. 116:12, 14).

11. Тә рʹожа ньхöмандьна хwә чь зәлал да кʹьфше?

¹¹ Һәрге тә ида әʹмьре хwә тʹәсмили Йаһоwа кьрийә у һати ньхöмандьне, әw йәк гәләк баш ә. Бинә бира хwә рʹожа ньхöмандьна хwә. Бьра бәр гәләк шәʹда пьрс да, һәла тә хwә тʹәсмили Йаһоwа кьрийә у тö фәʹм дьки кö «тʹәсмилбуйин у ньхöмандьна тә, дьдьнә кʹьфше кö тö ида Шәʹде Йаһоwа йи у тейи гьредане тʹәви тʹәшкиләта Йаһоwа, йе кö бь рʹöһʹе пироз те рʹебәрикьрьне». Щабед тә сәр wан пьрса, зәлал избат кьрьн wәки тә хwә бь тʹәмами тʹәсмили Хwәде кьрийә у нишан кьрийә кö тö һазьр и бейи ньхöмандьне у бьби хьзмәткʹаре Йаһоwа. Бәле, ве рʹоже тә гәләк дьле Йаһоwа ша кьр!

12. а) Әм гәрәке кʹижан пьрса бьдьнә хwә? б) Ль гора гьлийед Пәтрус, әм гәрәке нав хwәда кʹижан һʹöнöра пешда биньн?

¹² Ньхöмандьн дәстпека әʹмьре Мәсиһи йә. Паши ньхöмандьне, әм дьжин ль гора тʹәсмилбуйина хwә, демәк бь амьни Хwәдерʹа хьзмәт дькьн. Ле wе баш бә щара әм пьрсед öса бьдьнә хwә: «Гәло паши ньхöмандьне әз рʹöһʹанида пешда чумә йан на? Гәло әз бәрдәwам дькьм бь дьл у щан Йаһоwарʹа хьзмәт кьм? (Колс. 3:23) Гәло әз тʹьме дöа дькьм, Хәбәра Хwәде дьхуньм, дьчьмә щьвате у хьзмәтийе? Йан дьqәwьмә әз ида ча бәре хирәт ниньм?» Пәтрусе шанди шьровәкьр кö сәва әм хирәта хwә хьзмәтийеда öнда нәкьн, лазьм ә тʹьме баwәри, занәбун, сәбьр у амьнийа хwә зедә кьн. (Бьхунә 2 Пәтрус 1:5-8.)

13. Мәсиһийе кö хwә тʹәсмили Хwәде кьрийә у һатийә ньхöмандьне, гәрәке чь фәʹм бькә?

¹³ Әм нькарьн сонда хwәйә тʹәсмилбуйине, демәк созе хwә кö мә дабу Хwәде, пашда һьлдьн. Һәрге кәсәк ида нахwазә Йаһоwарʹа хьзмәт кә у пе qанунед wи бьжи, әw нькарә бежә кö әwи тʹö щар бь рʹастийе хwә тʹәсмили Хwәде нәкьрийә, йан жи wәки ньхöмандьна wи нәһатийә һʹәсабе, демәк бәтал бу.b Чьмки әwи мәрьви һʹәмде хwә у хwәстьна хwә, бәр шәʹда әʹйан кьр, кö әwи бь тʹәмами хwә тʹәсмили Хwәде кьрийә. У һәрге әw мәрьв гöнед мәзьн бькә, әw бәр Йаһоwа у бәр щьвате wе щаба хwә бьдә (Рʹом. 14:12). Wәрә алийе хwәда һʹәму тьшти бькьн, сәва Иса мәрʹа нәбежә кö мә һʹьзкьрьна хwәйә пешийе öнда кьрийә. Бәле әм дьхwазьн wәки Иса әван гьлийа мәрʹа бежә: «Әз һаш жь кьред тә, һʹьзкьрьна тә, баwәрийа тә, хьзмәткʹари у сәбьра тә һәмә. Әз заньм кö кьред тәйә пашwәхтийе жь йед пешийе зедәтьр ьн» (Әʹйан. 2:4, 19). Wәрә әм һәртʹьм бь хирәт ль гора тʹәсмилбуйина хwә бьжин у дьле Йаһоwа ша кьн.

СОНДА ЗӘWАЩЕ

14. Кʹижан сонда дöда йа фәрз мәрьв дькарә бьдә, у чьрʹа әв сонд жи гәләк фәрз ә?

