Пьрсед Хԝәндәвана

Гәло Ԝаиз 5:8 тʹәне бәʹса һʹӧкӧмдаред ве дьнйайе дькә, йан бәʹса Йаһоԝа жи дькә?

Дь ве рʹезеда, те готьне: «Һәгәр тӧ бьвини кӧ ль ви ԝәлати хьзана [кʹәсиба] дьхьн тәнгасийе у рʹастийа дадийе дькʹәвә зоре, бь ви кʹари шаш нәбә; жь бәр кӧ ль сәр йе бьльнд, йе һе жи бьльндтьр ә дьньһерʹә у ль сәр ԝан жи йе һе жи бьльндтьр ьн һәнә» (Ԝаиз 5:8).

Гава әм ве рʹезе дьхуньн, әм дьбәкә дьфькьрьн кӧ әв рʹез тʹәне бәʹса һʹӧкӧмдаред ве дьнйайе дькә. Ле бь әʹсле хԝә, ль ве рʹезе дәрһәԛа Йаһоԝа жи фькрәкә фәрз һәйә, йа кӧ дьле мә рʹьһʹәт дькә у мерхасийе дьдә мә.

Ԝаиз 5:8 бәʹса һʹӧкӧмдарәки хьраб дькә, йе кӧ бәләнгаза бьн дәст дькә у нәһәԛийе ль ԝан дькә. Гәрәке кәсед ӧса бир нәкьн кӧ дьбәкә, йәки кӧ жь ԝан бьльндтьр ә, ԝана дьвинә. Хенщи ве, бәлки кәсед һе бьльнд жи һәнә. Сәд һʹәйф ә кӧ дь һʹӧкӧмдарийед ве дьнйайеда гәләк кәсед хьраб һәнә, у хәлԛ сәва нәһәԛийа ԝан пʹьрʹ дьналә.

Һʹал чьԛас бечʹарә бе кʹьфше жи, әв йәк кӧ Йаһоԝа ԝана дьвинә дьле мә рʹьһʹәт дькә. Әм дькарьн һәԝара хԝә Хԝәде биньн у баре хԝә бьдьнә ԝи (Зәб. 55:22; Фили. 4:6, 7). Әм заньн кӧ «чʹәʹвед Хӧдан, бона кӧ дь охра йед кӧ дьлед ԝан бь ԝирʹа йәк ьн ԝе хԝӧртбуна [ԛәԝата] хԝә нишан бькә, ль һʹәмуйа рʹуйе әʹрдева фьр дьбә» (2 Дир. 16:9).

Ләма, Ԝаиз 5:8 дина мә дькʹьшинә сәр һʹӧкӧмдаред ве дьнйайе у тинә бира мә, кӧ һәр тʹьм жь ԝана бьльндтьр кәсәк һәйә. Сәрда жи, әв рʹез али мә дькә ԝәки әм бир нәкьн кӧ йе һәри бьльнд, Йаһоԝа йә. Әԝ ньһа бь сайа Кӧрʹе хԝә Иса Мәсиһ сәрԝертийе дькә. Хԝәде, йе кӧ һәр тьшти дьвинә, һәр тʹьм һәԛ у рʹаст ә, у Иса Мәсиһ жи ӧса йә.