¹⁴ Сонда фәрз йа дöда, әw һәйә сонда зәwаще. Гәло чьрʹа әw сонд жи гәләк фәрз ә? Чьмки бәр чʹәʹве Хwәде зәwащ пироз ә. Бук у зәʹwа һьн бәр Хwәде у һьн бәр шәʹда сонда зәwаще дьхwьн. Әwана соз дьдьнә һәв wәки һәвдö һʹьз бькьн, хәм бькьн у qәдьре һәв бьгьрьн. Әwана сонд дьхwьн кö әwе йәке бькьн «һʹәта кö бьжин сәр әʹрде, ль гора qануна Хwәде кö әwи бона зәwаще дани». Мәрьвед дьн йед кö зәwьщи нә, дьбәкә һәма әв гьли нәготьнә, ле йәкә wана жи бәр Хwәде сонд хwарьнә. Паши ве сонде, әwана бунә мер у жьне һәв у зәwаща wан һʹәта-һʹәтайе wана һәвва гьредьдә (Дәстп. 2:24; 1 Корн. 7:39). Чаwа Иса гот, «әwед кö Хwәде әw кьрьнә йәк, бьра мәрьв wан жь һәвдö нәqәтинә», нә мер, нә жьн, нә жи кәсәки дьн. Бона ве йәке, әwед кö дьзәwьщьн гәрәке qә нә жи бьфькьрьн wәки һәвqәтандьн чʹарәке дькә (Марq. 10:9).

15. Чьрʹа Мәсиһи гәрәке мина ве дьнйайе сьвьк сәр зәwаще нәньһерʹьн?

¹⁵ Зәwаща бекемаси тʹöнә йә, чьмки әw жь һәрдö мәрьвед гöнәкʹар саз дьбә. Ләма Кʹьтеба Пирозда те готьне wәки мер у жьн зәwащеда wе «рʹасти охьрмед гьран бен» (1 Корн. 7:28). Йазьх, ле ве дьнйайеда сәр зәwаще гәләк сьвьк дьньһерʹьн. Чахе һәләqәти ортʹа мер у жьнда сар дьбә, әwана тьштәки накьн сәва зәwаще хwәй кьн, у ләма жь һәв дьqәтьн. Ле Мәсиһи гәрәке сәр зәwаще öса нәньһерʹьн. Әwана фәʹм дькьн кö һәрге әwана сонда зәwаще нәйньн сери, әw бәр чʹәʹве Хwәде wәкә дәрәwийе йә, ле Хwәде мәрьвед дәрәw нәфрʹәт дькә! (Qан. Кʹаһ. 19:12; Мәтʹлк. 6:16-19) Паwлосе шанди ньвиси: «Жьнева гьредайи йи? Нәкә кö же бьqәти» (1 Корн. 7:27). Паwлос әw йәк гот, чьмки заньбу wәки Йаһоwа öса жи нәфрʹәт дькә чахе мәрьв һʹәмде хwә qәлпийе дькә, сәва жьн йан мере хwә бьqәтә (Малх. 2:13-16).

16. Кʹьтеба Пироз чь дьбежә дәрһәqа һәвqәтандьне у башqәжитьне?

¹⁶ Иса гот wәки сәр һʹиме Ньвисара тʹәне мәʹник һәйә, кʹижан кö изьне дьдә мәрьв сонда зәwаще бьтʹәрʹьбинә. Мәʹни әw ә, чахе мәрьв qавийа жьн йан мере хwә набахшинә (Мәт. 19:9; Ибрн. 13:4). Ле дәрһәqа башqәжитьне жи Кʹьтеба Пироз зәлал әʹйан дькә. (Бьхунә 1 Корьнтʹи 7:10, 11). Бь рʹастийе Кʹьтеба Пирозда найе готьне чь мәʹни һәнә wәки мер у жьн башqә бьжин. Йәкә, һьнә Мәсиһи чәнд дәрәща һʹәсаб дькьн ча мәʹни бона башqәжитьне. Мәсәлә, һәрге йәк алийе физикида qайим зийане дьдә жьн йан мере хwә, йан жи наһелә wәки әw Хwәдерʹа хьзмәт кә.c

17. Жьн у мер кö Мәсиһи нә, ча дькарьн зәwаща хwә qәwи кьн?

¹⁷ Щара хушк-бьра незики рʹуспийа дьбьн сәва ширәте жь wан һьлдьн, чьмки зәwаща wанда чәтьнайи һәнә. Wе баш бә һәрге рʹуспи wана һелан кьн кö бьньһерʹьн филм бь наве «Гәло Һʹьзкьрьна Рʹаст Чь йә?», у öса жи шеwьр кьн брошура «Малбәта Wә Дькарә Бәхтәwар бә». Ве филмеда у брошуреда, принсипед Хwәде әʹйан тенә кʹьфше, кʹижана кö али гәләка кьрьнә зәwаща хwә qәwи кьн. Мер у жьнәке гьли кьрьн: «Гава мә дәстпекьр әве брошуре леколин бькьн, һьнгеда әм зәwаща хwәда öса бәхтәwар ьн, кö тʹö щар öса нибунә». Кʹöлфәтәк жи кʹижан ида 22 сал ә меркьри йә, гьли кьр wәки һьнәк мабу әw у мере хwә жь һәв бьqәтийана. Әwе гот: «Әм һәрдö жи ньхöманди нә, ле алийе емосйалида әм жь һәв гәләк щöдә дьбун. Әв видео-филм һәма wәʹдәда дәркʹәт! Ньһа әм ида ча мер у жьн чьqас дьчә һәврʹа незик дьбьн». Һәрге тö зәwьщи йи йан меркьри йи, зәwаща хwәда тʹьме принсипед Йаһоwа бьдә хәбате. Әw йәк wе али тә бькә wәки бь шабуне сонда хwәйә зәwаще бини сери!

СОНДА QÖЛЬХКЬРЬНА МӘХСУСӘ ҺӘРТʹЬМ

18, 19. а) Гәләк де-бав кö Мәсиһи нә, чь һелане дьдьнә зарʹед хwә? б) Әwед кö хьзмәт дькьн ча qöльхкʹаред мәхсусә һәртʹьм, чь сонд дьхwьн?

¹⁸ Wә тʹәхмин кьр кö Йәфтаһ у Һанна диса чьда мина һәв бун? Әw сонда wан мәщал да qиза Йәфтаһ у кöрʹе Һаннайе, wәки конда бь тʹәмами тʹәсмили хьзмәтийа мәхсус у пироз бьн. Әw те һʹәсабе wәки wана әʹмьре хwә шабунеда у бәхтәwар дәрбаз кьрьн. Иро гәләк де-бав кö Мәсиһи нә, һелане дьдьнә зарʹед хwә wәки дәстпекьн хьзмәтийа һәртʹьм у әʹмьре хwәда хьзмәтийа Хwәдерʹа дайньн щийе әʹwльн. Зарʹед кö ве йәкеда гöһ данә де-бавед хwә у дәстпекьрьнә хьзмәтийа һәртʹьм, рʹасти жи һежайи пʹайа нә (Һʹакьм. 11:40; Зәб. 110:3).

¹⁹ Ньһа бь офисйал wәкә 67 000 хьзмәткʹар, әндәмед Ордена Һʹәмдьнйайе йа Qöльхкʹаред Мәхсусә Һәртʹьм йа Шәʹдед Йаһоwа нә. Һьнәк Бәйтʹәледа хьзмәт дькьн, һьнәк авакьрьнеда аликʹарийе дьдьн йан жи ча бәрпьрсийар хьзмәт дькьн, һьнәк жи дәрсдаред мәкʹтәбед тʹәшкиләте нә. Öса жи һәнә пешәнгед мәхсус, мисйонер, у хьзмәткʹаред кö мьqати Одед Щьвата йан жи wан авайа дьбьн кʹидәре кö мәкʹтәбед мә дәрбаз дьбьн. Әwана һʹәмушк жи «Сонда Гöһдарибуне у Кʹәсиббуне» хwарьнә. Әw сонд те һʹәсабе wәки әwана бона пешдачуйина шьхöле Пʹадшатийе һазьр ьн бькьн һәр шьхöли кö wанрʹа бьдьн. Һьн жи бь wе сонде wана да кʹьфше wәки qайил ьн бь әʹмьре нәдәwләти бьжин, у бей изьн хwәрʹа башqә нәхәбьтьн. Әw хьзмәткʹар мәхсус ниньн, ле шьхöлед кö әwана дькьн мәхсус ьн. Әwана фәʹм дькьн wәки һʹәта кö әwана ча qöльхкʹаред мәхсусә һәртʹьм хьзмәт бькьн, гәләк фәрз ә хwәйе сонда хwә бьн.

20. Әм гәрәке һәр рʹож чь бькьн у чьрʹа?

²⁰ Жь wан се сонда кö мә шеwьр кьр, wә кʹижан соз дайә Хwәде? Бәле, әм заньн wәки сәр сондед хwә гәрәке сьвьк нәньһерʹьн (Мәтʹлк. 20:25). Һәрге әм бәр Йаһоwа хwәйе гьлийед хwә у сонде хwә нибьн, әw йәк дькарә ахьрийа хьраб мәрʹа бинә (Wаиз 5:6). Ләма жи wәрә әм һʹәта-һʹәтайе бь әшqи наве Йаһоwа бьстьрен у һәр рʹож сондед хwә биньн сери (Зәб. 61:8).